ہندوستان

آر ایس ایس کو ڈیڑھ ارب لوگوں کی سچائی جاننے کا حق کس نے دیا: راہل

Published

17 minutes ago

August 20, 2026

نئی دہلی، لوک سبھا میں اپوزیشن لیڈر راہل گاندھی نے راشٹریہ سویم سیوک سنگھ (آر ایس ایس) کونشانہ بناتے ہوئے کہا ہے کہ اس نے یہ طے کر لیا ہے کہ وہ ملک کے ڈیڑھ ارب لوگوں کی سچائی جانتا ہے، جبکہ ہر شخص اپنی سچائی خود جانتا ہے انہوں نے سوال کیا کہ آخر آر ایس ایس کو ڈیڑھ ارب لوگوں کی سچائی جاننے کا حق کس نے دیا راہل نے جواہر بھون میں یہاں جمعرات کو سابق وزیر اعظم اور بھارت رتن راجیو گاندھی کے 82 ویں یوم پیدائش پر منعقدہ ‘ہرا بھرا سوراج: راجیو گاندھی کے نقطہ نظر کو خراج عقیدت’ پروگرام سے خطاب کرتے ہوئے کہا کہ آج ملک میں نظریاتی لڑائی اسی سوال پر ہے کہ سوراج کو اکثر آزادی کے برابر سمجھ لیا جاتا ہے، جبکہ اس کا مطلب خود پر حکومت کرنا ہے۔ یہ ذمہ داری اور سوچنے کا طریقہ ہے۔ کوئی شخص دوسرے کو آزادی دے سکتا ہے، لیکن کسی دوسرے کو سوراج نہیں دے سکتا۔ انہوں نے کہا کہ خود کو گہرائی سے سمجھنا اور دنیا کے ساتھ اپنے ذاتی تعلق کو سمجھنا ہی سوراج ہے۔

انہوں نے کہا کہ مہاتما گاندھی چاہتے تھے کہ ملک کا ہر شخص اس راستے پر چلے۔ کوئی شخص انجینئر، باورچی، موچی یا خلاباز بننا چاہتا ہے تو اسے اپنی پسند کے مطابق آگے بڑھنے کا موقع ملنا چاہیے۔ حکومت اور ملک کا کام لوگوں کی تخیل کے دروازے کھولنا اور انہیں اپنے منتخب کردہ راستے پر آگے بڑھنے میں مدد کرنا ہے۔ لیکن سچ یہ ہے کہ گاندھی جی کا سوراج کا نقطہ نظر ایسی مہنگی تعلیم کے نظام کے ساتھ ممکن نہیں ہے اور یہ ایسے ناانصافی پر مبنی امتحانی نظام کے ساتھ بھی قائم نہیں رہ سکتا۔ انہوں نے کہا کہ دو تین لوگوں کے ہاتھوں میں مرکوز مالیاتی نظام ملک کی گہرائی تک نہیں پہنچنے والا ہے اور اس سانچے کا سیاسی نظام بھی گاندھی جی کے نقطہ نظر کے مطابق نہیں ہو سکتا۔

مسٹر راہل گاندھی نے کہا کہ خراب ماحول انسان کو سوراج سے دور کر دیتا ہے اور اس کی قدرتی حالت کو بدل دیتا ہے، جس سے وہ اپنی زندگی ٹھیک سے نہیں جی پاتا۔ گاندھی جی کا ماننا تھا کہ ہر ذی روح ایک منفرد اکائی ہے اور سچائی تک پہنچنے کا اس کا اپنا راستہ ہے۔ اگر وہ خود یہ ماننے لگیں کہ وہ کسی دوسرے شخص کی سچائی جانتے ہیں تو یہ غلط ہوگا، کیونکہ انہوں نے وہ تجربہ نہیں کیا جو اس شخص نے کیا اور نہ ہی وہ دیکھا ہے جو اس نے دیکھا ہے۔ انہوں نے کہا کہ ہر شخص کو اپنی سچائی جاننے اور اپنی زندگی کا راستہ چننے کا حق ہے۔

انہوں نے الزام لگایا کہ بی جے پی مسلمانوں، عیسائیوں اور سکھوں سے کہتی ہے کہ ان کا کوئی وجود نہیں ہے۔ آدیواسیوں سے کہتی ہے کہ ان کی زمین لے لی جائے گی اور مخالفت کرنے پر انہیں گولی مار دی جائے گی، جبکہ دلتوں سے کہا جاتا ہے کہ ان کا استحصال اہمیت نہیں رکھتا۔ انہوں نے کہا کہ ملک میں جو کچھ کیا گیا ہے، اسے بدلنے کی ضرورت ہے۔ راہل نے کہا کہ ملک کے ہر شخص کو، چاہے وہ کسی بھی مذہب، ذات، عمر یا صنف کا ہو، یہ محسوس ہونا چاہیے کہ وہ اس ملک کا حصہ ہے، یہاں اس سے محبت کی جاتی ہے، اس کا احترام کیا جاتا ہے اور سچائی کی اس کی تلاش اہمیت رکھتی ہے۔

