تہران، ایران کی جانب سے قاسم بصیر بیلسٹک میزائل کی رونمائی تہران کی دفاعی بازداریت کی حکمت عملی میں ممکنہ طور پر ایک اہم تبدیلی کی نشاندہی کرتی ہے، جس میں ملک نے درست نشانہ سازی، حملے سے بچاؤ کی صلاحیت اور تنازع بڑھنے سے قبل دشمنوں کو خطرے میں ڈالنے کی صلاحیت پر زیادہ زور دینا شروع کر دیا ہے۔

ایران کا کہنا ہے کہ ٹھوس ایندھن سے چلنے والا یہ میزائل الیکٹرو آپٹیکل رہنمائی کے نظام سے لیس ہے اور نصف ٹن وزنی وار ہیڈ لے جانے کی صلاحیت رکھتا ہے۔ اسے ایران کے بڑھتے ہوئے میزائل ذخیرے میں محض ایک اور میزائل کے طور پر پیش نہیں کیا جا رہا بلکہ اس کی تیاری اس تبدیلی کی عکاسی کرتی ہے جسے ایرانی حکام تیزی سے ایک بنیادی طور پر ردعمل پر مبنی مؤقف سے زیادہ فعال نوعیت کی بازداریت کی جانب پیش قدمی قرار دے رہے ہیں۔

اس ابھرتی ہوئی حکمت عملی کے تحت ایران کا مقصد صرف حملے کے بعد جوابی کارروائی کرنا نہیں بلکہ اس وقت بھی ردعمل دینا ہوگا جب وہ یہ طے کرے کہ ایک سنگین اور فوری خطرہ پیدا ہو رہا ہے۔ اس سوچ کے مطابق مقصد ممکنہ حملے کے مکمل پیمانے پر پہنچنے سے پہلے ہی دشمن پر اس کی قیمت عائد کرنا ہے۔

یہ تبدیلی ایران کی میزائل، ڈرون، بحری اور جاسوسی صلاحیتوں میں تیزی سے اضافے اور اعلیٰ سطح کے ایرانی سکیورٹی حکام کے زیادہ جارحانہ بیانات کے درمیان سامنے آئی ہے۔ مجموعی طور پر یہ پیش رفت ایسی فوجی پوزیشن تشکیل دینے کی کوشش کی نشاندہی کرتی ہے جو حملہ شروع ہونے سے پہلے دشمن کے منصوبوں کا پتا لگانے، اسے نشانہ بنانے کی دھمکی دینے اور ممکنہ طور پر اسے ناکام بنانے کی صلاحیت رکھتی ہو۔

یہ نظریہ بازداریت کے روایتی فارمولے ’’وہ حملہ کریں، ہم جواب دیں‘‘ سے مختلف ہے۔ اس کے بجائے تہران ایسی صلاحیت حاصل کرنا چاہتا ہے جس کے ذریعے وہ یہ طے کر سکے کہ کسی خطرے کے اس کی نظر میں اہم حد عبور کرنے کے بعد کب اور کہاں جواب دینا ضروری ہے۔

قاسم بصیر کو اس حکمت عملی میں نمایاں مقام حاصل ہے۔ اس کی اہمیت صرف اس کی مبینہ مار یا وار ہیڈ تک محدود نہیں بلکہ ایران جس قدر درست رہنمائی اور جدید میزائل دفاعی نظاموں کے خلاف کارروائی کی صلاحیت پر زور دے رہا ہے، وہ بھی اہم ہے۔ ایرانی خبر رساں ادارے ارنا نے یہ اطلاع دی۔

جدید جنگ میں بیلسٹک میزائل کی بازدار صلاحیت کا تعین صرف اس بات سے نہیں ہوتا کہ وہ کتنی دور تک جا سکتا ہے یا اس کا وار ہیڈ کتنا بڑا ہے، بلکہ اس کی یہ صلاحیت بھی اہم ہے کہ وہ اہم اہداف کو درست نشانہ بنا سکے، دفاعی اقدامات سے بچ سکے اور تہہ در تہہ فضائی دفاعی نظاموں کو عبور کر سکے۔

