نئی دہلی، سپریم کورٹ دہلی ایکسائز پالیسی میں مبینہ گھوٹالہ سے متعلق مرکزی تفتیشی بیورو (سی بی آئی) کے کیس میں تہاڑ جیل میں بند وزیر اعلی اروند کیجریوال کی ضمانت کی مانگ اور اسی کیس میں ان کی گرفتاری کو چیلنج کرنے والی درخواستوں کا فیصلہ جمعہ کو یعنی 13 ستمبر کو سنائے گا سپریم کورٹ کی ویب سائٹ کے مطابق جسٹس سوریہ کانت اور جسٹس اجول بھویاں کی بنچ اپنا فیصلہ سنائے گی۔ عرضی گزار کیجریوال کی طرف سے پیش ہونے والے سینئر ایڈوکیٹ ابھیشیک منو سنگھوی اور سی بی آئی کی طرف سے پیش ہونے والے ایڈیشنل سالیسٹر جنرل ایس وی راجو کی گھنٹوں کی بحث کے بعد بنچ نے 5 ستمبر کو سماعت مکمل ہونے کے بعد اپنا فیصلہ محفوظ رکھ لیا تھا۔

عام آدمی پارٹی کے سربراہ مسٹر کیجریوال نے سی بی آئی کے کیس میں دہلی ہائی کورٹ کی جانب سے 5 اگست کو ان کی درخواستوں کو مسترد کرنے کے بعد سپریم کورٹ سے رجوع کیا تھا۔

ملزم وزیر اعلیٰ کیجریوال کو مرکزی تفتیشی ایجنسی انفورسمنٹ ڈائریکٹوریٹ (ای ڈی) نے 21 مارچ کو اور سی بی آئی نے 26 جون 2024 کو دہلی ایکسائز پالیسی 2021-22 میں مبینہ بے ضابطگیوں کے سلسلے میں گرفتار کیا تھا (جسے تنازعہ کے بعد منسوخ کر دیا گیا تھا)۔ سی بی آئی کی گرفتاری کے وقت وہ ای ڈی کے کیس میں عدالتی حراست میں تھے۔

سی بی آئی نے 25 جون کو خصوصی عدالت کی اجازت کے بعد انفورسمنٹ ڈائریکٹوریٹ (ای ڈی) کے معاملے میں مارچ سے عدالتی حراست میں رہنے والے ملزم وزیر اعلی کیجریوال سے پوچھ گچھ کی تھی اور پھر 26 جون کو انہیں گرفتار کر لیا تھا۔

عدالت عظمیٰ نے 12 جولائی کو مسٹر کیجریوال کو انفورسمنٹ ڈائریکٹوریٹ (ای ڈی) کے ذریعہ مبینہ ایکسائز پالیسی گھوٹالہ سے متعلق منی لانڈرنگ کے کیس میں عبوری ضمانت دی تھی۔ اگر جون میں سی بی آئی نے مقدمہ درج نہ کیا ہوتا تو وہ تبھی جیل سے رہا ہو جاتے۔

سپریم کورٹ نے اس سے قبل لوک سبھا انتخابات کے دوران انہیں عبوری ضمانت دی تھی۔

سنٹرل بیورو آف انویسٹی گیشن (سی بی آئی) نے 17 اگست 2022 کو ایکسائز پالیسی کی تشکیل اور اس پر عمل درآمد میں مبینہ بے ضابطگیوں کی بنیاد پر فوجداری کا ایک مقدمہ درج کیا تھا۔ اسی بنیاد پر ای ڈی نے 22 اگست 2022 کو منی لانڈرنگ کا معاملہ درج کیا تھا۔ ابتدائی طور پر وزیر اعلیٰ کیجریوال کا نام ملزمان میں شامل نہیں تھا۔

سی بی آئی کے کیس میں عدالت عظمیٰ میں سماعت کے دوران مرکزی تفتیشی ایجنسی کی طرف سے پیش ہونے والے ایڈیشنل سالیسٹر جنرل ایس وی راجو نے چیف منسٹر کیجریوال کو ضمانت دینے کے دلائل کی سختی سے مخالفت کرتے ہوئے کہا کہ ماتحت عدالت کو نظرانداز کرنے کی اجازت صرف غیر معمولی حالات میں ہی دی جاسکتی ہے۔

