دنیا

وینیزویلا میں آئے تباہ کن زلزلے کے آٹھ دن بعد ملبے میں دبے ایک شخص کو زندہ نکالا گیا

Published

4 months ago

July 3, 2026

کاراکاس، وینیزویلا میں آئے دوہرے زلزلے کے بعد منہدم عمارت کے ملبے میں آٹھ دن تک پھنسے رہنے کے بعد ایک شخص کو زندہ بچا لیا گیا ہے۔

بی بی سی کی ایک رپورٹ کے مطابق، ایمرجنسی اہلکاروں نے 140 ٹن ملبے کے نیچے دبے ہرنان گل کو تلاش کرنے کے 100 گھنٹے سے زیادہ وقت بعد باہر نکالا۔ ایک چلی کے فائر فائٹر نے پہلے بچاؤ مہم کو “بلا شبہ اب تک کی سب سے پیچیدہ اور تکنیکی طور پر مشکل مہم” بتایا تھا۔

جمعرات کی شام تک، 24 جون کو وینیزویلا میں آئے زلزلوں میں 2595 لوگوں کی موت کی تصدیق ہو چکی ہے اور ہزاروں لوگ ابھی بھی لاپتہ ہیں۔

ہرنان گل آکسیجن ماسک، گلے میں کالر اور نارنجی کمبل میں لپٹے ہوئے اسٹریچر پر لیٹے ہوئے دکھائی دے رہے ہیں۔ بچاؤ ٹیم نے گل کو بچانے کے لیے 100 گھنٹے سے زیادہ وقت تک آہستہ آہستہ کوشش کی۔ کوسٹا ریکا ریڈ کراس کے پیرامیڈک ایلن میڈریگل نے جائے وقوع پر موجود صحافیوں کو بتایا کہ گل اس ہولناک صورتحال سے “بالکل ٹھیک” نکلے۔ میڈریگل وہی بچاؤ اہلکار ہیں جنہوں نے اتوار کو ملبے سے گل کی مدد کی ہلکی آواز سنی تھی۔

انہوں نے یاد کرتے ہوئے کہا کہ یہ ایک جذباتی لمحہ تھا۔ انہوں نے بتایا کہ پہلے تو انہیں اپنے کانوں پر یقین نہیں ہوا اور انہوں نے ایک ساتھی سے تصدیق کرنے کے لیے کہا کہ کہیں وہ “تصور تو نہیں کر رہے ہیں”۔ اس لمحے سے ہی بچاؤ ٹیم سکیورٹی گارڈ کو ملبے سے باہر نکالنے کے لیے تیزی سے مصروف ہوگئی۔ جب دو بار زلزلہ آیا، تو گل کیٹیا لا مار میں گیلریاس پلاسیا گرانڈے مال کے پاس پارکنگ لاٹ کے بیسمنٹ میں بنے ایک چھوٹے سے کنکریٹ بوتھ میں ڈیوٹی پر تھے۔

ایسا لگتا ہے کہ اس بوتھ نے ان کے چاروں طرف ایک حفاظتی حصار بنادیا تھا، جس سے وہ 140 ٹن ملبے سے بچ گئے جو ان کے آس پاس اور اوپر گرا تھا۔ کوسٹا ریکا ریڈ کراس کے ایک اور ورکر نے گل کو ملبے سے باہر نکالنے سے کچھ دیر پہلے کہا کہ انہوں نے ہمیں بتایا ہے کہ ان کے جسم پر خراش تک نہیں آئی ہے۔

جب وینیزویلا، چلی، کوسٹا ریکا، ایل سلواڈور، میکسیکو، پرتگال اور امریکہ کی ٹیمیں انہیں باہر نکالنے کی کوشش کر رہی تھیں، تب گل کو پانی دیا گیا اور میڈیکل ٹیم نے انہیں آئی وی ڈرپ لگائی۔ بچاؤ ٹیم نے ان تک پہنچنے کے لیے جو راستے بنائے تھے، وہ کئی بار ڈھہ گئے۔ اس سے پتہ چلتا ہے کہ یہ کام بچاؤ ٹیم اور گل، دونوں کے لیے کتنا خطرناک تھا۔

