جموں،خطہ پیر پنچال میں سیلابی صورتحال پیدا،پانی وبجلی سپلائی متاثر
ایک شہری جاں بحق، درجنوں مویشی ہلاک،کئی ڈھانچوں اور گاڑیوں کو شدید نقصان،کئی پل ڈھہ گئے،درجنوں زمینی رابطے منقطع
خبراردو:-

سرینگر:محکمہ موسمیات کی پیش گوئی کے عین کے مطابق پیر پنچال کے آر پار موسلا دھار روزہ بارشوں کا سلسلہ 25اور26اگست کی درمیانی رات سے شروع ہوا،جو بدھ کو وقفے وقفے سے دن بھر جاری رہا جسکے نتیجے میں طویل ترین خشک سالی کا موسم ختم ہوگیا۔تاہم موسلا دھار بارشوں کے نتیجے میں جموں اور خطہ پیر پنچال کے کئی علاقوں میں سیلابی صورتحال پیدا ہوئی۔

اس دوران ندی نالوں میں طغیانی آنے، زمین دھنسنے،مٹی کے تودے گرآنے،چٹانیں کھسکنے،پسیاں گرآنے اور فلش فلڈ کے نتیجے میں ایک شہری جاں بحق ہوگیا جبکہ درجنوں مویشی بھی ہلاک ہوئے۔اس کے علاوہ کئی ڈھانچوں اور گاڑیوں کو بھی شدید نقصان پہنچا۔کئی پل ڈھہ جانے سے200دیہات کا زمینی را بطہ منقطع ہوگیا۔

کئی حساس علاقوں سے لوگوں کو محفوظ مقامات پر منتقل کیا گیا۔دریں اثناء وادی کشمیر میں بھی بارشوں کے نتیجے میں سڑکیں پانی سے لبا لب ہوگئیں جبکہ دریاؤں اور ندی نالوں میں سطح آب میں تیزی سے اضافہ بھی ہورہا ہے۔کشمیر نیوز سروس کے مطابق جموں وکشمیر میں مغربی ہوائیں داخل ہونے کیساتھ ہی منگلوار اور بدھ کی درمیانی رات سے گرج چمک کیساتھ ساتھ تیز بارشوں کا سلسلہ شروع ہوا۔

بارشوں کے نتیجے میں جموں اور خطہ پیر پنچال بری طرح سے متاثر ہوا۔جموں:بارشوں کے نتیجے میں جموں میں جہاں درجنوں علاقہ زیر آب آگئے اور لوگوں کو عبور ومرور میں شدید ترین مشکلات کا سامنا ہے۔جموں نامہ نگار کے مطابق شدید بارشوں کے نتیجے میں ندی نالوں میں آئی طغیانی کے سبب دراپ نالہ جموں پر تعمیر کئے گئے بابیاں پل صبح9بجکر30منٹ تیز پانی کے ریلے نے اپنے ساتھ بہا لیا۔

پل ڈھہ جانے کے نتیجے میں 200دیہات کا زمینی رابطہ منقطع ہو گیا۔مقامی لوگوں نے پل کی تعمیر پر سوال اٹھاتے ہوئے کہا ’کس طرح کی انجینئر نگ کی گئی؟،چار۔پانچ برس قبل ہی اس پل کی تعمیر کی گئی تھی‘۔ادھر جموں کے کئی نچلے علاقے زیر آب آگئے ہیں جسکی وجہ سے لوگوں کی ایک بڑی تعداد گھروں میں محصور ہو کر رہ گئی۔نانا نگر،جیون نگر،چینانی راما،پمپوش کالونی،اور دیگر کئی علاقے زیر آب گئے جبکہ ان علاقوں میں کئی رہائشی مکانات اور گاڑیوں کو بھی شدید نقصان پہنچا یا۔معلوم ہوا ہے کہ جموں کے کئی علاقوں میں پانی اور بر قی رو کی سپلائی متاثر ہوئی۔

کٹھوعہ میں پولیس نے15خانہ بدوش افراد کو اجھ دریامیں فلش فلڈ آنے کے بعد ریسکیو کرکے محفوظ مقامات پر منتقل کیا گیا۔پولیس نے بدھ کو کہا کہ کٹھوعہ ضلع میں سیلابی ریلوں کے بیچ پھنسے15افراد کو بحفاظت نکالا گیا ہے۔مختلف گھرانوں سے وابستہ یہ افراد ریائے اْجھ میں آئے سیلابی ریلوں میں پھنس کر رہ گئے تھے۔پولیس کو جونہی اطلاع ملی کہ کٹھوعہ کے راج باغ علاقے میں کچھ خانہ بدوش افراد، جو وہاں عارضی طور قیام پذیر تھے، سیلانی ریلوں میں پھنس گئے ہیں تو پولیس نے فوری بچاؤکارروائی ہاتھ میں لیکر پھنسے افراد کو، جن میں بچے اور خواتین بھی شامل تھیں،محفوظ مقام تک پہنچایا۔جموں خطے کے کئی علاقوں میں زور دار بارشوں کے نتیجے میں سیلابی ریلے آئے ہیں اور ندی نالوں میں پانی کی سطح میں اضافہ ہوا ہے۔

