سری نگر، لداخ کے لیفٹیننٹ گورنر ونے کمار سکسینہ نے جمعرات کو مرکز کے نئے کونسلیں قائم کرنے کے فیصلے کے بعد مرکز کے زیر انتظام علاقے کے تمام سات اضلاع میں خودمختار پہاڑی ترقیاتی کونسلوں (ایل اے ایچ ڈی سیز) کے قیام کے نوٹیفکیشن کی منظوری دے دی۔ اس کے ساتھ ہی پانچ نئے تشکیل دیے گئے اضلاع میں منتخب مقامی خود حکمرانی کی راہ ہموار ہوگئی ہے۔

مرکز نے 13 جولائی کو مرکز کے زیر انتظام علاقے لداخ میں نئی ایل اے ایچ ڈی سیز قائم کرنے کا اعلان کیا تھا۔

حکام نے بتایا کہ منظوری کے بعد اب لداخ کے تمام سات اضلاع لیہہ، کرگل، شام، نوبرا، چانگ تھانگ، زنسکار اور دراس میں ایل اے ایچ ڈی سیز قائم ہوں گی۔ منتخب مقامی خود حکمرانی کا جو نظام پہلے صرف لیہہ اور کرگل تک محدود تھا، اب اسے مرکز کے زیر انتظام علاقے کے پانچ نئے اضلاع تک بھی توسیع دی جائے گی۔

یہ پیش رفت لداخ میں اختیارات کی نچلی سطح تک منتقلی اور بنیادی سطح پر حکمرانی کو مضبوط بنانے کی سمت میں ایک اہم قدم ہے۔ نئی کونسلوں کے قیام سے لوگوں کو اپنے متعلقہ اضلاع کی ترقی اور انتظامیہ سے متعلق معاملات میں زیادہ سے زیادہ شرکت کا ادارہ جاتی نظام فراہم ہوگا۔

لیفٹیننٹ گورنر سکسینہ نے کہاکہ ’’تمام سات اضلاع میں خودمختار پہاڑی ترقیاتی کونسلوں کا قیام لداخ میں بنیادی سطح کی حکمرانی کو مضبوط بنانے کی جانب ایک سنگ میل ہے۔ اس سے عوام کو بااختیار بنایا جائے گا اور ترقیاتی عمل مقامی ضروریات اور خواہشات کے زیادہ مطابق ہوگا۔‘‘

لیفٹیننٹ گورنر نے اس تاریخی قدم کے لیے وزیر اعظم نریندر مودی اور مرکزی وزیر داخلہ امت شاہ کا شکریہ ادا کرتے ہوئے کہا کہ ساتوں کونسلوں کے قیام سے شراکتی مقامی حکمرانی کو نچلی سطح تک لے جاکر اسے مضبوط بنایا جائے گا۔ اس کے نتیجے میں مقامی خواہشات اور ترجیحات ضلع کی سطح پر منصوبہ بندی اور ترقی میں زیادہ مؤثر انداز میں شامل کی جاسکیں گی۔

مرکز کے زیر انتظام علاقے لداخ کے محکمہ ریونیو کی جانب سے جاری نوٹیفکیشن میں کہا گیا ہے کہ نو تشکیل شدہ کونسلوں کے انتخابات مناسب وقت پر کرائے جائیں گے۔ اس کے لیے پہلے لداخ خودمختار پہاڑی ترقیاتی کونسل ایکٹ، 1997 کی دفعہ 8 کے تحت باضابطہ نوٹیفکیشن جاری کیا جائے گا۔

یہ نوٹیفکیشن سرکاری گزٹ میں شائع ہونے کی تاریخ سے نافذ العمل ہوگا۔

یواین آئی۔ظ ا

سری نگر، ممنوعہ تنظیم جماعتِ اسلامی جموں و کشمیر (جے ای آئی) کے خلاف ایک اہم کارروائی کرتے ہوئے سوپور سب ڈویژن کی پولیس نے جمعرات کو قانونی کارروائی مکمل کرنے کے بعد دورو گاؤں میں دو عمارتیں، چھ دکانیں اور دو کنال اراضی منسلک کردی۔

پولیس نے بتایا کہ یہ جائیدادیں پولیس اسٹیشن سوپور میں درج ایف آئی آر نمبر 42/2025 کی تحقیقات کے دوران سامنے آئیں۔ یہ ایف آئی آر غیر قانونی سرگرمیاں (روک تھام) ایکٹ (یو اے پی اے) کی دفعات 10 اور 13 کے تحت درج کی گئی تھی۔

پولیس نے کہاکہ ’’مسلسل تحقیقات، سرکاری اور ریونیو ریکارڈ کی جانچ اور متعلقہ حکام کے ذریعے تصدیق سے ان مقامات کا جماعتِ اسلامی جموں و کشمیر کے ساتھ تعلق ثابت ہوا۔‘‘

