صارفین اگر بجلی چوری سے اجتناب کریں گے تو سسٹم میں بہت حد تک بہتری آسکتی ہے۔ چیف انجینئر اعجاز ڈار
خبراردو

سرینگر:کشمیر پاور ڈویلپمنٹ کارپوریشن لمیٹڈ (کے پی ڈی سی ایل) کے چیف انجینئر اعجاز احمد ڈار نے بجلی محکمے کی جانب سے موسم سرما کے دوران بجلی کی غیر اعلانیہ کٹوتی کے الزامات کی تردید کرتے ہوئے کہا کہ محکمہ صارفین کو مناسب اور شیڈول کے مطابق بجلی فراہم کررہا ہے لیکن برقی آلات کے بے تحاشا استعمال کے باعث بجلی کا سپلائی نظام تشویشناک حد تک متاثر ہورہا ہے۔

کے این ایس کے ساتھ خصوصی بات چیت کے دوران انہوں نے کہا کہ اس وقت پاور ڈیولپمنٹ کارپوریشن صبح اور شام کے اوقات میں مرحلہ وار شفٹوں میں 1500میگا واٹ بجلی سپلائی کررہا ہے تاہم انہوں نے کہا کہ اس بات میں کوئی شک نہیں ہے کہ ہمیں بجلی کی سپلائی کی ضرورت بہت زیادہ ہے لیکن مگر یہ بات بھی ذہن میں رکھنی ضروری ہے کہ پورے کشمیر میں صارفین سردیوں کے دوران غیر مناسب طریقوں سے بجلی پر چلنے والیآلات اور گیجٹس استعمال کر رہے ہیں اور اس عمل سے خود بخود بجلی کا سپلائی نظام بری طرح متاثر ہوتا ہے۔

چیف انجینئر مسٹر ڈار نے بجلی کٹوتی سے پیدا ہورہی پریشان کن صورتحال کیلئے صارفین کو ہی ذمہ دار قرار دیتے ہوئے کہا کہ صارفین غیر قانونی طور بجلی کا استعمال کررہے ہیں جس کی وجہ بجلی کا پورا سسٹم متاثر ہوتا ہے۔ انکا مزید کہنا تھا ہمارا محکمہ مختلف مراحل پر ذرائع ابلاغ کے ذریعے صارفین کو بجلی کا مناسب استعمال کرنے کے بارے میں آگاہی فراہم کررہا ہے اور میں صارفین سے اپیل کرتا ہوں کہ وہ دانشمندی کے ساتھ بجلی کا استعمال کریں جبکہ صارفین کو چاہیے کہ وہ بجلی چوری سے اجتناب کریں۔

انہوں نے کہا کہ اگر وادی کشمیر میں صارفین بجلی کا مناسب طریقے سے استعمال کریں گے تو میں وثوق سے کہتا ہوں کہ وادی کے تمام حصوں کو بجلی سپلائی سے فائدہ پہنچے گا۔مسٹر ڈار نے کہا کہ سردیوں کے دوران صارفین کی اصل مانگ کو پورا کرنے کے لئے محکمہ کو 2200 میگا واٹ بجلی کی ضرورت ہے لیکن محکمہ صرف 1500میگا واٹ ہی بجلی فراہم کرنے کا اہل ہے اور اس طرح صارفین کی مانگ پورا کرنے کیلئے ہمارے محکمے کو 700میگا واٹ بجلی کی کمی ہے لہذا سماج کے ہر ایک فرد کو عوام میں شعور اجاگر کرنے کیلئے قلیدی رول ادا کرنا ہوگا۔

مختلف علاقہ جات میں بجلی کی تقسیم کاری نظام کے بارے میں انہوں نے کہا صرف 40 فیصد علاقوں میں میٹر نصب کئے گئے ہیں اور مزکورہ علاقوں میں صارفین بجلی کا مناسب طریقے سے استعمال کررہے ہیں تاہم انہوں نے کہا کہ غیر میٹر والے علاقوں میں غیر قانونی طور پر بجلی کا استعمال ہورہا ہے اور یہی وجہ ہے بجلی کا نظام درہم برہم ہوکے رہ جاتا ہے تاہم انہوں نے کہا کہ مستقبل قریب میں منسلک اداروں کے ملازمین شہر و دیہات کے ہر حصے کو میٹڈ زون کے تحت شامل کرنے کی مہم چلائیں گے اور اس مہم کو مرکزی معاونت والی اسکیم کے تحت اٹھایا جائے گا اور اس عمل سے نہ صرف بجلی کی ضرورت 2200میگاواٹ سے کم ہوکر 1700 میگاواٹ تک رہ جائے گی بلکہ اسے محکمہ کو سالانہ اچھی خاصی آمدنی بھی حاصل ہوگی۔

