نئی دہلی، ہندوستانی محکمہ موسمیات (آئی ایم ڈی) نے ہفتہ کو تمل ناڈو، پڈوچیری اور جنوبی اندرونی کرناٹک کے کچھ علاقوں میں شدید بارش کی وارننگ جاری کی ہے۔ اس کے ساتھ ہی اگلے 6 سے 7 دنوں تک کئی جنوبی ریاستوں میں وسیع پیمانے پر بارش اور آندھی طوفان کا سلسلہ جاری رہنے کا امکان ہے۔

آئی ایم ڈی نے ہفتہ کی صبح جاری اپنے موسم سے متعلق بلیٹن میں 17 سے 20 اکتوبر کے درمیان تمل ناڈو، پڈوچیری اور کرائیکل میں، جبکہ 17 اکتوبر کو جنوبی اندرونی کرناٹک میں بعض مقامات پر شدید بارش ہونے کی پیش گوئی کی ہے۔

موسم کی پیش گوئی کے مطابق 17 سے 23 اکتوبر تک کیرالہ اور ماہے میں، 17 سے 19 اکتوبر تک ساحلی کرناٹک میں، 18 سے 23 اکتوبر تک جنوبی اندرونی کرناٹک میں اور 20 سے 23 اکتوبر تک لکشدیپ میں شدید بارش ہونے کا امکان ہے۔ ساحلی آندھرا پردیش اور رائل سیما میں 17 اور 18 اکتوبر کو شدید بارش ہو سکتی ہے، جبکہ 21 سے 23 اکتوبر کے دوران تمل ناڈو، پڈوچیری اور کارائیکل میں بعض مقامات پر شدید بارش ہونے کی پیش گوئی کی گئی ہے۔

آئی ایم ڈی کے مطابق، 17 سے 22 اکتوبر کے درمیان ساحلی کرناٹک، کیرالہ، ماہے، لکشدیپ، جنوبی اندرونی کرناٹک، تمل ناڈو، پڈوچیری اور کرائیکل میں تیز سے لے کر بہت تیز بارش ہونے کا امکان ہے۔ تمل ناڈو، پڈوچیری اور کرائیکل میں 17 سے 22 اکتوبر کے دوران آندھی طوفان کے ساتھ بجلی گرنے اور 40 سے 50 کلومیٹر فی گھنٹہ کی رفتار سے تیز ہوائیں چلنے کا امکان ہے، جن کی رفتار کبھی کبھی 60 کلومیٹر فی گھنٹہ تک پہنچ سکتی ہے۔

ساحلی آندھرا پردیش اور رائل سیما میں بھی 17 اور 18 اکتوبر کو اسی طرح کے حالات رہنے کی امید ہے۔ ان دنوں کیرالہ، کرناٹک اور تلنگانہ میں بھی آندھی طوفان آسکتا ہے، جس کے دوران ہواؤں کی رفتار 30 سے 40 کلومیٹر فی گھنٹہ رہ سکتی ہے اور کبھی کبھی یہ 50 کلومیٹر فی گھنٹہ تک پہنچ سکتی ہے۔

محکمہ موسمیات کے مطابق، موجودہ موسمی حالات کے پیچھے بالائی فضا میں بننے والے کئی نظام ہیں۔ ان میں شمالی تمل ناڈو اور اس سے ملحق جنوبی ساحلی آندھرا پردیش کے اوپر بنا ایک گردابی نظام شامل ہے، جو سمندر کی سطح سے 5.8 کلومیٹر کی بلندی تک پھیلا ہوا ہے۔ اس کے علاوہ شمالی لکشدیپ کے اوپر بھی ایک گردابی نظام بنا ہوا ہے اور شمالی کیرالہ، جنوبی اندرونی کرناٹک اور شمالی تمل ناڈو سے گزرتے ہوئے مغرب وسطی خلیج بنگال کی جانب ایک کم دباؤ کا خطہ بھی پھیلا ہوا ہے۔

جاری۔یو این آئی۔ این یو۔

نئی دہلی، وزیرِ خارجہ ایس جے شنکر 20 اکتوبر کو امریکہ کے وزیرِ خارجہ مارکو روبیو سے ممبئی میں ملاقات کریں گے اور اس دوران دونوں ممالک کے تعلقات کے جائزے کے ساتھ ساتھ جامع عالمی اسٹریٹجک شراکت داری پر تبادلۂ خیال ہوگا۔

