نئی دہلی، اپوزیشن جماعتوں کے انڈیا اتحاد کے اراکینِ پارلیمنٹ نے چیف الیکشن کمشنر گیانیش کمار کو ہٹانے کا مطالبہ کرتے ہوئے منگل کے روز پارلیمنٹ ہاؤس سے الیکشن کمیشن کی طرف مارچ کیا لیکن پولیس نے انہیں آگے بڑھنے سے روک دیا، جس کے بعد اراکینِ پارلیمنٹ نیتی آیوگ کے سامنے دھرنے پر بیٹھ گئے۔

تمام اپوزیشن اراکینِ پارلیمنٹ اس سے قبل پارلیمنٹ ہاؤس کے مکر دوار پر جمع ہوئے اور وہاں سے ‘لوک تنتر بچاؤ’ کے نعرے لگاتے ہوئے الیکشن کمیشن کی طرف بڑھنے لگے۔ پولیس نے انہیں آگے بڑھنے سے روکا تو تمام اراکینِ پارلیمنٹ نیتی آیوگ کے سامنے دھرنے پر بیٹھ گئے۔ پولیس کے روکنے کے بعد کئی اراکینِ پارلیمنٹ زبردستی آگے بڑھنے کی کوشش کرتے ہوئے بیریکیڈ پر چڑھ گئے۔ کافی دیر تک آگے نہ بڑھ پانے پر تمام اراکینِ پارلیمنٹ نے وہیں بیٹھ کر احتجاجی مظاہرہ شروع کر دیا۔

اس دوران لوک سبھا میں قائدِ حزبِ اختلاف راہل گاندھی نے کہا، “گیانیش، ہو گیا بھائی۔ اب استعفیٰ دینے کا وقت ہے۔” سماج وادی پارٹی کے صدر اکھلیش یادو نے کہا کہ الیکشن کمیشن پر پہلے بھی الزامات لگتے رہے ہیں۔ انہوں نے کہا کہ کمیشن نے 2017، 2019، 2022 اور 2024 کے انتخابات میں بے ایمانی کی اور مغربی بنگال میں پوری طرح سے ووٹ چوری کا کھیل کھیلا۔

مارچ میں شامل کانگریس رہنما پی چدمبرم نے کہا، “بی جے پی ہندی یا انگریزی نہیں پڑھ سکتی۔ چیف جسٹس نے واضح طور پر کہا تھا کہ انہوں نے فارم-6 میں کسی تبدیلی کی منظوری نہیں دی ہے۔ بی جے پی اس بات سے واضح طور پر انکار کیسے کر سکتی ہے۔ فارم-6 میں ڈیکلریشن واقعی جوڑا گیا ہے۔”

یواین آئی۔الف الف

نئی دہلی، وزیر خارجہ ڈاکٹر ایس جے شنکر منگل کے روز سے تین افریقی ممالک گھانا، کوٹ ڈی آئیوائر اور ایتھوپیا کے سرکاری دورے پر رہیں گے۔

وزارتِ خارجہ نے بتایا کہ وزیرِ خارجہ تینوں ممالک کی قیادت اور وہاں کے اپنے ہم منصبوں کے ساتھ دو طرفہ تعلقات، تجارت، اقتصادی تعاون، ترقیاتی تعاون اور صلاحیت سازی سمیت متعدد امور پر تبادلہ خیال کریں گے۔ میٹنگوں میں ہندستان اور ان تینوں ممالک کے درمیان دوستی اور تعاون سے جڑے تعلقات کا جائزہ لیا جائے گا۔ بات چیت میں تجارت اور اقتصادی تعلقات، ترقیاتی تعاون، صلاحیت سازی اور دونوں ممالک کے عوام کے درمیان رابطوں سمیت دو طرفہ تعلقات کے تمام اہم شعبوں پر گفتگو کی جائے گی۔

ڈاکٹر جے شنکر علاقائی اور عالمی سطح کے باہمی مفاد سے جڑے مسائل پر بھی متعلقہ ممالک کے ساتھ خیالات کا تبادلہ کریں گے۔ ایتھوپیا کے دارالحکومت ادیس ابابا میں وزیرِ خارجہ علاقائی مشن کے سربراہوں کی کانفرنس کی صدارت بھی کریں گے۔ وزارتِ خارجہ نے کہا ہے کہ وزیرِ خارجہ کا یہ دورہ افریقہ کے ساتھ ہندوستان کی شراکت داری کو مزید مضبوط بنانے کے عزم کی عکاسی کرتا ہے۔ یہ دورہ گلوبل ساؤتھ کے ساتھ ہندوستان کی یکجہتی کو بھی آگے بڑھائے گا۔

یواین آئی۔الف الف

مین پوری، اتر پردیش میں مین پوری ضلع کے بیور تھانہ علاقے میں جی ٹی روڈ پر منگل کو علی الصبح ہوئے ایک دردناک سڑک حادثے میں ماں اور اس کی دو معصوم بچیوں کی موت ہو گئی، جبکہ والد شدید طور پر زخمی ہو گئے۔

پولیس نے بتایا کہ کچھپورا کے رہنے والے کلکٹریٹ کے ٹھیکیدار ملازم بوبی (32) منگل کی صبح بیوی سمن (30)، چار سالہ بیٹی پریانشی اور ایک سالہ بچی کے ساتھ سسرال بیور سے مین پوری لوٹ رہے تھے۔ اسی دوران پیچھے سے آنے والے ایک تیز رفتار کنٹینر نے ان کی بائیک کو ٹکر مار دی۔ ٹکر کے بعد بائیک کنٹینر میں پھنس گئی اور ڈرائیور اسے تقریباً تین کلومیٹر تک گھسیٹتا ہوا لے گیا۔

رگڑ کے باعث نکلنے والی چنگاریوں سے بائیک اور کنٹینر میں آگ لگ گئی۔ حادثے میں سمن اور دونوں بچیوں کی موقع پر ہی موت ہو گئی۔ کنٹینر میں لدے اسپورٹس شوز کا سامان بھی جل کر راکھ ہو گیا۔ اطلاع ملتے ہی موقع پر پہنچی پولیس اور فائر بریگیڈ کی ٹیم نے آگ پر قابو پایا۔ زخمی بوبی کو علاج کے لیے ضلع اسپتال منتقل کر دیا گیا ہے۔ پولیس نے تینوں لاشوں کو پوسٹ مارٹم کے لیے بھیج کر کنٹینر ڈرائیور کو حراست میں لے لیا ہے۔

یواین آئی۔الف الف