بجلی کٹوتی شیڈول کے بارے میں چیف انجینئر نے کہا کہ شہر سرینگر میں ہمارے پاس تین سلاٹ ہیں جہاں ہمارے پاس کچھ علاقوں کو چھوڑ کر 1.5گھنٹے کی کٹوتی ہوتی ہے اور بعض اوقات اضافی لوڑنگ کی وجہ سے بجلی سپلائی میں مزید کٹوتی کی جاتی ہے۔ متعدد علاقوں میں گھنٹوں کے اندر ہی خراب پڑے ٹرانسفارمروں کی واپسی کے حکومت کے وعدوں کے بارے میں جب پوچھا گیا تو ڈار نے کہا کہ کچھ ایسے معاملات ہوسکتے ہیں جہاں خراب ٹرانسفارمروں کی بحالی میں کچھ دن لگ جاتے ہیں لیکن حقیقت یہ ہے کہ شہری علاقوں میں ایسے ٹرانسفارمرں کو 24گھنٹوں کے اندر ہی ٹھیک کیا جاتاہے جبکہ دیہی علاقوں کو 48گھنٹوں کے اندر اندر مزکورہ ٹرانسفار واپس مل جاتے ہیں۔کشمیر نیوز سروس کو انہوں نے کہا کہ پی ڈی ڈی کے پاس اس وقت اسٹاک میں 500 نئے ٹرانسفارمر ہیں جبکہ 200کے قریب ٹرانسفارمرں کو پہلے ہی ضرورت مند علاقوں میں تقسیم کیا گیا ہے۔

غیر قانونی اور چوری سے بجلی کے استعمال کرنے والے صارفین کے بارے میں چیف انجینئر اعجاز احمد ڈار نے کہا کہ محکمہ کے پاس ایک خصوصی دستہ ہے جو بجلی کے غلط استعمال،بجلی چوری اور غیر رجسٹرڈ شدہ صارفین کی نگرانی کررہا ہے تاہم انہوں نے کے این ایس کو مزید بتایا ہمارے پاس18 ڈویڑن ہیں جن کے لئے ہم نے 25خصوصی دستے تشکیل دئیے ہیں جو باقاعدگی سے بجلی کے غلط استعمال کا معائنہ کر رہے ہیں۔ انہوں نے یہ بھی کہا کہ آئندہ بھی اس طرح کی مہم جاری رکھی جائے گی۔

چیف انجینئر پاور کارپوریشن نیمزید بتایا کہ محکمہ نے صرف ان کاروباری لوگوں کی سپلائی کاٹ دی ہے جو ڈیفالٹرز ثابت ہوئے تھے تاہم انہوں نے صارفین کو مشورہ دیا کہ جو لوگ ایک ہی وقت میں واجب ادا بجلی فیس ادا نہیں کرسکتے ہیں وہ قسطوں میں بھی ادا کرسکتے ہیں محکمہ میں کام کررہے ڈیلی ویجروں کی التواء میں رکھی گئی اجرتوں اور ڈیوٹی کے دوران زخمی ہونے یا لقمہ اجل بنے کے بعد محکمہ کی جانب سے امداد فراہم کرنے کے بارے میں پوچھے گئے ایک سوال کے جواب میں انہوں نے کہا کہ کے مزدوروں کی زیر التوا اجرتوں کو بحال کرنے اور انکی نوکریوں کی حفاظت کے لئے جلد ہی محکمہ انشورنس پالیسی لے کر آئے گا اور مزکورہ پالیسی کی تجویز حکومت کو پہلے ہی ارسال کی گئی ہے اور اس بارے میں محکمہ پہلے ہی معیاری آپریٹنگ طریقہ کار (ایس پی اوز) تیار کر چکا ہے تاکہ محکمہ میں کام کررہے مزدوروں کے ساتھ کل کوئی اگر ناخوشگوار واقعہ پیش آئے گا انہیں اس انشورنس اسکیم کے زمرے میں لایا جاسکے گا تاہم انہوں نے محکمہ میں سہولیات کو بڑھانے میں وسیع تعاون پر لیفٹننٹ گورنر منوج سنہا کا شکریہ ادا کیا جبکہ صارفین کو معقول بجلی کی فراہمی کے لئے محکمہ کے ملازمین کی دن رات کی ڈیوٹی پر ان کا بھی شکریہ ادا کیا۔ انہوں نے آخر میں صارفین سے بجلی کا منصفانہ طریقے سے استعمال کرنے کے ساتھ ساتھ غیر قانونی طریقوں سے ہوکنگ اور بجلی چوری سے دور رہنے کی اپیل کی۔(کے این ایس)