سری نگر، سری نگر کے عیدگاہ علاقے سے تعلق رکھنے والے ماہر دستکار رفیق احمد صوفی کو مرکزی وزارتِ ٹیکسٹائل کی جانب سے ہاتھ سے گرہیں باندھ کر تیار کیے جانے والے قالینوں کے زمرے میں قومی ایوارڈ 2025 سے نوازا گیا ہے۔

حکام نے بتایا کہ سال 2025 میں اس زمرے کے لیے جموں و کشمیر سے رفیق احمد صوفی واحد ایوارڈ یافتہ ہیں۔ انہیں یہ اعزاز ایسے قالین کی تیاری پر دیا گیا ہے جس میں پھولوں کے نفیس نقش و نگار، روایتی طرزِ تعمیر کے نمونے اور خطاطی کے عناصر نمایاں ہیں۔ دسمبر میں منعقد ہونے والی ایک رسمی تقریب میں دیگر ایوارڈ یافتگان کے ساتھ صوفی کو بھی اعزاز سے نوازا جائے گا۔

کشمیر کے ہاتھ سے گرہیں باندھ کر تیار کیے جانے والے قالین صدیوں پرانی روایت کی عکاسی کرتے ہیں۔ ان میں گرہیں باندھنے کی نفیس تکنیک، منفرد ڈیزائن اور ”تعلیم” نامی روایتی طریقۂ کار کا امتزاج پایا جاتا ہے۔

ان قالینوں کو ان کے جغرافیائی ماخذ کی بنیاد پر 2016 میں جغرافیائی شناخت (جی آئی) رجسٹریشن بھی حاصل ہوئی تھی۔

محکمہ دستکاری و ہینڈلوم، کشمیر نے جمعرات کو مرکزی حکومت کی وزارتِ ٹیکسٹائل کی جانب سے قومی ایوارڈ سے نوازے جانے پر ماہر دستکار کو دلی مبارک باد پیش کی۔

محکمہ کے ایک ترجمان نے کہا کہ اس اعزاز کے ذریعے ماہر دستکار نے کشمیر کے مشہور دستکاری اور ہینڈلوم شعبے کا قومی سطح پر نام روشن کیا ہے۔

ترجمان نے کہاکہْ ”یہ اعزاز ہاتھ سے گرہیں باندھ کر قالین تیار کرنے کے روایتی فن میں ان کی غیر معمولی مہارت اور خدمات کا اعتراف ہے۔” انہوں نے مزید کہا کہ اس سے وادی کی قالین صنعت کو مزید فروغ حاصل ہوگا۔

ترجمان نے مزید کہا کہ قومی سطح پر صوفی کے کام کو ملنے والی یہ پذیرائی اس بات کی تصدیق کرتی ہے کہ کشمیر کا یہ موروثی فن آج بھی اپنی اعلیٰ معیار کی دستکاری اور اہمیت برقرار رکھے ہوئے ہے۔؎

انہوں نے کہاکہ ”محکمہ خطے کے دیگر دستکاروں کی حوصلہ افزائی کرتا ہے کہ وہ اس کامیابی سے تحریک حاصل کریں اور معیار و فن کاری کے ان اعلیٰ اصولوں کو برقرار رکھیں جو کشمیری دستکاری کی پہچان ہیں۔”

یواین آئی۔ ط ا

سری نگر، جمعہ کے خطبوں کے لیے مشترکہ خاکہ متعارف کرانے کی تجویز پر سیاسی اور مذہبی حلقوں میں مخالفت کے درمیان کشمیر کے میرواعظ عمر فاروق چرار شریف کی درگاہ میں جمعہ کا خطبہ دیں گے۔

چرار شریف کی درگاہ جموں و کشمیر کے مسلمانوں کے مقدس ترین مقامات میں شمار ہوتی ہے۔ اس کا انتظام جموں و کشمیر وقف بورڈ کے پاس ہے، جس کی سربراہی بی جے پی کی سینئر لیڈر درخشاں اندرابی کر رہی ہیں۔

میرواعظ کی سربراہی میں قائم انجمن اوقاف جامع مسجد سری نگر نے اعلان کیا ہے کہ روایت کے مطابق کشمیر کے میرواعظ جمعہ کو چرار شریف کی درگاہ میں خصوصی خطاب کریں گے۔؎

انجمن کے مطابق، میرواعظ اس موقع پر صوفی بزرگ شیخ نورالدین نورانی، المعروف شیخ العالم، کی تعلیمات پر روشنی ڈالیں گے۔