یو این آئی ایف اے

ہندوستان

لداخ میں قائم کی جائے گی جموں و کشمیر ہائی کورٹ کی بنچ: شاہ

Published

20 minutes ago

August 20, 2026

Online Desk

نئی دہلی، حکومت نے لداخ میں الگ سے ہائی کورٹ یا اس کی مستقل بنچ قائم کرنے کے مطالبے کو پورا کرتے ہوئے وہاں جموں و کشمیر ہائی کورٹ کی بنچ قائم کرنے کا فیصلہ کیا ہے۔

وزیراعظم نریندر مودی کی صدارت میں مرکزی کابینہ کی میٹنگ میں اس فیصلے کو منظوری دی گئی۔ مرکزی وزیر داخلہ امت شاہ نے جمعرات کو یہ معلومات دی۔

امت شاہ نے سوشل میڈیا پر ایک پوسٹ میں کہا کہ لداخ میں ہائی کورٹ کی بنچ بننے سے وہاں کے لوگوں کی انصاف تک رسائی آسان ہوگی۔ انہوں نے کہا کہ حکومت لداخ کی ہمہ جہت ترقی اور آئینی تحفظ کو یقینی بنانے کے لیے مکمل طور پر پرعزم ہے۔ مرکزی وزیر داخلہ نے پوسٹ میں لکھا، “وزیراعظم نریندر مودی کی صدارت میں مرکزی کابینہ نے لداخ میں جموں و کشمیر اور لداخ ہائی کورٹ کی ایک بنچ قائم کرنے کا فیصلہ کیا ہے۔ حکومت کے مطابق اس قدم سے لداخ کے دور دراز علاقوں میں رہنے والے لوگوں کے لیے انصاف تک رسائی آسان ہوگی اور قانونی خدمات کا فائدہ اٹھانے میں لگنے والا وقت کم ہوگا۔ حکومت نے کہا کہ وہ لداخ کی ہمہ جہت ترقی اور آئینی تحفظ کو یقینی بنانے کے لیے مکمل طور پر پرعزم ہے۔”

قابل ذکر ہے کہ لداخ کی سیاسی و سماجی تنظیمیں اور عوام طویل عرصے سے حکومت کے سامنے اپنا یہ مطالبہ رکھ رہے تھے۔ لداخ کے جغرافیائی اعتبار سے دشوار گزار علاقہ ہونے کی وجہ سے لوگوں کو قانونی معاملات کے حل کے لیے سری نگر جانا پڑتا ہے جس سے انہیں کافی دشواری اور پریشانی کا سامنا کرنا پڑتا ہے۔

یو این آئی ایف اے

ہندوستان

وزیراعظم مودی نے سابق وزیراعظم راجیو گاندھی کو ان کے یومِ پیدائش پر خراجِ عقیدت پیش کیا

Published

6 hours ago

August 20, 2026

Online Desk

نئی دہلی، وزیراعظم نریندر مودی نے جمعرات کے روز سابق وزیراعظم راجیو گاندھی کو ان کے یومِ پیدائش پر خراجِ عقیدت پیش کیا انہوں نے کانگریس لیڈر راجیو گاندھی کو یاد کیا، جنہوں نے 1984 سے 1989 تک ہندستان کے وزیراعظم کے طور پر خدمات انجام دی تھیں وزیراعظم نریندر مودی نے سوشل میڈیا پلیٹ فارم ‘ایکس’ پر ایک پوسٹ میں کہا، “آج ان کے یومِ پیدائش پر، سابق وزیراعظم مسٹرراجیو گاندھی جی کو میرا خراجِ عقیدت۔”

20 اگست 1944 کو پیدا ہونے والے راجیو گاندھی، اکتوبر 1984 میں اپنی والدہ اور اس وقت کی وزیراعظم اندرا گاندھی کے قتل کے بعد 40 سال کی عمر میں ہندستان کے سب سے کم عمر وزیراعظم بنے۔ اس کے بعد انہوں نے 1989 کے لوک سبھا انتخابات میں پارٹی کی شکست تک کانگریس اور ملک کی قیادت کی۔

راجیو گاندھی کا دورِ حکومت جدید کاری اور ٹیکنالوجی کے استعمال پر زور دینے کے لیے جانا جاتا ہے۔ ان کی حکومت نے تعلیم اور پنچایتی راج جیسے شعبوں میں اقدامات کرنے کے علاوہ، کمپیوٹرائزیشن اور ٹیلی کمیونیکیشن کے فروغ میں اہم کردار ادا کیا۔ ان کی حکومت نے ووٹ دینے کی عمر بھی 21 سال سے گھٹا کر 18 سال کر دی تھی۔

سال 1989 میں کانگریس کے اقتدار سے باہر ہونے کے بعد راجیو گاندھی لوک سبھا میں اپوزیشن لیڈر بنے۔ 21 مئی 1991 کو تمل ناڈو کے سری پیرومبدور میں لوک سبھا الیکشن کی مہم کے دوران ایک بم دھماکے میں ان کا قتل کر دیا گیا تھا۔

