کتابیں دنیا کےلئے کھڑکی کھول کرطرز انداز اور فکر کو بدلنے کا ذریعہ
ہمیں قدیم علمی نظام کو بحال کر کے مرکزی دھارے کی تعلیم کا حصہ بنانا ہوگا:لیفٹیننٹ گورنر منوج سنہا
سری نگر:جے کے این ایس : لیفٹیننٹ گورنر منوج سنہا نے ہفتہ کوشیر کشمیر انٹرنیشنل کنوونشن سینٹر سری نگر میں نیشنل ب ±ک ٹرسٹ آف انڈیا کے زیر اہتمام 9روزہ”چنار بک فیسٹیول“ کی افتتاحی تقریب میں شرکت کی۔افتتاحی تقریب میں مرکزی وزیر تعلیم دھرمیندر پردھان نے بھی شرکت کی۔جے کے این ایس کے مطابق اپنے خطاب میں لیفٹیننٹ گورنر منوج سنہانے مرکزی وزارت تعلیم اور نیشنل بک ٹرسٹ کو مبارکباد دی کہ وہ قارئین کو نئے خیالات اور نقطہ نظر سے باخبر رہنے اور ملک بھر کے نامور ادیبوں اور اسکالرز سے بات چیت کرنے کا موقع فراہم کرتے ہیں۔ انہوں نے کہاکہ کتابیں دنیا کےلئے کھڑکی کھولتی ہیں۔ کتابیں نئے خیالات اور نئے زاویے پیش کرتی ہیں جو چیزوں کو دیکھنے کے انداز کو بدلتی ہیں اور تنقیدی سوچ کو فروغ دیتی ہیں۔ چنار بک فیسٹیول نئی نسل کو ہمارے قیمتی ادبی ورثے سے جوڑ دے گا اور انہیں ہمارے اسلاف کے پیچھے چھوڑی گئی ہماری روایتی دانشمندی کے تحفظ اور فروغ کی ترغیب دے گا۔لیفٹیننٹ گورنر نے مصنفین پر زور دیا کہ وہ حقائق کو درست کرنے کے لیے تاریخ کو دوبارہ لکھنے کے بارے میں سوچیں، جو ماضی میں مسخ ہو چکے تھے۔انہوںنے کہاکہ نئی نسل کو اس بات سے آگاہ کرنا ہوگا کہ ہماری تہذیب معاشی طور پر خوشحال تھی اور یہ ادب، سائنس اور روحانیت کا عالمی مرکز بھی تھی۔لیفٹیننٹ گورنر منوج سنہا کاکہناتھاکہ قدیم ہندوستان عالمی تہذیب و تمدن کا انجن تھا۔انہوںنے کہاکہ ہم نے دنیا کو سائنس، ریاضی، ادویات کا تحفہ دیا اور ہمیں اپنے ثقافتی، ادبی، سائنسی اور روحانی ورثے پر فخر کرنا چاہیے۔لیفٹیننٹ گورنر منوج سنہا نے مزیدکہاکہ ہمارے علم و سائنس کی جڑیں ہمیشہ سے بے پناہ رہی ہیں۔ ہمیں نوآبادیاتی ذہنیت سے خود کو آزاد کرنے کی ضرورت ہے اور نئی نسل کو یہ بتانا ہوگا کہ ہمارا ورثہ پوری دنیا میں سرفہرست رہا ہے اور سائنس کا جو تحفہ ہم نے پوری انسانیت کو دیا ہے وہ لاجواب ہے،۔لیفٹیننٹ گورنر نے اس بات پر روشنی ڈالی کہ وزیر اعظم نریندر مودی کی قیادت میں ہندوستان بیک وقت اقتصادی، ثقافتی اور سائنسی نشان ثانیہ کا مشاہدہ کر رہا ہے۔ انہوں نے کہا کہ قوم کے روحانی، سماجی اور جذباتی اتحاد کو مضبوط بنانے کے لیے ادیبوں اور مفکرین کی بے مثال شراکت ضروری ہے۔لیفٹیننٹ گورنر نے اپنے خطاب میں ہندوستان کے قدیم علمی نظام کو زندہ کرنے اور اسے مرکزی دھارے کی تعلیم کا حصہ بنانے پر زور دیا۔انہوں نے نیشنل بک ٹرسٹ پر زور دیا کہ وہ نیلمت پران، راجترنگینی، اور کتھاسرتساگر کو مختلف ہندوستانی زبانوں میں شائع اور ترجمہ کرے۔

انہوں نے مزید کہا کہ علاقائی زبان میں ان ایڈیشنوں کو بین الاقوامی کتابی میلوں میں بھی نمایاں ہونا چاہیے تاکہ دنیا کو جموں و کشمیر کے منفرد ادبی ورثے سے متعارف کرایا جا سکے۔لیفٹیننٹ گورنر نے نیشنل بک ٹرسٹ سے مزید کہا کہ کتاب میلوں میں کشمیری، پہاڑی، گوجری، ڈوگری، اردو اور پنجابی کے مشہور ادب کو فعال طور پر فروغ دیا جائے اور وسیع تر سامعین تک ان کے مختلف زبانوں میں ترجمہ کو یقینی بنایا جائے۔اس تقریب میں شاردا حروف تہجی کی پہلی قومی نمائش ”سرادکسرانی“ اور ”جموں کشمیر اور لداخ،تھو دی ایجز“ کے عنوان سے کتاب کا کشمیری ترجمہ کا افتتاح بھی دیکھا گیا۔ راشٹریہ ای-پستکالیہ امرت کال کہانی لکھنے کے مقابلے کے فاتحین کا بھی اعلان کیا گیا۔پروفیسر ملند سدھاکر مراٹھے، چیئرمین، نیشنل بک ٹرسٹ؛ وجے کمار بیدھوری، ڈویڑنل کمشنر کشمیر؛ پروفیسر رگھوویندر تنور، چیئرمین انڈین کونسل آف ہسٹوریکل ریسرچ ؛ ڈاکٹر امیت وانچو، چیف کنوینر، چنار بک فیسٹیول؛ یوراج ملک، ڈائریکٹر، نیشنل بک ٹرسٹ؛ مختلف تعلیمی اداروں کے نائب سربراہان، اعلیٰ حکام، نامور ادبی شخصیات، کتاب کے شائقین، نوجوان اور بچے بڑی تعداد میں موجود تھے۔