سری نگر، ہندوستان میں امریکہ کے سفیر اور جنوبی و وسطی ایشیا کے لیے خصوصی ایلچی سرجیو گور بدھ کو کشمیر پہنچیں گے۔ یہ رواں سال کے اوائل میں عہدہ سنبھالنے کے بعد مرکز کے زیر انتظام علاقے جموں و کشمیر کا ان کا پہلا دورہ ہوگا۔

سرکاری ذرائع نے بتایا کہ سفیر بدھ کی دوپہر سری نگر پہنچیں گے اور قیام کے دوران جموں و کشمیر کے لیفٹیننٹ گورنر منوج سنہا اور وزیر اعلیٰ عمر عبداللہ سے ملاقات کرنے کی توقع ہے۔

ذرائع نے بتایا کہ مسٹر گور سری نگر میں رات گزارنے کے بعد جمعرات کو لداخ روانہ ہوں گے۔

یہ دورہ جموں و کشمیر کا ان کا پہلا دورہ ہے، جب انہوں نے رواں سال 14 جنوری کو بھارت میں امریکہ کے 27ویں سفیر کی حیثیت سے باضابطہ طور پر ذمہ داری سنبھالی تھی۔

اگرچہ سفیر کے سرکاری دورۂ پروگرام میں مرکز کے زیر انتظام علاقے کی اعلیٰ قیادت کے ساتھ ملاقاتیں شامل ہیں، تاہم یہ واضح نہیں ہے کہ آیا وہ اپنے دورے کے دوران سیاسی رہنماؤں، کاروباری نمائندوں، سول سوسائٹی اور سکیورٹی اداروں کے نمائندوں سے بھی ملاقات کریں گے یا نہیں۔

یہ دورہ اس لیے بھی اہمیت رکھتا ہے کہ 2019 میں آئینی تبدیلیوں اور اس کے بعد مرکز کے زیر انتظام علاقے میں منتخب حکومت کی بحالی کے بعد جموں و کشمیر کا سیاسی منظرنامہ تبدیل ہو چکا ہے۔

کشمیر میں امریکی سفیر کی مخصوص مصروفیات کے حوالے سے ابھی تک کوئی سرکاری اطلاع سامنے نہیں آئی ہے۔

یواین آئی۔ ظ ا

سری نگر، پیپلز کانفرنس کے صدر اور ہندواڑہ کے رکن اسمبلی سجاد لون نے منگل کو ان خبروں کو مسترد کر دیا کہ انہوں نے یومِ آزادی کی تقریبات کا بائیکاٹ کیا تھا۔ انہوں نے ان خبروں کو ’’بالکل بے بنیاد‘‘ قرار دیا۔

لون نے وضاحت کی کہ وہ پریڈ کے دن کپواڑہ میں موجود نہیں تھے اور کہا کہ تقریب کے بائیکاٹ کا کوئی سوال ہی پیدا نہیں ہوتا۔

انہوں نے کہاکہ ’’ایسا کچھ بھی نہیں ہوا۔ میں اس خاص دن کپواڑہ میں موجود نہیں تھا۔ بس یہی بات ہے۔‘‘

ان خبروں پر ردعمل ظاہر کرتے ہوئے لون نے کہا کہ ان کے مبینہ بائیکاٹ کے بارے میں پھیلائی جانے والی بات بے بنیاد ہے اور انہوں نے اپنی پوزیشن واضح طور پر بیان کرتے ہوئے اس معاملے کو ختم کرنے کی کوشش کی۔

وزیر اعلیٰ کے مشیر ناصر اسلم وانی نے کپواڑہ میں 80ویں یومِ آزادی کی تقریبات کے موقع پر قومی پرچم لہرایا۔

اس موقع پر لولاب کے رکن اسمبلی قیصر جمشید لون، ترہگام کے رکن اسمبلی میر سیف اللہ، ڈپٹی کمشنر کپواڑہ شری کانت سوسے، ایس ایس پی کپواڑہ طاہر گیلانی، 28 ڈویژن کے ڈپٹی جی او سی شکت اوت، 41 راشٹریہ رائفلز کے کمانڈنگ افسر انوپم تھاپا کے علاوہ سول اور پولیس انتظامیہ کے سینئر افسران اور پنچایتی راج اداروں (پی آر آئی) کے سابق نمائندے موجود تھے۔

یواین آئی۔ ظا

سرینگر، جموں و کشمیر کرائم برانچ کے اکنامک آفینسز ونگ (ای او ڈبلیو) کشمیر نے تحقیقات پر اثر انداز ہونے کی مبینہ کوشش کے معاملے میں بڈگام کے ایک رہائشی کے خلاف اسپیشل جج، اینٹی کرپشن، سرینگر کی عدالت میں چارج شیٹ دائر کی ہے۔ حکام نے منگل کے روز یہ معلومات فراہم کیں۔

حکام نے بتایا کہ رواں سال درج کی گئی ایف آئی آر میں یہ چالان بڈگام ضلع کے میر گنڈ کے رہائشی غلام احمد غنی کے خلاف داخل کیا گیا۔ اس پر پریوینشن آف کرپشن ایکٹ کی دفعہ 8 اور بھارتیہ نیاۓ سنہیتا (بی این ایس) کی دفعات 228 اور 229 کے تحت قابلِ سزا جرائم کا الزام ہے۔

حکام نے بتایا کہ یہ تحقیقات ایک تحریری شکایت کے بعد شروع کی گئی تھیں۔ شکایت میں الزام لگایا گیا تھا کہ ملزم نے تحقیقات کو متاثر کرنے کی نیت سے ایک تفتیشی افسر کے بینک اکاؤنٹ میں 10 ہزار روپے منتقل کیے تھے۔ ملزم کے خلاف کرائم برانچ کشمیر (جو اب ای او ڈبلیو کشمیر ہے) کی ایک ایف آئی آر کے تحت پہلے سے ہی تفتیش جاری ہے۔

شکایت ملنے کے بعد کرائم برانچ نے معاملے کی تحققیات کے احکامات دیے۔ حکام نے بتایا کہ تفتیش کے دوران الزامات کا باریک بینی سے جائزہ لیا گیا اور ثبوت اکٹھے کیے گئے۔ تحقیقات میں اس مبینہ واقعے میں ملزم کی ملوث ہونے کی تصدیق ہوئی۔

اس کے بعد، چالان تیار کیا گیا اور قانون کے مطابق عدالتی فیصلے کے لیے عدالت میں پیش کیا گیا۔

یواین آئی۔الف الف