اس پر مسٹر کیجریوال کی نمائندگی کرنے والے سینئر ایڈوکیٹ مسٹر سنگھوی نے دلیل دی تھی کہ حراست کے دوران سی آر پی سی کی دفعہ 41A کے تحت ملزم کو نوٹس جاری کرنے سے متعلق موجودہ عرضی میں جو بنیادیں اٹھائی گئی ہیں۔ جس کے بعد خصوصی عدالت نے اسے مسترد کر دیا۔ اس لیے درخواست گزار کو دوبارہ اسی مسئلے پر بحث کرنے کے لیے وہاں بھیجنا جائز نہیں ہوگا۔

مسٹر سنگھوی نے سپریم کورٹ کو یہ بھی بتایا کہ کیجریوال کا نام 2022 میں درج مقدمے میں نہیں تھا اور انہیں اس سال جون 2024 میں گرفتار کیا گیا تھا، انہوں نے کہا، “تین عدالتی احکامات میرے حق میں ہیں۔ یہ گرفتاری پہلے سے طے شدہ تھی ا تاکہ انہیں (وزیر اعلیٰ) کو جیل میں رکھا جا سکے۔

وزیراعلی کیجریوال کی نمائندگی کرنے والے سینئر وکیل نے مزید کہا “ثبوت کے ساتھ چھیڑ چھاڑ کا سوال ہی پیدا نہیں ہوتا کیونکہ لاکھوں دستاویزات ہیں، جن میں سے بہت سے ڈیجیٹل ہیں۔ ان کا مؤکل عدالتی حراست میں رہتے ہوئے گواہوں کو کیسے متاثر کرسکتا ہے اور پانچ چارج شیٹ ہیں؟” اس معاملے میں بھی مقدمہ درج کیا گیا ہے۔”

انہوں نے دہلی ایکسائز پالیسی کے کیس سے متعلق دیگر ملزمان کی ضمانت کے احکامات کا حوالہ دیا – دہلی کے سابق نائب وزیر اعلی منیش سسودیا، راجیہ سبھا کے رکن سنجے سنگھ اور بھارت راشٹرا سمیتی (بی آر ایس) کی قانون ساز کونسلر کے کویتا۔ عدالت عظمیٰ کے حکم پر یہ رہنما جیل سے رہا ہو چکے ہیں۔

مسٹر سنگھوی نے مزید کہا کہ سی آر پی سی کی دفعہ 41A گرفتاریوں کو منظم کرنے کے لیے 2010 میں متعارف کرایا گیا تھا اور اس کا مقصد من مانی گرفتاریوں کو روکنا تھا اور اس بات کو یقینی بنانا تھا کہ قانون نافذ کرنے والے افسران کسی کو بغیر کسی درست بنیاد کے گرفتار نہ کر سکیں۔

دوسری طرف مسٹر راجو نے کجریوال کی درخواستوں کی مخالفت کرتے ہوئے کہا کہ پہلے سیشن کورٹ سے رجوع کرنے کی بجائے انہوں نے براہ راست ہائی کورٹ سے رجوع کیا۔

انہوں نے کہا کہ یہ میرا ابتدائی اعتراض ہے، ماتحت عدالت کو پہلے میرٹ پر غور کرنا چاہیے تھا، ہائی کورٹ کو میرٹ کو دیکھنے کے لیے بنایا گیا تھا اور یہ صرف غیر معمولی کیسز میں ہی ہو سکتا ہے۔ عام کیسز میں سیشنز سے رجوع کرنا پڑتا ہے۔ پہلے وہ (کیجری والا) یہاں آئے اور پھر انہوں نے ہائی کورٹ سے رجوع کیا اور پھر وہ دوبارہ سپریم کورٹ آئے۔

ایڈیشنل سالیسٹر جنرل راجو نے یہ بھی دعویٰ کیا کہ کیجریوال نے اپنی پارٹی کی قیادت والی دہلی حکومت کے ذریعے پنجاب کے ایک ایکسائز لائسنس ہولڈر کو ہراساں کرنے کے لیے اپنا اثر و رسوخ استعمال کیا۔ انہوں نے یہ بھی کہا کہ ملزم کیجریوال کو کسی قسم کی دی جانے والی راحت کا ہائی کورٹ پر حوصلے پست کرنے والا اثر پڑے گا۔

یو این آئی ۔ ع خ