مسٹر جے شنکر 19 اور 20 اکتوبر کو ممبئی میں ہی متحدہ عرب امارات (یو اے ای) کے نائب وزیرِ اعظم اور وزیرِ خارجہ شیخ عبداللہ بن زاید آل نہیان کے سرکاری دورے کی بھی میزبانی کریں گے۔

وزارتِ خارجہ کے سرکاری ترجمان رندھیر جیسوال نے جمعہ کے روز یہاں میڈیا بریفنگ میں وزیرِ خارجہ کے ممبئی کے پروگراموں سے متعلق سوالات کے جواب میں یہ معلومات فراہم کیں۔

ترجمان نے کہا، “وزیرِ خارجہ 19 اور 20 اکتوبر کو ممبئی میں متحدہ عرب امارات (یو اے ای) کے نائب وزیرِ اعظم اور وزیرِ خارجہ عبداللہ بن زاید آل نہیان کے سرکاری دورے کی میزبانی کریں گے۔ وزیرِ خارجہ ممبئی میں 20 اکتوبر کو امریکہ کے وزیرِ خارجہ مارکو روبیو کے ساتھ بات چیت کریں گے اور امریکہ کی آزادی کے 250 ویں سالگرہ کی تقاریب میں بطورِ مہمانِ خصوصی شرکت کریں گے۔”

انہوں نے کہا کہ امریکی وزیرِ خارجہ کے آنے والے دورے سے دونوں ممالک کوہندوستان امریکہ تعلقات کا جائزہ لینے اور اپنی جامع عالمی اسٹریٹجک شراکت داری کو مزید مضبوط بنانے کے طریقوں پر بحث کرنے کا موقع ملے گا۔ بات چیت میں دوطرفہ تعاون کے اہم شعبے شامل ہونے کی امید ہے۔ ان میں توانائی، تجارت اور سرمایہ کاری، دفاع، اہم اور ابھرتی ہوئی ٹیکنالوجی اور باہمی دلچسپی کے دیگر شعبے شامل ہیں۔ دونوں فریق علاقائی اور عالمی صورتحال پر بھی اپنے خیالات کا تبادلہ کریں گے۔ انہوں نے کہا کہ یہ دورہ دونوں ممالک کے درمیان اعلیٰ سطحی گفتگو کو جاری رکھنے اور مشترکہ ترجیحات کو آگے بڑھانے کا موقع فراہم کرے گا۔

مسٹر جے شنکر اور مسٹر روبیو کے درمیان دارالحکومت دہلی کے بجائے ممبئی میں بات چیت ہونے کے بارے میں پوچھے گئے سوال کے جواب میں مسٹر جیسوال نے کہا کہ گزشتہ ایک دہائی سے یہ روایت رہی ہے کہ وقت وقت پر ہندوستان کے مختلف شہروں میں غیر ملکی شخصیات کی میزبانی کی جاتی رہی ہے۔

وزیرِ اعظم نے اسپین کے وزیرِ اعظم کی وڈودرا میں، جرمنی کے چانسلر مرز کی احمد آباد میں اور ماریشس کے وزیرِ اعظم کی وارانسی میں میزبانی کی تھی۔ اس کے علاوہ وزیرِ خارجہ نے شنگھائی تعاون تنظیم کے وزرائے خارجہ کے اجلاس کی گوا میں، بوتسوانا کے وزیرِ خارجہ کی کیوڑیا میں اور ہارٹ آف ایشیا کانفرنس کی امرتسر میں میزبانی کی تھی۔

شیخ آل نہیان کے دورے کے بارے میں ترجمان نے کہا کہ ان کے دورے سے ہندوستان-یو اے ای جامع اسٹریٹجک شراکت داری کے تحت دوطرفہ تعاون کے تمام پہلوؤں کا جائزہ لینے کا موقع ملے گا۔ دونوں ممالک کے وفود توانائی، تجارت اور سرمایہ کاری، فن ٹیک، دفاع اور کنیکٹیویٹی کے شعبوں میں کی گئی پہلوؤں کا جائزہ لیں گے اور انہیں آگے بڑھائیں گے۔ انہوں نے کہا کہ اس کے ساتھ ہی مغربی ایشیا کی صورتحال کے ساتھ ساتھ عالمی اور کثیر جہتی مسائل پر بھی تفصیل سے خیالات کا تبادلہ کیا جائے گا۔

