امپار کے اعلیٰ سطحی وفد کی وزیرِ دفاع راجناتھ سنگھ سے ملاقات

نئی دہلی، ملک میں بڑھتی ہوئی سماجی بے چینی، فرقہ وارانہ کشیدگی اور قومی یکجہتی کو درپیش چیلنجز کے تناظر میں انڈین مسلمس فار پروگریس اینڈ ریفارمز (امپار) کے ایک اعلیٰ سطحی وفد نے ڈاکٹر ایم جے خان کی سرپرستی میں مرکزی وزیرِ دفاع راجناتھ سنگھ سے نئی دہلی میں ان کی سرکاری رہائش گاہ پر ایک طویل، بامعنی اور سنجیدہ ملاقات کی۔

اس ملاقات میں کرناٹک کے سابق وزیر و معروف سیاسی رہنما روشن بیگ کی موجودگی کو خصوصی اہمیت حاصل رہی، جنہوں نے ابتدائی گفتگو کرتے ہوئے ملک کے مسلمانوں میں پائے جانے والے احساسِ عدم تحفظ پر گہری تشویش کا اظہار کیا اور کئی اہم نکات کی جانب وزیرِ دفاع کی توجہ مبذول کرائی۔مسٹر روشن بیگ نے کہا کہ ہندوستانی مسلمان ہمیشہ سے ملک کی تعمیر، دفاع اور ترقی میں صفِ اوّل میں رہے ہیں۔ انہوں نے اس بات پر تشویش ظاہر کی کہ بعض حلقوں کی غیر ذمہ دارانہ بیان بازی، نفرت پر مبنی طرزِ فکر اور اشتعال انگیز ماحول سماجی توازن کو نقصان پہنچا رہے ہیں، جس کے نتیجے میں عام شہریوں، بالخصوص اقلیتی طبقات میں عدم تحفظ کا احساس پیدا ہو رہا ہے۔ انہوں نے واضح کیا کہ ریاست کی بنیادی ذمہ داری ہے کہ قانون کی بالادستی کو ہر حال میں یقینی بنایا جائے اور کسی فرد یا گروہ کو قانون اپنے ہاتھ میں لینے کی اجازت نہ دی جائے۔

وفد میں سابق عدالتی شخصیات، دفاعی امور کے ماہرین، سینئر صحافی، دانشورانِ ملت، سماجی کارکنان اور مختلف شعبہ ہائے زندگی سے وابستہ معتبر شخصیات شامل تھیں۔ ملاقات نہایت مثبت، سنجیدہ اور مستقبل رُخ ماحول میں منعقد ہوئی، جس کا مرکز و محور قومی سلامتی، داخلی استحکام، سماجی ہم آہنگی اور آئینی اقدار کا تحفظ رہا۔

وفد نے وزیرِ دفاع کے سامنے اس حقیقت کو واضح کیا کہ ہندوستان ایک کثیر مذہبی، کثیر ثقافتی اور متنوع سماج ہے، جہاں فرقہ وارانہ ہم آہنگی، باہمی احترام اور رواداری ہی داخلی سلامتی کی اصل بنیاد ہیں۔ وفد کا کہنا تھا کہ ایسے وقت میں جب ہندوستان عالمی سطح پر ایک مؤثر اور طاقتور کردار ادا کرنے کی سمت بڑھ رہا ہے، اندرونی انتشار، نفرت انگیز بیانیہ اور سماجی تقسیم نہ صرف قومی اتحاد کو کمزور کرتی ہے بلکہ عالمی سطح پر ملک کی شبیہ کو بھی متاثر کرتی ہے۔

اس موقع پر امپار کے قومی جنرل سکریٹری نثار احمد نے کہا کہ ہندوستان کی طاقت ہمیشہ “کثرت میں وحدت” کے اصول سے پھوٹتی رہی ہے۔ انہوں نے اس بات پر زور دیا کہ سماجی ہم آہنگی کا فروغ محض ایک اخلاقی یا سماجی فریضہ نہیں بلکہ قومی سلامتی کی ایک ناگزیر ضرورت ہے۔ ان کے مطابق ہر شہری کا خود کو محفوظ، باوقار اور ریاست کا برابر کا شریک محسوس کرنا ہی جمہوری استحکام کی حقیقی علامت ہے۔

