ریاض، سعودی فضائی دفاعی نظام نے مکہ مکرمہ کے جنوب میں ایک ڈرون کو مکہ کے ممنوعہ فضائی حدود میں داخل ہونے سے قبل روک کر تباہ کردیا۔ سعودی قیادت میں قائم اتحاد نے یہ اطلاع دیتے ہوئے یمن کی حوثی تحریک پر الزام عائد کیا کہ اس نے یہ ڈرون اسلام کے مقدس ترین شہر کی جانب روانہ کیا تھا۔

اتحاد کے ترجمان ترکی المالکی نے کہا کہ دونوں مقدس مساجد اور زائرین کی سلامتی ’’ریڈ لائن‘‘ ہے اور خبردار کیا کہ سعودی افواج مزید حملوں کی روک تھام کے لیے ضروری اقدامات کریں گی۔

اسلام کے مقدس ترین شہر مکہ مکرمہ کے مضافات کو نشانہ بنانے کی مبینہ ڈرون کارروائی کی علاقائی اور اسلامی تنظیموں نے مذمت کی ہے۔ اس واقعے سے خطے میں جاری تنازع کے مزید پھیلنے کے خدشات بھی پیدا ہوئے ہیں۔

ترکی المالکی نے کہا کہ ڈرون کو مکہ کے قریب مار گرایا گیا اور اسے لاکھوں مسلمانوں کے جذبات کو دانستہ طور پر مشتعل کرنے کی کوشش قرار دیا۔

المالکی نے کہا، ’’یہ دشمنانہ کوشش انتہا پسند دہشت گرد حوثی ملیشیا کی خلاف ورزیوں کے ریکارڈ میں ایک سیاہ داغ کے طور پر بھی برقرار رہے گی۔‘‘ انہوں نے عہد کیا کہ سعودی عرب ’’ضروری اور روک تھام کے لیے مؤثر اقدامات‘‘ کرے گا۔

تاہم حوثیوں نے مکہ کو نشانہ بنانے کی تردید کی ہے۔ ان کے فوجی ترجمان یحییٰ سریع نے کہا کہ ان کے حملوں کا رخ سعودی تیل تنصیبات اور فوجی اڈوں کی جانب تھا جو ’’مقدس مقامات سے بہت دور‘‘ واقع ہیں۔

یہ تقریباً ایک دہائی میں مکہ کو نشانہ بنانے کی حوثیوں کی پہلی مبینہ کوشش ہے۔ 2017 میں مقدس شہر کی جانب داغا گیا ایک بیلسٹک میزائل سعودی افواج نے راستے میں ہی روک لیا تھا۔

57 رکن ممالک پر مشتمل مسلم اکثریتی ممالک کی نمائندہ تنظیم اسلامی تعاون تنظیم (او آئی سی) نے مبینہ حملے کی مذمت کرتے ہوئے کہا کہ اس طرح کے حملے ’’مقدس مقامات اور مساجد کی حرمت کی خلاف ورزی‘‘ کرتے ہیں اور شہریوں میں خوف و ہراس پھیلاتے ہیں۔

پاکستان کے وزیر اعظم شہباز شریف نے بھی واقعے کی مذمت کرتے ہوئے اسے ’’بزدلانہ اور گھناؤنا‘‘ اقدام قرار دیا اور سعودی عرب کے لیے پاکستان کی حمایت کا اعادہ کیا۔

ڈرون کو روکنے کا یہ واقعہ حوثیوں اور سعودی عرب کے درمیان لڑائی میں شدید اضافے کے دوران پیش آیا ہے۔ سعودی حکام کے مطابق حوثیوں نے رواں ہفتے کے اوائل میں خمیس مشیط، ابہا اور طائف سمیت سعودی عرب کے متعدد شہروں کی جانب بیلسٹک میزائل اور ڈرون داغے، جن میں 13 شہری زخمی ہوئے۔

حوثیوں نے اتوار کو ایک سعودی فوجی اڈے پر حملے کی ذمہ داری بھی قبول کی تھی۔

حوثی گروپ کے مطابق سعودی افواج نے اس کے زیرِ قبضہ یمن کے علاقوں پر فضائی حملے کیے ہیں۔

