سری نگر، جمعہ کے خطبوں کے لیے مشترکہ خاکہ متعارف کرانے کی تجویز پر سیاسی اور مذہبی حلقوں میں مخالفت کے درمیان کشمیر کے میرواعظ عمر فاروق چرار شریف کی درگاہ میں جمعہ کا خطبہ دیں گے۔

چرار شریف کی درگاہ جموں و کشمیر کے مسلمانوں کے مقدس ترین مقامات میں شمار ہوتی ہے۔ اس کا انتظام جموں و کشمیر وقف بورڈ کے پاس ہے، جس کی سربراہی بی جے پی کی سینئر لیڈر درخشاں اندرابی کر رہی ہیں۔

میرواعظ کی سربراہی میں قائم انجمن اوقاف جامع مسجد سری نگر نے اعلان کیا ہے کہ روایت کے مطابق کشمیر کے میرواعظ جمعہ کو چرار شریف کی درگاہ میں خصوصی خطاب کریں گے۔؎

انجمن کے مطابق، میرواعظ اس موقع پر صوفی بزرگ شیخ نورالدین نورانی، المعروف شیخ العالم، کی تعلیمات پر روشنی ڈالیں گے۔

انجمن نے کہا کہ میرواعظ اپنے خطاب میں ایمان، اتحاد اور اخلاقی تجدید سے متعلق شیخ العالم کی تعلیمات اور موجودہ معاشرے میں ان کی دیرپا اہمیت پر اظہار خیال کریں گے۔ انجمن نے عقیدت مندوں اور عوام سے اپیل کی ہے کہ وہ بڑی تعداد میں اس اجتماع میں شرکت کریں۔

میرواعظ کا یہ خطاب ایسے وقت میں ہورہا ہے جب مساجد اور درگاہوں میں جمعہ کے خطبوں کے لیے مشترکہ موضوعات متعارف کرانے کی وقف بورڈ کی تجویز کی مخالفت بڑھتی جارہی ہے۔

وزیر اعلیٰ عمر عبداللہ، پی ڈی پی صدر محبوبہ مفتی اور مذہبی رہنماؤں نے اس پہل پر تنقید کرتے ہوئے اسے مسلمانوں کے مذہبی معاملات میں مداخلت قرار دیا ہے۔ عمر عبداللہ نے اس اقدام کو ”بی جے پی کی جانب سے مسلمانوں کے مذہبی معاملات میں مداخلت کی ناقابل قبول کوشش” قرار دیا۔

تاہم، وقف بورڈ کی چیئرپرسن درخشاں اندرابی کا کہنا ہے کہ اس سلسلے میں کوئی باضابطہ حکم جاری نہیں کیا گیا ہے۔ انہوں نے یہ اشارہ بھی دیا کہ بورڈ سے وابستہ خطیب اس معاملے میں خود فیصلہ کرسکتے ہیں۔

اس تنازع نے وقف بورڈ، جس کی سربراہی بی جے پی رہنما درخشاں اندرابی کررہی ہیں، اور کشمیر کی روایتی اسلامی قیادت کے درمیان اس وسیع تر کشمکش کو نمایاں کردیا ہے کہ وادی کے مذہبی معاملات کی رہنمائی اور ان کی سمت متعین کرنے کا اختیار کس کے پاس ہونا چاہیے۔

یواین آئی۔ ط ا

سرینگر، محکمہ تعلیم کشمیر نے بدھ کو وادیٔ کشمیر کے تمام سرکاری اور تسلیم شدہ نجی اسکولوں کے اوقات میں تبدیلی کا حکم جاری کیا ہے۔ نئے اوقات کا اطلاق 15 اکتوبر سے ہوگا۔

حکم کے مطابق، سرینگر شہر کی میونسپل حدود میں واقع اسکول صبح 10 بجے سے دوپہر 3:30 بجے تک کھلیں گے۔

حکم نامے میں کہا گیا ہے کہ سرینگر کی میونسپل حدود سے باہر واقع اسکولوں سمیت وادیٔ کشمیر ڈویژن کے دیگر علاقوں کے اسکول صبح 10:30 بجے سے شام 4 بجے تک کام کریں گے۔

محکمہ نے تمام متعلقہ اداروں کو ہدایت دی ہے کہ وہ نئے اوقات پر سختی سے عمل کریں اور اس میں کسی قسم کی تبدیلی نہ کریں۔

یہ حکم ایسے دن جاری کیا گیا جب تازہ مغربی ہواؤں کے اثر سے کشمیر میں سردی بڑھ گئی۔ ان ہواؤں کے سبب میدانی علاقوں میں بارش اور بالائی علاقوں میں برف باری ہوئی۔

یو این آئی، ایم جے

سری نگر، کشمیر کے کئی بالائی علاقوں میں منگل کو تازہ برف باری ہوئی، جبکہ سری نگر سمیت میدانی علاقوں میں بارش ہوئی۔ محکمہ موسمیات نے جموں و کشمیر میں جمعرات تک بڑے پیمانے پر بارش اور دیگر موسمی سرگرمیوں کی پیش گوئی کی ہے۔

حکام کے مطابق، مغربی ہواؤں کے زیر اثر سیاحتی مقامات گلمرگ اور سونا مرگ کے علاوہ زوجیلا محور پر بھی تازہ برف باری ریکارڈ کی گئی۔ ادھر جموں و کشمیر کے گرمائی دارالحکومت سری نگر سمیت میدانی علاقوں میں بارش ہوئی، جو آخری اطلاعات موصول ہونے تک جاری تھی۔

محکمہ موسمیات کے مطابق، آئندہ 24 گھنٹوں کے دوران جموں و کشمیر کے بیشتر علاقوں میں ہلکی سے درمیانی بارش اور گرج چمک کے ساتھ بونداباندی کا امکان ہے۔ محکمہ نے آئندہ چند روز کے لیے بھی اسی طرح کے موسمی حالات کی پیش گوئی کی ہے۔

14 اکتوبر کی پیش گوئی کے مطابق، بعض علاقوں میں گرج چمک اور آسمانی بجلی کے ساتھ 30 سے 40 کلومیٹر فی گھنٹہ کی رفتار سے تیز ہوائیں چل سکتی ہیں۔ کچھ مقامات پر تیز بارش، گرج چمک اور آسمانی بجلی گرنے کے ساتھ اسی رفتار سے تیز ہوائیں چلنے کا بھی امکان ہے۔

موجودہ موسمی حالات کے باعث بالائی علاقوں میں سردی اور نمی برقرار رہنے کا امکان ہے، جب کہ میدانی علاقوں میں وقفے وقفے سے بارش جاری رہ سکتی ہے۔

محکمہ موسمیات نے کسانوں کو مشورہ دیا ہے کہ موجودہ موسمی حالات کے پیش نظر 13 سے 15 اکتوبر کے درمیان سیب، دھان اور دیگر فصلوں کی کٹائی کے بعد انہیں محفوظ طریقے سے ذخیرہ کرنے کے انتظامات کریں۔

خراب موسم کے امکان کے پیش نظر مسافروں، ٹرانسپورٹروں اور عام لوگوں کو مشورہ دیا گیا ہے کہ وہ اپنے سفر کی منصوبہ بندی احتیاط سے کریں اور کسی بھی پریشانی سے بچنے کے لیے ٹریفک سے متعلق جاری کردہ ہدایات پر عمل کریں۔

یواین آئی۔ ط ا