تہران، ایران اور امریکہ کے درمیان دوبارہ بڑھتی فوجی کشیدگی کے دوران اسرائیلی وزیراعظم بنیامین نیتن یاہو نے ایران کے خلاف اپنے مؤقف میں مزید سختی پیدا کرتے ہوئے کہا ہے کہ اسرائیلی حکومت ایرانی نظام کی تبدیلی کے لیے کام کر رہی ہے۔

ایک صحافتی انٹرویو میں نیتن یاہو نے دعویٰ کیا کہ ایران کی موجودہ حکومت کا خاتمہ ہوگا اور اسرائیل کی مختلف ایجنسیاں اس مقصد کے لیے سرگرم ہیں۔ انہوں نے ایران کو خبردار کیا کہ اسرائیل پر حملے کا فیصلہ اس کے لیے انتہائی سنگین نتائج کا باعث بن سکتا ہے۔

دوسری جانب امریکی صدر ڈونلڈ ٹرمپ نے ایک اسرائیلی نشریاتی ادارے سے گفتگو میں اسرائیل کو یقین دلایا کہ ایران کے ساتھ ممکنہ نئی جنگ کے حوالے سے اسے فکر مند ہونے کی ضرورت نہیں۔ ٹرمپ نے کہا کہ جب تک وہ امریکہ کے صدر ہیں، اسرائیل کے تحفظ کا خیال رکھا جائے گا۔

امریکی حکام کے مطابق واشنگٹن فی الحال جنگ کو مزید پھیلانے کے بجائے ایران کی جانب سے ممکنہ حملوں کے خطرے کو محدود کرنا چاہتا ہے۔ تاہم اسرائیلی چینل 13 کی رپورٹ کے مطابق امریکی حکام کو ثالثوں کے ذریعے بتایا گیا ہے کہ تہران کشیدگی کم کرنے میں دلچسپی نہیں رکھتا، جس سے صورتحال کو معمول پر لانے کی کوششیں مشکل ہو رہی ہیں۔

یہ پیش رفت ایسے وقت میں ہوئی ہے جب حالیہ دنوں امریکہ نے آبنائے ہرمز کے قریب ایرانی اہداف پر حملے کیے، جن کے بعد ایران کی جانب سے خطے میں امریکی مفادات کو نشانہ بنانے کی اطلاعات سامنے آئیں۔
ٹرمپ نے بھی خبردار کیا ہے کہ اگر ایران نے حالیہ امریکی حملوں کے جواب میں مزید کارروائی کی تو واشنگٹن زیادہ بڑے پیمانے پر فوجی ردعمل دے سکتا ہے۔

یو این آئی۔ م س

واشنگٹن، امریکہ کی فوج ایران میں شادی کی ایک تقریب پر مبینہ حملے کی اطلاعات کی تحقیقات کر رہی ہے، جبکہ امریکی حملوں میں ہلاک ہونے والوں کی تعداد بڑھ کر 18 ہو گئی ہے۔

امریکی سینٹرل کمانڈ (سینٹ کام) کے ترجمان کیپٹن ٹم ہاکنز نے کہا کہ امریکی فوج واقعے سے متعلق ایرانی سرکاری میڈیا کی جانب سے سامنے آنے والی اطلاعات کا جائزہ لے رہی ہے۔ دوسری جانب ایران کے وزیر صحت محمد رضا ظفرقندی کے مطابق امریکی حملوں میں 108 افراد زخمی بھی ہوئے ہیں۔

ہاکنز نے کہا کہ امریکی فوج کو ان اطلاعات کا علم ہے اور ان کی تحقیقات کی جا رہی ہیں۔ انہوں نے دعویٰ کیا کہ امریکی فوج عام شہریوں کو نشانہ نہیں بناتی۔

اطلاعات کے مطابق بدھ کی صبح امریکہ نے ایران میں مختلف اہداف پر بڑے پیمانے پر حملوں کا ایک نیا سلسلہ شروع کیا، جس میں جنوبی صوبہ ہرمزگان میں شادی کی ایک تقریب بھی مبینہ طور پر نشانہ بنی اور متعدد افراد جانی نقصان کا شکار ہوئے۔

اقوام متحدہ کے ترجمان اسٹیفان دوجارک نے کہا کہ اقوام متحدہ کے سیکریٹری جنرل انتونیو گوتریس ایران پر امریکی فضائی حملوں کے بعد عام شہریوں کے جانی نقصان کی اطلاعات پر تشویش میں مبتلا ہیں۔

یو این آئی۔ م س

ماسکو، ایران کی وزارت خارجہ کے ترجمان اسماعیل بقائی نے اقوام متحدہ کے سکریٹری جنرل انتونیو گوتریس کے اس بیان کو تنقید کا نشانہ بنایا ہے کہ اقوام متحدہ کی سب سے بڑی خدمت سپر پاورز کے درمیان جنگ کو روکنا رہی ہے۔ انہوں نے کہا کہ اس طرح کا موقف دراصل بڑی طاقتوں کے مظالم پر پردہ ڈالنے کے مترادف ہے۔

مسٹربقائی نے فنانشل ٹائمز کو گوتریس کے دیے گئے اس بیان پر ردعمل ظاہر کیا، جس میں اقوام متحدہ کے 80 سالہ وجود کے دوران سپر پاورز کے درمیان جنگ سے بچاؤ کو تنظیم کی بڑی کامیابی قرار دیا گیا تھا۔

انہوں نے سوشل میڈیا پلیٹ فارم ایکس پر کہا کہ اقوام متحدہ کے مقصد کو محض سپر پاورز کے درمیان جنگ روکنے تک محدود کرنا گمراہ کن اور خطرناک ہے۔ ان کے مطابق ایسی تشریح اقوام متحدہ کے چارٹر کے بنیادی اصولوں کو کمزور کرتی ہے، بیشتر رکن ممالک کو غیر اہم بنا دیتی ہے اور بڑی طاقتوں کی جانب سے دیگر ممالک کے خلاف کیے گئے مظالم پر پردہ ڈالتی ہے۔

مسٹربقائی نے مزید کہا کہ انتونیو گوتریس کی اس تشریح کے مطابق تو کوریا، ویتنام، کانگو، عراق، افغانستان، یمن، سوڈان اور غزہ میں لڑی جانے والی جنگیں اور ڈھائے جانے والے مظالم “سب اقوامِ متحدہ کی کامیابیاں شمار ہوں گی۔”

یو این آئی۔ م س