نئی دہلی، 8 وزیراعظم نریندر مودی نے منگل کے روز معروف موسیقار، شاعر اور فلم ساز بھارت رتن ڈاکٹر بھوپین ہزاریکا کے 100ویں یوم پیدائش پر انہیں خراج عقیدت پیش کرتے ہوئے ہندوستانی موسیقی میں ان کی غیر معمولی خدمات اور آسام و شمال مشرق کی ثقافتی شناخت کو قومی اسٹیج پر لانے میں ان کے دائمی کردار کو یاد کیا۔

سوشل میڈیا پلیٹ فارم ایکس پر ایک پوسٹ میں وزیراعظم نریندر مودی نے ہزاریکا کو ایک “عظیم ثقافتی شخصیت” قرار دیا جن کی آواز آسام سے بہت آگے تک گونجتی رہی۔

وزیراعظم نریندر مودی نے کہا کہ ان کی آواز میں آسام کی روح اور پورے ملک کے لیے شمال مشرق کا جذبہ شامل تھا۔

وزیراعظم نے واضح کیا کہ ہزاریکا کی موسیقی نے بے شمار لوگوں کے افکار، جذبات اور امنگوں کو زبان دی جبکہ لوگوں کو قریب لانے والے ایک پل کے طور پر بھی کام کیا۔

انہوں نے کہا کہ اپنی موسیقی کے ذریعے انہوں نے بے شمار لوگوں کے افکار اور روح کو خوبصورتی سے بیان کیا۔ ان کے گانوں نے لوگوں کو ایک دوسرے کے قریب کیا۔

وزیراعظم مودی نے گزشتہ سال گوہاٹی میں ہزاریکا کے صد سالہ یوم پیدائش کے سلسلے میں منعقدہ تقاریب کے افتتاح میں شرکت کو بھی یاد کیا۔ اس موقع کو یاد کرتے ہوئے انہوں نے کہا کہ انہیں یادگاری تقاریب کے آغاز کا حصہ بننا دل سے یاد ہے۔

وزیراعظم نے کہا کہ مجھے گزشتہ سال گوہاٹی میں ان کی 100ویں سالگرہ کی تقاریب کے آغاز میں شرکت کرنا دل سے یاد ہے، انہوں نے مزید کہا کہ ہزاریکا کی حیات وخدمات آنے والی نسلوں کو متاثر کرتا رہے گی۔

آسام کی سب سے نامور ثقافتی ممتاز شخصیات میں سے ایک ہزاریکا نے موسیقی، شاعری اور سنیما کے ذریعے ایک دیرپا اثر چھوڑا۔ ان کے کام میں اکثر عام لوگوں کی زندگیوں، جدوجہد اور امنگوں کی عکاسی ہوتی تھی اور انسانیت، سماجی ہم آہنگی اور اتحاد جیسے موضوعات کو اجاگر کیا جاتا تھا۔ ان کے منفرد فنکارانہ انداز نے ہندوستان کے وسیع تر ثقافتی منظر نامے کے ایک لازم و ملزوم حصے کے طور پر شمال مشرق کی ثقافتی وسعت کو قائم کرنے میں مدد کی۔

عظیم فنکار کو 2019 میں بعد از مرگ ہندوستان کے اعلیٰ ترین شہری اعزاز بھارت رتن سے نوازا گیا تھا۔ ان کا 100واں یوم پیدائش خراج عقیدت اور مختلف پروگراموں کے ذریعے منایا جا رہا ہے جس میں ان کے شاندار فنکارانہ سفر اور ہندوستانی ثقافتی اثر و رسوخ کو اجاگر کیا جا رہا ہے۔

یواین آئی ایف اے

نئی دہلی، وزیر خارجہ ایس جے شنکر نے کہا ہے کہ عالمی غیر یقینی صورتحال اور سپلائی چینز میں رکاوٹوں کے موجودہ دور میں ہندوستان اور لگژمبرگ کے تعلقات انتہائی اہم ہیں۔

مسٹر جے شنکر نے ہندوستان کے دورے پر آئے لگژمبرگ کے نائب وزیر اعظم اور وزیر خارجہ زیویئر بیٹل کے ساتھ پیر کے روز یہاں بات چیت کی۔ اس دوران دونوں رہنماؤں نے تجارت، سرمایہ کاری، مالیاتی ٹیکنالوجی، اسٹارٹ اپ، کلین ٹیکنالوجی، خلائی شعبہ، صحت، تعلیم اور لوگوں کے باہمی آمد و رفت سمیت دوطرفہ تعاون پر تفصیلی تبادلہ خیال کیا۔ بعد میں وزیر خارجہ نے سوشل میڈیا پر ایک پوسٹ میں کہا کہ عالمی غیر یقینی صورتحال کے دور میں ہند-لگژمبرگ تعلقات انتہائی اہم ہیں۔

