موسلاداربارشوں کے بعد کئی مقامات پرمٹی کے تودے وپتھر گرآنے اور زمین دھنس جانے کے واقعات
کشمیر وادی کا جموں ،خطہ پیرپنچال اور لداخ سے بھی زمینی رابطہ منقطع
جب تک موسم بہتر نہیں ہو جاتا اور بحالی کا کام مکمل نہیں ہو جاتا، سڑک پر سفر نہ کریں:حکام کاعوام کو مشورہ
سری نگرر: جے کے این ایس : منگل کی شام سے رات بھر جاری رہنے والی موسلادار اورسیلابی بارش نے کشمیر وادی کا جموں ،خطہ پیرپنچال اور لداخ سے بھی زمینی رابطہ منقطع کردیا۔حکام نے بدھ کو بتایاکہ سری نگرجموں قومی شاہراہ، مغل روڈ، سری نگر سونامرگ گاندربل (ایس ایس جی) روڈ اور سنتھن روڈ سمیت کئی اہم پہاڑی سڑکوں کو متعدد مقامات پر لینڈ سلائیڈنگ، مٹی کے تودے اورپتھر گرآنے کے واقعات کے بعد گاڑیوں کی آمدورفت کےلئے بند کر دیا گیا ہے۔اُدھرتازہ بارشوں کے بعد مٹی کے تادے گرآنے اورزمین دھنس جانے کے واقعات کے بعد راجوری ،پونچھ ،جموں قومی شاہراہ پر بھی گاڑیوںکی آمدورفت معطل کردی گئی ۔جے کے این ایس کے مطابق حکام نے بتایا کہ جموں وکشمیرکے پورے خطے میں مسلسل بارش نے رکاوٹیں پیدا کر دی ہیں، جس سے سڑک کا سفر غیر محفوظ ہو گیا ہے۔ انہوںنے بتایاکہ اودھم پور اوررام بن کے درمیان کئی مقامات پر مٹی کے تودے اور پتھر گرآنے کے بعد سری نگر جموں قومی شاہراہ پردرماندہ پڑی باقی گاڑیوں کی آمدورفت روک دی گئی ،تاہم خراب موسم کے باوجود متاثرہ علاقوں میں بحالی کا کام جاری ہے، لیکن حکام نے لوگوں کو مشورہ دیا ہے کہ جب تک موسم بہتر نہیں ہو جاتا اور کلیئرنس آپریشن مکمل نہیں ہو جاتا، کوئی سفر نہ کریں۔حکام نے مزید کہاکہ لوگوں سے درخواست کی جاتی ہے کہ وہ کسی بھی افواہ پر دھیان نہ دیں اور سڑک کی حالت سے متعلق صرف سرکاری مشورے پر عمل کریں۔ حکام نے بتایاکہ سری نگرجموں قومی شاہراہ کے علاوہ مغل روڈ، سری نگر سونامرگ گاندربل (ایس ایس جی) روڈ اور سنتھن روڈ سمیت کئی اہم پہاڑی سڑکوں کو متعدد مقامات پر لینڈ سلائیڈنگ، مٹی کے تودے اورپتھر گرآنے کے واقعات کے بعد گاڑیوں کی آمدورفت کےلئے بند کر دیا گیا ہے۔ادھرگاندربل ضلع میں زوجیلا روڈ کے قریب تازہ لینڈ سلائیڈنگ کے بعدزوجیلا سڑک بند ہوگئی ہے۔حکام نے بتایاکہ مسلسل بارشوں نے ضلع گاندربل میں زوجیلا پاس پر بجری نالہ پر تازہ لینڈ سلائیڈنگ شروع کردی ہے جس کی وجہ سے اسٹریٹجک زوجیلا سڑک بند ہوگئی ہے۔ لینڈ سلائیڈنگ نے اس راستے پر ٹریفک کی نقل و حرکت میں خلل ڈالا ہے، جو کشمیر اور لداخ کے درمیان ایک اہم رابطے کا کام کرتا ہے۔حکام نے بتایا کہ اس وقت ملبہ ہٹانے اور گاڑیوں کی آمدورفت کے لیے سڑک کو دوبارہ کھولنے کے لیے بحالی کا کام جاری ہے۔ تاہم مسلسل بارش کلیئرنس آپریشن میں رکاوٹ بن رہی ہے۔ادھر موسلادار بارش نے راجوری ضلع میں متعدد لینڈ سلائیڈنگ کو جنم دیا ہے، جس سے عام زندگی بری طرح متاثر ہوئی ہے اور رہائشی علاقوں کو خطرہ لاحق ہے۔راجوری میں کلر کے مقام پر جموں راجوری پونچھ قومی شاہراہ پر ایک بڑا لینڈ سلائیڈ ہوا، جہاںدوسے تین رہائشی مکانات کو نقصان اور ممکنہ گرنے کا انتہائی خطرہ ہے۔ مقامی لوگوں نے بتایا کہ تیز موڑ پر تقریباً 10 فٹ زمین دھنس گئی ہے، جس سے یہ مکانات کیلئے خطرہ پیدا ہوا ہے اور خاندانوں میں خوف و ہراس پھیل گیا ہے۔دریں اثنا، مسلسل بارش اور تازہ مٹی کے تودے گرنے کی وجہ سے تیراتھ موگلا کالاکوٹ سڑک بھی آج بند ہوگئی ہے۔ حکام نے تصدیق کی ہے کہ علاقے میں بارش کا سلسلہ بدستور جاری ہے۔

ایک اور واقعہ میں شیو مندر راجوری کے قریب سرکلر روڈ پر لینڈ سلائیڈنگ اور درخت گرنے کا واقعہ پیش آیا۔ پولیس اور ایس ڈی آر ایف کی ٹیمیں موقع پر پہنچ گئیں اور ملبہ ہٹانے اور نقل و حرکت بحال کرنے کا کام کر رہی ہیں۔لینڈ سلائیڈنگ اور دھنسنے کی وجہ سے راجوری ضلع میں کئی لنک روڈز بھی منقطع ہو گئے ہیں جس سے مکینوں کی مشکلات میں اضافہ ہو رہا ہے۔حکام نے عوام پر زور دیا ہے کہ وہ محتاط رہیں اور کلیئرنس آپریشن مکمل ہونے تک غیر ضروری سفر سے گریز کریں۔