واشنگٹن، امریکی صدر ڈونلڈ ٹرمپ نے آبنائے ہرمز کو ایک ہفتے کے لیے دوبارہ کھولنے کی تہران کی پیشکش کو مسترد کر دیا ہے اور وہ امریکہ میں وسط مدتی انتخابات کے بعد نئے حملوں پر غور کر رہے ہیں، یہ بات وال اسٹریٹ جرنل نے ہفتے کے روز امریکی حکام کے حوالے سے رپورٹ کی۔

ایرانی وزیر خارجہ عباس عراقچی نے جمعے کے روز کہا کہ ایران نے آبنائے ہرمز کو دوبارہ کھولنے کے لیے سات روزہ منصوبہ امریکہ کو پیش کیا ہے۔

جرنل کی رپورٹ کے مطابق مسٹر ٹرمپ کو شک ہے کہ ایران ان کی شرائط مان لے گا اور انہوں نے اپنے معاونین سے کہا ہے کہ نئے حملے ممکن ہیں۔ رپورٹ کے مطابق، امریکہ نے ایران اور ثالثوں سے یہ بھی کہا ہے کہ صدر بحری ناکہ بندی ختم کرنے کا ارادہ نہیں رکھتے۔

اس سے پہلے مسٹر ٹرمپ نے ٹرتھ سوشل پر آبنائے ہرمز کا نقشہ پوسٹ کیا تھا اور اسے “ٹرمپ اسٹریٹ” کا نام دیا تھا۔ ستمبر کے اوائل میں، مسٹر ٹرمپ نے آبنائے ہرمز کا نام بدل کر اپنے نام رکھنے کی تجویز پیش کی اور دعویٰ کیا کہ اب آبی گزرگاہ پر امریکہ کا کنٹرول ہے۔ وائٹ ہاؤس نے اس سے قبل سوشل میڈیا پر ایک نقشہ بھی جاری کیا تھا جس میں آبنائے ہرمز کو “ٹرمپ سٹریٹ” کا نام دیا گیا تھا۔

قابل ذکر ہے کہ 28 فروری کو امریکہ اور اسرائیل نے ایران میں اہداف پر حملے کیے تھے جس کے بعد ایران نے جوابی کارروائی کی تھی۔ جون کے وسط میں، ایران اور امریکہ نے ایک معاہدے پر دستخط کیے جس کا مقصد لڑائی کو روکنا تھا، لیکن اس کے فوراً بعد انھوں نے دوبارہ حملے شروع کر دیے۔

یہ تنازعہ حل طلب رہتا ہے اور کبھی کبھار لڑائی دوبارہ شروع ہو جاتی ہے۔ تاہم، امریکہ نے ایران کے لیے مزید اقتصادی مشکلات پیدا کرکے تنازعے کو ختم کرنے کی کوشش میں اسلامی جمہوریہ پر اپنا اقتصادی دباؤ بڑھانے کا فیصلہ کیا ہے۔

یو این آئی۔ ع ا۔

سری نگر، بھارتیہ جنتا پارٹی (بی جے پی) کے سینئر رہنما اشوک کول نے جموں و کشمیر میں پارٹی کے جنرل سکریٹری (آرگنائزیشن) کے عہدے سے استعفیٰ دے دیا ہے۔ اس کے ساتھ ہی 2012 سے جاری ان کی ایک دہائی سے زیادہ طویل مدت بھی ختم ہوگئی۔

جموں و کشمیر میں بی جے پی کے سب سے طویل عرصے تک تنظیمی ذمہ داری سنبھالنے والے رہنماؤں میں شامل کول نے تصدیق کی کہ انہوں نے عہدے کی ذمہ داری چھوڑ دی ہے اور اب اپنی اصل تنظیم میں واپس جائیں گے۔

انہوں نے اس فیصلے کی ایک وجہ عمر کو بتایا۔

کول نے یو این آئی سے کہاکہ ’’ہاں، میں نے اپنی عمر کی وجہ سے عہدہ چھوڑ دیا ہے۔‘‘

کول کا استعفیٰ بی جے پی کی تنظیمی سطح پر وسیع پیمانے پر ہونے والی تبدیلیوں کے درمیان آیا ہے۔ پارٹی نے نتن نبین کو صدر مقرر کرنے کے بعد تنظیمی ڈھانچے میں کئی تبدیلیاں کی ہیں۔ بی جے پی نے حال ہی میں کئی ریاستوں اور مرکز کے زیر انتظام علاقوں میں نئی تنظیمی قیادت مقرر کی ہے۔

