نئی دہلی، صدر جمہوریہ دروپدی مرمو نے تعلیم کو آئین میں درج مساوی مواقع کے آدرش کو عملی جامہ پہنانے کا سب سے مؤثر ذریعہ قرار دیتے ہوئے پرائمری اسکولوں میں پڑھائی چھوڑنے والے بچوں کی تعداد میں کمی لانے میں اساتذہ کی کوششوں کو اہم بتایا ہے۔

محترمہ دروپدی مرمو نے یوم اساتذہ کے موقع پر ہفتہ کو یہاں منعقدہ تقریب میں ملک بھر کے بہترین اساتذہ کو قومی ایوارڈز سے نوازا۔ صدر جمہوریہ نے کہا کہ اسکول کی تعلیم پورے تعلیمی نظام کی بنیاد ہے۔ ابتدائی کلاسوں میں بچوں کی ذہنی، جسمانی اور اخلاقی ترقی پر توجہ دے کر اساتذہ بہترین طالب علم اور ذمہ دار شہری تیار کر سکتے ہیں۔ انہوں نے کہا کہ معاشی طور پر کمزور خاندانوں کے بچوں، پہلی نسل کے علم حاصل کرنے والوں، گاؤں سے بڑے شہروں کے اسکولوں میں آنے والے طلباء، شرمیلے بچوں، باصلاحیت لیکن اعتماد کی کمی والے طلباء اور خصوصی ضروریات والے بچوں میں اعتماد پیدا کرنا اساتذہ کی خاص ذمہ داری ہے۔

انہوں نے کہا کہ تعلیمی عمدگی، ہنرمندی کا فروغ اور کاروباری صلاحیت ملک کی ترقی کے لیے انتہائی اہم ہیں۔ انہوں نے کہا کہ ملک کو دنیا کی مہارت کی راجدھانی اور علم کی عظیم طاقت بنانا حکومت کی قومی ترجیحات میں شامل ہے۔ صدر جمہوریہ نے کہا کہ وکست بھارت کا ہندوستان کا ہدف عالمی سطح کے تعلیمی نظام کے ذریعے ہی حاصل کیا جا سکتا ہے۔ انہوں نے زور دیا کہ ملک کا ایک بھی طالب علم معیاری تعلیم کے موقع سے محروم نہ رہے اور اساتذہ اپنی محبت اور لگن سے طلباء میں علم، تحریک، اخلاقیات اور حساسیت پیدا کریں۔

یواین آئی ایف اے

شاہجہاں پور، اتر پردیش کے شاہجہاں پور ضلع کے تلہر تھانہ علاقے میں ہفتہ کی صبح پیش آنے والے 2 الگ الگ سڑک حادثات میں 3 افراد گاڑیوں کی زد میں آکر ہلاک ہوگئے۔

پولیس سپرنٹنڈنٹ سوربھ دکشت نے ہفتہ کو بتایا کہ کنیگ گاؤں کے رہنے والے سومیش شکلا (24) اور موہت اوستھی (23) موٹر سائیکل سے نیم کروّلی مندر جا رہے تھے۔ ان کی موٹر سائیکل تلہر تھانہ علاقے کے بھیدپور کے قریب پہنچی، اسی دوران پیچھے سے آنے والی ایک بس نے موٹر سائیکل کو ٹکر مار دی۔ اس حادثے میں دونوں موٹر سائیکل سوار شدید زخمی ہوگئے، جنہیں پولیس نے سرکاری میڈیکل کالج پہنچایا، جہاں ڈاکٹروں نے دونوں کو مردہ قرار دے دیا۔

مسٹر دکشت نے بتایا کہ دوسرے واقعے میں جے پوریا اسکول کے قریب ایک پک اَپ گاڑی خراب ہوگئی تھی، جسے اس کا ڈرائیور ستیش (26) ٹھیک کر رہا تھا۔ اسی دوران پیچھے سے آنے والے ایک نامعلوم ٹرک نے اسے کچل دیا، جس کے نتیجے میں اس کی بھی موت ہوگئی۔ پولیس نے تینوں مہلوکین کی لاشوں کو قبضے میں لے کر پوسٹ مارٹم کے لیے بھیج دیا ہے۔

یو این آئی۔ ایم جے

لکھنؤ، بہوجن سماج پارٹی (بی ایس پی) کی صدر مایاوتی نے اتر پردیش میں مساجد سمیت مذہبی مقامات کے خلاف جاری کارروائی پر ریاستی حکومت پر سوال اٹھائے ہیں۔

انہوں نے کہا کہ ضلع سہارنپور کی مسجد سمیت پوری ریاست میں آباد مساجد کو مبینہ طور پر غیر قانونی قرار دے کر انہیں منہدم کرنے کی جو سرکاری مہم چل رہی ہے، وہ مناسب نہیں ہے۔ حکومت کو ایسے منفی حالات سے بچنے کے لیے اس پر فوری روک لگاکر حل کے دیگر طریقے اختیار کرنے چاہئیں۔

مایاوتی نے ہفتہ کو سوشل میڈیا پلیٹ فارم ’ایکس‘ پر کی گئی پوسٹ میں کہا کہ آئینی اور سیکولر حکومت کی ذمہ داری ہے کہ تمام مذاہب کو ماننے والے لوگوں اور ان کے مذہبی مقامات کے یکساں طور پر احترام اور تحفظ کو یقینی بنائے۔

انہوں نے کہا کہ اسلام مذہب میں مساجد ہر روز عبادت اور دن میں کئی بار جماعت کے ساتھ نماز پڑھنے کا اہم اور لازمی حصہ ہیں۔ اس لیے ہندوستانی روایت کے مطابق ان کا احترام کرنا ملک اور وسیع تر عوامی مفاد میں ضروری ہے۔ بی ایس پی سربراہ نے کہا کہ قواعد و قوانین کی مناسب پیروی کیے بغیر کسی بھی ملزم کا مکان منہدم کرکے اس کے پورے خاندان کو اجتماعی طور پر سزا دے کر بے گھر کرنے کی کارروائی سے لوگ کافی پریشان ہیں۔

انہوں نے کہا کہ ایسے معاملات میں بی ایس پی حکومت کی طرح ’قانون کے ذریعے قانون کی حکمرانی‘ والا طرز عمل اپنانا ضروری ہے۔

انہوں نے کہا کہ اس معاملے میں صرف حکومت ہی نہیں بلکہ عدالت کو بھی مناسب توجہ دینی چاہیے۔ تاہم موجودہ حالات میں تمام لوگوں سے خوش گوار ماحول برقرار رکھنے کی اپیل کرتے ہوئے مایاوتی نے کہا کہ ان کی پارٹی بھی یہی چاہتی ہے۔

یو این آئی۔ ایم جے