تہران، ایرانی صدر مسعود پزشکیان نے بدھ کو اقوام متحدہ کی جنرل اسمبلی سے خطاب کرتے ہوئے کہا کہ تہران امریکہ کے ساتھ مذاکرات اور سفارت کاری کے لیے تیار ہے، لیکن دباؤ، دھمکی یا طاقت کی زبان قبول نہیں کرے گا۔

انہوں نے کہا کہ پابندیوں، دباؤ اور دھمکی میں اضافے کے سامنے ایرانی عوام کی مزاحمت مزید مضبوط ہوگی۔

امریکی صدر ڈونالڈ ٹرمپ کا حوالہ دیتے ہوئے پزشکیان نے کہا، ’’ایران کو ٹرمپ کو سمجھنا ہوگا۔ ہم طاقت کی زبان قبول کیے بغیر بات چیت، سفارت کاری اور مذاکرات کے لیے تیار ہیں۔‘‘

آبنائے ہرمز کے معاملے پر ایرانی صدر نے کہا کہ ایران یہ قبول نہیں کرسکتا کہ کچھ ممالک کو اس آبی گزرگاہ تک آزادانہ رسائی حاصل ہو اور وہ اپنے مفادات حاصل کریں، جبکہ اسی راستے کو ایران کے خلاف کارروائی کے لیے استعمال کیا جائے اور اسے اپنے ہی آبی راستوں تک رسائی سے محروم کرنے کی کوشش کی جائے۔

انہوں نے امریکہ پر ایرانی جہاز رانی کو محدود کرنے اور آبنائے ہرمز کے راستے اپنے اتحادیوں تک میزائل پہنچانے کا الزام عائد کیا۔ ایران نے جنگ شروع ہونے کے بعد سے اس اہم آبی گزرگاہ میں آمدورفت روکنے کی کوشش کی ہے، جبکہ امریکہ نے ایرانی بندرگاہوں پر ناکہ بندی عائد کر رکھی ہے۔

غزہ کے معاملے پر پیزشکیان نے کہا کہ ’’قبضے، جارحیت اور ناانصافی‘‘ کے خلاف مزاحمت جاری رہے گی۔ انہوں نے کہا کہ اگر اسے ایک شکل میں کمزور کیا گیا تو وہ دوسری شکلوں میں، ممکنہ طور پر مزید طاقت کے ساتھ، دوبارہ سامنے آئے گی۔

ایران طویل عرصے سے حماس کی حمایت کرتا رہا ہے، جس کے 7 اکتوبر 2023 کو اسرائیل پر کیے گئے حملے کے بعد غزہ میں جاری جنگ شروع ہوئی تھی۔

ایرانی صدر نے بین الاقوامی جوہری توانائی ایجنسی (آئی اے ای اے) پر جوہری معائنے کے معاملے میں دوہرے معیار اپنانے کا بھی الزام عائد کیا۔ انہوں نے اسرائیل کے غیر اعلانیہ جوہری ہتھیاروں کے پروگرام کا حوالہ دیتے ہوئے کہا، ’’ایٹمی اور جوہری بم اسرائیلی حکومت کے ہاتھوں میں ہیں، لیکن معائنہ کاروں سے ایران آنے کے لیے کہا جاتا ہے۔‘‘

یو این آئی۔ م س

نیویارک، امریکہ کے وزیر خارجہ مارکو روبیو نے عالمی نظام کے بارے میں دوٹوک الفاظ میں اپنی رائے ظاہر کرتے ہوئے کہا ہے کہ ’’بین الاقوامی نظام ناکام ہوچکا ہے‘‘ اور اس میں ہندوستان اور پاکستان کے درمیان ممکنہ تنازع سمیت بڑے تنازعات سے نمٹنے یا انہیں ٹالنے کی صلاحیت نہیں ہے۔ انہوں نے کہا کہ ممالک تیزی سے اپنے قومی مفادات کے مطابق اقدامات کریں گے۔

روبیو نے اقوام متحدہ کی جنرل اسمبلی کے موقع پر صحافیوں سے بات کرتے ہوئے کہا کہ دنیا کے رہنماؤں میں اس بات پر وسیع اتفاق رائے پایا جاتا ہے کہ موجودہ بین الاقوامی نظام بڑے بحرانوں سے نمٹنے میں ناکام ہورہا ہے۔

مسٹر روبیو نے کہا، ’’میرے خیال میں بین الاقوامی نظام اس وقت اچھی حالت میں نہیں ہے۔‘‘ انہوں نے مزید کہا کہ بین الاقوامی اصولوں کی حتمی حد ’’آپ کا قومی مفاد‘‘ ہے۔

انہوں نے کہا کہ اقوام متحدہ میں ’’بے پناہ صلاحیت‘‘ موجود ہے، لیکن وہ اس صلاحیت کے مطابق کام نہیں کر رہا ہے۔ ان کا کہنا تھا کہ یہ نظام ’’اپنے اختیار سے آگے بڑھ گیا ہے‘‘ اور اب ان معاملات میں بھی شامل ہے جو اس کے مقررہ کردار سے باہر ہیں۔

روبیو نے کہا، ’’یہ دنیا کے تقریباً کسی بھی بڑے تنازع کو حل کرنے میں ناکام ہے۔‘‘ انہوں نے مزید کہا کہ اقوام متحدہ کے اجلاس میں اس بات پر ’’رضامندی اور اتفاق رائے‘‘ پایا جاتا ہے کہ بین الاقوامی نظام ناکام ہورہا ہے۔