خطہ پیر پنچال:ضلع پونچھ کے مینڈھر علاقے میں ایک جواں سال شہری زمینی تودے کے نیچے آکر دفن ہوگیا جبکہ ایک علیحدہ واقعہ میں کئی مویشی ایک شیڈ کے نیچے آگئے ہیں۔ اطلاعات کے مطابق 35سالہ محمد شوکت ولد محمد حسین ساکن کالر مورا(مینڈھر) ایک زمینی تودے کے نیچے آکر دفن ہوگیا۔یہ تودہ کوٹلی کے گولر نارا ڈھوک علاقے میں شدید بارش ک وجہ سے گر آیا۔شوکت کی لاش مقامی لوگوں کے ہاتھوں بر آمد کی گئی ہے۔

مینڈھر کے ہی سانگیوٹ گاوں میں ایک علیحدہ واقعہ میں بدھ کی صبح مویشیوں کا ایک شیڈ ڈھ گیا جس کے نیچے کئی مویشی آگئے۔مقامی ذرائع کے مطابق کم و بیش چھ بھینسیں شیڈ کے ملبے کے نیچے دبی ہیں اور اْنہیں بچانے کی کوششیں جاری ہیں۔ادھر راجوری ضلع کے سکتوہ اور درہال علاقوں میں بدھ کی صبح شدید بارشوں کی وجہ سے سیلابی ریلے آنے سے کئی سڑکوں اور پلوں کو نقصان پہنچا ہے۔

حکام کے مطابق راجوری میں شدید بارشوں کے نتیجے میں وہاں بہنے والے دو دریاوں کے پانی کی سطح اچانک بڑھ گئی ہے۔حکام کے مطابق بد ھ کی صبح سالانی کے مقام پر، جہاں سکتوہ اور درہالی دریا ملتے ہیں،پانی سطح سیلاب کی حد تک بڑھ گئی۔حکام نے مزید کہا کہ ایسا گذشتہ چالیس برس میں وہاں پہلی بار ہوا ہے۔انہوں نے مزید کہا کہ پانی کی سطح میں اب بتدریج کمی ہورہی ہے تاہم اچانک آئے سیلابی ریلوں کی وجہ سے کئی پلوں اور سڑکوں کو نقصان پہنچنے کی اطلاعات موصول ہوئی ہیں۔کئی سومو گاڑیاں نالے پار کے دوران سیلابی ریلوں میں پھنس گئیں،جو کے بعد یہاں ریسکیو آپریشنز بھی عمل میں لائے گئے۔

یاد رہے کہ گزشتہ روز(منگلوار کے روز)ریاسی ضلعے میں ایک ہی کنبے کے تین افراد سمیت4افراد کی موت ہوئی تھی۔معلوم ہوا ہے کہ خطہ پیر پنچال کے کئی علاقوں میں سیلابی صورتحال پیدا ہونے کے بیچ پانی اور بجلی کی سپلائی متاثر ہوئی۔اس دوران وادی کشمیر میں بھی بدھ کے روز وقفے وقفے سے بارشوں کا سلسلہ جاری رہا۔شہر میں کئی نشیبی علاقہ حسب سابقہ زیر آب آگئے جبکہ سڑکیں اور بازار پانی سے لبا لب ہو نے لوگوں کو عبور ومرور میں مشکلات کا سامنا کرنا پڑ ا۔اری گیشن اینڈ فلڈ کنٹرول کے مطابق دریائے جہلم میں بدھ کی دوپہر ایک بجے تک سنگم کے مقام پر3.76فٹ سطح آب تھی جبکہ سطح آب میں مسلسل اضافہ ہورہا ہے۔

اس دوران محکمہ موسمیات نے بتایا کہ گزشتہ4گھنٹوں کے دوران سرینگر میں صبح ساڑھے8بجے تک 0.4ملی میٹر بارش ہوئی تھی جبکہ قاضی گنڈ میں 1.8ایم ایم، پہلگام میں 11.0ایم ایم،جموں میں 18.0ایم ایم، بانہال میں 33.4ایم ایم بارشیں ہوئیں۔سرینگر میں زیادہ سے زیادہ درجہ حرارت 220-.6ڈگری سیلسیس ریکارڈ کیا گیا جبکہ قاضی گنڈ میں 20.9، پہلگام میں 20.6، کپوارہ میں 21.0، کوکرناگ میں 22.5، گلمرگ میں 15.4ڈگری سیلسیس ریکارڈ کیا گیا۔ترجمان کے مطابق اسی طرح جموں میں زیادہ سے زیادہ درجہ حرارت 29.8، بانہال میں 21.4، بٹوت میں 20.8اور کٹرا میں 26.3ریکارڈ کیا گیا جبکہ بھدرواہ میں یہ درجہ حرارت21.2ڈگری سیلسیس درج کیا گیا۔