نئی دہلی، ہندستان نے امریکی کانگریس میں روس-ایران پابندیوں کا قانون منظور ہونے پر ایک محتاط ردِعمل دیتے ہوئے کہا ہے کہ وہ اس معاملے میں آئندہ کی پیش رفت پر نظر رکھے ہوئے ہے اور ملک کی توانائی کی سلامتی کو یقینی بنانے کے لیے پوری طرح سے پرعزم ہے۔

وزارتِ خارجہ نے جمعرات کے روز ایک بیان جاری کر کے کہا کہ ہندستان نے اس معاملے کا نوٹس لیا ہے۔ حکومت اس معاملے کی آئندہ کی صورتِ حال پر گہری نظر رکھے ہوئے ہے۔ وزارت نے کہا کہ ہندستان اپنے 1.4 ارب عوام کی توانائی کی سلامتی کو یقینی بنانے کے لیے مضبوطی سے پرعزم ہے۔ اس کے لیے ہندستان مارکیٹ کے بدلتے ہوئے حالات کے مطابق مختلف ذرائع سے توانائی کی خریداری جاری رکھے گا۔

بیان میں کہا گیا ہے کہ گزشتہ چند مہینوں میں اس مسئلے پر حکومت کی جانب سے مختلف امریکی نمائندوں کے ساتھ اعلیٰ سطح پر گفتگو ہوئی ہے۔ ہندستانی فریق نے اس قانون کے ممکنہ اثرات کو نہ صرف ہندستان-امریکہ دوطرفہ تعلقات بلکہ بین الاقوامی توانائی کی مارکیٹ کے تناظر میں بھی واضح طور پر سامنے رکھا ہے۔

ہندستان نے یہ بھی واضح کیا ہے کہ وہ اپنے تجارتی اور معاشی مفادات کے تحفظ کے لیے تمام ضروری اقدامات کرنے کے لیے پرعزم ہے۔ حکومت نے کہا کہ ان پیش رفت کے اثرات سے نمٹنے کے لیے وہ ہندستانی تجارتی اور صنعتی تنظیموں کے ساتھ مل کر کام کرے گی۔

قابلِ ذکر ہے کہ امریکی پارلیمنٹ کی جانب سے منظور شدہ ‘لنڈسے او۔ گراہم سینکشننگ رشیا اینڈ ایران ایکٹ آف 2026’ روس اور ایران پر سخت معاشی پابندیاں عائد کرنے والا ایک نیا بل ہے۔ اس قانون کے تحت امریکی صدر کو روس سے خام تیل یا قدرتی گیس خریدنے والے سرفہرست پانچ ممالک اور پابندیوں سے بچنے میں مدد کرنے والوں پر 100 فیصد تک درآمدی ڈیوٹی عائد کرنے کا اختیار حاصل ہے۔

یواین آئی۔الف الف

نئی دہلی، ہندوستان نے پاکستان-چین کے نام نہاد مشترکہ سرحدی کمیشن کو پوری طرح مسترد کرتے ہوئے کہا ہے کہ اس کی کوئی قانونی بنیاد نہیں ۔

وزارت خارجہ کے سرکاری ترجمان رندھیر جیسوال نے بدھ کو کہا کہ پاکستان اور چین کے درمیان کوئی سرحد نہیں ہے اور اس نام نہاد مشترکہ کمیشن کی کوئی قانونی بنیاد نہیں ہے۔

انہوں نے کہا کہ جموں و کشمیر اور لداخ کے پورے مرکز کے زیر انتظام علاقے ہندوستان کے اٹوٹ اور ناقابل تقسیم حصے ہیں۔ ترجمان کے مطابق پاکستان کو ہندوستان کے غیر قانونی اور زبردستی قبضے والے علاقوں کے بارے میں کسی طرح کا انتظام کرنے کا کوئی حق نہیں ہے۔

ہندوستان نے 1963 کے نام نہاد ‘چین-پاکستان سرحدی سمجھوتے’ کو بھی کبھی تسلیم نہیں کیا ہے۔ ہندوستان کا کہنا ہے کہ یہ سمجھوتہ غیر قانونی اور باطل ہے۔

ہندوستان نے کہا کہ وہ ان قبضے والے علاقوں کی صورت حال بدلنے یا غیر قانونی قبضے کو درست ٹھہرانے کی کسی بھی کوشش کی مخالفت کرتا ہے۔ ہندوستان کے مطابق، ہندوستانی علاقوں کو لے کر چین اور پاکستان کے درمیان کسی بھی طرح کا نام نہاد سرحدی تعاون قابل قبول نہیں ہے اور اس سے ان علاقوں پر ہندوستان کی خودمختاری پر کوئی اثر نہیں پڑے گا۔

ہندوستان نے پاکستان سے کہا ہے کہ وہ ایسے دکھاوے کے بجائے ہندوستان کے غیر قانونی اور زبردستی قبضے والے علاقوں کو فوری طور پر خالی کرے۔

یو این آئی۔ م س۔ م الف

نئی دہلی، 16 ستمبر (یو این آئی) ہندوستان نے سمندر میں ہندوستانی بحریہ کے ایک یونٹ سے ٹکر کے واقعے کو سنجیدگی سے لیتے ہوئے پاکستان کے یہاں واقع ہائی کمیشن کے ناظم الامور کو طلب کر کے پاکستانی بحری یونٹ کے رویے کو ناقابلِ قبول اور غیر پیشہ ورانہ قرار دیا ہے اور اپنا سخت احتجاج درج کرایا ہے۔

وزارتِ خارجہ نے بدھ کے روز بتایا کہ یہ واقعہ بین الاقوامی سمندری حدود میں پیش آیا تھا اور اس میں کوئی بڑا نقصان نہیں ہوا۔ ہندوستان نے کہا ہے کہ پاکستانی بحری جہاز کا رویہ اپریل 1991ء میں ہندوستان اور پاکستان کے درمیان ہوئے فوجی مشقوں، جنگی مشقوں اور فوجیوں کی آمد و رفت کی پیشگی اطلاع سے متعلق معاہدے کی دفعہ 10 کی براہِ راست خلاف ورزی ہے۔

وزارتِ خارجہ نے پاکستان کے ناظم الامور کو طلب کر کے کہا کہ وہ متعلقہ پاکستانی حکام تک یہ پیغام پہنچائیں کہ تمام فوجی اکائیاں سمندر میں مناسب احتیاط برتیں اور دونوں ممالک کے درمیان نافذ العمل متعلقہ معاہدوں کا احترام کریں، تاکہ ایسے واقعات دوبارہ نہ ہوں۔

وزارتِ خارجہ نے بتایا کہ اس معاملے میں اسلام آباد واقع ہائی کمیشن میں ہندوستان کے ناظم الامور کو بھی پاکستان کی وزارتِ خارجہ کے سامنے اسی طرح کا احتجاج درج کرانے کی ہدایت دی گئی ہے۔

یواین آئی ایف اے