سری نگر، ڈویژنل کمشنر کشمیر انشول گرگ نے جمعہ کو ان اطلاعات کی تردید کی کہ سوشل میڈیا پر مبینہ دھمکی آمیز خط گردش کرنے کے بعد انتظامیہ نے کشمیری پنڈت ملازمین کو گھر سے کام کرنے کی کوئی زبانی ہدایت جاری کی ہے۔

گرگ نے کہا کہ ایسا کوئی حکم جاری نہیں کیا گیا اور لوگوں سے اپیل کی کہ وہ صرف سرکاری ذرائع سے موصول ہونے والی اطلاعات پر بھروسہ کریں۔

گرگ نے نامہ نگاروں سے کہاکہ ’’دیکھیں، اس طرح کا کوئی حکم کسی بھی صورت میں جاری نہیں کیا گیا ہے۔‘‘

انہوں نے عوام سے اپیل کی کہ وہ حکومت اور انتظامیہ کی جانب سے جاری کی جانے والی مستند اطلاعات پر ہی اعتماد کریں۔

انہوں نے کہاکہ ’’ہم سب کو اطلاعات کے محکمے، حکومت اور انتظامیہ کی جانب سے جاری کیے جانے والے مستند ذرائع پر ہی انحصار کرنا چاہیے۔ ہمیں ان پر بھروسہ کرنا چاہیے۔‘‘

سکیورٹی سے متعلق خدشات پر ڈویژنل کمشنر نے کہا کہ سرکاری ملازمین، رہائشیوں اور 15 اگست کی یومِ آزادی تقریبات میں شرکت کرنے والوں کے لیے مناسب سکیورٹی انتظامات کیے گئے ہیں۔

انہوں نے کہاکہ ’’جہاں تک سکیورٹی کا تعلق ہے، ملازمین، رہائشیوں یا 15 اگست کی یومِ آزادی تقریبات میں شرکت کرنے والوں، سب کے لیے فول پروف انتظامات کیے گئے ہیں۔‘‘

یواین آئی۔ظ ا

جموں، یومِ آزادی سے قبل ضلع انتظامیہ جموں نے جمعہ کو ایک عظیم الشان ترنگا ریلی کا انعقاد کیا۔ اس کا مقصد ’ہر گھر ترنگا‘ مہم کے پیغام کو مضبوط بنانا، شہریوں کو اپنے گھروں پر فخر کے ساتھ قومی پرچم لہرانے اور یومِ آزادی کی تقریبات میں بھرپور شرکت کی ترغیب دینا تھا۔

ریلی گلشن گراؤنڈ سے شروع ہوئی اور تاوی پل سے ہوتی ہوئی شری مہاراجہ ہری سنگھ جی پارک پہنچ کر اختتام پذیر ہوئی۔

سینکڑوں طلبہ اور عام شہریوں پر مشتمل اس عظیم الشان جلوس میں لوک سبھا کے رکن پارلیمنٹ جگل کشور شرما، باہو کے رکن اسمبلی وکرم رندھاوا، نگروٹہ کی رکن اسمبلی دویانی رانا، ڈویژنل کمشنر جموں رمیش کمار، انسپکٹر جنرل آف پولیس جموں زون بھیم سین ٹوٹی، ڈی آئی جی جے ایس کے رینج، ڈپٹی کمشنر جموں، کمشنر جموں میونسپل کارپوریشن، ایس ایس پیز، محکمۂ سربراہان، اے ڈی سیز اور سول و پولیس انتظامیہ کے دیگر اعلیٰ افسران اور اہلکاروں نے شرکت کی۔

شرکاء نے ترنگا ہاتھوں میں اٹھا رکھا تھا اور حب الوطنی کے نعرے بلند کرتے ہوئے مقررہ راستے پر مارچ کیا، جس سے قومی فخر، اتحاد اور جوش و خروش کا ماحول پیدا ہوگیا۔

اس موقع پر ڈویژنل کمشنر رمیش کمار نے کہا کہ ترنگا ریلی کا انعقاد یومِ آزادی کی پُرجوش تقریبات کا ماحول بنانے، ’ہر گھر ترنگا‘ مہم کے پیغام کو مضبوط کرنے اور قومی گیت ’وندے ماترم‘ کے 150 سال مکمل ہونے کے موقع کو خراجِ تحسین پیش کرنے کے لیے کیا گیا ہے۔

انہوں نے کہا کہ ’وندے ماترم‘ کی لازوال روح آج بھی ہر شہری کو متاثر کرتی ہے اور یہ حب الوطنی، قربانی، اتحاد اور ملک سے وابستگی کی اقدار کی نمائندگی کرتی ہے۔

ڈویژنل کمشنر نے معاشرے کے تمام طبقات کے لوگوں کی پُرجوش شرکت کو سراہا اور کہا کہ اس طرح کی سرگرمیاں قومی اتحاد، بھائی چارے اور اجتماعی ذمہ داری کے جذبے کو مضبوط کرتی ہیں۔ انہوں نے جموں ڈویژن کے اضلاع کی جانب سے فعال شرکت اور ’وندے ماترم‘ کی 150ویں سالگرہ کے سلسلے میں پروگراموں کے انعقاد کے لیے کی جانے والی مشترکہ کوششوں کی بھی تعریف کی۔