رات بھر چلی کوششوں کے بعد، تلاشی ٹیم آخر کار اس شخص کو دیکھ سکی جو ملبے میں پھنسا ہوا تھا، جس ملبے میں گل پھنسے تھے، وہاں ایک چھوٹا کیمرہ ڈال کر ریکارڈ کیے گئے فوٹیج میں چلی کے ایک فائر فائٹر کو ان سے اپنا سر کیمرے کی طرف گھمانے کے لیے کہتے ہوئے سنا جا سکتا ہے۔ بین الاقوامی بچاؤ ٹیم ملبے میں پھنسے شخص پر نظر رکھے ہوئے تھی۔

اس کی ایک آنکھ لال ہو گئی تھی اور اس نے چہرے پر ماسک پہنا ہوا تھا، جو بچاؤ ٹیم نے اسے دھول اور ملبے سے بچانے کے لیے ایک چھوٹے سے سراخ سے اندر بھیجا تھا؛ یہ ملبہ انہیں باہر نکالنے کی کوششوں کے دوران اڑ رہا تھا۔ فائر فائٹرز نے اسے اپنی آنکھوں کی حفاظت کے لیے گوگلز پہننے کو بھی کہا، جبکہ بچاؤ ٹیم احتیاط سے اس کے آس پاس کا ملبہ ہٹاتی رہی۔ میکسیکن ریڈ کراس کے مارکو انتونیو فرینکو نے گل کو “خوش مزاج شخص” بتایا۔

انہوں نے میکسیکن نیوز سائٹ ‘ملینیو’ کو بتایا کہ بچے ہوئے شخص نے “اپنی پسند کے خاص فلیور والے ہائیڈریشن ڈرنکس بھی مانگی” اور کہا کہ “بلاشبہ، ہم نے اس کی یہ خواہش پوری کی”۔ وہ خود ہمیں آگے بڑھنے کے لیے متاثر کرتے ہیں اور کہتے ہیں کہ کام جاری رکھیں۔ وہ ہماری ٹیم کے ارکان کو پہچانتے ہیں اور کہتے ہیں، ‘کتنی اچھی بات ہے کہ آپ واپس آئے اور پھر سے میرے ساتھ ہیں’۔

فرینکو کے مطابق، بچاؤ ٹیم اور گل لگاتار اس کے خاندان اور چیلنجنگ بچاؤ مہم کے بارے میں بات چیت کرتے رہے۔ گل کو ڈھونڈنے والے پیرامیڈک میڈریگل کا یہ پہلا بین الاقوامی بچاؤ مشن تھا اور انہوں نے کہا کہ وینیزویلا میں کیے گئے کام نے انہیں بدل دیا ہے۔

انہوں نے صحافیوں سے کہا کہ ایک ہفتے پہلے جو لڑکا یہاں آیا تھا، وہ کوسٹا ریکا واپسی پر ویسا نہیں رہے گا، یقین کیجیے۔”

یو این آئی۔ این یو۔

دنیا

سعودی عرب کے دمام ہوائی اڈے پر حملے میں دو افراد ہلاک، آٹھ زخمی، پروازیں بحال

Published

11 hours ago

October 22, 2026

Online Desk

دمام، سعودی عرب کے دمام شہر میں شاہ فہد بین الاقوامی ہوائی اڈے پر جمعرات کو فضائی آپریشن دوبارہ شروع ہوگیا اور ہوائی ٹریفک معمول پر آگئی۔ سعودی شہری ہوا بازی اتھارٹی نے بتایا کہ حملے میں دو افراد ہلاک اور آٹھ زخمی ہوگئے تھے۔

بدھ کی شام ہونے والا یہ حملہ مملکت کے مشرقی صوبے میں تیل کی ایک تنصیب پر روکے گئے ڈرون کا ملبہ گرنے سے دو کارکنوں کی ہلاکت کے چند گھنٹے بعد ہوا۔ ان واقعات نے سعودی عرب کے شہری اور توانائی کے بنیادی ڈھانچے کو درپیش مسلسل سلامتی کے خطرات کو اجاگر کیا ہے۔

