واشنگٹن، امریکہ کے صدر ڈونلڈ ٹرمپ نے جمعہ کو کہا کہ ایران معاہدہ کرنا چاہتا ہے، لیکن ان کے بقول وہ واشنگٹن کی شرائط کے مطابق ’’درست معاہدے‘‘ کے لیے ابھی تیار نہیں ہے۔ انہوں نے دونوں ممالک کے درمیان بڑھتی کشیدگی کے درمیان خطے کے اہم علاقوں پر امریکی کنٹرول کا بھی دعویٰ کیا۔

جنوبی کیرولائنا کے مرٹل بیچ روانگی سے قبل جوائنٹ بیس اینڈریوز میں صحافیوں سے بات کرتے ہوئے ٹرمپ نے کہا کہ ایران کے خلاف اقتصادی اقدامات کا مطلب یہ نہیں ہے کہ امریکہ کے پاس فوجی اختیارات محدود ہوگئے ہیں۔

انہوں نے ایران کی معاشی صورتحال کا حوالہ دیتے ہوئے کہا کہ ملک کے پاس پیسہ، بحریہ اور فضائیہ نہیں ہے، اس کے فوجیوں اور پولیس اہلکاروں کو ادائیگی نہیں کی جارہی اور مہنگائی 350 فیصد تک پہنچ گئی ہے۔ ٹرمپ نے کہا کہ امریکہ دیکھ رہا ہے کہ حالات کس رخ پر جاتے ہیں اور واشنگٹن کو خطے اور آبنائے ہرمز سے متعلق مکمل کنٹرول حاصل ہے۔

ٹرمپ نے کہا کہ ایران معاہدے میں دلچسپی رکھتا ہے، تاہم ابھی تک امریکہ کی مطلوبہ شرائط پر اتفاق نہیں کیا ہے۔ ان کے مطابق ایران معاہدہ کرنا چاہتا ہے، لیکن ان کی رائے میں وہ صحیح معاہدے کے لیے ابھی تیار نہیں ہے۔

ان کے یہ بیانات ایسے وقت آئے ہیں جب واشنگٹن اور تہران کے درمیان کشیدگی برقرار ہے۔ ٹرمپ نے حال ہی میں ایران کے خلاف اپنی کارروائی کو ’’اب تک کی سب سے شدید اقتصادی کارروائی‘‘ قرار دیتے ہوئے تہران کو مالی، کاروباری یا حکومتی مدد فراہم کرنے والے ممالک کو سنگین اقتصادی نتائج کی وارننگ دی تھی۔

ٹرمپ کے مطابق ان اقدامات کا ہدف ایران کی اقتصادی سرگرمیوں کی اہم کڑیاں ہیں، جن میں تیل کی اسمگلنگ کے نیٹ ورک، مالیاتی منتقلی، ایکسچینج ہاؤسز، جہازوں کی رجسٹریاں اور فرضی کمپنیوں کے نیٹ ورک شامل ہیں۔

یو این آئی۔ م س

تیونس، تیونس کے ساحل کے قریب اٹلی جانے والے تارکین وطن کی کشتی ڈوبنے سے کم از کم 13 افراد لاپتہ ہوگئے۔ تارکین وطن کے حقوق کے لیے کام کرنے والی ایک تنظیم کے مطابق کشتی جمعرات کی علی الصبح روانہ ہوئی تھی۔تیونس آبزرویٹری فار ہیومن رائٹس کے سربراہ مصطفی عبدالکبیر نے ہفتہ کے روز بتایا کہ کشتی میں سوار دو افراد کو بچا لیا گیا

ہے۔ ان میں سے ایک نے امدادی کشتی کے عملے کو بتایا کہ کشتی الٹنے کے بعد وہ کئی گھنٹوں تک سمندر میں پھنسے رہے۔ دوسرے شخص کی حالت تشویشناک ہے۔

گزشتہ دو برسوں کے دوران تیونس سے یورپ جانے کی کوشش کرنے والے تارکین وطن کی تعداد میں نمایاں کمی آئی ہے۔ اس کی وجہ تیونس میں سخت کارروائی اور یورپی یونین کی حمایت سے سمندری نگرانی میں اضافہ بتایا جاتا ہے۔

اس سے قبل تیونس افریقہ کے مختلف علاقوں سے یورپ جانے والے تارکین وطن کے لیے ایک اہم روانگی کا مقام تھا، جہاں بہت سے افراد گنجائش سے زیادہ بھری اور غیر محفوظ کشتیوں کے ذریعے خطرناک سمندری سفر کرتے تھے۔

یو این آئی۔ م س

کریوی ریہ، یوکرین کے وسطی شہر کریوی ریہ میں ایک شاپنگ سینٹر پر روسی ڈرون کے دو مرحلوں میں کیے گئے حملے میں کم از کم 16 افراد ہلاک اور 130 زخمی ہوگئے۔ زخمیوں میں 23 بچے بھی شامل ہیں، جبکہ متعدد افراد کے ملبے تلے دبے ہونے کی اطلاعات ہیں۔

مقامی حکام کے مطابق یہ حملہ شہر کے سب سے بڑے شاپنگ مال پر کیا گیا۔ یوکرین کے صدر ولودیمیر زلنسکی نے حملے کو انتہائی بے حسی پر مبنی قرار دیتے ہوئے کہا کہ یہ دن کے وقت دو مرحلوں میں کیا گیا، جس میں دوسرے حملے میں امدادی کارکنوں کو بھی نشانہ بنایا گیا۔

بی بی سی سے تصدیق شدہ ویڈیو میں ایک جلتے ہوئے شاپنگ سینٹر سے دوسرے ڈرون کے ٹکرانے کا منظر دیکھا جاسکتا ہے۔ روسی فوج نے اس حملے پر فوری طور پر کوئی تبصرہ نہیں کیا۔

دنیپروپیٹروفسک کے علاقائی سربراہ اولیکساندر ہانژا نے بتایا کہ امدادی کارروائی کے دوران ملبے سے ایک اور لاش برآمد ہوئی۔ ان کے مطابق کریوی ریہ کے شاپنگ سینٹر میں اب بھی 9 افراد لاپتہ ہیں، جن میں دو بچے شامل ہیں۔

یو این آئی۔ م س