مسقط، عمان کے وزیر خارجہ سید بدر البوسعیدی منگل کو تہران کا دورہ کریں گے، جہاں وہ ایرانی وزیر خارجہ عباس عراقچی کے ساتھ دوطرفہ اور علاقائی امور پر بات چیت کریں گے۔ ایرانی وزارت خارجہ کے ترجمان اسماعیل بقائی نے پیر کو یہ اطلاع دی۔

مذاکرات میں آبنائے ہرمز کے انتظام کا معاملہ بھی شامل ہوگا۔ دونوں ممالک کی ساحلی حدود اس اہم آبی گزرگاہ سے ملتی ہیں اور گزشتہ کئی ہفتوں سے وہ تجارتی بحری جہازوں کی آمدورفت کے لیے انتظامات اور سمندری نقل و حمل کے فریم ورک کو حتمی شکل دینے پر بات چیت کر رہے ہیں۔

یہ دورہ ایسے وقت ہو رہا ہے جب ایران اور عمان آبنائے ہرمز میں سلامتی اور بحری ٹریفک کی نقل و حرکت سے متعلق مذاکرات جاری رکھے ہوئے ہیں۔ دونوں ممالک نے نئی بحری گزرگاہوں کے لیے جغرافیائی حدود طے کر لی ہیں، تاہم حتمی اعلامیے، آپریشنل فیس اور وسیع تر سکیورٹی شرائط پر بات چیت ابھی جاری ہے۔

مذاکرات میں اہم اختلافی نکات میں ممکنہ ٹرانزٹ یا سروس فیس، سمندری بارودی سرنگوں کی صفائی کی ذمہ داری اور ایران کا یہ وسیع تر مطالبہ شامل ہے کہ مکمل سکیورٹی صرف اس وقت بحال کی جائے جب امریکہ اپنی بحری ناکہ بندی ختم کرے۔

مذاکرات میں آبنائے سے گزرنے والے بحری جہازوں سے ممکنہ فیس وصول کرنے اور آبنائے میں داخل ہونے اور باہر نکلنے والے جہازوں کے لیے مخصوص راستے مقرر کرنے کے امور پر بھی تبادلہ خیال کیا جائے گا۔

بقائی نے کہا کہ عمانی وزیر خارجہ اپنے دورے کے دوران ایرانی حکام سے ملاقات کریں گے اور یہ دورہ دونوں ہمسایہ ممالک کے درمیان تعاون مضبوط بنانے اور سیاسی مشاورت جاری رکھنے کی کوششوں کا حصہ ہے۔انہوں نے کہا کہ مذاکرات میں علاقائی امن اور سلامتی کے معاملات بھی زیر بحث آئیں گے۔

بقائی نے واضح کیا کہ عمانی وزیر خارجہ کا دورہ ایران کے پاکستانی آرمی چیف کے مجوزہ دورہ تہران سے الگ ہے۔

پاکستانی آرمی چیف ایران اور امریکہ کے درمیان ثالثی کی کوششوں میں بھی کردار ادا کر رہے ہیں۔

ایرانی ترجمان نے ممالک کو خبردار کرتے ہوئے کہا کہ وہ امریکہ کو اپنی سرزمین یا سہولیات فراہم کرنے سے گریز کریں۔

بقائی نے الگ سے کہا کہ ایران کی خارجہ پالیسی میں اب صبر کے ساتھ سوچے سمجھے خطرات مول لینے کا امتزاج بڑھتا جا رہا ہے۔

انہوں نے کہا، ”ہم طویل عرصے سے شطرنج کے کھلاڑی رہے ہیں۔ حالیہ برسوں میں ہم پوکر کے کھلاڑی بھی بن گئے ہیں اور کچھ عرصے سے ہم دونوں کھیلوں کا امتزاج کھیل رہے ہیں۔“

یو این آئی۔ ع ا۔

واشنگٹن، امریکہ کے وزیرِ خزانہ اسکاٹ بیسنٹ نے کہا ہے کہ امریکہ، ایران کے خلاف ’’اقتصادی ڈی ڈے‘‘ میں داخل ہو گیا ہے۔

بیسنٹ نے امریکی سوشل میڈیا پلیٹ فارم ایکس سے جاری کردہ بیان میں کہا ہے کہ ’’صدر ڈونلڈٹرمپ نے ایران کی فوجی صلاحیتوں کو تباہ کر دیا، اس کی تقریباً 100 فیصد فوجی فیکٹریوں کو ختم کر دیا اور اس کے جوہری پروگرام کو دفن کر دیا ہے۔‘‘

انہوں نے مزید کہا ہے کہ’’اب ہم آخری مرحلے میں داخل ہو رہے ہیں۔ صبح ہوتے ہی ایک اقتصادی ڈی ڈے شروع ہو رہا ہے۔ یہ، ایک دشمن کے خلاف، اب تک کی سب سے بڑی مالی کارروائی۔‘‘

بیسنٹ نے کہا ہےکہ انتظامیہ کا مقصد ایران کو اقتصادی طور پر مزید تنہا کرنا اور ایرانی حکومت کو مدد فراہم کرنے والے وسائل کا راستہ روکنے کے لیے تمام دستیاب ذرائع استعمال کرنا ہے۔

