خبراردو:

گورنر ستیہ پال ملک نے جنگجو مخالف آپریشنو ں کے دوران مارے جارہے جنگجوؤں کی ہلاکت کو تکلیف دہ قرار دیتے ہوئے واضح کیا کہ جنگجوؤں کا خاتمہ اصل مسئلے کا حل نہیں ہے۔ انہوں نے دبے الفاظ میں ہی مسئلہ کشمیر کو متنازعہ قرار دیتے ہوئے کہا کہ پے در پے جنگجو نوجوانوں کی ہلاک اصل مسئلے کا حل نہیں ہے۔

ریاستی گورنر ستیہ پال ملک نے جمعرات کو سرمائی دارالحکومت جموں میں نویں ست پال سہنی میموریل لیکچر کی تقریب میں شرکت کے دوران ذرائع ابلاغ سے بات کرتے ہوئے کہا کہ جنگجو مخالف آپریشنوں کے دوران مارے جارہے جنگجوؤں کی ہلاکت ایک تکلیف دہ امر ہے۔ انہوں نے صاف کیا کہ فورسز کارروائی کے نتیجے میں آئے روز جنگجوؤں کی ہلاکت مسئلہ کا حل نہیں ہے۔ گورنر کا کہنا تھا کہ وادی کشمیر میں عام شہریوں یا جنگجوؤں کی ہلاکت سے اُن کے دل چھلنی ہوتے ہیں۔

انہوں نے بتایا کہ وہ انتہائی مایوس ہوجاتے ہیں جب وادی کشمیر میں انسانی جانوں کا زیاں ہوتا ہے۔گورنر کا کہنا تھا کہ پے در پے ہلاکتیں مسئلہ کا حل نہیں ہے۔ دبے الفاظ میں ہی مسئلہ کشمیر کو متنازعہ قرار دیتے ہوئے گورنر ستیہ پال ملک نے بتایا کہ جنگجوؤں کی ہلاکت مسئلہ کا حل نہیں ہے کیوں کہ ہلاکتوں کے بعد وہی مسئلہ جوں کاتوں ہے۔ جموں وکشمیر پولیس کی طرف سے امن عامہ کو برقرار رکھنے کے لیے گورنر ستیہ پال ملک کا کہنا تھا کہ امن کو بحال کرنے میں پولیس کا رول قابل سراہنا ہے تاہم انہوں نے بتایا کہ کشمیر میں چاہے عام شہری ہلاک ہو یا جنگجو مارا جائے، مجھے اُس سے انتہائی تکلیف پہنچتی ہے۔گورنر موصوف گزشتہ روز شمالی قصبہ بارہمولہ میں ہوئی خونریز معرکہ آرائی کے دوران لشکر طیبہ سے وابستہ 3جنگجوؤں کی ہلاکت کے تناظر میں میڈیا سے بات کررہے تھے۔گورنر نے میڈیا نمائندوں کو بتایاکہ مجھے پوری اُمید ہے کہ وادی کشمیر کے نوجوان تشدد اور جنگجوئیت کا راستہ ترک کرکے اپنے مستقبل کے تئیں فکر مند رہیں گے۔

انہوں نے بتایا کہ وادی کشمیر کے نوجوان اپنے ادھوے سپنوں کو پورا کرنے اور سماج کی خدمت کرنے کے بجائے تشدد اور جنگجوئیت کی راہ اختیار کررہے ہیں جس کے نتیجے میں وادی میں انسانی جانیں بے تحاشا تلف ہورہی ہیں۔ ’کشمیر میں چاہے عام شہری مارا جائے یا فورسز کارروائی کے دوران کسی جنگجو کو ہلاک کیا جائے، مجھے ذاتی طور پر اُس سے بڑا صدمہ پہنچتا ہے‘۔گورنر ستیہ پال ملک نے غیر محسوس طریقے پر مسئلہ کشمیر کے متنازعہ ہونے کا اقرار کرتے ہوئے بتایا کہ جنگجوؤں کو ہلاک کرنے سے کوئی بھی مقصد پورا نہیں ہوتا بلکہ اس کے بعد بھی مسئلہ جوں کا توں برقرار ہے۔گورنر کا کہنا تھا کہ ’میرے خیال سے جنگجوئیت بندوقوں میں نہیں ہے بلکہ نوجوانوں کے ذہنوں میں سرایت کرچکی ہے۔ ہماری یہی کوشش ہے کہ نواجوانوں کے ذہنوں سے اس جنگجوئیت کو باہر نکالا جائے جس کے لیے ہم کام کررہے ہیں‘۔

اس دوران گورنر ستیہ پال ملک نے فوج، پولیس، سی آر پی ایف اور دیگر سیکورٹی ایجنسیوں کی کوششوں کی حوصلہ افزائی کرتے ہوئے بتایا کہ ہماری فوج و فورسز ہمہ تن الرٹ رہ کر ریاست کی حفاظت کرنے میں جٹے ہوئے ہیں۔انہوں نے بتایا کہ فوج و فورسز کی کارکردگی کو ہمیشہ سراہا گیا ہے اور میں سمجھتا ہوں کہ ذرائع ابلاغ کے ذریعے اُن کی سراہنا کرنا کوئی معنی نہیں رکھتی۔ میں اپنی طرف سے بھر پور کوشش کررہا ہوں کہ فوج اور دیگر سیکورٹی فورسز کو وہ تمام سہولیات بہم رکھی جائیں جس کی انہیں ضرورت ہے۔ گورنر کا کہنا تھا کہ جب ہم لوگ آرام کررہے ہوتے ہیں ہماری فوج اور دیگر سیکورٹی ایجنسیاں دوران شب اس شدید برف باری میں کارروائیاں انجام دے رہے ہوتے ہیں۔ انہوں نے بتایا کہ جب سے میں نے ریاستی گورنر کا عہدہ سنبھالا ہے میں نے تبھی سے اس کام میں لگا ہوا ہوں کہ فورسز اہلکاروں کی فلاح و بہبود کے لیے بہتر اقدامات اُٹھائے جائیں اور میں اس کام کو آگے بھی جاری رکھوں گا۔