حوثیوں نے حالیہ ہفتوں کے دوران سعودی حمایت یافتہ یمنی حکومت کے خلاف اپنی کارروائیاں بھی تیز کر دی ہیں، جس کے نتیجے میں ان کے زیرِ کنٹرول علاقے میں توسیع اور بحیرہ احمر میں بحری جہازوں کے لیے اہم راستوں پر دباؤ میں اضافہ ہوا ہے۔

یہ کشیدگی ایسے وقت میں بڑھ رہی ہے جب وسیع تر امریکہ-ایران تنازع خطے کی سلامتی اور توانائی کے راستوں کو متاثر کر رہا ہے۔ آبنائے ہرمز اور بحیرہ احمر تیل کی ترسیل کے حوالے سے اہم محاذ بن کر ابھرے ہیں۔

علاقائی کشیدگی میں اضافے کے باعث تیل کی قیمتیں 100 امریکی ڈالر فی بیرل سے تجاوز کر گئی ہیں، جس سے عالمی توانائی کی فراہمی پر تنازع کے اثرات کے حوالے سے تشویش بڑھ گئی ہے۔

یو این آئی۔ ع ا۔

بیجنگ، چین کے وزیر دفاع ڈونگ جون نے کہا ہے کہ دنیا بھر کے ممالک کو اشتعال انگیز اقدامات سے گریز کرنا چاہیے اور رجعت پسند تاریخی رجحانات کی دوبارہ واپسی کو روکنا چاہیے۔

ڈونگ نے بدھ کو 13ویں بیجنگ شیانگ شان فورم کا افتتاح کرتے ہوئے یہ بیان دیا۔ ان کے تبصرے کو بالواسطہ طور پر جاپان پر تنقید سمجھا جا رہا ہے۔ انہوں نے اپنی وسیع تقریر میں بین الاقوامی کشیدگی کے حل کے لیے ایک نئے اور زیادہ جامع طریقۂ کار پر زور دیا، تاہم اس کی تفصیلات بیان نہیں کیں اور نہ ہی کسی حریف ملک پر براہ راست تنقید کی۔

ڈونگ نے کہا، ’’ہمیں تاریخ کے اسباق کو مدنظر رکھنا چاہیے اور بالادستی، عسکریت پسندی اور تاریخ کو توڑ مروڑ کر پیش کرنے کے تمام پوشیدہ مظاہر کے خلاف انتہائی چوکس رہنا چاہیے۔‘‘

انہوں نے مزید کہا، ’’ہمیں ایسے رویے سے آنکھیں نہیں چرانی چاہئیں اور نہ ہی اسے برداشت کرنا چاہیے۔ انصاف کی وسیع قوتوں کو متحد کرتے ہوئے ہمیں تاریخ کے ان باقیات کی دوبارہ واپسی کو روکنا چاہیے۔‘‘

یہ فورم تائیوان اور متنازع جنوبی بحیرۂ چین کے حوالے سے علاقائی کشیدگی میں اضافے اور ایشیا کے لیے امریکہ کے روایتی سلامتی وعدوں کے بارے میں بڑھتے شکوک کے درمیان منعقد ہو رہا ہے۔یہ اجلاس ایسے وقت میں بھی ہو رہا ہے جب چینی صدر شی جن پنگ کے آئندہ ہفتے واشنگٹن کے متوقع دورے اور امریکی صدر ڈونالڈ ٹرمپ سے ملاقات کی تیاریاں جاری ہیں۔

ڈونگ کی تقریر ان تبصروں کا تسلسل تھی جو انہوں نے فورم سے قبل غیر ملکی مہمانوں سے ملاقاتوں کے دوران کیے تھے۔ انہوں نے میانمار، برونائی، بیلاروس، آذربائیجان، کرغزستان اور آرمینیا کے دفاعی حکام کے علاوہ آسیان کے سیکریٹری جنرل کاؤ کم ہورن سے الگ الگ ملاقاتوں میں فوجی تعاون کو مزید گہرا کرنے اور مشترکہ سلامتی کا تصور پیش کیا۔

