واشنگٹن، عالمی رہنماوں نے ہندوستان اور پاکستان سے کہا کہ وہ فوجی کارروائیاں ختم کرے اور ایسا کوئی قدم نہ اٹھائے جس سےجنوبی ایشا کا خطہ جنگ کے شعلوں کی نذر ہوجائے امریکی صدر ڈونالڈ ٹرمپ، اقوام متحدہ کے سکریٹری جنرل انتونیو گوتیرس ، روس ، چین، برطانیہ ، قطر کے علاوہ دوسرے ملکوں نے دونوں ایٹمی ملکوں کے رہنماوں سے اپیل کی کہ وہ ایسا قدم نہ اٹھائے جو خطہ کے لئےتباہ کن ثابت ہو امریکی صدر نے کہا کہ دنیا بھر میں جاری تمام تنازعات کا خاتمہ چاہتےہیں کسی بھی تنازع میں فریقین کو مذاکرات پر لانا آسان ہے۔

غیر ملکی خبر رساں ایجنسیوں کے مطابق امریکی صدر ڈونلڈ ٹرمپ نے آپریشن سندور پر ردعمل کا اظہار کرتے ہوئے کہاکہ “میں نے اس کے بارے میں سنا، مجھے لگتا ہے کہ ہمیں معلوم تھا کہ کچھ ہونے والا ہے، امید ہے کہ یہ جلد ختم ہو جائے گا۔ وہ (پاکستان اور ہندوستان) طویل عرصے سے لڑ رہے ہیں، وہ کئی دہائیوں سے لڑ رہے ہیں، اب مجھے امید ہے کہ یہ بہت جلد ختم ہو جائے گا۔”

ترجمان امریکی محکمہ خارجہ ٹیمی بروس نے کہا ہے کہ صدر ٹرمپ ایک پرامن دنیا چاہتے ہیں صدر ٹرمپ امریکی امنگوں کےمطابق امن کیلئے کام کر رہے ہیں صدر دنیا بھر میں جاری تمام تنازعات کا خاتمہ چاہتےہیں کسی بھی تنازع میں فریقین کو مذاکرات پر لانا آسان ہے۔

ترجمان امریکی محکمہ خارجہ ٹیمی بروس سے ہندوستان اور پاکستان کی کشیدگی پر سوال کیا تو انہوں نے جواب میں کہا کہ پاکستان ہندوستان تنازع ایک متحرک اور سنجیدہ مسئلہ ہے ۔پاکستان ہندوستان کشیدگی کی وجہ سےایک ابھرتی صورتحال بنی ہوئی ہے ہم اب بھی پاکستان ہندوستان کشیدہ صورتحال کی نگرانی کر رہے ہیں۔ترجمان نے کہا کہ پاکستان اور ہندوستان پر زور دیتے ہیں کہ ذمہ دارانہ حل کےلیے کام کریں ایسا حل جو جنوبی ایشیا میں طویل مدتی امن اور علاقائی استحکام کو برقرار رکھے، پاکستان اور ہندوستان کی حکومتوں کےساتھ متعدد سطح پر رابطے میں ہیں تمام صورتحال سے واقف ہیں۔

برطانوی وزیرتجارت نے کہا کہ پاکستان اور ہندوستان میں کشیدگی میں کمی کرانے میں مددکیلئے تیار ہیں، ہمارا پیغام یہ ہوگا کہ ہم پاکستان اور ہندوستان کے دوست، شراکت دار ہیں۔برطانوی وزیرتجارت کا کہنا تھا کہ ہم پاکستان ہندوستان کی سپورٹ کے لیے تیار ہیں، علاقائی استحکام، ڈائیلاگ اور کشیدگی میں کمی کے لیے جو کچھ بھی کر سکتے ہیں ہم کرنے کو تیار ہیں۔

دوسری جانب روس نے بھی پاکستان ہندوستان سے تحمل کا مظاہرہ کرنےکامطالبہ کیا ہے۔روسی وزارت خارجہ نے پاکستان اور ہندوستان کےدرمیان بڑھتے فوجی تصادم پر تشویش کا اظہار کرتے ہوئے کہا کہ پاکستان ہندوستان تحمل کامظاہرہ کریں۔

ترجمان ا سٹیفن دوجارک کا کہنا تھا گوئتریس نے دونوں ملکوں سے زیادہ سے زیادہ تحمل کا مظاہرہ کرنے کا مطالبہ کیا۔ایک پیغام میں اقوام متحدہ کے سربراہ نے کہا تھا کہ دنیا دو جوہری ہتھیاروں سے لیس پڑوسیوں کے درمیان فوجی تصادم کی متحمل نہیں ہو سکتی، کشیدگی میں کمی اور سفارت کاری کی ضرورت پر زور دیا۔اقوام متحدہ کے سکریٹری جنرل انتونیو گوتریس نے ہندوستان کے پاکستانی مقبوضہ کشمیر میں دہشت گردوں کے ٹھکانوں کو نشانہ پر دونوں ممالک سے زیادہ سے زیادہ فوجی تحمل سے کام لینے کی اپیل کی ہے۔