لہٰذا ایران کی جانب سے قاسم بصیر کی پیشکش اس کے میزائل پروگرام میں وسیع تر ارتقا کی عکاسی کرتی ہے، جس میں بنیادی توجہ صرف مار اور تباہ کن طاقت پر رکھنے کے بجائے زیادہ درستگی، حملے سے بچاؤ کی صلاحیت اور مختلف اہداف میں امتیاز کرنے کی صلاحیت پر مرکوز کی جا رہی ہے۔

اس ارتقا کے ساتھ جاسوسی اور ہدف بندی کے نظام، ڈرونز، جہاز شکن ہتھیاروں اور زیادہ فاصلے سے حملے کی صلاحیت رکھنے والے ہتھیاروں میں سرمایہ کاری بھی جاری ہے۔ مجموعی طور پر یہ نظام ایران کو دشمن کے فوجی ڈھانچے اور دیگر تزویراتی اہداف کو خطرے میں رکھنے کے لیے زیادہ وسیع اختیارات فراہم کر سکتے ہیں۔

لہٰذا ایران کی ابھرتی ہوئی فوجی پوزیشن کا سب سے اہم پہلو ٹیکنالوجی کے بجائے اس کی جنگی حکمت عملی میں تبدیلی ہے۔

جاری۔ یو این آئی۔ْ ع ا۔

صنعا، یمن کی بین الاقوامی طور پر تسلیم شدہ حکومت کی وفادار فورسز نے حوثی باغیوں کے خلاف جوابی کارروائیاں شروع کر دی ہیں۔ حکام کا کہنا ہے کہ ان کا مقصد ایران کے حمایت یافتہ گروپ سے دارالحکومت صنعا واپس لینا ہے۔

پیر کو تعز، البیضا اور الجوف صوبوں میں لڑائی شدت اختیار کر گئی۔ الجوف کو دارالحکومت صنعا کی جانب پیش قدمی کے لیے اہم دروازہ سمجھا جاتا ہے۔ سعودی عرب کی حمایت یافتہ حکومتی فورسز نے دعویٰ کیا کہ انہوں نے حوثیوں کے ٹھکانوں پر راکٹ اور ڈرون حملے کیے اور زمینی دستوں کے درمیان ’’شدید لڑائی‘‘ جاری رہی۔

حوثیوں نے کہا کہ انہوں نے الجوف میں حکومتی فورسز کی پیش قدمی پسپا کر دی ہے۔ گروپ کے مطابق الحزم شہر میں ایک جیل پر فضائی حملے میں کم از کم 7 افراد ہلاک ہوئے۔ حوثیوں نے اس حملے کا الزام ریاض پر عائد کرتے ہوئے کہا کہ ’’جارحیت کو سزا کے بغیر نہیں چھوڑا جائے گا۔‘‘

دوسری جانب سعودی عرب نے حوثیوں پر مملکت کے جنوبی صوبوں میں حالیہ حملوں کے دوران خواتین اور بچوں سمیت کم از کم 73 شہریوں کو زخمی کرنے کا الزام عائد کیا ہے۔

ریاض نے اس ’’خطرناک کشیدگی‘‘ کے جواب میں کارروائی کا بھی وعدہ کیا ہے۔

کشیدگی میں اضافے کے دوران یمن کے نائب وزیر دفاع میجر جنرل سمیر الصبری نے سرکاری ٹیلی ویژن پر نشر ہونے والے بیان میں کہا کہ حکومت نے ’’صنعا واپس لینے‘‘ کا فیصلہ کیا ہے۔

یمنی حکومت کی حامی فورسز کے ترجمان ماجد النزیلی نے کہا کہ مہم کا مقصد ’’یمن کو حوثیوں کے قبضے سے آزاد کرانا اور صنعا کو تمام یمنی باشندوں کے لیے دارالحکومت کی حیثیت سے بحال کرنا‘‘ ہے۔

انہوں نے شہریوں کو صنعا جانے والی کئی اہم شاہراہوں سے دور رہنے کی بھی تنبیہ کی۔ ان کے مطابق یہ انتباہ دارالحکومت کو مارب اور الجوف سے ملانے والے راستوں پر لاگو ہوتا ہے، جن میں نہْم، صرواح، مہلیہ اور الحزم سے گزرنے والی سڑکیں شامل ہیں۔