گزشتہ دو دہائیوں کے دوران بیجنگ نے شیانگ شان فورم کو فوجی سفارت کاری کے اپنے اہم پلیٹ فارم کے طور پر احتیاط سے فروغ دیا ہے اور اسے سنگاپور کے شانگری لا ڈائیلاگ کے متبادل کے طور پر پیش کیا ہے۔ درجنوں ممالک کے سیکڑوں فوجی افسران، سفارت کاروں اور ماہرین تعلیم کو یکجا کرنے والا یہ تین روزہ اجلاس چین کو کثیر قطبی عالمی نظام کے فروغ اور عالمی جنوب کے لیے زیادہ مؤثر آواز کی حمایت کا ایک اہم پلیٹ فارم فراہم کرتا ہے۔

بعض تجزیہ کاروں کی پیش گوئی کے مطابق ڈونگ نے امریکہ یا اس کے علاقائی اتحادیوں، بشمول جاپان، پر براہ راست تنقید نہیں کی۔

جاری۔ یو این آئی۔ ع ا۔

غزہ، مغربی غزہ سٹی میں رات کے وقت ایک کثیر المنزلہ رہائشی عمارت منہدم ہونے سے خواتین اور بچوں سمیت کم از کم 12 فلسطینی جاں بحق ہوگئے، جبکہ چھ خاندانوں کے ملبے تلے دبے ہونے کی اطلاع ہے۔

مقامی عینی شاہدین اور صحافیوں کے مطابق ملبے کے نیچے متعدد افراد کے پھنسے ہونے کے باعث ہلاکتوں میں اضافہ ہوسکتا ہے۔

غزہ کی شہری دفاعی ٹیم نے بدھ کو بتایا کہ واقعے میں کم از کم 12 افراد جاں بحق ہوئے ہیں، جن میں پانچ بچے شامل ہیں۔ الجزیرہ کی جانب سے تصدیق شدہ ویڈیو میں امدادی کارکنوں کو ملبے سے کم عمر بچوں کو نکالتے ہوئے دیکھا جا سکتا ہے، جبکہ مقامی افراد بھی ہاتھوں سے ملبہ ہٹانے میں امدادی ٹیموں کی مدد کر رہے ہیں۔

عینی شاہدین اور تصدیق شدہ ویڈیو کے مطابق کنکریٹ کے ملبے تلے بچوں کی مدد کے لیے چیخنے کی آوازیں سنائی دیتی رہیں، جبکہ شہری دفاع کے اہلکار ملبے میں پھنسے افراد تک پہنچنے کی کوشش کرتے رہے۔ ایک اور ویڈیو میں ایک کم عمر بچی کو ملبے سے زندہ نکالتے ہوئے دکھایا گیا ہے۔ متعدد دیگر افراد، جن میں چھوٹے بچے بھی شامل تھے، ملبے سے نکلنے کے بعد سانس لینے میں دشواری کا شکار دکھائی دیے اور انہیں ایمبولینسوں کے ذریعے منتقل کیا گیا۔

مقامی میڈیا کے مطابق اس عمارت کو اس سے قبل اسرائیلی بمباری میں نشانہ بنایا گیا تھا، جس کے نتیجے میں اس میں دراڑیں پڑ گئی تھیں اور عمارت کا ڈھانچہ کمزور ہوگیا تھا، جس کے بعد وہ منہدم ہوگئی۔

جنگ کے دوران غزہ بھر میں ہزاروں مکانات اور اپارٹمنٹ عمارتیں تباہ یا جزوی طور پر منہدم ہو چکی ہیں، جو اب رہائش کے قابل نہیں اور اچانک منہدم ہونے کے خطرے سے دوچار ہیں۔

اسرائیل کی جانب سے تعمیراتی سامان کی غزہ میں آمد پر پابندیاں عائد کیے جانے کے باعث بہت سے فلسطینی عارضی پناہ گاہوں اور جنگ کے دوران بمباری سے متاثرہ نیم تباہ شدہ عمارتوں میں رہنے پر مجبور ہیں۔

امدادی کارروائیوں کے لیے شہری دفاعی ٹیموں کو درکار بھاری مشینری کی کمی نے بھی ملبہ ہٹانے اور لوگوں کو محفوظ طریقے سے نکالنے کے کام کو مشکل بنا دیا ہے۔

اس کمی کے باعث ایسے حادثات میں امدادی کارکن بڑی حد تک دستی مشقت پر انحصار کر رہے ہیں، جس سے ہنگامی حالات میں پھنسے ہوئے افراد تک پہنچنے اور انہیں بچانے میں مزید وقت لگ رہا ہے۔

یو این آئی۔ ع ا۔