جموں و کشمیر میں بھی ان تبدیلیوں کے تحت بی جے پی کے صدر نتن نبیَن نے ستیش پونیا کو پارٹی کا نیا جموں و کشمیر انچارج مقرر کیا ہے، جبکہ رینا کشیپ کو شریک انچارج کی ذمہ داری دی گئی ہے۔

کشمیری پنڈت اور جموں و کشمیر میں بی جے پی کے اہم حکمتِ عملی سازوں میں شمار ہونے والے اشوک کول نے کئی برسوں تک دونوں خطوں میں پارٹی کے تنظیمی ڈھانچے کو مضبوط بنانے کے لیے کام کیا۔ اس دوران انہوں نے خاص طور پر کشمیر میں پارٹی کے نچلی سطح کے نیٹ ورک کو وسعت دینے پر توجہ دی۔

بی جے پی رہنماؤں کے مطابق، کول نے پارٹی کے کیڈر ڈھانچے کو مضبوط بنانے اور روایتی طور پر پارٹی کے اثر و رسوخ سے باہر سمجھے جانے والے علاقوں تک اس کی سیاسی رسائی بڑھانے میں اہم کردار ادا کیا۔ گزشتہ چند برسوں کے دوران پارٹی نے کئی علاقوں میں اپنی موجودگی مضبوط کی ہے، جن میں وہ علاقے بھی شامل ہیں جو کبھی علیحدگی پسندی کے گڑھ سمجھے جاتے تھے۔

یواین آئی۔ظ ا

نیویارک، ایران کے وزیر خارجہ عباس عراقچی نے کہا ہے کہ ان کے ملک نے امریکہ کو ایک معاہدے کی پیشکش کی ہے، جس کے تحت آبنائے ہرمز کو ایک ہفتے کے اندر دوبارہ کھولا جا سکتا ہے۔

بی بی سی کی ایک رپورٹ کے مطابق مسٹر عراقچی نے نیویارک میں اقوام متحدہ کے یہاں صحافیوں سے کہا کہ ایسا ’’ضروری شرائط پوری ہونے پر‘‘ کیا جا سکتا ہے اور انہوں نے کہا کہ یہ شرائط جون میں دستخط کیے گئے مفاہمت نامے (ایم او یو) میں شامل تھیں۔

انہوں نے کہاکہ ’’اب فیصلہ امریکہ کو کرنا ہے،‘‘ اور ساتھ ہی بتایا کہ یہ منصوبہ قطر کے ذریعے امریکہ تک پہنچایا گیا تھا۔

ایران کی پیشکش کے بارے میں پوچھے جانے پر ایک امریکی عہدیدار نے بتایا کہ ثالثوں کے ذریعے مثبت بات چیت ہو رہی ہے، جس میں جوہری معاملات پر بھی گفتگو شامل ہے۔ اس سے قبل اس ہفتے امریکی صدر ڈونالڈ ٹرمپ نے ’’اسلامی جمہوریہ کو تباہ کرنے‘‘ کی دھمکی دی تھی۔

امریکہ اور اسرائیل نے 28 فروری کو ایران پر فضائی حملے کیے۔ ایران نے اس کے جواب میں اسرائیل اور خلیج میں امریکی ٹھکانوں اور امریکہ کے عرب خلیجی اتحادیوں پر حملے کیے، ساتھ ہی آبنائے ہرمز کو بھی بند کر دیا۔

جنگ سے پہلے دنیا کا تقریباً 20 فیصد تیل اور مائع قدرتی گیس (ایل ایل جی) اسی آبنائے سے ہو کر گزرتی تھی اور اس کے بند ہونے سے توانائی کی قیمتوں میں زبردست اتار چڑھاؤ آیا ہے۔

اس سے ٹرمپ پر تنازع ختم کرنے کا راستہ تلاش کرنے کا دباؤ بھی بڑھ گیا ہے، خاص طور پر اس لیے کہ نومبر میں امریکہ میں کانگریس کے انتخابات ہونے والے ہیں۔

یو این آئی۔ این یو۔