سری نگر جموں قومی شاہراہ کی مسلسل بندش کے درمیان مرکزی حکومت کا پھل کاشتکاروں کو بھاری نقصان سے بچانے کیلئے غیر معمولی اقدام
13 ستمبر سے خصوصی مال برداری سروس متعارف ہوگی :ریلوے وزیر اشونی ویشنو
سری نگر: جے کے این ایس : حالیہ موسلادار بارشوں کے نتیجے میں مٹی کے تودے وپتھر گرآنے اور کئی مقامات پر زمین کھسک جانے کی وجہ سے نقصان زدہ سری نگر جموں قومی شاہراہ پر پھنسے ہوئے سڑنے والے سیبوں کی وجہ سے کشمیرکے پھل کاشتکاروں اورتاجروں کو درپیش بڑے نقصان کے درمیان، ریلوے حکام نے جمعرات کو بڈگام کےلئے موٹر،کم،پارسل وین کی ترجیحی نقل و حرکت کا اعلان کیا۔جے کے این ایس کے مطابق یہ غیر معمولی فیصلہ اس وقت سامنے آیا ہے جب تھارداودھم پور میں لینڈ سلائیڈنگ کے بعد سیب سے لدے ہزاروں ٹرک سری نگرجموں قومی شاہراہ پر پھنسے ہوئے ہیں، جس سے لاکھوں مالیت کے پھل سڑنے کا خطرہ ہیں۔حکام نے کہا کہ خصوصی پارسل وین سے کسی حد تک فوری ریلیف ملنے کی امید ہے، لیکن بڑا بحران کشمیر کی باغبانی کی معیشت کے تحفظ کےلئے متبادل راستوں کی فوری ضرورت کو اجاگر کرتا ہے۔ریلوے کے وزیر اشونی ویشنو نے بڈگام سے دہلی تک سیب لے جانے والی2 پارسل وین کا اعلان کرتے ہوئے ایکس پر ایک پوسٹ میں لکھا کہ کشمیر کے سیب کاشتکاروں کو بااختیار بنانا حکومت کی ترجیح ہے۔اشونی ویشنو نے کہا کہ جموں سری نگر لائن آپریشنل ہونے سے وادی کشمیر کا رابطہ بہتر ہے۔ ریلوے 13 ستمبر2025 سے وادی کشمیر کے بڈگام سے دہلی کے آدرش نگر اسٹیشن تک روزانہ ٹائم ٹیبل والی پارسل ٹرین متعارف کروا رہا ہے۔ریلوے کے وزیر نے کہا کہ بڈگام سے دہلی سیب لے جانے والی 2 پارسل وینوں کی لوڈنگ آج سے شروع ہو رہی ہے۔اس دوران مرکزی وزیر اشونی ویشنو نے وادی کشمیر اور دہلی کے درمیان روزانہ ٹائم ٹیبلڈ پارسل خدمات کاباضابط اعلان کیا۔ریلوے کے مرکزی وزیر اشونی ویشنو نے اعلان کیا کہ حکومت ہند روزانہ ٹائم ٹیبل والا پارسل متعارف کرانے کے لئے تیار ہے، جو جمعرات کو کشمیر اور دہلی کو جوڑے گا۔ایکس پر ایک پوسٹ میں اشونی ویشنو نے کہا کہ یہ پارسل خدمات وادی کشمیر کے بڈگام علاقے سے دہلی کے آدرش نگر تک شروع ہوں گی۔وزیر ریلوے نے مزید کہا کہ یہ خدمات رواں سال 13 ستمبر سے نافذ العمل ہوں گی۔ اشونی ویشنو کے مطابق، وہ اس بات پر زور دیتے ہیں کہ یہ خدمات کشمیر کے سیب کے کسانوں کو بااختیار بنائیں گی۔انہوں نے مزید کہا کہ بڈگام سے دہلی سیب لے جانے والی دو پارسل وینوں کو لوڈ کرنے کی خدمات اب آج سے شروع ہو رہی ہیں۔دریں اثنا، کورئیر کے کاروبار میں ریلوے کا حصہ بڑھانے اور صارفین کو ایک موثر، قابل اعتماد اور اقتصادی آپشن فراہم کرنے کےلئے، ریلوے بورڈ نے اس سال20 اگست کو شمالی ریلوے میں جموں ڈویڑن کے لئے جوائنٹ پارسل پروڈکٹ،ریپڈ کارگو ٹرین سہولیات کی خدمات کو منظوری دی۔جموں ڈویڑن کے سینئر کمرشل ڈویڑنل منیجر اچیت سنگھل کے مطابق اس پارسل کی پہلی سروس13 ستمبر کو دوپہر 12بجکر10منٹ پر دہلی کے آدرش نگر سے بڈگام کے لیے روانہ ہوگی۔ یہ 15 ستمبر کی صبح 6بجکر15منٹ پر بڈگام سے دہلی کے لیے روانہ ہوگی۔ ٹرین چلانے کا بنیادی مقصد کشمیر کے تاجروں کو فائدہ پہنچانا اور اس بات کو یقینی بنانا ہے کہ ان کا سامان ملک کے کونے کونے تک پہنچے جس میں بنیادی طور پر سیب، زعفران، اخروٹ، پشمینہ شال، قالین اور کشمیری دستکاری جیسی اشیاءشامل ہیں۔ یہ ٹرین تقریباً 23 گھنٹے میں دہلی پہنچنے والی ہے، جسے بڈگام سے سڑک کے سفر سے کم وقت سمجھا جاتا ہے۔ان خدمات کو دوبارہ شروع کرنے کے فیصلے پر روشنی ڈالتے ہوئے ڈویڑنل ریلوے منیجر وویک کمار نے کہا کہ اس پارسل ٹرین سروس کو دوبارہ شروع کرنے کا فیصلہ خراب موسم کی وجہ سے کیا گیا ہے۔ شدید بارش کی وجہ سے سڑکوں کی آمدورفت متاثر ہو رہی ہے، سیب اور دیگر پھلوں کو ملک بھر کی دیگر ریاستوں اور دیہاتوں تک پہنچانے میں متعدد مسائل پیدا ہو رہے ہیں۔ اس مسئلے کو حل کرنے کے لیے ریلوے نے پارسل ٹرین شروع کرنے کا فیصلہ کیا۔سہولیات کے بارے میں بات کرتے ہوئے، شمالی ریلوے نے کہا کہ اس پارسل ٹرین میں ایک ایس ایل آر ہوگا، جس کے ساتھ8 پارسل بھی ہوں گے۔کاروباری طبقے کی سہولت کے لیے باری بھرہانہ اسٹیشن پر سامان کی لوڈنگ اور ان لوڈنگ کی سہولت فراہم کی جائے گی۔جموں ڈویڑن کے ڈویڑنل ریلوے مینیجر کے مطابق، جوائنٹ پارسل پروڈکٹ،ریپڈ کارگو سروس کا مقصد ریلوے کے ذریعے مال کی نقل و حمل کو فروغ دینا ہے۔ مزید برآں، یہ ایک ورچوئل ایگریگیشن پلیٹ فارم کے طور پر کام کرتا ہے جو نجی شعبے میں ریلوے کی شراکت کو بڑھانے میں مدد کرے گا۔ یہ کارگو ٹرین پہلی بار جموں ڈویڑن میں چلائی جا رہی ہے۔