نئی دہلی، حکومت نے تمل ناڈو، آندھرا پردیش، کرناٹک اور تلنگانہ میں ریل راستوں کی صلاحیت بڑھانے کے لیے کل 540 کلومیٹر طویل پانچ پروجیکٹوں کو منظوری دی جن پر کل تخمینہ لاگت 10,021 کروڑ روپے آئے گی۔

ان پروجیکٹوں میں تمل ناڈو اور آندھرا پردیش کو جوڑنے والی ارکونم – رینی گنٹا تیسری اور چوتھی لائن (77 کلومیٹر)، کرناٹک میں وائٹ فیلڈ – بنگارپیٹ تیسری اور چوتھی لائن (47 کلومیٹر)، تمل ناڈو میں ہوسور – اوملور راستے کے ڈبلنگ (147 کلومیٹر)، تمل ناڈو میں سیلم – کرور – ڈنڈی گل ڈبلنگ (159 کلومیٹر) اور تلنگانہ میں سکندرآباد (گھاٹ کیسر) – کاجی پیٹ ملٹی ٹریکنگ (110 کلومیٹر) کے پروجیکٹس شامل ہیں۔

وزیراعظم نریندر مودی کی صدارت میں بدھ کے روز کابینہ کی اقتصادی امور کی کمیٹی (سی سی ای اے) میں کیئے گئے ان فیصلوں کی معلومات اطلاعات و نشریات نیز ریلوے کے وزیر اشونی ویشنو نے دی۔ انہیں سال 30-2029 تک مکمل کرنے کا منصوبہ ہے جس سے ریلوے کے موجودہ نیٹ ورک میں تقریباً 540 کلومیٹر کا اضافہ ہوگا۔

تمل ناڈو، آندھرا پردیش، کرناٹک اور تلنگانہ کے 17 اضلاع کو احاطہ کرنے والے یہ پانچ پروجیکٹس بھارتیہ ریلوے کے موجودہ نیٹ ورک میں تقریباً 540 کلومیٹر کا اضافہ کریں گے۔ منظور شدہ ملٹی ٹریکنگ پروجیکٹوں سے تقریباً 2,121 دیہاتوں کو بہتر ریل کنیکٹیوٹی ملے گی، جن کی کل آبادی تقریباً 52 لاکھ ہے۔ ویشنو نے بتایا کہ یہ پروجیکٹس کل 11,000 کلومیٹر تک پھیلے سات انتہائی مصروف ریل راستوں کی صلاحیت بڑھانے کے حکومت کے جامع منصوبے کا حصہ ہیں۔ ان میں سے 2,000 کلومیٹر ریل راستوں کو چار لین کا بنا دیا گیا ہے۔ 5,000 کلومیٹر کے راستوں کے پروجیکٹس منظور کیے جا چکے ہیں، جن پر کام چل رہا ہے یا شروع ہو چکا ہے۔ 4,000 کلومیٹر راستے پر نئی لائنیں بچھانے کا کام مرحلہ وار طریقے سے کیا جانا ہے۔

سی سی ای اے نے آج ہی جھارکھنڈ، اڈیشہ، مدھیہ پردیش اور چھتیس گڑھ کے 14 اضلاع کو جوڑنے والے تین پروجیکٹوں کو بھی شامل کیا ہے جن سے موجودہ ریل نیٹ ورک میں تقریباً 656 کلومیٹر کا اضافہ ہوگا۔ ان میں کھڑگ پور – جھارسگوڑا (باگد یہی) چوتھی لائن، کٹنی – پینڈرا روڈ چوتھی لائن اور بلاسپور (اسلاپور) – پینڈرا روڈ کے درمیان تیسری لائن کا پروجیکٹ شامل ہے۔ ان تین پروجیکٹوں پر کل تخمینہ لاگت 10,783 کروڑ روپے آنے کا امکان ہے۔