یہ دشمنی 2022 میں اقوام متحدہ کی ثالثی میں ہونے والی جنگ بندی کے بعد بڑے پیمانے پر لڑائی کے دوبارہ شروع ہونے کے بعد سب سے سنگین کشیدگی ہے۔

یمن میں جنگ 2014 میں اس وقت شروع ہوئی جب حوثیوں نے صنعا پر قبضہ کر لیا، جس کے بعد اگلے سال سعودی قیادت میں فوجی مداخلت کی گئی۔ سفارت کاروں کو امید تھی کہ جنگ بندی ایک پائیدار سیاسی تصفیے کی بنیاد بنے گی، تاہم امریکہ اور اسرائیل کی ایران کے خلاف جنگ سے پیدا ہونے والی علاقائی کشیدگی کے باعث یہ کوششیں ناکام ہو گئیں۔

جولائی میں اس وقت لڑائی دوبارہ شروع ہوئی جب حکومتی فورسز نے صنعا میں حوثیوں کے زیر کنٹرول ہوائی اڈے پر حملہ کیا اور ایران سے آنے والے ایک طیارے کو اترنے سے روک دیا۔

گزشتہ ہفتے حوثیوں نے ایک بڑی کارروائی شروع کی اور مغربی تعز اور جنوبی حدیدہ کے راستے بحیرہ احمر کے ساحلی شہر المخا اور باب المندب آبنائے کی جانب پیش قدمی کی کوشش کی۔

حوثیوں نے سعودی بحری جہازوں کے لیے اس آبی راستے کی ناکہ بندی کا اعلان کیا تھا۔ باب المندب بحیرہ احمر اور خلیج عدن کے درمیان بحری تجارت کے لیے ایک اہم گزرگاہ ہے۔ ایران کی جانب سے امریکا اور اسرائیل کی جنگ کے آغاز پر آبنائے ہرمز سے آمدورفت محدود کیے جانے کے بعد سعودی تیل کی برآمدات کے لیے باب المندب کی اہمیت مزید بڑھ گئی ہے۔

الجزیرہ کے یمن امور کے ایڈیٹر احمد الشلافی نے کہا کہ یمنی حکومتی فورسز بظاہر حوثیوں کی ابتدائی کارروائی کا جھٹکا برداشت کر چکی ہیں اور ’’لڑائی کو کئی محاذوں تک پھیلا دیا ہے تاکہ حوثی فورسز کو مختلف علاقوں میں مصروف رکھا جا سکے اور ان پر دباؤ بڑھایا جا سکے۔‘‘

انہوں نے کہا کہ جمعرات کو لڑائی زیادہ تر تعز کے مغرب اور حدیدہ کے جنوب تک محدود تھی، لیکن اب یہ الضالع، مارب، الجوف اور البیضا صوبوں تک پھیل چکی ہے۔

انہوں نے کہا، ’’الجوف خاص طور پر اہم ہے کیونکہ اس کی سرحد سعودی عرب سے ملتی ہے اور یہ صوبہ صعدہ کی جانب راستہ فراہم کرتا ہے، جو حوثیوں کا اہم گڑھ ہے۔‘‘

انہوں نے مزید کہا، ’’البیضا تزویراتی اعتبار سے اہم ہے کیونکہ یہ یمن کے وسط میں واقع ہے اور 8 گورنریٹس کو آپس میں ملاتا ہے، جن میں 4 شمال اور 4 جنوب میں ہیں۔‘‘

لڑائی کے نتیجے میں سیکڑوں افراد ہلاک یا زخمی ہو چکے ہیں۔

جاری۔ یو این آئی۔ ع ا۔

مالے، مالدیپ کے صدر ڈاکٹر محمد معیزو نے چاگوس جزائر کی خودمختاری سے متعلق امور پر باضابطہ مذاکرات کے لیے برطانوی وزیر اعظم اینڈریو برنہم کو دعوت دی ہے۔

