خبراردو:

لائن آف کنٹرول اور بین الاقوامی سرحد پر جنگجو مخالف نیٹ ورک کو مضبوط بنانے اور دراندازی کی کوششوں پر روک لگانے کے لیے فوج آنے والے دنوں میں 6ہزار قناص رائفلیں اور دیگر جدید آلات کوسرحد پر تعینات اہلکاروں کو سونپنے جارہی ہے۔ معلوم ہوا ہے کہ پاکستان کی طرف سے مسلسل سنائپر حملوں کا منہ توڑ جواب دینے کی غرض سے فوج نے لائن آف کنٹرول پر تعینات اپنے جوانوں کو بھی قناص رائفلیں اور ٹھوس چیزوں کو پاش پاش کردینے والے جدید طرز کے ہتھیار سونپ دینے کو منظوری دی ہے۔

لائن آف کنٹرول اور بین الاقوامی سرحد پر جنگجو مخالف نیٹورک کو سخت کرنے اور یہاں سرحد پار سے جاری دراندازی کا سختی سے مقابلہ کرنے کی خاطر فوج آنے والے دنوں میں یہاں تعینات اپنے اہلکاروں کو 6ہزار سنائپر (قناص) رائفلیں فراہم کررہی ہیں ۔ معلوم ہوا ہے کہ سرحد پار دراندازی سے نمٹنے اور پاکستان کی طرف سے بار بار جنگ بندی معاہدوں کی خلاف ورزی سے نمٹنے کے لئے فوج کو جدید ترین ہتھیار بھی فراہم کئے جائیں گے۔اس سلسلے میں فوج نے نئے منصوبے پر کام شروع کردیا ہے اور آنے والے دنوں میں اس کو مکمل کئے جانے کا قوی امکان ہے۔

ذرائع کا کہنا ہے کہ فوج آنے والے دنوں میں لائن آف کنٹرول اور خطے پیر پنچال کے پونچھ اور راجوری کے علاوہ کپوارہ اور بارہمولہ اضلاع سے ملنے والی سرحدی لائن پر آنے والے دنوں میں 6ہزار سنائپر رائفلیں نصب کرے گی جس کی نتیجے میں فوج کو جنگجو مخالف نیٹ ورک اور دراندازی کے واقعات سے نمٹنے میں بھر پور مدد ملے گی۔ ذرائع نے بتایا کہ نئے قناص رائفلوں کی فراہمی کے بعد سرحد پر تعینات فوجی اہلکار پاکستان کی طرف سے جاری گولہ باری اور دراندازی کی کوششوں کا منہ توڑ جواب دینے کی اہل ہوگی۔ انہو ں نے بتایا کہ سنائپر رائفلوں کی فراہمی کے بعد فوج دور سے بھی دشمن کو نشانہ بنانے کی صلاحیت سے لیس ہوگی۔ذرائع سے معلوم ہوا ہے کہ فوج نے سرحد پر تعینات اہلکاروں کو جدید ہتھیاروں سے لیس کرنے کی غرض سے 6ہزار سنائپر رائفلیں اور جدید آلات خریدنے کا نشانہ مقرر کیا ہے۔معلوم ہوا ہے کہ اس منصوبے کو پایہ تکمیل تک پہنچانے کے لئے فی الحال ایک کھیپ بین الاقوامی سپلائروں سے حاصل کی گئی ہے۔ فوج کا کہنا ہے کہ جونہی تمام ہتھیار مہیا ہوں گے تو عین اُسی وقت انہیں سرحد پر تعینات اہلکاروں کو سونپ دیا جائے گا تاکہ لائن آف کنٹرول اور بین الاقوامی سرحد پر کسی بھی چیلنج سے نبردآزماہوا جائے۔

ذرائع نے کے این ایس کو بتایا کہ سرحد پر پہلے سے ہی جنگجو مخالف کارروائیوں کے دوران ’’ڈریگونو ایس وی ڈی‘‘ نامی ہتھیار موجود ہے تاہم اب سنائپر رائفل حاصل ہونے کے بعد انہیں وہاں سے ہٹالیا جائے گا۔ معلوم ہوا ہے کہ نئے قناص رائفلوں کو سرحد پر استعمال میں لانے سے فوج بھر پور صلاحیت سے لیس ہوگی اور کسی بھی بڑے جنگجوانہ حملے سے نمٹ سکتی ہے جس کے دور رس نتائج برآمد ہونے کا امکانات موجود ہیں۔انہوں نے بتایا کہ سنائپر رائفلوں کے ذریعے فوج اپنے ٹارگیٹ کو بہ آسانی نشانہ بناسکتی ہے جس کے نتیجے میں دشمن کو بڑے پیمانے پر نقصان پہنچنے کا احتمال ہے۔ادھرخفیہ ذرائع نے بتایا کہ سنائپر کے علاوہ لائن آف کنٹرول پر مضبوط نیٹورک کو یقینی بنانے کی خاطر جدید قسم کے آلات نصب کئے جارہے ہیں۔ انہوں نے بتایا کہ فوجی اہلکاروں کو جدید طرز کی ٹیکنالوجی سے لیس کرنے اور دشمن کو منہ توڑ جواب دینے کی خاطر فوج کے پاس کئی اہم منصوبے زیر غور ہے جن پر کام کیا جارہا ہے۔معلوم ہوا ہے کہ لائن آف کنٹرول اور بین الاقوامی سرحد پرتعینات فوجی اہلکاروں کو جدید طرزکے مہلک ہتھیار فراہم کئے جائیں گے جن میں جدید سنائپر رائفل بھی شامل ہیں۔ اس کے علاوہ یہاں اہلکاروں کو کسی بھی چیلنج سے نمٹنے کے لیے ’’انٹی میٹریئل رائفل‘‘ فراہم کی جائے گی جو موٹی سی موٹی دیوار کو بھی تباہ کرسکتی ہے۔معلوم ہوا ہے کہ ’’انٹی میٹریئل رائفل‘‘ سے کسی بھی ٹھوس چیزجیسے فوجی گاڑی کو بہ آسانی تباہ کیا جاسکتا ہے۔

ادھر ذرائع نے بتایا کہ نئے منصوبے کے تحت سرحد پر مامور اہلکاروں کو بریٹا کی طرف سے تیار کردہ’’ 338لاپا میگنم اسکارپیو‘‘اور ’’ 50کیلبر ایم 95‘‘ہتھیار بھی فراہم کئے جارہے ہیں۔خیال رہے گزشتہ مہینے فوجی سربراہ جنرل بپن راوت نے اس بات کا انکشاف کرتے ہوئے کہا کہ لائن آف کنٹرول اور بین الاقوامی سرحد پر تعینات فوجی اہلکاروں کو سرحدوں کی کڑی نگہبانی اور یہاں کسی بھی چیلنج کا مقابلہ کرنے کی خاطر جلد ہی جدید ہتھیار وں سے لیس کیا جارہا ہے جن میں سنائپر رائفل بھی شامل ہیں۔معلوم ہو اہے کہ بریٹا نامی کمپنی کی طرف سے تیار کردہ ہتھیار ’’ 50کیلبر ایم 95‘‘کسی بھی ٹھوس چیز کو پاش پاش کردینے کی صلاحیت رکھتی ہے ۔ مذکورہ ہتھیار 1800میٹر کی دوری سے بھی دشمن کو نشانہ بنانے کی صلاحیت رکھتی ہے۔