خبراردو:
جواہرٹنل کے آرپارتازہ برف باری اورمتواتربارشیں ہونے کے باعث سری نگرجموں شاہراہ کوپھرایک مرتبہ بندکردیاگیاجسکے نتیجے میں سینکڑوں مسافراورمال بردارگاڑیاں مختلف مقامات پردرماندہ پڑی ہیں۔ اس دوران سادھناٹاپ،فرکیاں اورزیڈگلی پرتازہ برف باری ہونے کے بعدکپوارہ کرناہ شاہراہ کوبھی بندکردیاگیا۔خیال رہے موسم سرماکی پہلی برف باری ہونے کے بعدسرینگرلیہہ شاہراہ ،گریزبانڈی پورہ شاپراہ اورمغل روڑماہ ٹریفک کی نقل و حمل کے لیے بند کردئے گئے ہیں۔تازہ برف باری اور بارشیں ہونے کے بعدسری نگرسمیت وادی کے سبھی ضلعی و تحصیلی صدرمقامات کی سڑکوں ،گلیوں اوربازاروں میں پانی جمع ہوجانے کے باعث لوگوں کوعبورومرورمیں سخت مشکلات کاسامناکرناپڑا۔اس دوران محکمہ موسمیات نے جموں ،کشمیراورلداخ کے میدانی وبالائی علاقوں میں متواتربارش اورہلکی تادرمیانہ درجے کی برف باری ہونے کی تصدیق کرتے ہوئے یہ امکان ظاہرکیاکہاتوارتک موسمی صورتحال پھرمعمول پرآجائیگی۔ موسمیاتی ماہرین کی پیشگوئی کے عین مطابق جمعہ اور سنیچر کی درمیانی شب سے کشمیروادی کے کئی حصوں ،خطہ چناب ،خطہ پیرپنچال ،جموں اورلداخ خطے میں موسمی صورتحال نے کروٹ لی ،اورمیدانی علاقوں میں بارشوں کاسلسلہ ہونے کیساتھ ہی بالائی علاقوں میں تازہ برف باری ہوئی۔

معلوم ہواکہ سرحدی تحصیل ٹنگڈارکوضلعی کپوارہ سے جوڑنے والی اس واحدشاہراہ کے بالائی مقامات پرتازہ برف باری ہوئی جبکہ نزدیکی علاقوں میں بارشیں بھی ہوئیں ،اس وجہ سے سنیچرکی صبح اس پْرخطر شاہراہ کوبندکردیاگیااورکسی بھی گاڑی کوسفرکی اجازت نہیں دی گئی۔کپوارہ پولیس کے ذرائع نے بتایاکہ سادھناٹاپ جیسے مقامات پرتازہ برف بارہ ہوجانے کے بعدکرناہ ،کپوارہ شاہراہ کوبندکیاگیا۔انہوں نے کہاکہ تازہ برف باری اوربارشیں ہوجانے کے بعدکرناہ ،کیرن،مڑھل اورٹنگدارجیسے بالائی علاقوں کازمینی رابطہ کپوارہ سے کٹ کررہ گیاہے۔ذرائع نے بتایاکہ تازہ برف باری اور بارشیں ہونے کے بعد برفانی ومٹی کے تودے ،پسیاں وچٹانیں گرآنے کااندیشہ بڑھ گیاہے ،اسلئے صورتحال کامکمل جائزہ لینے کے بعدہی کپوارہ ،کرناہ شاہراہ کوگاڑیوں کیلئے کھول دیاجائیگا۔ ٹنگڈار کپوارہ اور سادھنا ٹاپ کو تازہ بارف باری کے نتیجے میں ٹریفک کی نقل و حمل کے لیے بند کردیا گیا ہے۔ انہوں نے بتایا کہ سادھنا ٹاپ پر 1فٹ برف باری ریکارڈ کی گئی ہے جبکہ زیڈ موڈ پر بھی 1فٹ برف جمع ہوئی ہے۔ نمائندے نے بتایا کہ سرحدی اضلاع میں تازہ برف باری کے نتیجے میں یہاں معمولات زندگی بری طرح سے متاثر ہوئے ہیں۔ انہوں نے کہا کہ کپوارہ ، اوڑی، کرناہ، ٹنگڈار وغیرہ علاقوں میں گزشتہ دو دنوں سے بجلی کا کہی نام و نشان نہیں ہے جبکہ کئی دنوں سے یہاں موبائل ٹاؤروں نے بھی کام کرنا چھوڑ دیا ہے۔ انہوں نے بتایا کہ کہ بجلی کی نایابی کی وجہ سے ضلع بھر میں طبی سہولیات بری طرح سے متاثر ہوئی ہیں جس کے نتیجے میں مریضوں کو سخت مشکلات کا سامنا کرنا پڑ رہا ہے۔ انہوں نے کہا کہ ہسپتالوں میں بجلی کی عدم دستیابی کی وجہ سے مختلف تشخیصی ٹیست نہ ہونے کے نتیجے میں ہسپتالوں سے مریض مایوس لوٹ رہے ہیں۔

