جموں و کشمیر

آئی ایچ پی ایل کرکٹ لیگ مالی غبن کے الزامات کی زد میں، منتظمین کے خلاف مقدمہ درج

Published

9 months ago

November 3, 2025

سری نگر، جموں و کشمیر پولیس نے ایک نجی ٹی20 کرکٹ کے منتظمین کے خلاف مقدمہ درج کیا ہے، جو مبینہ طور پر بین الاقوامی کھلاڑیوں کے ساتھ دھوکہ دہی اور مالی غبن کے بعد شہر سے فرار ہو گئے۔ اس لیگ میں ویسٹ انڈیز کے مشہور بلے باز کرس گیل سمیت کئی بین الاقوامی کھلاڑیوں نے شرکت کی تھی۔ پولیس کے مطابق راج باغ پولیس اسٹیشن میں بھارتی نیائے سنہا کی دفعات 316(2) اور 318(4) کے تحت مقدمہ درج کیا گیا ہے۔ یہ دفعات دھوکہ دہی، امانت میں خیانت اور مجرمانہ لاپرواہی سے متعلق ہیں۔ ذرائع نے بتایا کہ آئی ایچ پی ایل لیگ 25 اکتوبر کو سرینگر کے بخشی اسٹیڈیم میں شروع ہوئی تھی اور اس کا فائنل میچ 8 نومبر کو ہونا تھا۔ تاہم، ہفتے کے روز اچانک کھلاڑیوں کو بتایا گیا کہ میچ تکنیکی وجوہات کی بنا پر منسوخ کر دیا گیا ہے۔ اگلی صبح جب کھلاڑی اپنے ہوٹل سے باہر نکلے تو انہیں معلوم ہوا کہ منتظمین مبینہ طور پر شہر چھوڑ کر جا چکے ہیں اور ہوٹل کے بل تک ادا نہیں کیے گئے۔ یہ لیگ یُووا سوسائٹی موہالی نامی ایک تنظیم نے منعقد کی تھی۔ کھلاڑیوں اور عملے نے پولیس کو دی گئی شکایت میں الزام عائد کیا ہے کہ منتظمین پرمندر سنگھ اور آشودھانی نے ان سے معاہدے کیے، انہیں پرکشش ادائیگیوں اور مکمل رہائش و سفری سہولیات کی یقین دہانی کرائی، مگر بعد میں ساری رقم غائب کر دی۔ شکایت کے مطابق، منتظمین نے نہ صرف کھلاڑیوں اور ہوٹلوں کے بل ادا نہیں کیے بلکہ وہ اپنے فون بند کرکے فرار ہو گئے، جس کے نتیجے میں تقریباً 50 کھلاڑیوں اور عملے کے ارکان کو سرینگر میں پھنسے رہنا پڑا۔ کھلاڑیوں کا کہنا ہے کہ وہ شدید ذہنی دباؤ، مالی مشکلات اور عوامی شرمندگی کا شکار ہوئے ہیں۔ کئی کھلاڑیوں نے الزام لگایا کہ منتظمین نے ایک سرکاری منظوری یافتہ لیگ کے نام پر بھاری فنڈ جمع کیے تھے، جو اب مبینہ طور پر خوردبرد ہو گئے ہیں۔ جموں و کشمیر اسپورٹس کونسل نے اس معاملے سے خود کو الگ کرتے ہوئے کہا کہ اس نجی لیگ سے ان کا کوئی تعلق نہیں تھا۔ تاہم، سرکاری ریکارڈ سے ظاہر ہوتا ہے کہ ڈویژنل کمشنر کشمیر نے 22 اکتوبر کو ایک اجلاس طلب کیا تھا جس میں مختلف محکموں کے افسران کو آئی ایچ پی ایل کی تیاریوں کا جائزہ لینے کی ہدایت دی گئی تھی۔ سرکاری بیان میں کہا گیا تھا کہ لیگ کے پہلے ایڈیشن میں قومی، بین الاقوامی اور مقامی کھلاڑی حصہ لیں گے اور اسٹیڈیم میں 25 سے 30 ہزار تماشائیوں کی آمد متوقع ہے۔ واضح رہے کہ لیگ میں کرس گیل کے علاوہ سری لنکا کے تھیسارا پریرا، نیوزی لینڈ کے جیس رائیڈر اورویسٹ انڈیز کے ڈیوین اسمتھ جیسے معروف کھلاڑی بھی شامل تھے۔ پولیس نے کہا کہ تحقیقات جاری ہیں اور جلد ہی مفرور منتظمین کو گرفتار کرنے کے لیے کارروائی تیز کی جائے گی۔ فی الحال آئی ایچ پی ایل کے تمام سرگرمیاں معطل کر دی گئی ہیں، جبکہ بخشی اسٹیڈیم میں ہونے والے باقی میچز منسوخ کر دیے گئے ہیں۔