انجمن نے کہا کہ میرواعظ اپنے خطاب میں ایمان، اتحاد اور اخلاقی تجدید سے متعلق شیخ العالم کی تعلیمات اور موجودہ معاشرے میں ان کی دیرپا اہمیت پر اظہار خیال کریں گے۔ انجمن نے عقیدت مندوں اور عوام سے اپیل کی ہے کہ وہ بڑی تعداد میں اس اجتماع میں شرکت کریں۔

میرواعظ کا یہ خطاب ایسے وقت میں ہورہا ہے جب مساجد اور درگاہوں میں جمعہ کے خطبوں کے لیے مشترکہ موضوعات متعارف کرانے کی وقف بورڈ کی تجویز کی مخالفت بڑھتی جارہی ہے۔

وزیر اعلیٰ عمر عبداللہ، پی ڈی پی صدر محبوبہ مفتی اور مذہبی رہنماؤں نے اس پہل پر تنقید کرتے ہوئے اسے مسلمانوں کے مذہبی معاملات میں مداخلت قرار دیا ہے۔ عمر عبداللہ نے اس اقدام کو ”بی جے پی کی جانب سے مسلمانوں کے مذہبی معاملات میں مداخلت کی ناقابل قبول کوشش” قرار دیا۔

تاہم، وقف بورڈ کی چیئرپرسن درخشاں اندرابی کا کہنا ہے کہ اس سلسلے میں کوئی باضابطہ حکم جاری نہیں کیا گیا ہے۔ انہوں نے یہ اشارہ بھی دیا کہ بورڈ سے وابستہ خطیب اس معاملے میں خود فیصلہ کرسکتے ہیں۔

اس تنازع نے وقف بورڈ، جس کی سربراہی بی جے پی رہنما درخشاں اندرابی کررہی ہیں، اور کشمیر کی روایتی اسلامی قیادت کے درمیان اس وسیع تر کشمکش کو نمایاں کردیا ہے کہ وادی کے مذہبی معاملات کی رہنمائی اور ان کی سمت متعین کرنے کا اختیار کس کے پاس ہونا چاہیے۔

یواین آئی۔ ط ا

سری نگر، کشمیر کے بالائی علاقوں میں جمعرات کو مسلسل دوسرے دن ہلکی برف باری ہوئی، جبکہ میدانی علاقوں کے کئی حصوں میں بارش سے موسم سرد ہوگیا۔

حکام کے مطابق، سنتھن پاس، مغل روڈ، کپواڑہ کے بالائی علاقوں، بانڈی پورہ کے گریز اور تولیل علاقوں کے علاوہ زوجیلا-گمری محور پر بھی برف باری ہوئی۔ لداخ کے کئی بلند مقامات، جن میں دراس، زنسکار اور سنکو شامل ہیں، میں بھی برف باری ریکارڈ کی گئی۔

موسم میں تبدیلی کے باعث درجہ حرارت میں نمایاں کمی درج کی گئی، خصوصاً زیادہ بلندی پر واقع علاقوں میں سردی بڑھ گئی۔

محکمہ موسمیات کے مرکز سری نگر کے مطابق، جمعرات کی صبح 8 بج کر 30 منٹ پر ختم ہونے والے گزشتہ 24 گھنٹوں کے دوران کپواڑہ میں سب سے زیادہ 26.2 ملی میٹر بارش ریکارڈ کی گئی۔ اس کے بعد قاضی گنڈ میں 23.6 ملی میٹر اور گلمرگ میں 20.4 ملی میٹر بارش ہوئی۔ اسی مدت کے دوران پہلگام میں 16.8 ملی میٹر، جبکہ سری نگر میں 16.4 ملی میٹر بارش ریکارڈ کی گئی۔

محکمہ موسمیات کی پیش گوئی کے مطابق، جمعرات کو جموں و کشمیر میں موسم عام طور پر ابر آلود رہنے کے ساتھ کئی مقامات پر ہلکی سے درمیانی بارش ہوسکتی ہے، جبکہ بالائی علاقوں میں ہلکی برف باری کا امکان ہے۔ بعض مقامات پر گرج چمک کے ساتھ طوفان، تیز ہوائیں اور ژالہ باری بھی ہوسکتی ہے۔

پیش گوئی میں کہا گیا ہے کہ 16 اکتوبر کو موسم عموماً خشک رہنے کا امکان ہے، تاہم بعض مقامات پر مختصر وقفے کے لیے ہلکی بارش ہوسکتی ہے۔ 17 سے 24 اکتوبر تک جموں و کشمیر میں موسم عام طور پر خشک رہنے کی توقع ہے۔

یواین آئی۔ ط ا