کانگریس ان کے یومِ پیدائش کو ‘سدبھاونا دیوس’ کے طور پر مناتی ہے، جس میں پارٹی کے لیڈران اور کارکنان نئی دہلی میں ان کی یادگار ‘ویر بھومی’ پر جا کر خراجِ عقیدت پیش کرتے ہیں۔

وزیراعظم نریندر مودی باقاعدگی سے راجیو گاندھی کو ان کے یومِ پیدائش پر خراجِ عقیدت پیش کرتے رہے ہیں۔ 2024 میں بھی انہوں نے پوسٹ کیا تھا، “ہمارے سابق وزیراعظم مسٹرراجیو گاندھی جی کو ان کے یومِ پیدائش پر خراجِ عقیدت۔”

یہ خراجِ عقیدت ایسے وقت میں پیش کیا گیا ہے جب راجیو گاندھی کی سیاسی میراث نہرو-گاندھی خاندان اور کانگریس سے گہرائی سے جڑی ہوئی ہے۔ ان کے بیٹے، راہل گاندھی، فی الحال لوک سبھا میں اپوزیشن لیڈر ہیں اور پارٹی کے اہم ترین رہنماؤں میں سے ایک ہیں۔

یواین آئی۔الف الف

ہندوستان

راجیو گاندھی کو 82 ویں یومِ پیدائش پر کانگریس لیڈران نے خراجِ عقیدت پیش کیا

Published

6 hours ago

August 20, 2026

Online Desk

نئی دہلی، کانگریس پارلیمانی پارٹی کی لیڈر سونیا گاندھی، پارٹی صدر ملیکارجن کھرگے، سابق صدر راہل گاندھی سمیت کانگریس کے کئی سینئر لیڈران نے جمعرات کو سابق وزیرِ اعظم راجیو گاندھی کے 82 ویں یومِ پیدائش پر ان کی یادگار ‘ویر بھومی’ پر پھول پیش کر کے انہیں خراجِ عقیدت پیش کیا۔سابق وزیرِ اعظم کی یادگار پر مسٹرکھرگے، محترمہ گاندھی، اور ان کے بیٹے راہل گاندھی کے علاوہ ان کی بیٹی پرینکا گاندھی واڈرا اور ان کے شوہر رابرٹ واڈرا نے بھی راجیو گاندھی کو خراجِ عقیدت پیش کیا۔

مسٹرگاندھی نے سوشل میڈیا پلیٹ فارم ‘ایکس’ پر اپنے والد راجیو گاندھی کو یاد کرتے ہوئے کہا کہ آج جب ملک بھر میں نوجوانوں کے درمیان بڑھتی ہوئی بے چینی اور ہلچل کو دیکھا جا رہا ہے، تب یہ یاد کرنا اہم ہے کہ سابق وزیرِ اعظم راجیو گاندھی نے نوجوانوں اور ملک کے مستقبل کے حوالے سے کئی اہم اقدامات اٹھائے تھے۔

انہوں نے کہا کہ راجیو گاندھی نے آئین میں ترمیم کر کے ووٹ ڈالنے کی کم از کم عمر 21 سال سے گھٹا کر 18 سال کی اور 18 سال کے نوجوانوں کو حقِ رائے دہی دیا۔ مسٹرراجیو گاندھی نے سوامی وویکانند کے یومِ پیدائش 12 جنوری کو ‘نیشنل یوتھ ڈے‘ قرار دیا تھا اور 1988 میں نئی تعلیمی پالیسی نافذ کی، جس کے تحت ملک بھر میں نوودیہ ودیالیہ کا نیٹ ورک قائم کرنے سمیت کئی نئی کوششیں کی گئیں۔

انہوں نے کہا کہ راجیو گاندھی نے ملک کے تمام اضلاع کو کور کرنے والے ‘نہرو یوتھ سینٹر آرگنائزیشن’ کی بنیاد رکھی، جس کا نام اب بدل کر ‘میرا یووا بھارت’ کر دیا گیا ہے۔

کانگریس لیڈر نے کہا کہ راجیو گاندھی نے ہندستان کو فیصلہ کن طور پر انفارمیشن ٹیکنالوجی کے دور میں پہنچایا، جس سے روزگار کے لاکھوں نئے مواقع پیدا ہوئے۔

مسٹر گاندھی نے مزید لکھا: ”ہندستانیوں کے درمیان خیر سگالی، ہر دل میں ہمدردی اور ہر شہری کو انصاف و جمہوریت میں مساوی حقوق۔ پاپا، آپ کی یہ تعلیمات میری طاقت ہیں اور آپ کی یادیں میری ہمت۔ آپ کے خوابوں کا ہندستان بنانے کا عزم ہمیشہ میری رہنمائی کرتا رہے گا۔“

یواین آئی۔الف الف