ریل وزیر نے کہا کہ ان ریل لائنوں کی صلاحیت بڑھنے سے آمد و رفت میں نمایاں سدھار ہوگا، جس سے انڈین ریلوے کی آپریشنل صلاحیت اور خدمات کی قابل اعتماد کیفیت بہتر ہوگی۔ یہ ملٹی ٹریکنگ پروجیکٹس ریل آپریشن کو منظم کرنے اور بھیڑ بھاڑ کم کرنے میں اہم کردار ادا کریں گے۔

تمل ناڈو، آندھرا پردیش، کرناٹک اور تلنگانہ کے 17 اضلاع کو جوڑنے والے مذکورہ بالا پانچ پروجیکٹوں کے فعال ہونے پر تقریباً 2,121 دیہاتوں کو بہتر ریل کنیکٹیوٹی ملے گی، جن کی کل آبادی تقریباً 52 لاکھ ہے۔ ان راستوں کی صلاحیت بڑھنے سے تروپتی، سبرامنیم سوامی مندر (تیروتانی)، شری پدماتی اماواری مندر (تیروچانور)، کوٹی لنگیشور دیوالیہ، شری سیتھی بائرویشور سوامی مندر، بنگارو تروپتی، کولار گولڈ فیلڈز، ہوگنکل آبشار، ہوسور قلعہ، میٹور ڈیم، کوڈائی کنال کی پہاڑیاں، ستیا منگلم وائلڈ لائف سنکچوری، نامکل انجنیئر مندر، نامکل قلعہ، کلیان پسوپتیشور مندر، یادادری گٹا مندر، بھونگیر قلعہ، سریندر پوری اور سورن گری مندر جیسے اہم مذہبی اور سیاحتی اہمیت کے مقامات کے لیے آمد و رفت کی سہولت بھی بڑھے گی۔

وزیرموصوف نے بتایا کہ یہ پروجیکٹس کوئلہ، سیمنٹ، لوہا اور اسٹیل، کنٹینر، آٹوموبائل، اناج، پیٹرولیم مصنوعات، کھاد وغیرہ اشیاء کی منتقلی کے لیے اہم ریل راستوں پر ہیں۔ صلاحیت بڑھانے کے ان کاموں سے سالانہ اضافی 4.7 کروڑ ٹن مال برداری کا امکان ہے۔

انہوں نے کہا کہ ریلوے ماحول کے موافق اور توانائی کی بچت والا ذریعہ آمد و رفت ہے۔ اس لیے ان پروجیکٹوں سے ملک کے ماحولیاتی اہداف کو حاصل کرنے اور لاجسٹکس کی لاگت کو کم کرنے میں مدد ملے گی۔ ساتھ ہی، تقریباً آٹھ کروڑ لیٹر تیل کی درآمد میں کمی آئے گی اور تقریباً 42 کروڑ کلوگرام کاربن کے اخراج میں کمی ہوگی جو تقریباً دو کروڑ درخت لگانے کے فائدے کے برابر ہے۔

یواین آئی ایف اے

نئی دہلی، پنجاب کانگریس کے بعد اب کانگریس کے سابق صدر اور لوک سبھا میں اپوزیشن لیڈر راہل گاندھی نے بھی ریاست کی عام آدمی پارٹی (اے اے پی) حکومت پر اس کی ناکامی پر سوال اٹھانے والوں کو دھمکانے اور ہراساں کرنے کا الزام عائد کرتے ہوئے گلزار سنگھ کو انصاف دلانے کا مطالبہ کیا ہے۔

مسٹر گاندھی نے بدھ کے روز سوشل میڈیا پلیٹ فارم ‘ایکس’ پر کہا کہ اپنے بیٹے کو نشے کا شکار ہوتے دیکھنے والے دلت برادری کے گلزار سنگھ نے ریاست کے وزیرِ خزانہ سے صرف یہ سوال پوچھا تھا کہ حکومت نشے کے کاروبار کو روکنے میں اتنی بری طرح کیوں ناکام ہو رہی ہے۔ انہوں نے الزام لگایا کہ اس سوال پر گلزار سنگھ کو ہراساں اور ذلیل کیا گیا اور معافی مانگنے کے لیے اتنا دباؤ ڈالا گیا کہ انہوں نے زہر کھا لیا۔ اسپتالوں میں علاج کے لیے بھٹکنے کے بعد بالآخر ان کی موت ہو گئی۔