صدر معیزو نے منگل کو برطانوی وزیر اعظم کے نام ایک خط میں یہ دعوت دی اور چاگوس جزائر کی خودمختاری ماریشس کو منتقل کرنے کے برطانیہ کے فیصلے پر مالدیپ کے تحفظات کا اظہار کیا۔

اپنے خط میں معیزو نے مالدیپ اور چاگوس جزائر کے درمیان مشترکہ تاریخ اور ثقافتی روابط کے ساتھ ساتھ خطے میں سمندری حیات کے تحفظ اور سائنسی تحقیقی مہمات کے لیے مالدیپ کی طویل عرصے سے جاری حمایت کو اجاگر کیا۔

مالدیپ کے صدر نے چاگوس سے متعلق امور پر برطانیہ کے ساتھ ’’قابلِ اعتماد اور تعمیری شراکت داری‘‘ برقرار رکھنے کے اپنے ملک کے عزم کا اعادہ کیا، تاہم ساتھ ہی مالدیپ کی ریاست اور اس کے عوام کے ان مفادات کے تحفظ پر زور دیا جنہیں انہوں نے جائز قرار دیا۔

معیزو نے چاگوس جزائر کی خودمختاری سے متعلق معاملات پر مالدیپ اور برطانیہ کے درمیان بامعنی مذاکرات کی اہمیت پر بھی زور دیا۔

مالدیپ کے صدر دفتر کے ایک بیان کے مطابق، انہوں نے امید ظاہر کی کہ دونوں ممالک کے درمیان دوبارہ رابطہ عالمی سطح پر بڑھتی ہوئی غیر یقینی صورتحال کے درمیان بحر ہند میں استحکام اور سلامتی کو مضبوط بنانے میں مددگار ثابت ہوگا۔

مالدیپ نے برطانیہ کو باضابطہ طور پر آگاہ کیا ہے کہ وہ چاگوس جزائر کی خودمختاری ماریشس کو منتقل کرنے کی مجوزہ تجویز کو تسلیم نہیں کرتا۔

مالدیپ کے صدر محمد معیزو نے برطانیہ کے نائب وزیر اعظم ڈیوڈ لیمی کے ساتھ دو تحریری اعتراضات اور ایک ٹیلی فونک گفتگو کے ذریعے اپنے تحفظات کا اظہار کیا ہے۔

بحر ہند میں واقع جزائر پر مشتمل ملک مالدیپ نے چاگوس جزائر کے حوالے سے اپنے مفادات کا دعویٰ کیا ہے اور خبردار کیا ہے کہ وہ اپنے مؤقف کے حق میں بین الاقوامی قانونی کارروائی کا راستہ اختیار کر سکتا ہے۔

برطانوی دفتر خارجہ کے وزیر اسٹیفن ڈاؤٹی نے اس سے قبل کہا تھا کہ چاگوس جزائر کی خودمختاری کا معاملہ برطانیہ اور ماریشس کے درمیان ہے اور اس کا مالدیپ سے کوئی تعلق نہیں۔

چاگوس جزائر، جنہیں سرکاری طور پر برٹش انڈین اوشن ٹیریٹری (BIOT) کہا جاتا ہے، بحر ہند میں واقع ہیں اور 19ویں صدی کے اوائل سے برطانیہ کے کنٹرول میں ہیں۔

گزشتہ سال برطانوی حکومت نے اس علاقے کی خودمختاری ماریشس کو منتقل کرنے پر اتفاق کیا تھا، تاہم اس کے ساتھ ساتھ جزائر کے سب سے بڑے جزیرے ڈیاگو گارشیا میں قائم مشترکہ برطانیہ-امریکا فوجی اڈے تک رسائی برقرار رکھنے کا فیصلہ کیا گیا تھا۔ مجوزہ معاہدے کے تحت برطانیہ فوجی اڈے کو لیز پر لینے کے لیے اوسطاً سالانہ 101 ملین پاؤنڈ ادا کرے گا۔

ماریشس طویل عرصے سے چاگوس جزائر کی خودمختاری کا دعویٰ کرتا رہا ہے اور اس معاملے کو بین الاقوامی قانونی اور سفارتی ذرائع کے ذریعے آگے بڑھاتا رہا ہے۔

یو این آئی۔ ع ا۔