نئی دہلی، یو ایس اوپن کے پہلے راؤنڈ میں حیران کن شکست کے بعد نوواک جوکووچ دو دہائیوں سے زیادہ عرصے میں پہلی بار اے ٹی پی ٹاپ 10 سے باہر ہو گئے ہیں۔

نیویارک میں ماریانو ناوون سے ابتدائی راؤنڈ میں ہارنے کے بعد پیر کو جاری تازہ ترین رینکنگ میں جوکووچ پانچویں سے 12ویں مقام پر کھسک گئے۔ اس واقعے کے ساتھ ہی اکتوبر 2002 کے بعد یہ پہلی بار ہے جب کھیل کے ’بگ تھری‘ یعنی جوکووچ، رافیل نڈال اور راجر فیڈرر میں سے کوئی بھی اے ٹی پی ٹاپ 10 میں شامل نہیں ہے۔

20 بار کے گرینڈ سلیم چیمپئن فیڈرر 2022 میں ریٹائر ہو گئے، جبکہ 22 گرینڈ سلیم خطاب جیتنے والے نڈال نے 2024 میں اپنے کیریر کو الوداع کہہ دیا۔ 39 سال کے جوکووچ اس تینوں کے واحد فعال کھلاڑی ہیں اور اب بھی ریکارڈ 25ویں گرینڈ سلیم خطاب کی تلاش میں ہیں، جس سے وہ مارگریٹ کورٹ کے 24 بڑے خطابوں کے ریکارڈ کو پیچھے چھوڑ دیں گے۔

حالانکہ، ان کی حالیہ کوشش مایوس کن رہی کیونکہ ناوون کے خلاف میچ کے دوران انہیں جسمانی پریشانی کا سامنا کرنا پڑا اور کورٹ پر قے بھی کی۔ نیویارک میں شکست کے بعد جوکووچ نے کہا کہ ’’مجھے ماضی کی تمام کامیابیوں پر بہت فخر ہے، لیکن اب جو ہے، سو ہے۔‘‘

یو این آئی۔ این یو۔

ماسکو، جرمنی کے ٹینس کھلاڑی الیگزینڈر زیوریف نے نیویارک کے ہارڈ کورٹ پر کھیلے گئے یو ایس اوپن کے فائنل میں امریکہ کے بین شیلٹن کو شکست دے دی۔

زیوریف (پہلی سیڈ) نے شیلٹن (آٹھویں سیڈ) کو 6-3، 7-6 (7-2)، 5-7، 6-2 کے اسکور سے شکست دی۔

دونوں کھلاڑی 3 گھنٹے اور 33 منٹ تک کورٹ پر رہے۔ جرمن کھلاڑی نے شیلٹن کے خلاف باہمی مقابلوں میں اپنی برتری 6-0 کر لی۔

زیوریف نے اپنے پیشہ ورانہ کرئیر میں پہلی بار یو ایس اوپن جیتا اور اپنا دوسرا گرینڈ سلیم خطاب حاصل کیا۔

اس سے پہلے وہ 2026 میں فرنچ اوپن جیت چکے ہیں۔ 2020 میں جرمن کھلاڑی یو ایس اوپن کے فائنل میں پہنچے تھے، جہاں انہیں آسٹریا کے ڈومینک تھیم کے ہاتھوں شکست کا سامنا کرنا پڑا تھا۔

یو ایس اوپن میں فتح کے لیے زیوریف نے ریکارڈ 5.5 ملین ڈالر کی انعامی رقم حاصل کی، جبکہ شیلٹن کو 2.8 ملین ڈالر ملے۔ 2026 یو ایس اوپن کی کل انعامی رقم ٹینس مقابلوں کی تاریخ میں پہلی بار 100 ملین ڈالر سے تجاوز کر گئی۔

یو این آئی، ایم جے

لاہور، پاکستان کے کرکٹرز امام الحق اور محمد رضوان کو فٹنس ٹیسٹ رپورٹس جمع نہ کرانے پر پریزیڈنٹ ٹرافی گریڈ ون کے پہلے راؤنڈ میں کھیلنے سے روک دیا گیا ہے۔

پاکستانی میڈیا رپورٹ کے مطابق کھلاڑیوں کے محکموں کی جانب سے دونوں کرکٹرز کی فٹنس ٹیسٹ رپورٹس پاکستان کرکٹ بورڈ (پی سی بی) کو موصول نہیں ہوئیں۔ پی سی بی کے قواعد کے تحت فرسٹ کلاس کرکٹ میں شرکت کے لیے فٹنس ٹیسٹ رپورٹس جمع کرانا لازمی ہے۔

پریزیڈنٹ ٹرافی کا آغاز 12 ستمبر سے پنڈی، اسلام آباد، ایبٹ آباد اور پشاور میں ہوگا۔ امام الحق کو او جی ڈی سی ایل کی قیادت کرتے ہوئے پی ٹی وی کے خلاف میچ کھیلنا تھا، جبکہ شان مسعود کی عدم موجودگی میں محمد رضوان کو پہلے راؤنڈ میں سوئی گیس کی کپتانی کرنا تھی۔

ذرائع کے مطابق پی سی بی نے تمام کرکٹرز کے لیے ڈومیسٹک کرکٹ میں کم از کم پانچ میچز کھیلنا بھی لازمی قرار دے رکھا ہے۔ اس صورتحال میں دونوں کھلاڑیوں کے لیے اپنے سینٹرل کنٹریکٹ برقرار رکھنا بھی مشکل ہوسکتا ہے۔

امام الحق اور محمد رضوان پہلے ہی این سی سی آئی اے کی جانب سے مبینہ ڈریسنگ روم لیکس کے معاملے میں طلبی کا سامنا کر رہے ہیں۔ ایک طرف جاری تحقیقات اور دوسری جانب ڈومیسٹک کرکٹ سے باہر ہونے کے باعث دونوں کرکٹرز کے مستقبل کے حوالے سے سوالات اٹھ رہے ہیں۔

یو این آئی۔ م س