جنرل اتھارٹی آف سول ایوی ایشن (گاکا) نے بتایا کہ ہوائی اڈے پر حملے میں ایک سعودی شہری اور ایک ہندوستانی باشندہ ہلاک ہوئے۔ زخمیوں میں سعودی عرب، ہندوستان، یمن، بنگلہ دیش اور نیپال کے شہری شامل ہیں۔
اتھارٹی کے مطابق، زخمیوں کی حالت معمولی سے شدید نوعیت کی ہے اور انہیں مختلف اسپتالوں میں طبی امداد دی جارہی ہے۔

گاکا نے مزید کہا کہ حکام ہوائی اڈے کو پہنچنے والے نقصان کا جائزہ لے رہے ہیں اور مسافروں و عملے کی سلامتی یقینی بنانے کے لیے اقدامات کیے جارہے ہیں۔

یمن میں قانونی حکومت کی بحالی کے لیے قائم اتحاد کے مطابق، جمعرات کو بھی سعودی عرب کو نشانہ بنانے والے ڈرون حملے جاری رہے۔ ریاض اور مدینہ کے علاقوں میں پانچ ڈرونوں کو روک کر تباہ کردیا گیا، جبکہ اس سے قبل مشرقی صوبے میں چار دیگر ڈرون مار گرائے گئے تھے۔

گزشتہ چند ہفتوں کے دوران سعودی عرب کو یمن کی حوثی ملیشیا سے منسوب ڈرون اور میزائل حملوں کا مسلسل سامنا ہے۔ ان حملوں میں ہوائی اڈوں، توانائی کی تنصیبات اور شہری علاقوں کو نشانہ بنایا گیا ہے۔

اس سے قبل بدھ کو سعودی وزارت توانائی نے بتایا تھا کہ مشرقی صوبے میں سعودی آرامکو کے شیبہ آئل فیلڈ کی ایک پروسیسنگ تنصیب پر روکے گئے ڈرون کا ملبہ گرنے سے فلپائن اور نیپال کے دو کارکن ہلاک ہوگئے تھے۔

وزارت کے مطابق، اس واقعے میں پاکستان اور ہندوستان سے تعلق رکھنے والے دو دیگر کارکن بھی زخمی ہوئے۔

وزارت نے بتایا کہ اس واقعے کے نتیجے میں تنصیب کے احاطے سے باہر ایک ٹھیکیدار کی گاڑی میں آگ لگ گئی، تاہم آئل فیلڈ میں کام کاج متاثر نہیں ہوا۔

حملوں کے پیش نظر سعودی حکام آنے والے ڈرونوں اور میزائلوں کو روکنے کی کوششیں جاری رکھے ہوئے ہیں۔ ان واقعات نے مملکت میں اہم بنیادی ڈھانچے اور شہری تنصیبات کی سلامتی کے حوالے سے تشویش بڑھا دی ہے۔

یو این آئی۔ یو این آئی۔ ع ا۔

دنیا

یمن کی فوج کے تعز میں حوثیوں کے میزائل ٹھکانوں، اسلحہ ڈپو اور فوجی تنصیبات پر فضائی حملے

Published

11 hours ago

October 22, 2026

Online Desk

صنعاء، یمن کی فوج نے جمعرات کو تعز صوبے میں حوثی باغیوں کے میزائل لانچروں، اسلحہ ڈپو اور فوجی تنصیبات کو فضائی حملوں میں نشانہ بنایا۔ سرکاری ٹیلی ویژن نے یہ اطلاع ایسے وقت دی ہے جب لڑائی میں شدت آرہی ہے اور اقوام متحدہ نے بے گھر افراد کے بڑھتے ہوئے بحران سے خبردار کیا ہے۔

یمن سیٹلائٹ چینل کے مطابق، جنوب مغربی صوبے تعز کے مغربی، جنوبی اور مشرقی علاقوں میں حوثیوں کے متعدد ٹھکانوں پر حملے کیے گئے۔ ان میں رڈار نظام، فوجی مواصلاتی آلات اور اسلحہ ذخیرہ کرنے کی تنصیبات شامل ہیں۔

