سری نگر،جموں وکشمیر کے وزیر اعلیٰ عمر عبداللہ نے پیر کو سول سیکریٹریٹ سری نگر میں کشمیر چیمبر آف کامرس اینڈ انڈسٹری (کے سی سی آئی) کے ایک وفد سے ملاقات کے دوران کہا کہ حکومت ایک حقیقت پسندانہ اور قابلِ عمل منصوبہ تیار کرے گی تاکہ وادی میں سیاحت اور تجارت کی بحالی کو ممکن بنایا جا سکے۔

’کے سی سی آئی‘ کے صدر جاوید احمد ٹینگا کی قیادت میں وفد نے صنعت و تجارت، سیاحت، زراعت، باغبانی، تعلیم، صحت، شہری ترقی اور ٹرانسپورٹ سمیت کئی اہم شعبوں سے وابستہ مسائل اور مشکلات وزیر اعلیٰ کے سامنے رکھے۔

وزیر اعلیٰ نے وفد کو مکمل سرکاری تعاون کی یقین دہانی کراتے ہوئے کہا، ’جو بھی مسائل آپ نے ہمارے سامنے رکھے ہیں، ان کا ہم سنجیدگی سے جائزہ لے رہے ہیں اور ضرورت پڑی تو مرکز سے بھی مدد طلب کریں گے۔‘

انہوں نے موجودہ معاشی سست روی کو محض حالیہ معاملہ نہ مانتے ہوئے اسے سابقہ حکومتوں کی پالیسیوں کا تسلسل قرار دیا اور کہا کہ اس صورتحال کا حل نکالنے کے لیے ایک مخصوص، بامقصد اور شراکت داری پر مبنی پیکیج تیار کیا جائے گا۔

’کے سی سی آئی‘ کی طرف سے قرضوں کی ادائیگی پر مہلت، سود میں نرمی، اکاؤنٹس کو این پی ایس قرار دینے سے تحفظ، ایمرجنسی کریڈٹ لائن، ٹرانسپورٹ سیکٹر کیلئے نرم قرضے، زمین کی الاٹمنٹ میں قانونی پیچیدگیاں، ملٹی ایئرلائنز کے ذریعے برآمدات کی سہولت، ویٹ لینڈز کا تحفظ، اور سرینگر کے پرانے شہر میں پارکنگ جیسے مسائل پر خاص طور پر زور دیا گیا۔

وزیر اعلیٰ نے یقین دلایا کہ ان مسائل کو نہ صرف ریاستی بلکہ مرکزی سطح پر، بالخصوص مرکزی وزارتِ خزانہ کے ساتھ مؤثر انداز میں اٹھایا جائے گا۔

وادی میں سیاحت پر پڑنے والے منفی اثرات کا ذکر کرتے ہوئے عمر عبداللہ نے کہا کہ سیاحوں کی آمد پر لگی پابندیوں کو بتدریج ختم کرنے کی ضرورت ہے۔ انہوں نے مقامی سیاحت کو فروغ دینے اور اسکول و کالجوں کو وادی کے اندر ہی تعلیمی و تفریحی دورے منعقد کرانے کی بھی تجویز دی۔

وزیر اعلیٰ نے یہ بھی بتایا کہ انہوں نے وزیراعظم اور پارلیمانی امور کے محکمے سے کشمیر میں پارلیمانی اسٹینڈنگ کمیٹیوں اور مشاورتی اجلاسوں کے انعقاد کی درخواست کی ہے تاکہ اعتماد سازی اور کشمیر کی مثبت شبیہ اجاگر کی جا سکے۔

انہوں نے مزید کہا کہ حکومت جموں و کشمیر آئندہ کولکتہ اور احمد آباد میں ہونے والی ٹریول اینڈ ٹورازم فیئرز میں بھرپور شرکت کرے گی تاکہ ملک بھر سے سیاحوں کی توجہ وادی کی جانب مبذول کی جا سکے۔

وزیر اعلیٰ نے کہا کہ ان کی حکومت کا فوکس ان چھوٹے تاجروں اور کارکنوں پر ہے جنہوں نے حال ہی میں ٹرانسپورٹ اور سیاحت کے شعبوں میں سرمایہ کاری کی تھی۔

“مجھے اس سومو ڈرائیور کی فکر ہے جس نے قرض لے کر انووا گاڑی خریدی، اس ہوم اسٹے مالک کی جو 15 کمروں کا ہوٹل بنارہا ہے، یا اس دکاندار کی جو روز کی کمائی سے اپنے بچوں کو کھانا کھلاتا ہے۔”

انہوں نے اس بات پر زور دیا کہ چھوٹے کاروباری، خود روزگار یافتہ افراد اور گھریلو صنعتکاروں کو بڑے سرمایہ داروں کے مقابلے میں ترجیح دی جانی چاہیے۔

وزیر اعلیٰ نے یہ بھی کہا کہ غیر منصفانہ تجارتی سرگرمیوں جیسے گمراہ کن اشیاء کی فروخت، جعلی مصنوعات اور سیاحوں سے زیادہ قیمتیں وصولنے جیسے عوامل کشمیر کی سیاحت اور مصنوعات کی ساکھ کو نقصان پہنچا سکتے ہیں۔ انہوں نے ایسے عناصر کے خلاف سخت کارروائی کا اعلان کیا۔

عمر عبداللہ نے کہا کہ ریاستی حکومت زرعی اور باغبانی مصنوعات کی نقل و حمل بہتر بنانے کیلئے وزارت ریلوے کے ساتھ مل کر کام کر رہی ہے اور اُمید ظاہر کی کہ جلد ہی اس شعبے میں بہتری آئے گی۔

آخر میں عمر عبداللہ نے کہا، ’ہم تمام اسٹیک ہولڈرز کی مشاورت سے ایک جامع منصوبہ تیار کریں گے اور مرکز کے سامنے اپنی بات مضبوطی سے رکھیں گے۔ مرکزی وزیر خزانہ سے میری بات ہوئی ہے اور اُن کا ردعمل حوصلہ افزا تھا۔‘

انہوں نے تاجر برادری سے کہا کہ وہ حوصلہ نہ ہاریں، حکومت ان کے ساتھ کھڑی ہے اور ایک پائیدار، خود انحصار اور ترقی پسند مستقبل کی سمت بڑھنے کیلئے ہر ممکن تعاون فراہم کرے گی۔

اجلاس میں چیف سیکریٹری اتل دولو، وزیر اعلیٰ کے ایڈیشنل چیف سیکریٹری دیراج گپتا، پرنسپل سیکریٹری خزانہ شیلندر کمار، کمشنر سیکریٹری صنعت و تجارت وکرم جیت سنگھ، کمشنر سیکریٹری کھیل سرمد حفیظ، ڈائریکٹر ٹورازم کشمیر راجہ یعقوب اور دیگر اعلیٰ افسران بھی موجود تھے۔

یو این آئی، ارشید بٹ