ترک خبر رساں ادارے ’انادولو‘ کی رپورٹ کے مطابق انتونیو گوتریس کے ترجمان نے کہا کہ سکریٹری جنرل کو لائن آف کنٹرول اور بین الاقوامی سرحد پر ہندوستانی فوجی کارروائیوں پر گہری تشویش ہے۔ترجمان اسٹیفن دوجارک نے ایک بیان میں کہا کہ سیکریٹری جنرل دونوں ممالک سے زیادہ سے زیادہ فوجی تحمل کا مطالبہ کرتے ہیں۔انہوں نے کہا کہ دنیا پاکستان اور ہندوستان کے درمیان فوجی محاذ آرائی کی متحمل نہیں ہو سکتی۔

چین نے ہندوستانی فوجی کارروائی کو افسوسناک قرار دیتے ہوئے کہا کہ ہم موجودہ صورتِ حال پر تشویش کا اظہار کرتے ہیں، ہندوستان اور پاکستان ایک دوسرے کے ہمسایہ تھے، ہیں اور ہمیشہ رہیں گے۔ دونوں ممالک چین کے بھی ہمسایہ ہیں۔فرانسیسی خبر رساں ادارے ’اے ایف پی‘ کے مطابق چین نے پاکستانی مقبوضہ کشمیر پر ہندوستانی حملوں پر افسوس اور تشویش کا اظہار کرتے ہوئے دونوں جوہری فریقین پر زور دیا ہے کہ وہ کشیدگی کے جواب میں تحمل کا مظاہرہ کریں۔چینی دفتر خارجہ کے ترجمان نے کہا کہ ہندوستان اور پاکستان ایسے ہمسایہ ممالک ہیں جنہیں الگ نہیں کیا جا سکتا، اور دونوں چین کے ہمسائے بھی ہیں، چین ہر قسم کی دہشت گردی کی مخالفت کرتا ہے۔ترجمان چینی وزارت خارجہ نے کہا کہ ہم ہندوستان اور پاکستان دونوں سے مطالبہ کرتے ہیں کہ وہ امن و استحکام کو ترجیح دیں، پرسکون اور پرسکون رہیں، اور ایسے اقدامات سے گریز کریں جن سے صورتحال مزید پیچیدہ ہو۔

متحدہ عرب امارات کے نائب وزیراعظم و وزیر خارجہ شیخ عبداللہ بن زاید النہیان نے ہندوستان اور پاکستان پر زور دیا ہے کہ وہ تحمل سے کام لیں اور کشیدگی روکیں۔ اسے مزید بڑھانے سے گریز کریں، جس سے علاقائی اور بین الاقوامی امن کو خطرہ ہو سکتا ہے۔شیخ عبداللہ بن زاید النہیان نے جنوبی ایشیا میں مزید علاقائی کشیدگی سے بچنے کیلئے بات چیت اور باہمی افہام و تفہیم کی اہمیت پر زور دیا۔

انہوں نے کہا سفارت کاری اور مذاکرات بحران کو پُرامن طریقے سے حل کرنے کا سب سے موثر ذریعہ ہیں۔شیخ عبداللہ بن زاید النہیان کا مزید کہنا تھا متحدہ عرب امارات علاقائی اور بین الاقوامی تنازعات کے پُرامن حل کے حصول کیلئے تمام اقدامات کی حمایت کے لیے اپنی کوششیں جاری رکھے گا۔

جاپان نے ہندو پاک کشیدگی پر تشویش کا اظہار کرتے ہوئے دونوں ملکوں کو تحمل کا مظاہرہ کرنے اور بات چیت کے ذریعے صورتِ حال مستحکم کرنے پر زور دیا ہے۔ذرائع کے مطابق جاپانی چیف کیبنٹ سیکریٹری یوشیماسا حیاشی کا کہنا ہے کہ ہند و پاک کشیدگی انتقامی کارروائیوں کو بھڑکا سکتی ہے اور صورتِ حال کے مکمل فوجی تصادم میں تبدیل ہونے کا خدشہ ہے۔انہوں نے دونوں ممالک پر زور دیا ہے کہ پاکستان اور ہندوستان تحمل کا مظاہرہ کریں اور بات چیت کے ذریعے صورتِ حال کو مستحکم کریں۔

قطر نے پاکستان اور ہندوستان کے درمیان حالیہ کشیدگی پر ردعمل ظاہر کرتے ہوئے دونوں ممالک سے فوجی کشیدگی سے بچنے کا مطالبہ کر دیا۔قطری نشریاتی ادارے الجزیرہ کی رپورٹ کے مطابق قطر نے کہا کہ پاکستان اور ہندوستان کے درمیان جاری کشیدگی پر تشویش ہے اور صورتحال کا جائزہ لے رہے ہیں۔قطر نے زور دیا کہ دونوں ممالک سفارتی ذرائع سے بحران کو حل کریں۔

یو این آئی۔ ع ا۔