سری نگر، پیپلز ڈیموکریٹک پارٹی (پی ڈی پی) کی صدر محبوبہ مفتی نے مرکزی وزیر داخلہ امیت شاہ سے اپیل کی ہے کہ وہ جموں و کشمیر کے ثقافتی شعبے کی بحالی اور اسے مضبوط بنانے کے لیے مداخلت کریں۔

انہوں نے دوردرشن اور آکاشوانی، بالخصوص ڈی ڈی کشمیر پر مقامی پروگراموں کی نشریات کے لیے مختص فنڈز فراہم کرنے اور مشکلات سے دوچار خطے کے فن کاروں کو مسلسل ادارہ جاتی تعاون دینے کا مطالبہ کیا ہے۔

امیت شاہ کو لکھے گئے خط میں محبوبہ مفتی نے زور دیا کہ جموں و کشمیر کے فن کار، موسیقار، ادیب، فلم ساز اور ثقافتی شعبے سے وابستہ افراد محض فن کا مظاہرہ کرنے والے نہیں، بلکہ خطے کے مالا مال ثقافتی ورثے کے محافظ اور ثقافتی سفیر بھی ہیں۔ انہوں نے کہا کہ یہ افراد ہندوستان کی مشترکہ تہذیبی شناخت، امن اور قومی یکجہتی کے فروغ میں اہم کردار ادا کرتے ہیں۔

محبوبہ مفتی نے مطالبہ کیا کہ ڈی ڈی کاشیر اور آکاشوانی کے مراکز کو مناسب اور مخصوص فنڈز فراہم کیے جائیں، تاکہ وہ مقامی زبانوں، لوک روایات، موسیقی، ادب، تھیٹر اور سنیما پر مبنی معیاری پروگرام باقاعدگی سے تیار کرکے نشر کرسکیں۔

فن کاروں کو باعزت اور پائیدار روزگار فراہم کرنے کی ضرورت پر زور دیتے ہوئے انہوں نے مرکزی وزارتِ ثقافت اور دیگر مرکزی ثقافتی اداروں سے بھی اپیل کی کہ مقامی فن کاروں کے لیے خصوصی پروگرام اور مالی اقدامات متعارف کرائے جائیں، تاکہ انہیں مستقل بنیادوں پر اپنی صلاحیتوں کے اظہار کے مواقع حاصل ہوسکیں۔

محبوبہ مفتی نے اپنے خط میں لکھاکہ ”ہمارے فن کاروں کی مدد کرنا اور ثقافتی اداروں کو مضبوط بنانا محض ایک ثقافتی ذمہ داری نہیں، بلکہ ہندوستان کی ثقافتی وحدت، قومی یکجہتی اور ہمارے مالا مال تہذیبی ورثے کے تحفظ میں سرمایہ کاری ہے۔”

محبوبہ مفتی نے اس خط کی نقول مرکزی وزرائے اطلاعات و نشریات اور ثقافت کو بھی روانہ کی ہیں۔ انہوں نے ان سے مشترکہ طور پر مداخلت کرنے کی اپیل کی، تاکہ ثقافتی اداروں کو مستحکم بنایا جاسکے اور جموں و کشمیر کے فن کاروں کو وہ شناخت، وسائل اور پلیٹ فارم فراہم کیے جاسکیں جن کے وہ مستحق ہیں۔

یواین آئی۔ ظ ا

جموں، جموں و کشمیر پولیس نے ایک بڑی کامیابی حاصل کرتے ہوئے ضلع کشتواڑ میں لاپتہ ہونے والے اسپیشل پولیس آفیسر (ایس پی او) کے قتل کا معاملہ حل کرلیا اور اس سلسلے میں دو افراد کو گرفتار کیا ہے۔

پولیس کے ایک ترجمان نے اتوار کو یہاں بتایا کہ ایس پی او بشیر احمد کے اہل خانہ نے 15 اکتوبر کو پولیس چوکی تریگام سے ان کے سرکاری ہتھیار سمیت لاپتہ ہونے کی اطلاع دی تھی۔ اطلاع ملنے کے بعد متعدد پولیس ٹیموں پر مشتمل ایک وسیع تلاشی مہم شروع کی گئی۔

ترجمان نے کہاکہ ”اگلے روز تلاشی مہم کے دوران پولیس نے پہلے ایس پی او کا ہتھیار برآمد کیا اور اس کے بعد تریگام کے جنگلاتی علاقے میں واقع سیران وانی کے مقام پر ایک نالے میں گڑھے سے ان کی لاش برآمد کی، جسے وہاں دفن کیا گیا تھا۔”

