خبراردو:

ریاستی گورنرستیہ پال ملک نے اننت ناگ ، بارہمولہ ، راجوری ، ڈوڈہ اور کٹھوعہ اضلاع میں 5نئے میڈیکل کالج شروع ہونے میں ہوئی تاخیرکاسخت نوٹس لیتے ہوئے صحت وطبی تعلیم کے اعلیٰ حکام کویہ ہدایات دی ہیں کہ وہ ان کالجوں کوچالوکرانے کیلئے درکارتمام انتظامات کواب بلاتاخیرمکمل کریں ۔ذرائع نے بتایاکہ بدھ کوسرمائی راجدھانی جموں میں طلب کردہ ایک اعلیٰ سطحی میٹنگ کے دوران گورنرایس پی ملک نے تعمیراتی ایجنسیوں بالخصوص جے کے پی سی سی کے افسروں کوہدایت دی کہ میڈیکل کالجوں کیلئے درکارعمارات اوردیگرتعمیراتی کاموں کوفوراًسے پیشترمکمل کیاجائے ۔اسکے ساتھ ہی ریاستی گورنر نے صحت وطبی تعلیم اورمختلف بھرتیوں ایجنسیوں کویہ ہدایت دی کہ پانچ نئے میڈیکل کالجوں کیلئے درکار افسروں ،منتظمین ومدرسین اوردیگرعملہ کی بھرتی عمل میں لانے کاکام جلدپوراکیاجائے ۔معلوم ہواکہ میٹنگ کے دوران حکام نے گورنرموصوف کوبتایاکہ مرکزی سرکارنے ریاست میں 5نئے میڈیکل کالجوں کاقیام عمل میں لانے کیلئے کل 945کروڑروپے کی رقم منظورکی ہے ،اوراب تک اس رقم کازیادہ ترحصہ مرکزنے واگزارکردیاہے ۔حکام کاکہناتھاکہ ہرمیڈیکل کالج پربرابری کی بنیادپرفی کالج189کروڑروپے خرچ ے جائیں گے ۔انہوں نے بتایاکہ مختص کردہ رقم یعنی189کروڑروپے میں سے ،69کروڑدرکارعمارات کی تعمیرپرخر چ ہونگے جبکہ 50کروڑروپے کی رقم ضروری سامان اورمشینری خریدنے پرصرف کی جائے گی ۔انہوں نے مزیدبتایاکہ ہرمیڈیکل کالج میں ہوسٹلوں کی تعمیرویہاں دگرسہولیات پر40کروڑروپے خرچ کئے جارہے ہیں جبکہ کالجوں میں مختلف تعلیمی وتدریسی شعبوں پرفی کالج30کروڑروپے کی رقم صرف کی جائیگی ۔گورنرکویہ بھی جانکاری فراہم کی گئی کہ ہرنئے میڈیکل کالج کیساتھ 500بستروں والاایک اسپتال بھی ہوگا۔

معلوم ہواکہ پانچ نئے میڈیکل کالجوں میں میڈیکل نشستوں کی کل تعدادیاصلاحیت500ہوگی ،اورہرکالج میں 100طلباء وطالبات کوایم بی بی ایس کورس کیلئے داخلہ دیاجائیگا۔ذرائع نے بتایاکہ اگلے سال یعنی2019کے اوائل میں یہ پانچ نئے میڈیکل کالج چالوکرنے کیلئے میڈیکل کونسل آف انڈیاسے رجوع کیاجائیگا،اورایم سی آئی کے ماہرین کی ٹیم اننت ناگ ،بارہمولہ ،راجوری ،ڈوڈہ اورکٹھوعہ کادورہ کرکے یہاں میڈیکل کالجوں کیلئے تعمیرکردہ عمارات ،دیگرلازمی سہولیات ،سامان ومشینری اوردرکارتدریسی وغیرتدریسی عملہ کی بھرتی کاازخودجائزہ لے گا۔ذرائع نے بتایاکہ میڈیکل کونسل آف انڈیاکی جانب سے منظوری اوراجازت ملنے کے فوراًبعدریاست میں قائم پانچوں نئے میڈیکل چالوکئے جائیں گے ،اوران کالجوں میں میڈیکل کورسزکیلئے اہل اُمیدواروں کوداخلہ دینے کا عمل شروع کیاجائیگا۔انہوں نے کہاکہ اگرسب کچھ بغیرکسی رکاؤٹ کے آگے بڑھاتوعین ممکن ہے کہ جولائی 2019میں پانچوں نئے میڈیکل کالج چالوکئے جائیں گے ،اوریہاں 500طلاب کوداخلہ دیکردرس وتدریس کاعمل شروع کیاجائیگا۔

محبوبہ مفتی کی سربراہی والی سابق مخلوط سرکارنے سال2018میں ہی پانچوں میڈیکل کالج چالوکرنے کافیصلہ لیاتھالیکن درکاربنیادی ڈھانچے کی تیاری میں تاخیراوردیگرلازمی انتظامات وسہولیات مکمل نہ ہونے کی بناء پرایسانہیں ہوسکا۔ ذرائع کامزیدکہناتھاکہ پانچ نئے میڈیکل کالجوں میں کل3375افسروں ،منتظمین ومدرسین اوردیگرعملہ کی بھرتی عمل میں لائی جارہی ہے ۔بدھ کوجموں میں ریاستی گورنرکی زیرصدارت میٹنگ کے دوران حکام نے بتایاکہ اننت ناگ ، بارہمولہ ، راجوری ، ڈوڈہ اور کٹھوعہ اضلاع میں5نئے میڈیکل کالجوں پر کام شدو مد سے جاری ہے اور ان پروجیکٹوں کو وقت پر مکمل کیا جائے گا۔ انہوں نے کہا کہ کالجوں کیلئے تمام آسامیاں معرض وجود میں لائی گئی ہیں اور اُنہیں بھرتی ایجنسیوں کو بھیج دیا گیاہے تا کہ اُنہیں تیز تر بنیادوں پر پُر کیا جا سکے اور اگلے تدریسی سیشن سے کالجوں میں پہلا بیچ شروع کیا جا سکے ۔حکام نے بتایاکہ ڈاکٹروں کی کمی کو پورا کرنے کیلئے میڈیکل افسروں کی ایک ہزار آسامیاں پی ایچ سی کو ریفر کی گئی ہیں جنہیں جلد از جلد پُر کیا جائے گا ۔میٹنگ میں ریاستی پبلک سروس کمیشن کے چیئرمین لطیف الزمان دیوا نے بتایا کہ5میڈیکل کالجوں کیلئے فیکلٹی ممبران کی بھرتی کا کام تدریسی سیشن شروع کرنے سے پہلے مکمل کیا جائے گا ۔