سری نگر، کرائم برانچ جموں و کشمیر کے اقتصادی جرائم ونگ (ای او ڈبلیو) کشمیر نے ایک بدنام جعلساز کے خلاف چارج شیٹ داخل کی ہے، جس پر وادیٔ کشمیر کے مختلف علاقوں میں لوگوں کو جعلی سرکاری ملازمتیں دلانے کا جھانسہ دے کر لاکھوں روپے ٹھگنے کا الزام ہے۔ حکام کے مطابق اس کے خلاف 15 مقدمات درج ہیں۔

حکام نے پیر کو بتایا کہ معاملے میں ایف آئی آر نمبر 12/2026 کے تحت تعزیراتِ ہند (آئی پی سی) کی دفعات 420، 468 اور 471 کے تحت دھوکہ دہی اور جعلسازی کے الزام میں کوپواڑہ کے کالاروس علاقے کے لِشٹیال کے رہائشی عبدالماجد میر کے خلاف سری نگر کی فاریسٹ مجسٹریٹ عدالت میں چارج شیٹ پیش کی گئی ہے۔

ای او ڈبلیو نے بتایا کہ یہ مقدمہ ایک تحریری شکایت کی بنیاد پر درج کیا گیا تھا، جس میں الزام عائد کیا گیا تھا کہ ملزم نے شکایت کنندہ کے بیٹے کو سرکاری ملازمت دلانے کا جھانسہ دے کر بے ایمانی سے لاکھوں روپے وصول کیے۔ ملزم نے ایئرپورٹس اتھارٹی آف انڈیا کی جانب سے جاری کردہ مبینہ تقرری کا ایک حکم نامہ بھی فراہم کیا تھا، جو بعد میں جعلی اور فرضی ثابت ہوا۔

تحقیقات کے دوران الزامات کی تصدیق ہوگئی، جس کے بعد عدالتی فیصلے کے لیے مجاز عدالت کے سامنے چارج شیٹ پیش کردی گئی۔

ملزم کے خلاف وادیٔ کشمیر کے مختلف علاقوں میں 15 فوجداری مقدمات درج ہیں۔ اسے 18 جولائی 2026 کو گرفتار کیا گیا تھا اور فی الحال وہ سینٹرل جیل سری نگر میں قید ہے۔

میر پر الزام ہے کہ وہ معصوم لوگوں کو دھوکہ دینے اور ان سے رقم بٹورنے کے ارادے سے انتہائی بااثر شخصیات اور بیوروکریٹس کا روپ دھارتا تھا۔

یواین آئی۔ ظا

جموں، ہندستان کے سب سے زیادہ مطلوب دہشت گرد اور لشکر طیبہ (ایل ای ٹی) کے بانی حافظ سعید کے خلاف دوسرا غیر ضمانتی وارنٹ (این بی ڈبلیو) حاصل کرتے ہوئے قومی جانچ ایجنسی (این آئی اے) نے جموں کی ایک خصوصی عدالت کو بتایا کہ وہ پاکستان میں ہے۔

یہ غیر ضمانتی وارنٹ مرکز کے زیر انتظام علاقے میں سرگرم دہشت گرد گروہوں کو ہتھیار، فنڈز اور ہدایات دینے سے جڑے ایک دہشت گردی کے معاملے میں دو ماہ کے اندر حاصل کیا گیا۔

عدالت قومی جانچ ایجنسی (این آئی اے) کی جانب سے دائر اس درخواست پر سماعت کر رہی تھی جس میں بھارتیہ ناگرک سرکشا سنہیتا (بی این ایس ایس) کی دفعہ 75 کے تحت ایل ای ٹی کے بانی اور ر اعلان کردہ دہشت گرد حافظ سعید کے خلاف غیر ضمانتی وارنٹ کا مطالبہ کیا گیا تھا۔

درخواست میں پنجاب (پاکستان) کے سرگودھا کے رہنے والے سعید کو سرینگر کے بیرونی علاقے پنڈاچ میں جانچ کے دوران محمد نقیب بھٹ کی گرفتاری سے جڑے معاملے میں “فرار ملزم” بتایا گیا۔ بٹ پورہ کے رہنے والے بھٹ کے پاس سے چین کا بنا گرینیڈ اور 15 فعال کارتوس برآمد کیے گئے تھے۔ اس پر زکورہ پولیس اسٹیشن میں متعلقہ دفعات کے تحت معاملہ درج کیا گیا تھا۔ این آئی اے کے خصوصی جج پریم ساگر نے 8 ستمبر کے اپنے حکم میں کہا کہ جانچ کے دوران سعید کی شمولیت سامنے آئی ہے اور وہ “مبینہ طور پر دہشت گردی میں ملوث” تھا۔

