وزیراعظم کا بغیرکسی پیشگی پروگرام کے منگل کی صبح پنجاب میں واقع آدم پور ایئر بیس پہنچنے پروالہانہ استقبال
ہندوستان ہمیشہ اپنی بہادر افواج کا شکر گزار رہے گا
’بھارت ماتا کی جئے صرف ایک نعرہ نہیں، ملک کے سپاہیوں کا قوم کےلئے اپنی زندگیاں وقف کرنے کا عہد‘
سری نگر :جے کے این ایس: وزیر اعظم نریندر مودی نے منگل کی صبح پنجاب کے آدم پور ایئر بیس کا دورہ کیا اور فضائیہ کے افسروں و اہلکاروں سے بات چیت کرتے ہوئے اُن کی بہادری اور پیشہ ورانہ صلاحیتوںکی تعریف کی۔حکام کے مطابق پاکستان نے 9اور10مئی کی درمیانی رات آدم پور ائربیس کونشانہ بنانے کی کوشش کی تھی۔وزیراعظم مودی نے کہاکہ آپریشن سندور کے بعد ہمارے فوجیوں کی بہادری کی داستانیں ہمیشہ کےلئے تاریخ میں ثبت ہوئی ہیں۔جے کے این ایس مانٹرینگ ڈیسک کے مطابق وزیر اعظم نریندر مودی منگل کو صبح سویرے آدم پور ایئر بیس گئے، انہیں ایئر فورس کے افسروںنے یہاںبریفنگ دی۔وزیر اعظم نے بھارتی فضائیہ کے بہادر جوانوں سے بات چیت بھی کی۔

وزیراعظم مودی کا دورہ ہندوستان اور پاکستان کے درمیان7 مئی کو آپریشن سندور کے تحت پڑوسی ملک میں دہشت گردی کے مقامات پر ہندوستانی حملوں کے بعد شدید تنازعات کے بعد آیا ہے۔بغیرکسی پیشگی پروگرام کے منگل کی صبح آدم پور ایئر بیس کے بعد وزیراعظم مودی نے آپریشن سندور کے تحت پاکستان کوسبق سکھانے اوراسکے عزائم کو ناکام بنانے پر بھارتی فضائیہ کے افسروں اور جوانوں کی تعریف کی ۔پنجاب کے آدم پور ایئر بیس پر فضائیہ کے اہلکاروں سے خطاب کرتے ہوئے وزیر اعظم نریندر مودی نے زور دےکر کہا کہ بھارت ماتا کی جئے صرف ایک نعرہ نہیں ہے بلکہ ملک کے سپاہیوں کا قوم کے لیے اپنی زندگیاں وقف کرنے کا عہد ہے۔وزیراعظم نے کہاکہ آپریشن سندور کے بعد ہمارے فوجیوں کی بہادری کی داستانیں ہمیشہ کےلئے تاریخ میں ثبت ہوئی ہیں۔

وزیراعظم مودی نے کہا کہ جب ہماری مسلح افواج نیوکلیئر بلیک میلنگ سے باہر نکلتی ہیں تو ہمارے دشمن ’بھارت ماتا کی جئے‘ کی اہمیت کو سمجھتے ہیں۔انہوںنے فضائیہ کے افسروں اورجوانوں سے مخاطب ہوتے ہوئے کہاکہ آپ کی بہادری کی داستانیں ہمیشہ کے لیے تاریخ میں لکھی جائیں گی۔وزیر اعظم نریندر مودی نے کہاکہ میں اپنی فوج، فضائیہ اور بحریہ کے جوانوں کو سلام پیش کرتا ہوں۔بھارت اور پاکستان نے 10 مئی کو فوجی کارروائیاں روکنے پر اتفاق کیا۔ تاہم وزیراعظم مودی نے پیرکی شام قوم سے خطاب کے دوران یہ واضح کیا ہے کہ بھارت نے محض اپنا آپریشن روک دیا ہے اور اس کے اقدامات پاکستان کے طرز عمل سے رہنمائی حاصل کریں گے۔وزیراعظم نریندر مودی نے ایکس پر ٹوئٹ کیا کہ آج صبح، میں اے ایف ایس آدم پور گیا اور اپنے بہادر فضائیہ کے سپاہیوں سے ملا۔ ان کے ساتھ رہنا ایک بہت ہی خاص تجربہ تھا جو ہمت، عزم اور بے خوفی کی مثال قائم کرتے ہیں، بھارت، ہمیشہ ہماری مسلح افواج کے ہر اس کام کے لیے شکر گزار ہے جو وہ ہماری قوم کے لیے کرتے ہیں۔پیر کو وزیر اعظم نریندر مودی نے قوم سے خطاب کرتے ہوئے کہا تھا کہ ’فورسز کو دہشت گردوں کا صفایا کرنے کی مکمل آزادی دی گئی ہے‘۔

انہوں نے کہا کہ ہر دہشت گرد تنظیم اب یہ جان چکی ہے کہ ہماری بہنوں، بیٹیوں اور ماں کے سندور کی قیمت کیا ہے‘۔ وزیر اعظم مودی نے کہا کہ بھارتی فضائیہ، آرمی نیوی، بارڈر سیکورٹی فورس اور بھارت کی نیم فوجی دستے مسلسل چوکس ہیں۔واضح رہے کہ 22 اپریل کو جموں و کشمیر کے پہلگام میں دہشت گردانہ حملہ کے جواب میں بھارت نے آپریشن سندور کے تحت پاکستان اور پاکستان کے زیر قبضہ کشمیر کے9 مقامات پر میزائیل حملوں کے ذریعہ دہشت گردوں کے ٹھکانوں کو نشانہ بنایا گیا تھا، جس کے بعد دونوں ممالک کے درمیان جنگ جیسی صورتحال پیدا ہوگئی تھی تاہم بعد میں10مئی کو جنگ بندی کا اعلان کیا گیا،اور12مئی کو دونوں ملکوںکے ڈائریکٹر جنرل ملٹری آپریشنز نے جنگ بندی پر سختی کیساتھ عمل درآمد جاری رکھنے کیساتھ ساتھ سرحدوں پر تعینات اپنی افواج کی تعدادمیں کمی لانے پر بھی اتفاق کیا۔