یہ حملے حوثیوں کے قبضے میں موجود علاقوں کو دوبارہ حاصل کرنے کے لیے حکومت کی بڑھتی ہوئی فوجی کارروائیوں کے دوران کیے گئے ہیں۔ حوثیوں کا شمالی اور مغربی یمن کے بڑے حصے پر کنٹرول ہے۔

حکومتی فورسز نے حالیہ دنوں میں حوثیوں کے ٹھکانوں کے خلاف سیکڑوں کارروائیاں کرنے کی اطلاع دی ہے۔
فوجی ترجمان ماجد النزیلی نے کہا کہ سرکاری فورسز نے 835 اہدافی کارروائیاں کیں، جن میں 285 حوثی جنگجو ہلاک یا زخمی ہوئے، جبکہ ٹینکوں اور اسلحہ کے گوداموں کو تباہ کردیا گیا۔

اسٹریٹجک اہمیت کے حامل جبل حان کے پہاڑی علاقوں کے علاوہ ذباب اور المسراخ اضلاع کے اطراف شدید لڑائی کی اطلاعات ہیں۔ ایک سرکاری فوجی ذریعے نے یہ بھی بتایا کہ تعز کے جنوب میں معافر ضلع میں حوثیوں کے اجتماع اور بنیادی ڈھانچے کو فضائی حملوں میں نشانہ بنایا گیا۔

یمنی حکومت نے خبردار کیا ہے کہ اس کی فوجی کارروائیوں کا دائرہ حوثیوں کی ریلیوں تک بھی پھیل سکتا ہے۔ حکومت کا الزام ہے کہ حوثی ان اجتماعات کو بچوں کی بھرتی کے لیے استعمال کررہے ہیں۔ وزارت دفاع نے حوثیوں کے زیر کنٹرول علاقوں کے شہریوں سے اپیل کی ہے کہ وہ ریلیوں اور ان سرگرمیوں سے دور رہیں جنہیں حوثی ”ثقافتی کورس” قرار دیتے ہیں۔

اقوام متحدہ کے دفتر برائے رابطۂ انسانی امور (اوچا) کے مطابق، اگست سے اب تک بڑھتے ہوئے تشدد کے باعث تقریباً 2 لاکھ 60 ہزار افراد اپنے گھر بار چھوڑنے پر مجبور ہوئے ہیں، جن میں سے تقریباً نصف نے تعز میں پناہ لی ہے۔

اوچا نے بدھ کی دیر شب جاری کردہ رپورٹ میں بتایا کہ اقوام متحدہ کے انسانی حقوق کے دفتر نے شہریوں کے جانی نقصان کے 251 واقعات کی تصدیق کی ہے، جن میں 57 افراد ہلاک اور 194 زخمی ہوئے۔ رپورٹ کے مطابق، ہلاک ہونے والوں میں نصف بچے تھے۔

اوچا نے کہا کہ انسانی ہمدردی کی تنظیموں نے اگست سے اب تک 1 لاکھ 74 ہزار سے زیادہ بے گھر افراد تک امداد پہنچائی ہے۔ انہیں خوراک، حفظانِ صحت کی کٹس اور ہنگامی نقد امداد فراہم کی گئی ہے۔

ادارے کے مطابق، حال ہی میں بے گھر ہونے والے خاندانوں نے پناہ گاہ کو اپنی سب سے فوری ضرورت قرار دیا ہے، جس کے بعد خوراک اور نقد امداد کی ضرورت ہے۔

دریں اثنا، یمن کی وزارت تعلیم نے بتایا ہے کہ تنازع کے باعث 25 لاکھ سے زیادہ بچے اسکولوں سے باہر ہیں۔

تازہ لڑائی ایسے وقت میں ہورہی ہے جب یمن کی بین الاقوامی طور پر تسلیم شدہ حکومت نے حوثیوں کے قبضے والے علاقوں، بشمول دارالحکومت صنعاء، کو واپس لینے کے لیے رواں ماہ کے اوائل میں شروع کیے گئے جوابی فوجی آپریشن ”یمن کی صبح” کو تیز کردیا ہے۔ اس کارروائی میں سعودی عرب کی قیادت والے اتحاد کی حمایت حاصل ہے۔

