نئی دہلی، ہندوستان نے جموں و کشمیر پر نام نہاد اسلامی تعاون تنظیم (او آئی سی) رابطہ گروپ کے مشترکہ بیان میں ہندوستان کے بارے میں کیے گئے غیر ضروری اور حقائق کے برعکس حوالہ جات کو واضح طور پر مسترد کر دیا ہے۔

وزارت خارجہ نے بدھ کے روز اس سلسلے میں جاری کردہ ایک بیان میں کہا کہ او آئی سی کو ان امور پر تبصرہ کرنے کا کوئی حق نہیں ہے جو مکمل طور پر ہندوستان کے اندرونی معاملات ہیں۔ وزارت نے کہا ہے کہ جموں و کشمیر اور لداخ کے تمام مرکز کے زیر انتظام علاقے ہندوستان کا اٹوٹ اور ناقابل تنسیخ حصہ ہیں اور سیاسی مقاصد کے تحت کیے جانے والے پروپیگنڈے کو بار بار دہرانے سے اس حقیقت کو بدلا نہیں جا سکتا۔ بیان میں کہا گیا ہے کہ ایسے جانبدارانہ بیانات کی بار بار حمایت او آئی سی کی ساکھ پر سنگین سوالات کھڑے کرتی ہے۔

وزارت نے کہا ہے کہ او آئی سی کو پاکستان کو اپنا من گھڑت پروپیگنڈا کرنے کے لیے پلیٹ فارم دینے کے بجائے اسے مشورہ دینا چاہیے کہ دہشت گردی کی حمایت اور اس کی حوصلہ افزائی کا ریکارڈ رکھنے والے پاکستان کو پہلے اپنے گریبان میں جھانکنا چاہیے اور اپنے زیر کنٹرول علاقوں سے پیدا ہونے والے دہشت گردی کے مسلسل خطرے کے حل کی سمت میں اقدامات کرنے چاہئیں۔

رپورٹوں کے مطابق او آئی سی کے رابطہ گروپ نے اقوام متحدہ کی جنرل اسمبلی کے موقع پر ہونے والے ایک اجلاس میں بیان جاری کرتے ہوئے کہا ہے کہ کشمیر کے تنازع کا حل اقوام متحدہ کی قراردادوں کے تحت ہونا چاہیے۔

یواین آئی ایف اے

نئی دہلی، کانگریس صدر ملکارجن کھرگے نے گزشتہ سال 24 ستمبر کو لیہ میں تحریک کے دوران مارے گئے چار نوجوانوں کو خراج عقیدت پیش کرتے ہوئے واقعے کی عدالتی تحقیقات کر کے پوری سچائی سامنے لانے، جواب دہی طے کرنے اور بغیر کسی خوف یا جانب داری کے انصاف یقینی بنانے کا مطالبہ کیا ہے۔

سوشل میڈیا ایکس پر بدھ کے روز مسٹر کھرگے نے کہا کہ ایک سال پہلے لداخ کے جمہوری اور آئینی حقوق کے لیے چلی تحریک کے دوران لیہ میں چار نوجوانوں کو گولی ماری گئی تھی۔ انہوں نے کہا کہ یوم شہداء پر وہ انہیں خراج عقیدت پیش کرتے ہیں اور ان کے خاندانوں کے ساتھ مکمل یکجہتی کے ساتھ کھڑے ہیں۔

انہوں نے کہا کہ لداخ کے لوگوں نے اپنی جائز خواہشات کی تکمیل کے لیے طویل عرصے تک انتظار کیا ہے۔ کانگریس زمین، روزگار، نازک ماحولیات، ثقافت اور شناخت کے تحفظ کے لیے چھٹے شیڈول سمیت بامعنی آئینی تحفظ کے ان کے مطالبے کے ساتھ مضبوطی سے کھڑی ہے۔

مسٹر کھرگے نے کہا کہ جمہوریت اور نمائندہ اداروں کو مکمل طور پر بحال کیا جانا چاہیے اور لوگوں کو اپنے مستقبل کے تعین میں موثر آواز ملنی چاہیے۔

یواین آئی ایف اے

نئی دہلی، کانگریس نے کہا ہے کہ بی جے پی حکومت یکساں سول کوڈ (یو سی سی) پر جلد بازی میں ہے اور 2029 کے لوک سبھا انتخابات سے پہلے قومی جمہوری اتحاد (این ڈی اے) کی حکومت والی تمام ریاستوں میں اسے نافذ کرنا چاہتی ہے، جبکہ ایسے قانونی اصلاحات وسیع غور و خوض، عوامی بحث اور زیادہ سے زیادہ ممکنہ رضامندی کے ساتھ نافذ کیے جانے چاہئیں۔

کانگریس کے محکمہ مواصلات کے انچارج جے رام رمیش نے بدھ کو یہاں ایک بیان میں کہا کہ مہاراشٹر میں یو سی سی کا مسودہ تیار کرنے کے لیے تشکیل دی گئی ریاستی حکومت کی کمیٹی سے سپریم کورٹ کے ایک سابق جج نے استعفیٰ دے کر کئی بڑے سوال کھڑے کر دیے ہیں۔ سابق جج نے کمیٹی کے کام کاج پر بھی تشویش ظاہر کی ہے۔ آئین ساز اسمبلی نے کبھی ایسے حالات کا تصور نہیں کیا تھا جس میں ہر ریاست اپنا الگ یکسںاں سول کوڈ بنائے۔

انہوں نے کہا کہ 17 جون 2016 کو مودی حکومت نے یو سی سی کے سوال کو تفصیلی مطالعہ کے لیے 21 ویں لاء کمیشن کے پاس بھیجا تھا اور وسیع تحقیق کے بعد کمیشن نے 31 اگست 2018 کو اپنے خط میں کہا تھا کہ اس مرحلے پر یو سی سی بنانا نہ تو ضروری ہے اور نہ ہی مناسب۔ کمیشن نے ہندوستان کی قانونی اور ثقافتی تنوع کو برقرار رکھتے ہوئے الگ الگ خاندانی قوانین میں موجود امتیازی سلوک کو دور کرنے کی سفارش کی تھی۔

مسٹر رمیش نے کہا کہ اس کے باوجود گزشتہ تین سال میں بی جے پی کی حکومت والی ریاستوں نے یو سی سی کے اپنے اپنے ایڈیشن پاس کیے ہیں۔ اتراکھنڈ میں یہ 27 جنوری 2025 سے نافذ ہے، جبکہ گجرات، آسام اور مدھیہ پردیش کی اسمبلیوں نے بالترتیب 24 مارچ، 27 مئی اور 21 جولائی 2026 کو متعلقہ بل پاس کیے۔ ان ریاستی سطح کے کوڈز میں الگ الگ دفعات، سزائیں، طریقہ کار اور اہم چھوٹ شامل ہیں۔

کانگریس رہنما نے کہا کہ وزیر داخلہ نے 2029 کے لوک سبھا انتخابات سے پہلے این ڈی اے کی حکومت والی تمام ریاستوں میں یو سی سی نافذ کرنے کا اعلان کیا ہے۔

مسٹر رمیش نے کہا کہ اسے مکمل طور پر غور وخوض کے بعد اور عوامی مباحثہ کے ذریعے نیز زیادہ سے زیادہ ممکنہ رضامندی کے ساتھ نافذ کیا جانا چاہیے۔

یواین آئی ایف اے