ایجنسی کے بیان کے بعد عدالت نے پایا کہ وہ فرار ہے اور جانچ ایجنسی اس کی موجودگی کو یقینی نہیں بنا سکی ہے۔ اس لیے گزشتہ سال اپریل میں پہلگام میں ہوئے دہشت گردانہ حملے (جس میں 25 سیاح اور ایک مقامی شخص کی موت ہو گئی تھی) کے سلسلے میں سعید کے خلاف غیر ضمانتی وارنٹ جاری کیا گیا۔

یواین آئی۔الف الف

سرینگر، کشمیر میں قومی تحقیقاتی ایجنسی (این آئی اے) نے ہفتہ کو کالعدم دہشت گرد تنظیم لشکر طیبہ کے پاکستان میں مقیم آقاوں اور ان کے مقامی ‘اوور گراؤنڈ ورکرز’ کے نیٹ ورک سے جڑی سرحد پار دہشت گردانہ سازش کے معاملے میں 10 مقامات پر چھاپے مارے۔

ایجنسی کے مطابق، یہ تلاشی مہم کپواڑہ، کولگام، باندی پورہ، بارہمولہ اور سوپور میں چلائی گئی، تاکہ سازش سے جڑے اضافی ثبوت اکٹھے کیے جا سکیں اور دراندازی کرنے والے دہشت گردوں کو رسد و دیگر امداد دینے والے لوگوں کے کردار کا پتہ لگایا جا سکے۔

یہ معاملہ اصل میں سرینگر کے زکورہ تھانے میں درج کیا گیا تھا، جسے بعد میں این آئی اے نے یو اے پی اے کی مختلف دفعات سمیت دیگر دفعات میں دوبارہ رجسٹر کیا۔

این آئی اے کی تحقیقات 31 مارچ 2026 کی دیر رات ایک ناکہ پوائنٹ پر لشکر سے جڑے ایک شخص کی گرفتاری کے بعد شروع ہوئی تھی، جس کے پاس سے ایک ہینڈ گرینیڈ اور کارتوس برآمد کیے گئے تھے۔ اس کے بعد ہوئی جانچ کی بنیاد پر سازش سے جڑے پاکستانی شہریوں کی گرفتاری ہوئی اور مقامی سپورٹ نیٹ ورک کے ارکان کی شناخت و ان کے مشتبہ کردار اجاگر ہوئے۔

ایجنسی نے بتایا کہ اب تک کی تحقیقات سے پاکستان میں مقیم لشکر آقاوں اور ان کے مقامی معاونین کے درمیان براہ راست تعلقات کا پتہ چلا ہے۔ ان مقامی رابطوں کا استعمال دراندازی کے ساتھ بات چیت قائم کرنے، ان کی نقل وحرکت، انہیں چھپانے، پناہ دینے، ریکی کرنے اور رسد فراہم کرنے کے لیے کیا جا رہا تھا۔

پورے نیٹ ورک کو بے نقاب کرنے کے لیے این آئی اے مالی لین دین، مواصلاتی نظام، ملزمان کی نقل وحرکت اور ہتھیاروں و دھماکہ خیز مواد کی سپلائی چین کی بھی باریک بینی سے جانچ کر رہی ہے۔

آج کی تلاشی مہم سرحد پار دہشت گردی کو فروغ دینے والے اس وسیع نیٹ ورک کے خلاف جاری جانچ کا ہی حصہ ہے۔ کارروائی کے دوران کئی نئی قابل اعتراض اشیاء ضبط کی گئی ہیں، جنہیں پہلے سے جمع کیے گئے ثبوتوں کے ساتھ ملایا جا رہا ہے۔

این آئی اے نے واضح کیا کہ سازش میں شامل تمام افراد کی شناخت اور کردار طے کرنے کے لیے جانچ جاری رہے گی اور اس کے نتائج کی بنیاد پر آگے گرفتاریاں و برآمدگی کی جا سکتی ہیں۔ اس سے پہلے ایجنسی نے 22 اگست کو بھی اسی جانچ کے سلسلے میں سرینگر، کپواڑہ، اننت ناگ، پلوامہ اور بڈگام میں 10 مقامات پر چھاپہ ماری کی تھی۔

یواین آئی۔الف الف