یو این آئی، ارشید بٹ۔

جموں و کشمیر

اننت ناگ میں آسمانی بجلی گرنے سے دو افراد ہلاک

Published

35 minutes ago

August 13, 2026

Online Desk

سرینگر، حکام نے بتایا کہ جمعرات کے روز جنوبی کشمیر کے ضلع اننت ناگ کے علاقے لرنو کے گوڑن علاقے میں آسمانی بجلی گرنے سے دو نوجوان ہلاک اور دو دیگر زخمی ہو گئے۔

متوفین کی شناخت بلال احمد بتانا اور فیضان احمد چاڈ کے طور پر ہوئی ہے، جو دونوں میتھنڈو کے باشندے تھے۔

زخمیوں شریف احمد بتانا اور سجاد احمد بتانا کو پی ایچ سی لرنو منتقل کیا گیا، جہاں ان کی حالت مستحکم بتائی جاتی ہے۔

رپورٹس کے مطابق یہ چاروں نوجوان لہوان سے گوڑن کی طرف جا رہے تھے جب علاقے میں آسمانی بجلی گری۔

یو این آئی۔ م س۔ م الف

جموں و کشمیر

جموں و کشمیر میں یومِ آزادی سے پہلے ڈائریکٹر جنرل آف پولیس نے سیکورٹی تیاریوں کا جائزہ لیا

Published

4 hours ago

August 13, 2026

Online Desk

سرینگر، جموں و کشمیر کے ڈائریکٹر جنرل آف پولیس نلن پربھات نے جمعرات کو مرکز کے زیرِ انتظام علاقے میں یومِ آزادی کی تقاریب سے پہلے سیکورٹی تیاریوں کا جائزہ لیتے ہوئے سیکورٹی ایجنسیوں کو مکمل طور پر الرٹ رہنے اور انٹیلی جنس پر مبنی آپریشنز کو مضبوط کرنے کی ہدایت دی۔

میٹنگ میں جموں و کشمیر پولیس، بارڈر سیکورٹی فورس (بی ایس ایف)، سینٹرل ریزرو پولیس فورس (سی آر پی ایف) اور سشستر سیما بل (ایس ایس بی) کے سینیئر حکام شامل ہوئے۔ ان میں اسپیشل ڈی جی پی (ہم آہنگی)، اے ڈی جی پی (سی آئی ڈی)، کشمیر اور جموں زون کے انسپکٹر جنرل آف پولیس (آئی جی پی)، رینج ڈی آئی جی، اضلاع کے ایس ایس پی اور دیگر حکام شامل تھے۔

مسٹر پربھات نے میٹنگ میں 15 اگست کی تقاریب کے لیے سیکورٹی انتظامات اور آپریشنل تیاریوں کا جائزہ لیا۔ انہوں نے حکام کو ہدایت دی کہ وہ الرٹ رہیں تاکہ یہ قومی تقریب بغیر کسی رکاوٹ کے مکمل ہو سکے۔ انہوں نے مرکز کے زیرِ انتظام علاقے میں سیکورٹی نظام کو مزید مضبوط کرنے کے لیے فورسیز کی موثر تعیناتی، علاقے میں بہتر نگرانی اور مختلف سیکورٹی ایجنسیوں کے درمیان بہتر ہم آہنگی پر بھی زور دیا۔

پولیس ڈائریکٹر جنرل نے اہم مقامات، بالخصوص سرینگر کے بخشے اسٹیڈیم میں انتظامات کا جائزہ لیتے ہوئے تقریب کے مقام کے اندر اور آس پاس ٹریفک کنٹرول اور پارکنگ مینجمنٹ کو موثر طریقے سے کرنے پر زور دیا۔ انہوں نے متعلقہ حکام کو ہدایت دی کہ وہ باہمی ہم آہنگی کو بہتر رکھیں تاکہ تقریب میں شرکت کرنے والے لوگوں کو کم سے کم پریشانی ہو اور انہیں تمام ضروری سہولیات آسانی سے مل سکیں۔ سیکورٹی تیاریوں، جوانوں کی تعیناتی، انٹیلی جنس معلومات، ٹریفک مینجمنٹ اور دیگر انتظامات پر تفصیل سے تبادلہ خیال کیا گیا۔

