جموں، جموں یونیورسٹی کے وائس چانسلر پروفیسر امیش رائے نے پیر کو کہا کہ یونیورسٹی اعلیٰ تعلیم کے ایسے ماڈل کی جانب آگے بڑھ رہی ہے جس میں تعلیمی معیار اور تحقیق کے ساتھ جدت طرازی، ہنرمندی کی ترقی، ثقافتی وابستگی اور طلبہ کے لیے زیادہ سے زیادہ مواقع کو یکجا کیا جائے گا۔

پروفیسر رائے نے منگل کو منعقد ہونے والی یونیورسٹی کی 58ویں یومِ تاسیس سے قبل پیر کو یہاں میڈیا نمائندوں سے گفتگو کرتے ہوئے کہاکہ ’’یومِ تاسیس محض یونیورسٹی کے سفر پر نظر ڈالنے کا موقع نہیں بلکہ اس ادارے کے بارے میں غور کرنے کا بھی موقع ہے کہ آنے والے برسوں میں اسے کس شکل میں ڈھالا جائے۔‘‘

انہوں نے کہاکہ ’’ہماری کوشش ہے کہ ایسی یونیورسٹی قائم کی جائے جہاں طلبہ کو صرف ڈگری حاصل کرنے کا موقع ہی نہ ملے بلکہ وہ سیکھیں، جدت طرازی کریں، تخلیق کریں، سرگرمیوں میں حصہ لیں اور اپنی صلاحیتوں کو پروان چڑھائیں۔‘‘

یومِ تاسیس کی تقریب بریگیڈیئر راجندر سنگھ آڈیٹوریم میں منعقد ہوگی۔ آئی سی اے آر-نیشنل ڈیری ریسرچ انسٹی ٹیوٹ، کرنال کے ڈائریکٹر ڈاکٹر دھیر سنگھ تقریب کے مہمانِ خصوصی ہوں گے، جبکہ اسمایل گروپ کے منیجنگ پارٹنر اور وانا وینچرز، نئی دہلی کے بانی منیش وج مہمانِ اعزاز ہوں گے۔

پروفیسر رائے نے کہا کہ این اے اے سی سے اے گریڈ حاصل کرنے والی جموں یونیورسٹی کو این آئی آر ایف کی یونیورسٹی کیٹیگری میں 51واں اور ریاستی سرکاری یونیورسٹیوں میں 21واں مقام حاصل ہے۔ یونیورسٹی نے قومی تعلیمی پالیسی (این ای پی) 2020 کے مطابق اپنے تعلیمی پروگراموں کے دائرے کو وسعت دی ہے۔

انہوں نے بتایا کہ رواں تعلیمی سال میں پہلی مرتبہ مختلف شعبوں میں پانچ سالہ انٹیگریٹڈ پروگرامز شروع کیے گئے ہیں، جن میں مجموعی طور پر 400 طلبہ کے داخلے کی گنجائش ہے۔

انہوں نے کہا کہ کئی نئے ڈاکٹریٹ، انڈر گریجویٹ اور پوسٹ گریجویٹ پروگرام بھی شروع کیے گئے ہیں۔ یوآئی ای ٹی کے کٹھوعہ کیمپس میں الیکٹرانکس اینڈ کمیونیکیشن انجینئرنگ میں بی ٹیک شروع کیا گیا ہے، جبکہ روبوٹکس اینڈ آٹومیشن میں بی ٹیک پروگرام کو اگلے تعلیمی سال کے لیے منظوری دی گئی ہے۔

پروفیسر رائے نے بتایا کہ حال ہی میں قائم کیے گئے شعبۂ غیر ملکی زبانیں کی جانب سے ہسپانوی، جرمن، فرانسیسی، جاپانی، چینی، کوریائی اور روسی سمیت مختلف زبانوں میں سرٹیفکیٹ اور ڈپلومہ کورسز بھی شروع کیے جا رہے ہیں۔

یونیورسٹی کی بڑھتی ہوئی تحقیقی سرگرمیوں کا ذکر کرتے ہوئے پروفیسر رائے نے کہا کہ جموں یونیورسٹی نے آئی آئی ٹی دہلی کے اشتراک سے ANRF-PAIR پروگرام میں بطور اسپوک ادارہ شمولیت اختیار کی ہے۔
انہوں نے بتایا کہ سالانہ تحقیقی حوالہ جات (ریسرچ سائیٹیشنز) 2022 میں 944 سے بڑھ کر 2025 میں 10,549 ہوگئے، جبکہ پی ایچ ڈی میں داخلوں کی تعداد 2024-25 میں 133 سے بڑھ کر 2025-26 میں 177ہوگئی۔
۔
یواین آئی۔ ظا

جموں، جموں ضلع کے نروال علاقے میں نارکوٹکس کنٹرول بیورو (این سی بی) کی حراست سے فرار ہونے والے ایک مشتبہ منشیات فروش کو پکڑنے کے لیے بڑے پیمانے پر تلاشی مہم شروع کردی گئی ہے۔

حکام نے بتایا کہ پلوامہ کے کاکاپورہ کا رہائشی مشتبہ منشیات فروش عاقب بشیر کو 3 ستمبر کو سامبا ضلع میں ایک مسافر بس سے ہیروئن سمیت گرفتار کیا گیا تھا۔ تاہم، 6 اور 7 ستمبر کی درمیانی شب وہ جموں کے نروال علاقے میں این سی بی کی حراست سے فرار ہوگیا۔

اطلاع ملتے ہی پولیس کی ٹیموں نے این سی بی حکام کے ساتھ مل کر اسے تلاش کرنے کے لیے بڑے پیمانے پر تلاشی مہم شروع کردی۔ حکام نے بتایا کہ ’’ملزم کو تلاش کرنے کے لیے مختلف مقامات پر ٹیمیں تعینات کردی گئی ہیں۔‘‘

یواین آئی۔ ظ ا

جموں، جموں پولیس نے ارنیہ علاقے میں کارروائی کرتے ہوئے ’خوف گینگ‘ کے چھ ارکان کو پستول اور تیز دھار ہتھیاروں سمیت گرفتار کرلیا۔

پولیس نے بتایا کہ گینگ کے چھ ارکان کو کول کلاں میں ایک شخص کو پستول اور تیز دھار ہتھیار دکھا کر مبینہ طور پر دھمکانے کے الزام میں حراست میں لیا گیا۔

پولیس نے کہاکہ ’’شکایت موصول ہونے کے بعد تحقیقات کی گئی اور فوری کارروائی کرتے ہوئے تمام ملزمان کو گرفتار کرلیا گیا۔‘‘ پولیس نے مزید بتایا کہ ملزمان کے قبضے سے ایک میگزین سمیت پستول، تین کارآمد کارتوس اور پانچ تیز دھار ہتھیار بھی برآمد کیے گئے ہیں۔

تاہم، پولیس نے معاملے کی اصل حقیقت کا پتہ لگانے کے لیے مزید تحقیقات شروع کردی ہیں۔

یواین آئی۔ظ ا