امپار کے نائب صدر جاوید یونس نے ملک کے مختلف حصوں سے سامنے آنے والے نفرت انگیز واقعات، سماجی اضطراب اور افواہوں کے پھیلاؤ پر تشویش کا اظہار کیا۔ انہوں نے زور دے کر کہا کہ آئینی نظم و ضبط اور قانون کی حکمرانی ہی ایسے تمام رجحانات کا مؤثر اور پائیدار جواب ہیں، اور یہی راستہ قومی مفاد کے عین مطابق ہے۔

انڈیا اسلامک کلچرل سینٹر کے بورڈ آف ٹرسٹیز کے رکن خواجہ محمد شاہد نے کہا کہ امن و امان، فرقہ وارانہ ہم آہنگی اور ریاستی اداروں پر عوامی اعتماد ہی کسی بھی مضبوط اور مستحکم ریاست کی پہچان ہوتے ہیں۔ انہوں نے متنبہ کیا کہ نفرت اور تقسیم پر مبنی سیاست سے اگرچہ وقتی فائدہ حاصل ہو سکتا ہے، مگر اس کے دور رس نتائج قومی سلامتی اور سماجی استحکام کے لیے نقصان دہ ثابت ہوتے ہیں۔

ملاقات کے دوران مرکزی وزیرِ دفاع راجناتھ سنگھ نے وفد کے خیالات کو توجہ اور سنجیدگی سے سنا اور کہا کہ ہندوستان کا اتحاد اور سماجی ہم آہنگی ہی قومی سلامتی کی بنیاد ہیں۔ انہوں نے اس عزم کا اعادہ کیا کہ دستورِ ہند کے تحت مذہب، ذات یا زبان کی بنیاد پر کسی کے ساتھ امتیاز کی گنجائش نہیں، اور حکومت تمام شہریوں کے حقوق، وقار اور تحفظ کے لیے پوری طرح پرعزم ہے۔ وزیرِ دفاع نے اس بات پر بھی زور دیا کہ سماجی رہنماؤں اور شہری تنظیموں کے ساتھ مسلسل مکالمہ وقت کی اہم ضرورت ہے تاکہ مسائل کو بروقت، مثبت اور تعمیری انداز میں حل کیا جا سکے۔

وفد نے اس موقع پر اس بات کا اعادہ کیا کہ ہندوستانی مسلمان نہ صرف ملک کے وفادار شہری ہیں بلکہ قومی اتحاد، امن اور ترقی کے لیے ہر سطح پر تعمیری کردار ادا کرنے کے خواہاں ہیں۔ وفد کے اراکین نے ذمہ دار شہریت، قانون کی پاسداری اور ہر قسم کی انتہا پسندی سے اجتناب کی اہمیت پر زور دیتے ہوئے کہا کہ ہر کمیونٹی کے حقوق اور وقار کا تحفظ ریاست کو کمزور نہیں بلکہ مزید مضبوط بناتا ہے۔

وفد نے حکومت کی جانب سے مکالمے کے اس موقع کو سراہتے ہوئے امن، اتحاد اور قومی یکجہتی کے فروغ کے لیے ادارہ جاتی تعاون اور مسلسل رابطے کے عزم کا اظہار کیا۔

وفد میں شامل نمایاں شخصیات میں سابق ہائی کورٹ جج زیڈ یو خان، دفاعی امور کے ماہر قمر آغا، ڈاکٹر ایم جے خان، روشن بیگ، نثار احمد، جاوید یونس، کرنل اے ایچ خان، سراج قریشی، ڈاکٹر ندا فاطمہ، محترمہ تحسین زیدی، ڈاکٹر تاجور محمد خان، محمد احمد، ڈاکٹر نکہت نقوی، اختر علی خان، اطہر علی، ابراہیم احمد اور دیگر معزز شخصیات شامل تھیں۔

یو این آئی۔ ع ا۔ م الف