یو این آئی ایف اے

نئی دہلی، مرکزی وزیرِ داخلہ امت شاہ نے پنجاب میں منشیات کے خلاف آواز اٹھانے والے پرویندر سنگھ جھوٹا کے قتل پر ریاست کی برسرِ اقتدار عام آدمی پارٹی کو نشانہ بناتے ہوئے کہا ہے کہ وزارتِ داخلہ اس واقعے پر ریاستی حکومت سے جواب طلب کرے گی۔

مسٹر شاہ نے جمعہ کے روز سوشل میڈیا پلیٹ فارم پر ایک پوسٹ میں پنجاب میں منشیات کے نیٹ ورک پر فیصلہ کن ضرب لگانے اور مجرموں کو ملنے والی کسی بھی سیاسی سرپرستی کی غیر جانبدارانہ جانچ کرانے کا بھی مطالبہ کیا۔ انہوں نے کہا، “پنجاب آج منشیات، گینگسٹرزم اور منظم جرائم کے بڑھتے ہوئے خطرے سے جوجھ رہا ہے۔ بھگونت مان حکومت کے سامنے سب سے بڑا سوال یہ ہے کہ آخر پنجاب کے عوام کی سلامتی کی ذمہ داری کون نبھائے گا؟”

پنجاب کے دڑبا میں اپنے بیٹے کے منشیات سے جڑے معاملے میں آواز اٹھانے کے بعد سیاست دانوں کے دباؤ میں ایک باپ کے زہر کھا لینے اور پرویندر جھوٹا کے قتل کا ذکر کرتے ہوئے انہوں نے کہا، “دڑبا میں ایک باپ کا دباؤ میں زہر کھا لینا اور مانسا میں منشیات کے خلاف آواز اٹھانے والے پرویندر سنگھ جھوٹا کا دن دہاڑے قتل پنجاب کی امن و امان کی صورتحال پر سنگین سوالات کھڑے کرتا ہے۔ پرویندر کے والد نے عام آدمی پارٹی حکومت اور ان کے ایم ایل اے پر سنگین الزامات عائد کیے ہیں۔ وزارتِ داخلہ بھی ان دونوں واقعات پر پنجاب حکومت سے جواب مانگے گی۔”

مسٹر شاہ نے کہا کہ پنجاب میں منشیات کا کاروبار پھل پھول رہا ہے، منظم جرائم کا خطرہ بڑھ رہا ہے اور منشیات کے خلاف آواز اٹھانے والوں کے تحفظ پر سوالات کھڑے ہو رہے ہیں۔ انہوں نے کہا، “بھگونت مان جی! پنجاب کے عوام کو تشہیر نہیں، جواب چاہئے؛ اعلانات نہیں، نتائج چاہئیں؛ منشیات کے نیٹ ورک پر فیصلہ کن ضرب اور مجرموں کو ملنے والی کسی بھی سیاسی سرپرستی کی غیر جانبدارانہ جانچ چاہئے۔”

پنجاب میں حکومت بننے کے بعد ریاست کو منشیات سے پاک کرنے کا عزم دہراتے ہوئے انہوں نے کہا، “میں آج پنجاب کے عوام کے سامنے اپنا عزم دہراتا ہوں کہ پنجاب میں ہماری حکومت بننے پر ہم منشیات سے پاک، گینگسٹرز سے پاک اور محفوظ پنجاب بنانے کے لیے پوری طاقت سے کام کریں گے۔ ہمارا ہدف واضح ہے – منشیات کے کاروبار پر ضرب، نوجوانوں کے مستقبل کا تحفظ، مجرموں پر سخت کارروائی اور قانون کی ایسی حکمرانی جس میں کوئی بھی شہری خوف کے سائے میں جینے پر مجبور نہ ہو۔”

یو این آئی ایف اے