مسٹر گاندھی نے کہا کہ انہوں نے گزشتہ ہفتے ایک نوجوان موہن جیت سنگھ سے بھی بات کی تھا، جنہیں وزیراعلیٰ بھگونت مان کے خلاف احتجاج کرنے پر ہراساں کیا گیا۔ ان کا کہنا تھا کہ حکومت کا کام عوام کو جواب دینا ہے، سوال پوچھنے والوں کو کچلنا نہیں۔ انہوں نے گلزار سنگھ کے اہل خانہ کو جلد از جلد انصاف دینے، وزیراعلیٰ بھگونت مان سے فوری طور پر وزیرِ خزانہ کا استعفیٰ لینے اور معاملے کی آزادانہ اور غیر جانبدارانہ تحقیقات کو یقینی بنانے کی مانگ کی ہے۔ انہوں نے تحقیقاتی ایف آئی آر میں وزیرِ خزانہ کا نام شامل کرنے کا بھی مطالبہ کیا۔

یواین آئی۔الف الف

نئی دہلی، وزیراعظم نریندر مودی نے منگل کے روز گجرات کے وڈودرا میں 35,000 کروڑ روپے سے زیادہ کے ترقیاتی منصوبوں کا افتتاح، وقف اور سنگ بنیاد رکھنے کے بعد کہا کہ ہندوستان لوگوں اور سامان کی نقل وحمل میں تیزی لانے، نئے معاشی مواقع پیدا کرنے اور ترقی کو آگے بڑھانے کے لیے اپنے بنیادی ڈھانچے کو تیزی سے مضبوط کر رہا ہے۔

مہاراجہ سیا جی راؤ یونیورسٹی (ایم ایس یو) پیویلین گراؤنڈ میں “نمو فار وکست بھارت” کے عنوان سے منعقدہ ایک عظیم الشان عوامی پروگرام سے خطاب کرتے ہوئے مودی نے کہا کہ حکومت کا بنیادی ڈھانچے پر زور ایک ترقی یافتہ ہندوستان کی بنیاد رکھنے کے مقصد سے ہے۔ اس پروگرام میں نوجوانوں کے ساتھ بات چیت اور اہم انفراسٹرکچر پروجیکٹوں کے آغاز کو ایک ہی جگہ پر لایا گیا، جس میں طلباء، نوجوانوں اور شہریوں نے بڑی تعداد میں شرکت کی۔

وزیراعظم نے کہا کہ ہم ہندوستان کے بنیادی ڈھانچے کو مضبوط کر رہے ہیں تاکہ لوگوں اور سامان کو تیزی سے منتقل کیا جا سکے، نئے مواقع پیدا کیے جا سکیں اور معاشی ترقی کو طاقت دی جا سکے۔ انہوں نے مینوفیکچرنگ، تجارت اور سرمایہ کاری کی حمایت میں جدید ٹرانسپورٹ نیٹ ورکس کی اہمیت پر زور دیا۔

اس پروگرام کی ایک اہم خصوصیت ویسٹرن ڈیڈیکیٹڈ فریٹ کوریڈور (ڈبلیو ڈی ایف سی) کے تین اہم حصوں کا افتتاح اور قوم کے نام وقف کرنا تھا۔ ڈیڈیکیٹڈ فریٹ کوریڈورز کو ہندوستان کی معاشی توسع کے لیے انتہائی اہم قرار دیتے ہوئے مودی نے کہا کہ ڈیڈیکیٹڈ فریٹ کوریڈور تیزی سے ترقی کرتے ہوئے ہندوستان کی لائف لائن ہے۔

