بغداد، عراقی صدر نجار عمیدی نے کہا ہے کہ ان کا ملک کسی دوسرے ملک پر حملے کے لیے عراقی سرزمین کے استعمال کو قبول نہیں کرے گا۔ انہوں نے کہا کہ عراق کے اندر سے خطے کے کسی بھی ملک کے خلاف حملوں کا کوئی جواز نہیں ہے۔

مسٹر عمیدی نے بغداد ڈائیلاگ کانفرنس کے آٹھویں ایڈیشن کے دوسرے دن کہا کہ عراق میں صرف “دو یا تین” مسلح گروہ ہیں جنہوں نے ابھی تک اپنے ہتھیار حکومت کے حوالے نہیں کیے ہیں۔ انہوں نے کہا کہ ہتھیاروں کو ریاستی کنٹرول میں لانے کے لیے بات چیت جاری ہے۔ انہوں نے کہا، “آئین واضح طور پر کہتا ہے کہ ہتھیار ریاستی کنٹرول میں ہونے چاہئیں، اور نجف میں مذہبی اتھارٹی بھی اسی کا مطالبہ کرتی ہے۔”

مسٹر عمیدی نے کہا کہ تمام فریق عراق کو خطے میں جاری جنگ میں گھسیٹنے سے روکنے کے لیے پرعزم ہیں۔ انہوں نے کہا کہ علاقائی تنازعہ کے اثرات “ہمارے ملک کے لیے بہت سخت” رہے ہیں۔

انہوں نے کہا کہ آبنائے ہرمز کا بحران نہ صرف عراق بلکہ پوری دنیا کو متاثر کرتا ہے۔ انہوں نے مزید کہا کہ بغداد آبنائے کے پیچیدہ مسائل پر ایران کے ساتھ بات چیت کر رہا ہے۔

مسٹر عمیدی نے کہا کہ عراقی تیل لے جانے والے کئی جہازوں کو آبنائے ہرمز سے گزرنے میں مدد کی جا رہی ہے۔ انھوں نے یہ بھی کہا کہ انھیں یقین ہے کہ امریکہ جنگ کے خاتمے کے لیے ایک معاہدہ چاہتا ہے۔

یو این آئی۔ ع ا۔

واشنگٹن/اوٹاوا، آخری وقت میں مذاکرات ناکام ہونے کے بعد امریکہ اور کینیڈا کے درمیان تجارتی جنگ ایک بار پھر شدت اختیار کر گئی ہے۔ واشنگٹن نے تقریباً 28 ارب ڈالر مالیت کی کینیڈین اشیا پر 50 فیصد نیا ٹیرف عائد کرنے کا فیصلہ کیا ہے، جس کے جواب میں کینیڈا کے وزیراعظم مارک کارنی نے ڈالر کے بدلے ڈالر کی بنیاد پر جوابی ٹیرف عائد کرنے کا اعلان کیا ہے۔

کارنی نے کہا کہ واشنگٹن کی جانب سے آخری وقت میں مجوزہ شرائط میں تبدیلیاں ’’غیر منصفانہ‘‘ اور ’’معاشی طور پر ناقابل عمل‘‘ قرار پانے کے بعد کینیڈا نے امریکہ کے ساتھ تجارتی مذاکرات معطل کر دیے ہیں۔

کارنی نے ایک بیان میں کہا، ’’آج نصف شب امریکہ تقریباً 28 ارب ڈالر مالیت کی کینیڈین اشیا پر 50 فیصد ٹیرف عائد کرنے کا ارادہ رکھتا ہے۔ کینیڈا اپنے کارکنوں اور کاروباری اداروں کے تحفظ کے لیے ان ٹیرف کا ڈالر کے بدلے ڈالر جواب دے گا۔‘‘

انہوں نے کہا کہ امریکی تجویز میں آخری لمحات میں کی جانے والی تبدیلیوں نے ’’کسی بھی معاہدے کی قابلِ اعتماد ہونے پر سوال‘‘ کھڑا کر دیا، جس کے بعد انہوں نے کینیڈین مذاکرات کاروں کو اوٹاوا واپس آنے کی ہدایت کی۔

کارنی نے کہا، ’’چنانچہ آج شام میں نے امریکہ کے ساتھ تجارتی مذاکرات معطل کرنے کا فیصلہ کیا ہے۔‘‘

مذاکرات کے خاتمے سے قبل امریکی صدر ڈونلڈ ٹرمپ، کارنی اور دونوں ممالک کے اعلیٰ تجارتی حکام کے درمیان پورے ہفتے شدید رابطے اور مذاکرات جاری رہے تھے۔ ٹرمپ نے اس سے قبل ٹیرف کے نفاذ میں تین روز کی تاخیر کی تھی، جس سے یہ امید پیدا ہوئی تھی کہ دونوں ممالک کسی معاہدے کے قریب پہنچ گئے ہیں۔

ٹرمپ نے رواں ہفتے کے آغاز میں کہا تھا، ’’ہم کینیڈا کے ساتھ ایک معاہدے پر پہنچ گئے ہیں‘‘، تاہم انہوں نے واضح کیا تھا کہ حتمی دستاویزات مکمل ہونا باقی ہیں۔