انہوں نے سول انتظامیہ، پولیس، تعلیمی اداروں اور عوام کی مربوط کوششوں کو سراہا، جن کی بدولت تقریبات کو بامعنی اور کامیاب بنایا گیا۔

ڈویژنل کمشنر نے نوجوانوں پر زور دیا کہ وہ ’وندے ماترم‘ میں موجود حب الوطنی کی اقدار سے تحریک حاصل کریں اور ملک کی تعمیر و ترقی میں مثبت کردار ادا کریں۔ انہوں نے نوجوان نسل سے اپیل کی کہ وہ اتحاد، سماجی ہم آہنگی، نظم و ضبط اور ذمہ دار شہری ہونے کے اصولوں کو برقرار رکھتے ہوئے ملک کی ترقی میں فعال کردار ادا کریں۔

ترنگا ریلی مہاراجہ ہری سنگھ جی پارک میں اختتام پذیر ہوئی، جہاں شرکاء نے ملک کے اتحاد، سالمیت اور ترقی کے لیے اپنے عزم کا اعادہ کیا۔

اس تقریب کے ذریعے ’ہر گھر ترنگا‘ مہم کے پیغام کو بھی مزید تقویت ملی اور شہریوں کو یومِ آزادی فخر کے ساتھ منانے اور ہر شہری کے دل میں حب الوطنی کے جذبے کو زندہ رکھنے کی ترغیب دی گئی۔

یواین آئی۔ ظ ا

سری نگر، جموں و کشمیر کے لیفٹیننٹ گورنر منوج سنہا نے جمعہ کو کہا کہ جموں و کشمیر کے نوجوان اس بات کو یقینی بنائیں کہ ماضی کی غلطیاں دوبارہ نہ دہرائی جائیں اور ایک جامع اور بااختیار ہندوستان کو مضبوط بنانے کے لیے اعتماد کے پل تعمیر کیے جائیں۔

سری نگر میں ’تقسیمِ ہند کے ہولناک واقعات کی یاد کے دن‘ کی تقریب سے خطاب کرتے ہوئے سنہا نے 1947 کی تقسیمِ ہند کے دوران مصائب برداشت کرنے والے لوگوں کو خراجِ عقیدت پیش کیا اور کہا کہ ان کی قربانیاں نسلوں کو متاثر کرتی رہیں گی۔

لیفٹیننٹ گورنر نے کہا کہ تقسیمِ ہند کا زخم آج بھی ہر ہندوستانی کے اجتماعی شعور میں درد کی صورت میں موجود ہے۔

انہوں نے کہاکہ ’’تقسیم کے کئی دہائیاں گزر جانے کے باوجود ان کی قربانیاں ہمیں یاد دلاتی ہیں کہ یہ زخم ابھی مندمل نہیں ہوا اور ہندوستان کی اجتماعی روح میں نسل در نسل درد کی صورت میں موجود ہے۔ تقسیمِ ہند کے ہولناک واقعات کی یاد کے دن ہم صرف ماضی کو یاد نہیں کر رہے بلکہ ان لاکھوں لوگوں کی آواز کو بھی سامنے لا رہے ہیں جن کی آواز ان سے چھین لی گئی تھی۔ میں پختہ عزم کے ساتھ دوبارہ کہنا چاہتا ہوں کہ ہم ان کے درد کو تاریخ کی گرد میں دفن نہیں ہونے دیں گے۔‘‘

انہوں نے مزید کہاکہ ’’انہیں یاد کرنا انسانیت کے تئیں اپنی ذمہ داری پوری کرنا ہے۔ ہم ان کی یادوں کو محفوظ رکھیں گے۔

پوری سچائی، ایمانداری اور انتہائی حساسیت کے ساتھ انہیں یاد کرنا سب سے مقدس خراجِ عقیدت ہے۔ میرا یقین ہے کہ ان کی داستانیں ہمارے قومی شعور کا ناقابلِ فراموش باب ہیں اور ان کی قربانیاں مادرِ ہند کی روح میں ہمیشہ زندہ رہیں گی۔‘‘

لیفٹیننٹ گورنر نے جموں و کشمیر مرکز کے زیر انتظام علاقے کے لوگوں سے اپیل کی کہ وہ اس دن کو خود احتسابی اور قومی عزم کے موقع کے طور پر منائیں۔

انہوں نے نوجوانوں، کسانوں، مزدوروں اور خواتین سے اپیل کی کہ وہ حوصلے اور عزم کے ساتھ آگے آئیں اور ترقی و ہم آہنگی کی جانب وقت کا رخ موڑیں۔

لیفٹیننٹ گورنر نے ان لوگوں کے عزم و حوصلے کو سراہا جنہوں نے ہمت کے ساتھ اپنی زندگیوں کو دوبارہ تعمیر کیا اور تاریخی روایات اور اقدار کے ذریعے ملک کے سماجی تانے بانے اور ثقافتی ورثے کو مزید مالا مال کیا۔

انہوں نے کہاکہ ’’آج کا موقع ماضی کے درد کو تسلیم کرنے اور امن، ہم آہنگی اور قومی اتحاد کے لیے اپنے غیر متزلزل عزم کو مزید مضبوط کرنے کا موقع ہے۔ یہ دن ہمیں یاد دلاتا ہے کہ تاریخ سے حاصل ہونے والے اسباق ہی مستقبل کو محفوظ اور انسانی بنا سکتے ہیں۔‘‘

جاری۔یواین آئی۔ظ ا