یمن کا تنازع اب علاقائی کشیدگی سے بھی جڑتا جارہا ہے۔ حوثی سعودی اہداف پر حملے کررہے ہیں، جبکہ سعودی عرب کو بار بار ڈرون اور میزائل حملوں کے خطرات کا سامنا ہے۔

سعودی عرب کی شہری ہوا بازی اتھارٹی نے جمعرات کو بتایا کہ بدھ کی شام دمام کے شاہ فہد بین الاقوامی ہوائی اڈے پر حملے میں دو افراد ہلاک ہوگئے تھے۔ سعودی حکام نے ایسے متعدد حملوں کا الزام حوثی تحریک پر عائد کیا ہے۔

امریکی محکمہ خارجہ کے مطابق، امریکہ نے بھی ریاض میں اپنے سفارت خانے کے غیر ضروری عملے اور ان کے اہل خانہ کو سعودی عرب چھوڑنے کا حکم دیا ہے۔ اس کی وجہ یہ بتائی گئی ہے کہ خطے میں دشمنانہ کارروائیوں میں تیزی سے اضافے کا امکان ہے۔

یمنی حکومت نے حوثیوں پر بدھ کو عدن اور الریان ہوائی اڈوں پر حملے کرنے کا الزام بھی لگایا ہے۔ صدارتی قیادت کونسل کے سربراہ رشاد العلیمی نے مبینہ حملوں کی مذمت کرتے ہوئے عالمی برادری سے حوثی گروپ کو دہشت گرد تنظیم قرار دینے کی اپیل کی۔

یمن 2014 سے تنازع کی لپیٹ میں ہے، جب حوثیوں نے صنعاء اور دیگر صوبوں پر قبضہ کرلیا تھا۔ مارچ 2015 میں سعودی عرب کی قیادت میں اتحاد نے بین الاقوامی طور پر تسلیم شدہ حکومت کی حمایت میں مداخلت کی تھی۔

یو این آئی۔ ع ا۔

دنیا

ایران کا آبنائے ہرمز میں چار جہازوں پر حملے کا دعویٰ، تین دیگر بحری جہاز بارودی سرنگوں سے ٹکرائے

Published

11 hours ago

October 22, 2026

Online Desk

تہران، ایران کی نیم فوجی تنظیم پاسدارانِ انقلاب (آئی آر جی سی) نے جمعرات کو دعویٰ کیا کہ اس نے خلیج فارس میں تیل کی منتقلی کرنے والے چار بحری جہازوں کو نشانہ بنایا، کیونکہ وہ آبنائے ہرمز میں ایسے بحری راستوں سے گزر رہے تھے جنہیں تہران غیر مجاز قرار دیتا ہے۔ تنظیم کے مطابق، تین دیگر جہاز بھی آبنائے ہرمز میں اسی ”غیر مجاز” راستے سے گزرتے ہوئے بارودی سرنگوں سے ٹکرا گئے۔

آئی آر جی سی کی بحریہ نے کہا کہ اس نے ان چار جہازوں کی نقل و حرکت پر نظر رکھی تھی، جو اس کے بقول ”غیر قانونی راستے” سے گزرے تھے۔ اس سے مراد عمان کے قریب جنوبی بحری راستے ہیں، جنہیں امریکہ نے تجارتی جہازوں کو ایرانی فیس اور پابندیوں سے بچانے کے لیے استعمال کرنے کی ترغیب دی ہے۔

آئی آر جی سی نے ایک بیان میں کہا، ”ہم نے خلیج فارس کے شمالی وسطی حصے میں جہاز سے جہاز میں تیل منتقل کرنے والے ان بحری جہازوں کا پتہ لگایا۔ چاروں جہازوں کو بیک وقت نشانہ بنایا گیا اور ان میں آگ لگ گئی ہے۔”

تنظیم نے یہ دعویٰ بھی کیا کہ ایران کی جانب سے تسلیم نہ کیے جانے والے راستوں سے گزرنے کی کوشش کرنے والے تین دیگر جہاز آبنائے ہرمز کے مغرب میں بارودی سرنگوں سے ٹکرا گئے، جس کے بعد ان میں آگ لگ گئی اور انہیں سفر روکنا پڑا۔