روبیو نے خاص طور پر کئی تنازعات اور کشیدگی والے معاملات کا ذکر کیا اور کہا کہ ان سے موجودہ بین الاقوامی نظام کی حدود واضح ہوتی ہیں۔

انہوں نے کہا، ’’یہ بہت اچھا ہوتا اگر ہمارے پاس ایک مؤثر بین الاقوامی نظام ہوتا، جو مثال کے طور پر تھائی لینڈ اور کمبوڈیا کے درمیان ہونے والی جنگ، یا ہندوستان اور پاکستان کے درمیان ممکنہ تنازع، یا جمہوریہ کانگو اور روانڈا میں جاری حالات، یا سوڈان میں جاری بحران، یا آبنائے میں ایران سے متعلق صورتحال سے نمٹ سکتا۔‘‘

روبیو نے مزید کہا، ’’اس وقت ایسا لگتا ہے کہ ہمارے پاس کوئی مؤثر بین الاقوامی نظام نہیں ہے جو ان مسائل سے نمٹ سکے۔‘‘

ان کا یہ بیان اقوام متحدہ کی جنرل اسمبلی کے دوران بڑھتی ہوئی سفارتی سرگرمیوں کے درمیان سامنے آیا ہے، جہاں رہنما کثیر ملکی اداروں کی کارکردگی اور تنازعات کو روکنے یا حل کرنے میں عالمی برادری کی صلاحیت پر بحث کر رہے ہیں۔

یو این آئی، ایم جے

نیویارک، امریکہ، جاپان اور جنوبی کوریا نے دنیا بھر میں چھوٹے ماڈیولر جوہری ری ایکٹرز (ایس ایم آر) کی برآمدات کو فروغ دینے کے لیے مشترکہ طور پر ایک ’’عملی منصوبے‘‘ کا اعلان کیا ہے۔ یہ منصوبہ اس سال کے اوائل میں انقرہ میں طے پانے والے سہ فریقی معاہدے کو آگے بڑھاتا ہے، جبکہ امریکہ اور اس کے اتحادی عالمی سطح پر جوہری توانائی کی صلاحیت میں توسیع کی کوششیں تیز کر رہے ہیں۔

یہ اعلان نیویارک میں اقوام متحدہ جنرل اسمبلی کے اجلاس کے موقع پر تینوں ممالک کے وزارتی سطح کے اجلاس کے بعد کیا گیا۔ امریکی محکمہ خارجہ نے کہا کہ نیا منصوبہ ’’دیگر ممالک میں چھوٹے ماڈیولر ری ایکٹرز (ایس ایم آر) کی تنصیب سے متعلق تعاون کی یادداشت‘‘ کی بنیاد پر تیار کیا گیا ہے، جس پر تینوں ممالک نے 7 جولائی کو دستخط کیے تھے۔

محکمہ خارجہ کے مطابق یہ معاہدہ ’’دنیا بھر میں توانائی کی بڑھتی ضروریات پوری کرنے کے لیے ایس ایم آر ری ایکٹرز کے بیڑے کی تنصیب کے ایک پرعزم ایجنڈے‘‘ کے ذریعے تینوں ممالک کے مشترکہ سلامتی مفادات کے تحفظ میں مدد دے گا۔

الگ سے، نائب وزیر خارجہ کرسٹوفر لینڈاؤ نے صنعت سے متعلق ایک معاہدے پر دستخط کی تقریب میں شرکت کی، جس کے تحت امریکہ کی جی ای ویرنووا، جاپان کی ہٹاچی، جنوبی کوریا کی سام سنگ سی اینڈ ٹی اور پولینڈ کی ایس جی ای نے یورپ بھر میں بی ڈبلیو آر ایکس-300 چھوٹے ماڈیولر ری ایکٹرز کی مشترکہ تنصیب پر اتفاق کیا ہے۔

امریکی محکمہ خارجہ نے کہا کہ چار ملکی صنعتی اتحاد کا مقصد ’’یورپ بھر میں لاکھوں افراد کو قابل اعتماد بنیادی جوہری بجلی فراہم کرنا‘‘ ہے اور آنے والے برسوں میں ری ایکٹرز میں 150 ارب ڈالر سے زیادہ کی سرمایہ کاری کو فروغ دینا ہے۔

واشنگٹن نے اس صنعتی شراکت داری کو اس امر کی مثال قرار دیا کہ اتحادی ممالک اپنی ’’ایک دوسرے کی تکمیلی صنعتی صلاحیتوں‘‘ سے فائدہ اٹھا کر ایسے ری ایکٹرز کی تنصیب تیز کر سکتے ہیں جو جوہری تحفظ، سلامتی اور عدم پھیلاؤ کے اعلیٰ ترین معیارات پر پورا اترتے ہوں۔

یہ اعلانات اس سہ فریقی مفاہمتی یادداشت کے بعد سامنے آئے ہیں جس پر امریکی وزیر خارجہ مارکو روبیو اور ان کے جاپانی و جنوبی کوریائی ہم منصبوں نے دستخط کیے تھے۔ یہ معاہدہ عالمی جوہری ری ایکٹرز کی برآمدات میں روس اور چین کے غلبے کا مقابلہ کرنے کی وسیع تر امریکی کوششوں کا حصہ ہے، جس کے تحت امریکہ، جاپان اور جنوبی کوریا کی کمپنیوں کو جوہری توانائی میں توسیع کے خواہاں ممالک کے لیے متبادل سپلائرز کے طور پر سامنے لانے کی کوشش کی جا رہی ہے۔

یو این آئی۔ ع ا۔