انہوں نے مزید بتایا کہ لاش ملنے کے بعد کشتواڑ پولیس اسٹیشن میں متعلقہ قانونی دفعات کے تحت مقدمہ درج کیا گیا۔

تحقیقات کے دوران دو مشتبہ افراد کی شناخت بشیر احمد ڈار اور نذیر احمد ڈار کے طور پر کی گئی۔ دونوں سیران وانی، تریگام کے رہنے والے ہیں۔ ان سے پوچھ گچھ کے دوران ایس پی او کے قتل کی سازش اور اس کے محرکات کا انکشاف ہوا۔

پولیس ترجمان نے کہا کہ ملزمین کی جانب سے فراہم کردہ معلومات کی بنیاد پر واردات میں استعمال ہونے والا ہتھیار اور مقتول کا چھپایا گیا سامان بھی برآمد کرلیا گیا ہے۔

انہوں نے بتایا کہ معاملے میں مزید قانونی کارروائی جاری ہے۔

ضلع کشتواڑ پولیس نے اس عزم کا اعادہ کیا کہ وہ علاقے میں امن و قانون برقرار رکھنے اور مجرموں کو انصاف کے کٹہرے میں لانے کے لیے پرعزم ہے۔

یواین آئی۔ ظ ا

سری نگر، اتوار کی دیر رات پنجاب میں سری نگر جانے والی ایک نجی سلیپر بس کو نامعلوم افراد نے نشانہ بنایا۔ 2 دن کے اندر ایک ہی کمپنی کی بسوں پر پتھراؤ کا یہ دوسرا واقعہ ہے۔

بس کے ڈرائیور اشفاق احمد کے مطابق، تازہ واقعہ رات تقریباً 11 بجے لدھیانہ کے قریب دہلی-جموں شاہراہ پر پیش آیا، جب اسٹار ورلڈ وینچرز کی وولوو بس پر پتھر پھینکے گئے۔

فون پر بات کرتے ہوئے احمد نے کہا کہ اس حملے سے مسافر خوف زدہ ہوگئے، تاہم کسی کے زخمی ہونے کی اطلاع نہیں ہے۔

انہوں نے کہا، ”ہم دہلی سے تقریباً 70 کلومیٹر فی گھنٹہ کی رفتار سے آرہے تھے کہ بس پر پتھر پھینکے گئے۔ تمام مسافر محفوظ ہیں۔ بس کی کھڑکیوں کے شیشے مضبوط ہیں، جس کی وجہ سے مسافروں کو تحفظ ملا۔ بس میں خواتین اور بچوں سمیت 38 مسافر سوار تھے۔”

واقعے کے بعد ڈرائیور نے بس روک دی اور پنجاب پولیس کو اطلاع دی۔

حکمراں نیشنل کانفرنس کے رہنما عمران ڈار نے اس حملے کو تشویش ناک خبر قرار دیا۔

یہ واقعہ اس کے ایک دن بعد پیش آیا ہے، جب جموں و کشمیر سے مسافروں کو لے جانے والی اسی کمپنی کی ایک دوسری بس پر ہفتے کی رات ہریانہ کے کرنال ضلع میں سڑک کنارے واقع ایک ڈھابے پر پتھر اور اینٹوں سے حملہ کیا گیا تھا۔ اس حملے میں ایک مسافر اور ایک کارکن زخمی ہوگئے تھے، جبکہ واقعے کے سلسلے میں 2 افراد کو گرفتار کیا گیا تھا۔ کرنال پولیس نے دعویٰ کیا تھا کہ معاملہ پارکنگ کے تنازعے سے شروع ہوا تھا اور اس میں نفرت پر مبنی جرم کا کوئی پہلو نہیں تھا۔ بس کے ڈرائیور نے الزام لگایا تھا کہ گاڑی کا رجسٹریشن نمبر دیکھنے کے بعد حملہ آوروں نے اسے ”دہشت گرد” کہا تھا۔

ہریانہ میں ہوئے حملے کے بعد کشمیر میں بڑے پیمانے پر تشویش پیدا ہوگئی تھی اور سیاسی و مذہبی رہنماؤں نے ذمہ دار افراد کے خلاف سخت کارروائی کا مطالبہ کیا تھا۔

جموں و کشمیر کے وزیر اعلیٰ عمر عبداللہ نے اس واقعے کی مذمت کی اور ہریانہ حکومت سے ملزمین کے خلاف کارروائی کرنے کا مطالبہ کیا۔

یو این آئی، ایم جے