سوپور پولیس کی جانب سے پیش کیے گئے تفصیلی ڈوزیئر کی بنیاد پر کشمیر کے ڈویژنل کمشنر نے 12 اگست کے حکم کے ذریعے دورو کے اسلامیہ ماڈل اسکول کی عمارت کو یو اے پی اے، 1967 کی دفعہ 8(1) کے تحت نوٹیفائی کیا۔ یہ اسکول 2022 سے بند ہے اور اس میں دو دو منزلہ عمارتیں، چھ دکانیں اور دو کنال اراضی شامل ہے۔

اس کے بعد سوپور پولیس کی درخواست پر بارہمولہ کے ضلع مجسٹریٹ نے یو اے پی اے کی دفعات 8(3) اور 8(4) کے تحت ضروری احکامات جاری کیے۔ ان احکامات کی تعمیل میں سوپور پولیس نے ایگزیکٹو مجسٹریٹ کے ہمراہ موقع پر پہنچ کر قانون کے مطابق مذکورہ نوٹیفائیڈ جائیدادوں کو منسلک کردیا۔

پولیس نے کہا کہ یہ کارروائی ممنوعہ تنظیموں اور ان کے وابستہ نیٹ ورک سے منسلک جائیدادوں اور اثاثوں کی نشاندہی کرنے اور ان کے خلاف قانونی کارروائی کرنے کے مقصد سے کی جانے والی مسلسل تحقیقات کا نتیجہ ہے۔

یواین آئی۔ ظ ا

جموں، اکنامک آفنسز ونگ (ای او ڈبلیو)، کرائم برانچ جموں نے جمعرات کو ادھم پور کی انسداد بدعنوانی عدالت کے ایڈیشنل ڈسٹرکٹ اینڈ سیشن جج کی عدالت میں دھوکہ دہی، جعل سازی اور ریونیو ریکارڈ میں مبینہ ردوبدل سے متعلق ایک معاملے میں چارج شیٹ داخل کی۔

ایک سرکاری بیان کے مطابق چارج شیٹ بٹل بالیاں، ادھم پور کے اللہ دین اور اس وقت کے تحصیلدار ادھم پور جوگندر کمار ساہنی کے خلاف داخل کی گئی ہے۔ جوگندر کمار ساہنی کا اب انتقال ہوچکا ہے۔ یہ معاملہ ادھم پور کے بٹل علاقے کے رہنے والے شمس دین کی جانب سے دائر تحریری شکایت کی بنیاد پر درج کیا گیا تھا۔

شکایت کنندہ نے الزام لگایا تھا کہ ملزم اللہ دین نے ریونیو ریکارڈ میں اپنے والد کا نام مبینہ طور پر دھوکے سے تبدیل کردیا اور تبدیل شدہ ولدیت کی بنیاد پر شکایت کنندہ کی آبائی جائیداد پر غیر قانونی طور پر اپنا حق جتایا۔

بیان میں مزید کہا گیا کہ تحقیقات کے دوران جمع کیے گئے شواہد سے یہ بات سامنے آئی کہ ملزم اللہ دین نے مبینہ طور پر اس وقت کے تحصیلدار ادھم پور جوگندر کمار ساہنی کے ساتھ ملی بھگت کرکے اپنی ولدیت دل میر سے تبدیل کرکے باغو کردی۔

اس معاملے کی تحقیقات ڈی ایس پی آکاش کوہلی نے کیں۔ انہوں نے تحقیقات کی قیادت کرتے ہوئے متعلقہ ریونیو ریکارڈ اور دیگر شواہد کا جائزہ لیا۔ بیان کے مطابق تحقیقات کے دوران سامنے آنے والے شواہد اور مواد کی بنیاد پر الزامات درست ثابت ہوئے۔

اس کے مطابق تحقیقات مکمل کرنے کے بعد ملزم اللہ دین اور جوگندر کمار ساہنی (جن کا انتقال ہوچکا ہے)، جو اس وقت تحصیلدار ادھم پور تھے، کے خلاف متعلقہ دفعات کے تحت قابل سزا جرائم کے سلسلے میں عدالت میں چارج شیٹ داخل کردی گئی۔ اس کے ساتھ گواہوں کی فہرست اور ضبط شدہ دستاویزات بھی پیش کی گئی ہیں تاکہ معاملے کا عدالتی فیصلہ کیا جاسکے۔

کرائم برانچ ای او ڈبلیو نے عوام کو ایسے اقتصادی فراڈ سے محتاط رہنے اور اس طرح کے کسی بھی واقعے کی اطلاع ایس ایس پی کرائم برانچ ای او ڈبلیو جموں (کرائم برانچ، جموں و کشمیر) کو دینے کا مشورہ دیا ہے۔

یواین آئی۔ ظا