ویسٹرن ڈیڈیکیٹڈ فریٹ کوریڈور کو اہم صنعتی اور تجارتی مراکز کے درمیان مال برداری کی تیز تر اور زیادہ موثر نقل و حمل فراہم کرنے کے لیے ڈیزائن کیا گیا ہے، جس سے روایتی ریلوے روٹس پر دباؤ کو کم کرنے اور لاجسٹکس کی کارکردگی کو بہتر بنانے میں مدد ملے گی۔ اس کوریڈور سے بندرگاہوں تک کنیکٹیویٹی کو مضبوط بنانے اور مغربی و شمالی ہندوستان میں صنعتی سامان کی نقل و حمل کی حمایت کی بھی توقع ہے۔

ملک کی مینوفیکچرنگ خواہشات کے ساتھ بنیادی ڈھانچے کی ترقی کو جوڑتے ہوئے مودی نے کہا کہ ہندوستان صنعتی ترقی کے ایک نئے مرحلے میں داخل ہو رہا ہے۔ انہوں نے کہا کہ چپس سے لے کر جہازوں تک، ہندوستان اب ایک نیا مینوفیکچرنگ مستقبل بنا رہا ہے، جس میں گھریلو پیداوار، سپلائی چینز اور اسٹریٹجک مینوفیکچرنگ صلاحیتوں پر حکومت کے زور کو اجاگر کیا گیا۔

فریٹ کوریڈور پروجیکٹوں کے ساتھ ساتھ وزیراعظم نے کئی ریلوے، ہائی وے اور قبائلی کنیکٹیویٹی پروجیکٹوں کا آغاز، وقف اور سنگ بنیاد رکھا۔ ان پہل قدمیوں کا مقصد علاقائی کنیکٹیویٹی کو بہتر بنانا، لاجسٹکس نیٹ ورکس کو مضبوط بنانا اور معاشی سرگرمیوں و روزگار کے لیے نئے مواقع کھولنا ہے۔

وڈودرا کی یہ تقریب مودی کے لیے اپوزیشن پر شدید سیاسی حملہ کرنے کا ایک پلیٹ فارم بھی بن گئی۔ ان لوگوں کو نشانہ بناتے ہوئے جن کے بارے میں انہوں نے کہا کہ وہ ہندوستان کی پیشرفت کو تسلیم کرنے سے قاصر ہیں، وزیراعظم نے اپنے “ناراض پھوپھا” والے طنز کو دہرایا، اور تجویز دی کہ کچھ لوگ ملک کی کامیابیوں کے باوجود ناخوش رہتے ہیں۔

مودی نے کہا کہ کچھ سیاسی مخالفین ہندوستان کی ترقی سے خوش ہونے کی صلاحیت سے محروم معلوم ہوتے ہیں اور تقریباً ہر چیز کے بارے میں رونا روتے رہتے ہیں۔ خاندانی تقریب میں کسی ناخوش رشتہ دار کی تصویر کشی کرتے ہوئے انہوں نے کہا کہ اپوزیشن ایک “ناراض پھوپھا” کی طرح برتاؤ کر رہی ہے جو دوسروں کے ترقی کا جشن منانے پر بھی ناراض رہتا ہے۔

وزیراعظم نے اس بات پر بھی حملہ کیا جسے انہوں نے ہندوستان کی کامیابیوں کے گرد “جھوٹ کی گونج” پیدا کرنے کی کوشش قرار دیا۔ مودی نے کہا کہ نوجوانوں کا سچ “جھوٹ کی گونج” کو شکست دے گا، اور اس بات پر زور دیا کہ نوجوان ہندوستانی بالآخر حقائق اور غلط معلومات کے درمیان فرق کریں گے۔

انہوں نے کہا کہ “جھوٹ کی گونج” نوجوانوں کو گمراہ نہیں کر سکتی، اور مزید کہا کہ “سچائی کی فتح ہوگی”۔

مودی کے تبصرے خاص طور پر ان کوششوں کی طرف اشارہ کر رہے تھے جن کا مقصد ہندوستان کی ترقیاتی کامیابیوں اور حقائق کو خارج یا کم تر کر کے پیش کرنا ہے۔ انہوں نے کہا کہ نوجوان نسل ان بار بار کیے جانے والے دعووں سے گمراہ نہیں ہوگی کہ ملک کی ترقی من گھڑت ہے۔

جاری ۔ یواین آئی ایف اے