آئی آر جی سی نے ان واقعات کا ذمہ دار واشنگٹن کو ٹھہراتے ہوئے الزام لگایا کہ امریکی فوج جہازوں کو بارودی سرنگوں والے پانیوں سے گزرنے کی ہدایت دے رہی ہے۔ اس نے خبردار کیا کہ امریکہ کی مسلسل کارروائیوں کے نتیجے میں پورے خطے میں امریکی فوجی اڈوں پر حملے ہو سکتے ہیں۔

ایران عمان کے قریب جنوبی بحری راہداری کو غیر قانونی سمجھتا ہے، جسے تجارتی جہازوں کی آمدورفت کے لیے مختص کیا گیا ہے اور امریکہ اس کی حفاظت کر رہا ہے۔

یہ دعوے ایسے وقت سامنے آئے ہیں جب آبنائے ہرمز کے آس پاس بحری جہازوں پر حملوں کی اطلاعات مسلسل موصول ہو رہی ہیں۔

بدھ کو برطانیہ کے ادارے میری ٹائم ٹریڈ آپریشنز (یو کے ایم ٹی او) نے اطلاع دی تھی کہ عمان کے علاقے بَخا کے قریب ایک آئل ٹینکر پر نامعلوم سمت سے آنے والا ایک پروجیکٹائل گرا۔

اگر ان اطلاعات کی تصدیق ہو جاتی ہے تو سات بحری جہازوں کو نقصان پہنچنے کا یہ واقعہ 28 فروری کو ایران جنگ شروع ہونے کے بعد خلیج میں ایک ہی دن کے دوران جہازوں کو پہنچنے والا سب سے بڑا نقصان ہوگا۔ تاہم، ان دعوؤں کی آزادانہ طور پر تصدیق نہیں ہو سکی ہے۔

ایرانی سرکاری ٹیلی ویژن کی جانب سے سات آئل ٹینکروں کو ایرانی فورسز یا سمندری بارودی سرنگوں سے نشانہ بنائے جانے کی اطلاعات کے بعد جمعرات کو تیل کی قیمتوں میں تیزی سے اضافہ ہوا۔ عالمی معیار کے برینٹ خام تیل کی قیمت 3.2 فیصد بڑھ کر 112.27 ڈالر فی بیرل ہو گئی، جبکہ امریکی خام تیل کی قیمت 2.8 فیصد اضافے کے ساتھ 99.80 ڈالر فی بیرل تک پہنچ گئی۔

حالیہ دنوں میں برینٹ خام تیل کی قیمت تقریباً 110 ڈالر فی بیرل کے آس پاس رہی ہے۔ اس کی وجہ تنازع ختم ہونے کے وقت اور آبنائے ہرمز کے ذریعے توانائی کی ترسیل معمول پر آنے کے حوالے سے پائی جانے والی غیر یقینی صورت حال ہے۔

عالمی حصص بازاروں میں بھی گراوٹ دیکھی گئی۔ یورپ میں کاروبار کے ابتدائی اوقات میں جرمنی کا ڈیکس انڈیکس 1.1 فیصد گر کر 25,367.96 پوائنٹس پر آ گیا، فرانس کا سی اے سی 40 انڈیکس 1.3 فیصد کمی کے ساتھ 7,816.67 پوائنٹس پر رہا، جبکہ برطانیہ کا ایف ٹی ایس ای 100 انڈیکس 0.7 فیصد گر کر 10,678.67 پوائنٹس پر آ گیا۔

امریکی اسٹاک فیوچرز میں بھی کمزوری دیکھی گئی۔ ایس اینڈ پی 500 کے فیوچرز میں ایک فیصد جبکہ ڈاؤ جونز انڈسٹریل ایوریج کے فیوچرز میں 0.7 فیصد کی کمی درج کی گئی۔

حملوں کے باوجود تجارتی انٹیلی جنس کمپنی کیپلر کے اعداد و شمار سے ظاہر ہوتا ہے کہ ایران کو چھوڑ کر خلیج فارس کے دیگر ممالک سے خام تیل کی برآمدات، متبادل پائپ لائنوں کے ذریعے بھیجی جانے والی ترسیل سمیت، جنگ سے پہلے کی سطح سے تجاوز کر گئی ہیں۔

یو این آئی ۔ ع ا۔