امریکی تجارتی نمائندے جیمیسن گریئر نے تاہم کہا کہ کینیڈا نے رواں ہفتے کے دوران طے پانے والی شرائط کو حتمی شکل دینے سے انکار کردیا۔

گریئر نے کہا، ’’آج رات کینیڈا نے اس ہفتے کے آغاز میں طے شدہ شرائط کے تحت تجارتی معاہدے کو حتمی شکل دینے سے انکار کردیا۔‘‘ انہوں نے اوٹاوا پر نئی شرائط عائد کرنے اور سابقہ وعدوں سے پیچھے ہٹنے کا الزام لگایا۔

ان کے مطابق امریکی پیشکش میں اسٹیل، ایلومینیم، گاڑیوں اور لکڑی پر ’’نمایاں ٹیرف میں کمی‘‘ کے ساتھ ایک ’’تاریخی اقتصادی اور قومی سلامتی شراکت داری‘‘ بھی شامل تھی۔تاہم کارنی نے کہا کہ امریکی شرائط میں آخری وقت پر کی گئی تبدیلیوں نے مذاکرات میں ہونے والی پیش رفت کو نقصان پہنچایا۔

جاری۔ یو این آئی۔ ع ا۔

تہران، ایران نے اپنی نئی فوجی صلاحیتوں کو خفیہ رکھنے اور دشمن کے خلاف حیرت کا عنصر برقرار رکھنے کے لیے فوجی سازوسامان کی سرعام نمائش اور رونمائی سے گریز شروع کر دیا ہے۔

ایرانی وزارت دفاع کے ترجمان رضا طلائی نیک نے کہا کہ گزشتہ اور رواں سال دفاعی صنعت کے دن کے موقع پر فوجی نمائش منعقد نہ کرنے اور ہتھیاروں کی رونمائی میں بڑی حد تک کمی کرنے کی ایک اہم وجہ دشمن کو حیران کرنا اور دفاعی معلومات و رازوں کا تحفظ ہے۔

ایرانی سرکاری میڈیا کے مطابق انہوں نے ایک ٹیلی ویژن انٹرویو میں کہا، “دشمن کو حیران کرنا اور دفاعی معلومات اور رازوں کا تحفظ” اس پالیسی کی بنیادی وجوہات میں شامل ہے۔

انہوں نے بتایا کہ ایرانی فوجی کمانڈروں کو بیلسٹک اور کروز میزائلوں، ڈرونز، فضائی دفاعی نظام اور دیگر ہتھیاروں میں ہونے والی پیش رفت کے بارے میں مسلسل بریفنگ دی جا رہی ہے، تاہم وزارت دفاع نے ان صلاحیتوں سے متعلق عوامی سطح پر جاری کی جانے والی معلومات میں نمایاں کمی کر دی ہے۔

طلائی نیک نے دعویٰ کیا کہ گزشتہ ایک سال کے دوران ایران میں ہتھیاروں اور فوجی سازوسامان کی مجموعی پیداوار دوگنی ہو گئی ہے، جبکہ جنگ کے دوران درکار بعض اسٹریٹجک ہتھیاروں کی پیداوار میں تین گنا سے زیادہ اضافہ ہوا ہے۔انہوں نے کہا کہ تہران آئندہ مجموعی ہتھیاروں کی پیداوار کو تین گنا کرنے کا ہدف رکھتا ہے، جبکہ بعض اقسام کے ہتھیاروں کی پیداوار میں چار سے پانچ گنا تک اضافہ کیا جائے گا۔

ترجمان کے مطابق ایران جنگ کے میدان میں استعمال ہونے والے ہتھیاروں اور گولہ بارود کو تقریباً اسی رفتار سے دوبارہ تیار کرنے کی کوشش کر رہا ہے جس رفتار سے وہ استعمال ہو رہے ہیں۔ ان کے بقول اس حکمت عملی میں موجودہ ذخائر کے ساتھ ساتھ مسلسل پیداوار جاری رکھنا شامل ہے۔

طلائی نیک نے ایرانی دفاعی صنعت کو مسلح افواج، جامعات، تحقیقی اداروں اور ہزاروں نجی و علم پر مبنی کمپنیوں پر مشتمل ایک وسیع اور منتشر نیٹ ورک قرار دیا۔

ان کے مطابق ملک کے دفاعی شعبے میں استعمال ہونے والے تقریباً دو تہائی پرزے، نظام اور خام مال اسی وسیع نیٹ ورک کے ذریعے فراہم کیا جاتا ہے۔انہوں نے دعویٰ کیا کہ گزشتہ ایک سال کے دوران دفاعی شعبے کے ساتھ تعاون کرنے والی نجی کمپنیوں کی تعداد تقریباً 8,000 سے بڑھ کر 9,300 سے زیادہ ہوگئی ہے، جبکہ تعاون کے حجم میں تقریباً 70 فیصد اضافہ ہوا ہے۔

ایرانی وزارت دفاع کے ترجمان نے یہ بھی دعویٰ کیا کہ بعض ایرانی ساختہ ہتھیاروں کی قیمت اسی نوعیت کے غیر ملکی نظاموں کے مقابلے میں دسواں سے بیسواں حصہ تک ہے، تاہم انہوں نے یہ واضح نہیں کیا کہ کن ہتھیاروں یا غیر ملکی نظاموں کا تقابل کیا گیا ہے۔

یو این آئی۔ ع ا۔