انہوں نے کہا ہے کہ’’صدر نے ایسے حالات پیدا کر دیئے ہیں جو ہمیں ہر ادارے، ہر اختیار اور ہر ایسے اقدام کو استعمال کرنے کی اجازت دیتے ہیں جنہیں بہت سے لوگ سمجھتے تھے کہ ہم کبھی استعمال نہیں کریں گے۔ ہمارا مقصد تہران کے تنہا ہونے تک اس جابر حکومت کو سہارا دینے والی ہر اقتصادی شہ رگ کو کاٹنا ہے۔‘‘

انہوں نے ایران کی حامی حکومتوں اور دیگر فریقوں کو یہ سمجھنے سے پرہیز کرنے کی بھی تنبیہ کی ہے کہ امریکہ، واشنگٹن کی ایران پالیسی کو چیلنج کرنے والوں کو معاف کردے گا۔

بیسنٹ نے مزید کہا ہے کہ’’اسلامی جمہوریہ نے بلیک میلنگ کو سکیورٹی ضمانت کے پردے میں چھپا کر اپنا وجود برقرار رکھا ہوا ہے۔ اسے ایران کی یقینی جوابی کاروائی اور امریکی پابندیوں کو مذاکرات کا موضوع بنا سکنےکی سوچ سے طاقت ملی ہے ۔ صدر ٹرمپ کے دور میں یہ سلسلہ ختم ہو چکا ہے۔ جو لوگ تہران کی مخالفت کے خطرے سے خوفزدہ ہیں انہیں واشنگٹن کو آزمانے کی قیمت کو کم نہیں سمجھنا چاہیے۔‘‘

بیسنٹ نے اپنی پوسٹ میں اس منصوبہ بند کاروائی کے تحت نافذ کیے جانے والے مخصوص اقتصادی اقدامات یا اس میں شامل کیے جانے والے اداروں کے بارے میں کوئی تفصیلات فراہم نہیں کیں۔

واضح رہے کہ وزیرِ خزانہ اسکاٹ بیسنٹ نے یہ بیان ٹرمپ انتظامیہ کی جانب سے یہ دعویٰ کیے جانے کے بعد جاری کی ہےا کہ ایران کی فوجی اور جوہری صلاحیتوں کو تباہ کر دیا گیا ہے۔

یو این آئی۔ ع ا۔

اسلام آباد، پاکستان کے چیف آف آرمی اسٹاف اور چیف آف ڈیفنس فورسز فیلڈ مارشل عاصم منیر پیر کو ایران کا دورہ کر رہے ہیں، جہاں وہ اعلیٰ ایرانی حکام سے مذاکرات کریں گے۔ ایران کی وزارت خارجہ نے اتوار کو ان کے دورے کی تصدیق کی۔

یہ رواں سال عاصم منیر کا ایران کا تیسرا دورہ ہے۔ پاکستان مسلسل امریکا اور اسرائیل کی ایران کے خلاف جاری جنگ کے خاتمے کے لیے ثالثی کی کوششیں کر رہا ہے۔

پاکستانی حکام نے نام ظاہر نہ کرنے کی شرط پر دورے کی تصدیق کی، تاہم اس کے ایجنڈے کی تفصیلات بتانے سے گریز کیا۔

پاکستانی فوج کے شعبہ تعلقات عامہ (آئی ایس پی آر)، وزارت خارجہ اور وزارت اطلاعات نے بھی دورے سے متعلق سوالات کا جواب نہیں دیا۔ قابل ذکر بات یہ ہے کہ اس بار دورے کا اعلان اسلام آباد کے بجائے تہران کی جانب سے کیا گیا۔

ایرانی وزارت خارجہ کے ترجمان اسماعیل بقائی نے کہا کہ یہ دورہ خطے میں امن و سلامتی کے فروغ کے لیے پاکستان کی کوششوں کو آگے بڑھائے گا۔ ان کے مطابق عاصم منیر قیام کے دوران اعلیٰ ایرانی حکام سے ملاقاتیں کریں گے۔

یہ دورہ عاصم منیر اور ایرانی وزیر خارجہ عباس عراقچی کے درمیان صرف چار دن کے اندر ہونے والی دو ٹیلی فونک گفتگو کے بعد ہو رہا ہے۔ ایرانی سرکاری میڈیا کے مطابق دونوں رہنماؤں نے علاقائی صورتحال اور مغربی ایشیا میں امن، استحکام اور سلامتی کو مضبوط بنانے کے طریقوں پر تبادلہ خیال کیا۔

عاصم منیر نے رواں سال پہلی مرتبہ اپریل میں ایران کا دورہ کیا تھا۔ یہ دورہ اسلام آباد میں ہونے والے مذاکرات کے چند روز بعد ہوا تھا، جو چار دہائیوں سے زائد عرصے بعد امریکہ اور ایران کے درمیان براہ راست مذاکرات کی پہلی کوشش تھی، تاہم کسی اہم پیش رفت کے بغیر ختم ہوگئی۔

انہوں نے مئی میں بھی ایران کا دورہ کیا تھا۔ یہ دورہ ایسے وقت ہوا جب امریکی وزیر خارجہ مارکو روبیو نے واشنگٹن اور تہران کے درمیان مذاکرات میں ’’معمولی پیش رفت‘‘ کا عندیہ دیا تھا۔

ان کا تازہ دورہ ایسے وقت میں ہو رہا ہے جب اسلام آباد مفاہمتی یادداشت (MoU) کے تحت جاری سفارتی عمل تقریباً تعطل کا شکار ہے اور واشنگٹن ایران کے خلاف نئی پابندیاں عائد کرنے کی تیاری کر رہا ہے۔

جاری۔ یو این آئی۔ ع ا۔