خبراردو:

وراٹ کوہلی کی قیادت میں ہندوستانی کرکٹ ٹیم نے آسٹریلیائی سرزمین پر ٹیسٹ کے بعد یک روزہ سیریز میں بھی تاریخ رقم کر دی ہے۔ ٹیسٹ سیریز میں میزبان کنگاروؤں کو 70 سال بعد 1-2 سے شکست دینے والی ہندوستانی ٹیم نے پہلی بار آسٹریلیائی کی زمین پر کوئی دو فریقی یک روزہ سیریز پر قبضہ کیا ہے۔ ملبورن میں کھیلے گئے آخری میچ میں ہندوستان کو جیت کے لیے آسٹریلیا نے 231 رنوں کا ہدف دیا تھا جسے ایک بار پھر مہندر سنگھ دھونی کی سمجھداری بھری اننگ کی بدولت 7 وکٹ رہتے حاصل کر لیا۔ یہ بات ہر ہندوستانی کے لیے فخرآمیز ہے کہ 19-2018 کے آسٹریلیائی دورہ میں ٹیم نے ٹیسٹ اور یک روزہ دونوں سیریز میں فتح کی عبارت لکھ دی۔

What a run-chase. The Dhoni-Jadhav duo take #TeamIndia to a thumping 7-wicket victory. India take the series 2-1 ???? #AUSvIND pic.twitter.com/vb4fZ0xwR9

— BCCI (@BCCI) January 18, 2019

جہاں تک ونڈے سیریز کا سوال ہے، ہندوستان نے اس سے قبل آسٹریلیا کی زمین پر 12 سیریز کھیلی ہے لیکن اس میں صرف ایک کو چھوڑ دیا جائے تو بقیہ سبھی کثیر ملکی یک روزہ سیریز تھا۔ ہندوستان اور آسٹریلیا کے مابین واحد دو فریقی ونڈے سیریز 2016 میں کھیلا گیا تھا۔ پانچ میچوں کی اس سیریز میں ہندوستان کو 1-4 سے شکست کا سامنا کرنا پڑا تھا۔ مجموعی ریکارڈ دیکھا جائے تو ہندوستان نے آسٹریلیا میں کل 51 یک روزہ میچ کھیلے ہیں جس میں 13 میں اسے فتح ملی ہے جب کہ 36 میں شکست کا سامنا کرنا پڑا اور 2 بے نتیجہ رہا۔

یہاں قابل ذکر یہ بھی ہے کہ ہندوستانی ٹیم نے آسٹریلیا میں دو یک روزہ سیریز پر قبضہ کیا ہے لیکن وہ دو فریقی نہیں بلکہ کثیر ملکی سیریز تھا۔ ہندوستان نے 85-1984 میں بنسن اینڈ ہیجز ورلڈ چمپئن شپ ٹورنامنٹ جیتا تھا اور اس کے بعد ہندوستان نے 08-2007 میں کامن ویلتھ بینک ونڈے ٹرائی سیریز اپنے نام کیا تھا۔ 85-1984 میں ہندوستان نے سنیل گاوسکر کی کپتانی میں کنگاروؤں کی دھرتی پر کثیر ملکی ونڈے ٹورنامنٹ جیتا تھا۔ اس ٹورنامنٹ میں ایک میچ میں ہندوستان نے آسٹریلیا کو 8 وکٹ سے شکست فاش دے کر بے مثال کارنامہ انجام دیا تھا۔ ایم سی جی پر 85-1984 میں بنسن اینڈ ہیجز ورلڈ چمپئن شپ ہندوستان اور آسٹریلیا دونوں کے لیے ہی بہت اہم تھا۔ ٹیم انڈیا کو ناک آؤٹ کرنے کے لیے آسٹریلیا کو 223 رن بنا کر مہمان ٹیم کو 160 رن کے اسکور پر روکنے کی ضرورت تھی۔

بہر حال، آج ملبور میں کھیلے گئے تیسرے اور نتیجہ خیز میچ میں آسٹریلیا نے ہینڈسکومب کی 58 رنوں کی بدولت 230 رن بنا سکی۔ ہندوستان کی جانب سے پہلے تو تیز گیندبازوں بھونیشور کمار اور محمد شامی نے کسی ہوئی گیندبازی کی اور پھر اسپنر یجویندر چہل نے ریکارڈ 6 وکٹ لے کر آسٹریلیائی بلے بازی کی کمر توڑ دی۔ ہندوستان کے لیے 231 رن کا ہدف بہت بڑا نہیں تھا لیکن روہت شرما کے محض 9 رن بنا کر آؤٹ ہونے اور دھون کے بھی 23 رن پر پویلین لوٹنے سے ہندوستانی خیمہ میں ہلچل پیدا ہو گئی تھی۔ وراٹ کوہلی کے 46 رن پر آؤٹ ہونے کے بعد مشکلیں بڑھتی ہوئی محسوس ہو رہی تھیں لیکن ایک طرف دھونی نے اپنے تجربے کا فائدہ اٹھاتے ہوئے ٹک کر کھیلنا شروع کیا اور دوسری طرف کیدار جادھو نے بھی بغیر کوئی غلطی کیے سنگل کھیلنا جاری رکھا۔ نتیجہ یہ رہا کہ 4 گیند باقی رہتے ہی ہندوستان نے 234 رن بنا لیے۔ مہندر سنگھ دھونی نے ناٹ آؤٹ 87 رن بنائے جب کہ کیدار جادھو نے ناٹ آؤٹ 61 رن بنائے۔

مہندر سنگھ دھونی نے یک روزہ سیریز میں کھیلے گئے سبھی میچوں میں نصف سنچری بنائی اور آخری کے دونوں میچوں میں تو انھوں نے ناٹ آؤٹ رہتے ہوئے ہندوستان کو فتح کے دروازے تک لے گئے۔ ان کی بہترین بلے بازی کے لیے انھیں مین آف دی سیریز کے ایوارڈ سے نوازا گیا۔ مہندر سنگھ دھونی کی یہ کارکردگی ان کے ناقدین کے منھ پر طمانچے کے مترادف ہے جو اکثر یہ کہتے رہتے ہیں کہ دھونی کا کھیل اب ختم ہو چکا ہے۔ انھوں نے صرف بلے بازی میں ہی نہیں بلکہ وکٹ کے پیچھے بھی اس سیریز میں اپنی چابکدستی کا بھرپور مظاہرہ کیا۔