ادھر شہر سرینگر سمیت وادی کے دیگر اضلاع و تحصیل صدر مقاما ت گزشتہ رات سے جاری بارشوں اور برف باری کے نتیجے میں سڑکیں اور گلی کوچے زیر آب آگئی ہیں۔ شہر کے تجاری مرکز لعل چوک، ریگل چوک، ہری سنگھ ہائی سٹریٹ، امیر کدل، پولو ویو، ریذیڈنسی روڑ، نمائشی، مگر مل باغ سمیت متعدد علاقوں میں بارشوں کا پانی جمع ہونے کے نتیجے میں لوگوں کو سخت مشکلات کا سامنا کرنا پڑرہا ہے سنیچر صبح سے جاری برف باری نے حکومتی دعوؤں کی پول کھول کر رکھ دی ہے کیوں کہ شہر سرینگر کے تجارتی مرکز میں ہر سو پانی نظر آرہا ہے جس کی نکاسی کے لیے سرکار اور انتظامیہ کی طرف سے کوئی اقدام نہیں اُٹھایا گیا۔

ادھر وادی کے دیگر اضلاع و تحصیل صدر مقامات پر بھی سڑکیں زیر آب آگئی ہیں جس کے نتیجے میں یہاں بھی لوگوں کے چلنے پھرنے میں دشواریاں آرہی ہیں۔ اس دوران عوامی حلقوں میں حکومت کی طرف سے بار بار کئے جارہے دعوؤں کو لے کر سخت ناراضگی پائی جارہی ہے۔ لوگوں نے بتایا کہ اگر چہ فی الوقت ریاست کی کرسی پر گورنر براجمان ہے تاہم ان کے ہوتے ہوئے بھی یہاں کی زمینی صورتحال میں کوئی تبدیلی دیکھنے کو نہیں مل رہی ہے۔ انہوں نے بتایا کہ گزشتہ ایک روز سے بوندا باندی کے نتیجے میں شہر سرینگر میں بجلی کا کہیں نام و نشان نہیں ہے جبکہ چند انچ برف گرنے کے بعد سڑکیں ندی نالوں میں تبدیل ہوئی ہے۔ انہوں نے بتایا کہ لوگوں کی نقل و حرکت کو یقینی بنانے کے لیے حکومت نے اپنی مشنری کو الرٹ رکھنا چاہیے تھا تاہم ہر بار کی طرح اس مرتبہ بھی صورتحال جوں کی توں ہے۔ادھر موسم میں اچانک تبدیلی کی وجہ سے سرینگر ائرپورٹ پر بھی پروازوں کی آواجاہی میں خلل واقع ہوا۔ ائر ذرائع نے بتایا کہ رن وے پر کم روشنی اور برف باری کی وجہ سے پروازوں کو منسوخ کرنا پڑا ۔ انہوں نے بتایا کہ جونہی موسم میں نمایاں تبدیلی دیکھنے کو ملے گی تو ائر پورٹ انتظامیہ رن وے پر پروازوں کی آواجاہی کو بحال کرے گی۔