انہوں نے کہا ، ” نئی دہلی میں آج لگژمبرگ کے نائب وزیر اعظم اور وزیر خارجہ زیویئر بیٹل کا خیرمقدم کیا۔

ہندوستان اور لگژمبرگ کے درمیان قابل اعتماد شراکت داری عالمی غیر یقینی صورتحال اور رکاوٹوں کے دور میں اہم ہے۔ تجارت، سرمایہ کاری، مالیاتی ٹیکنالوجی، اسٹارٹ اپ، کلین ٹیکنالوجی، خلائی شعبہ، صحت، تعلیم اور آمد و رفت سمیت دوطرفہ تعاون پر تفصیلی تبادلہ خیال کیا۔ اس کے ساتھ ہی عالمی پیش رفت اور کثیر جہتی تعاون پر بھی غور و خوض ہوا۔ ہند-لگژمبرگ شراکت داری اور ہندوستان-یورپی یونین تعلقات کو مضبوط کرنے کے لیے لگژمبرگ کے نائب وزیر اعظم کی حمایت قابل ستائش ہے۔ ” مسٹر بیٹل کا منگل کے روز چنئی جانے کا پروگرام ہے۔

یو این آئی ۔ این یو۔ م الف

نئی دہلی، جنوب مغربی دہلی کے ستیہ نکیتن میں عمارت منہدم ہونے کے واقعہ میں مہلوکین کی تعداد بڑھ کر 7 ہو گئی ہے، جبکہ 5 افراد زخمی ہیں۔

واقعہ کے بعد دہلی میونسپل کارپوریشن (ایم سی ڈی) نے جنوبی زون کے ڈپٹی کمشنر سمیت 5 افسران کو معطل کر دیا ہے۔ 24 گھنٹے سے زیادہ جاری رہی راحت اور بچاؤ مہم اب ختم کر دی گئی ہے۔ دہلی پولیس نے تصدیق کی ہے کہ ملبے میں اب کوئی شخص پھنسا ہوا نہیں ہے۔

معطل افسران میں جنوبی زون کے ڈپٹی کمشنر راکیش کمار، محکمہ تعمیرات کے ایگزیکٹو انجینئر للت کمار گوئل، اسسٹنٹ انجینئر سنیل چوہان اور جونیئر انجینئر آشیش کمار شامل ہیں۔ پانچویں معطل افسر کا نام فوری طور پر دستیاب نہیں ہو سکا۔

ایم سی ڈی کے ویجی لینس محکمہ نے میونسپل کمشنر سنجیو کھیروار کی ہدایت پر دہلی میونسپل کارپوریشن سروس (کنٹرول اینڈ اپیل) ضوابط، 1959 کے تحت معطلی کے احکامات جاری کیے۔ احکامات پر ویجی لینس محکمہ کے ڈپٹی لا افسر نند کشور نے دستخط کیے ہیں۔

معطل افسران کو فوری اثر سے معطل کیا گیا ہے اور ان کے خلاف محکمہ جاتی کارروائی شروع کر دی گئی ہے۔ ضوابط کے تحت انہیں گزارہ الاؤنس دیا جائے گا۔ اسی دوران، دہلی پولیس نے عمارت کے مالک ہری رام گپتا کو راجستھان کے بھیواڑی سے گرفتار کر لیا ہے۔ اس کے علاوہ گپتا کی اہلیہ ارمیلا اور بیٹے مہیش کو بھی گرفتار کیا گیا ہے۔

پولیس ڈپٹی کمشنر ابھیمنیو پوسوال نے بتایا کہ ابتدائی رپورٹ کے مطابق پولیس نے صرف گپتا کو گرفتار کیا تھا، کیونکہ اسی کو پی جی کا مالک اور منیجر سمجھا گیا تھا۔

مزید تفتیش میں پتہ چلا کہ بجلی کا کنکشن ہری رام کے نام پر تھا، لیکن کاغذات میں جائیداد کی اصل مالکن ان کی اہلیہ ارمیلا تھیں۔ ان کا بیٹا مہیش گپتا انتظامی امور سنبھالتا تھا، جس کی وجہ سے اسے بھی گرفتار کیا گیا۔

عمارت منہدم ہونے کے بعد مبینہ طور پر رابطے سے باہر ہونے پر پولیس نے اس کے خلاف لک آؤٹ سرکلر جاری کیا تھا۔ ایک پولیس افسر نے بتایا کہ گپتا کو بھیواڑی میں پکڑا گیا ہے اور واقعہ کے حالات کی جانچ کے تحت اس سے پوچھ گچھ کی جا رہی ہے۔

یو این آئی۔ این یو۔