یو این آئی۔ ظ ا۔ م الف

جموں و کشمیر

یومِ آزادی کی تقریبات سے قبل پورے کشمیر میں سکیورٹی مزید سخت

Published

7 hours ago

August 13, 2026

Online Desk

سری نگر، یومِ آزادی کی تقریبات کے پیش نظر پورے کشمیر میں سکیورٹی انتظامات میں نمایاں اضافہ کیا گیا ہے۔ حکام نے 15 اگست کی تقریبات کو پرامن اور بلارکاوٹ یقینی بنانے کے لیے وادی کے مختلف علاقوں میں فل ڈریس ریہرسل بھی کی۔

جمعرات کو یہاں بخشی اسٹیڈیم میں فل ڈریس ریہرسل کے بعد صحافیوں سے بات کرتے ہوئے کشمیر کے انسپکٹر جنرل آف پولیس (آئی جی پی) ودھی کمار بردی نے کہا کہ قومی تقریب کی تیاریوں کے سلسلے میں وادی کے تمام اضلاع میں سکیورٹی ریہرسل کی گئی ہے۔

بردی نے کہاکہ ’’وادی کے تمام اضلاع میں فل ڈریس ریہرسل کی گئی ہے۔ اس کے ساتھ سکیورٹی انتظامات کی بھی مکمل ریہرسل کی گئی ہے، تاکہ 15 اگست کو ہم مرکزی تقریب کو بلارکاوٹ منعقد کر سکیں۔‘‘

گزشتہ ماہ جنوبی کشمیر میں ہونے والے دو دہشت گردانہ حملوں کے بارے میں پوچھے جانے پر آئی جی پی نے کہا کہ وادی بھر میں سکیورٹی مزید سخت کر دی گئی ہے۔

انہوں نے کہاکہ ’’ان معاملات میں تحقیقات جاری ہیں۔ اس کے علاوہ متعلقہ اضلاع کی جانب سے تمام مضبوط سکیورٹی انتظامات کیے جا رہے ہیں۔ سکیورٹی کا نظام مزید سخت کیا گیا ہے۔‘‘

بردی نے لوگوں سے بھی اپیل کی کہ وہ بڑی تعداد میں یومِ آزادی کی تقریبات میں شرکت کریں اور 15 اگست کو ایک قومی تقریب قرار دیا۔

انہوں نے کہا کہ ضلعی سطح کے ساتھ ساتھ انتظامی اور مرکز کے زیرِ انتظام علاقے کے دارالحکومت میں بھی تقریبات منعقد کی جائیں گی۔ انہوں نے عوام سے ان تقریبات کو کامیاب بنانے کی اپیل کی۔

دہلی کے لال قلعہ میں 25 نومبر کو ہونے والے دھماکے، جس میں 11 افراد ہلاک ہوئے تھے، کو مبینہ طور پر القاعدہ برصغیر (اے کیو آئی ایس) کی ایک ذیلی تنظیم سے باضابطہ طور پر جوڑے جانے سے متعلق رپورٹس کے بارے میں پوچھے جانے پر آئی جی پی نے کہا کہ پولیس کے پاس ایسی کوئی معلومات نہیں ہے اور اگر ضرورت ہوئی تو تفصیلات الگ سے شیئر کی جائیں گی۔

آئی جی پی نے کہاکہ ’’ابھی ہماری معلومات میں ایسی کوئی بات نہیں ہے۔‘‘

انہوں نے سوشل میڈیا پر گردش کرنے والی کشمیری پنڈتوں کو مبینہ دھمکیوں کی رپورٹس پر تبصرہ کرنے سے بھی انکار کیا اور کہا کہ وہ اپنے بیان کو یومِ آزادی اور اس سے متعلق سکیورٹی انتظامات تک محدود رکھیں گے۔

حکام نے سوشل میڈیا پر گردش کرنے والے ایک دھمکی آمیز خط میں چھ کشمیری پنڈتوں کے نام درج ہونے کے بعد سرکاری محکموں میں کام کرنے والے کشمیری پنڈت ملازمین کو زبانی طور پر مشورہ دیا ہے کہ وہ 20 اگست تک اپنے دفاتر میں حاضر نہ ہوں۔

وادی میں تقریباً 6,000 مہاجر ملازمین کام کر رہے ہیں۔ کشمیری پنڈتوں اور اقلیتی ملازمین کی رہائش والے کیمپوں اور دیگر مقامات پر بھی سکیورٹی بڑھا دی گئی ہے۔

یواین آئی۔ ظ ا