نئی دہلی، پاکستان کی دہشت گرد تنظیم جیشِ محمد کے سرغنہ مسعود اظہر پر 70 لاکھ پاکستانی روپے کے انعام کے اعلان کو دکھاوٹی قرار دیتے ہوئے ہندوستان نے کہا ہے کہ صرف انعام کا اعلان نہیں بلکہ حکومتِ پاکستان کو ٹھوس کارروائی کرتے ہوئے مسعود اظہر کو گرفتار کرنا چاہیے۔

وزارتِ خارجہ کے ترجمان رندھیر جیسوال نے منگل کے روز یہاں ہفتہ وار میڈیا بریفنگ کے دوران اس سلسلے میں پوچھے گئے سوال کے جواب میں کہا کہ صرف انعام کے اعلان کا کوئی مطلب نہیں ہے، پاکستان کو ٹھوس کارروائی کرنی چاہیے۔

انہوں نے کہا کہ پاکستان کی اس طرح کی دکھاوٹی حرکتیں آنکھوں میں دھول جھونکنے کی کوشش ہیں۔ یہ کوئی نئی بات نہیں ہے۔ پاکستان اس طرح کی حرکتیں پہلے بھی کرتا رہا ہے۔ ان کھوکھلے اعلانات کا کوئی مطلب نہیں ہے اور پاکستان کو ٹھوس کارروائی کرتے ہوئے مسعود اظہر کو گرفتار کرنا چاہیے۔

قابلِ ذکر ہے کہ پاکستان کی جانب سے یہ دکھاوٹی کارروائی اکتوبر میں ہونے والے فائنینشل ایکشن ٹاسک فورس (ایف اے ٹی ایف) کے مکمل اجلاس سے قبل کی گئی ہے۔ پاکستان کی کوشش ہے کہ ایسا کرنے سے وہ دوبارہ گرے لسٹ میں جانے سے بچ سکتا ہے۔ کارروائی سے بچنے اور بین الاقوامی برادری کو گمراہ کرنے کے لیے پاکستان نے 2021ء میں دعویٰ کرنا شروع کیا تھا کہ مسعود اظہر اب اس کے ملک میں نہیں ہے اور افغانستان بھاگ گیا ہے۔ اسی سال پاکستان کی وفاقی تحقیقاتی ایجنسی نے اس پر 50 لاکھ پاکستانی روپے کا انعام مقرر کیا تھا؛ پانچ سال بعد اب یہ انعام بڑھا کر 70 لاکھ پاکستانی روپے کر دیا گیا ہے۔

یواین آئی ایف اے

نئی دہلی، دفاعی وزیر راج ناتھ سنگھ نے دفاعی شعبے میں مائیکرو،ا سمال اینڈ میڈیم انٹرپرائزز (ایم ایس ایم ای) اور نئی ٹیکنالوجی پر کام کر رہے اسٹارٹ اپس کی شراکت کو بڑھانے کے لیے منگل کے روز متعدد نئی پہل قدمیوں کا آغاز کیا، جن کے تحت انہیں براہِ راست مالی امداد، تربیت اور تحقیقی تعاون کے ساتھ ساتھ دفاعی تحقیق و ترقی تنظیم (ڈی آر ڈی او) کی ٹیسٹنگ کی سہولیات تک خصوصی رسائی حاصل ہوگی۔

وزیردفاع نے پیر کے روز یہاں ڈی آر ڈی او-صنعت رابطہ اجلاس ‘وِمرش’ میں ان پہل قدمیوں کا افتتاح کیا۔

اس دوران ڈی آر ڈی او کی جانب سے تیار کردہ سافٹ ویئر کے سورس کوڈ کو لائسنس یافتہ صنعتوں کے ساتھ شیئر کرنے کے لیے ایک محفوظ اور یکساں نظام بھی شروع کیا گیا۔

پروگرام میں 13 مینوفیکچرنگ پارٹنرز کو جدید ترین دفاعی نظام کی تجارتی پیداوار کے لیے ٹیکنالوجی کی منتقلی کے نو لائسنس معاہدے سونپے گئے۔ ڈی آر ڈی او نے صنعتوں تک رسائی بڑھانے اور چھوٹی صنعتوں کی شراکت کو فروغ دینے کے لیے سوسائٹی آف انڈین ڈیفنس مینوفیکچررز اور لگھو ادیو بھارتی کے ساتھ حکمتِ عملی کے معاہدے بھی کیے۔

ڈی آر ڈی او نے گھریلو دفاعی کمپنیوں کی مینوفیکچرنگ کی صلاحیت کا جائزہ لینے کے لیے کوالٹی کونسل آف انڈیا کے ساتھ ‘سسٹم فار ایڈوانسڈ مینوفیکچرنگ اسیسمنٹ اینڈ ریٹنگ’ کے دوسرے ایڈیشن کے لیے معاہدہ کیا۔

راج ناتھ سنگھ نے کہا کہ ڈی آر ڈی او اور صنعت کے درمیان تعاون صرف پیداوار تک محدود نہیں رہنا چاہیے۔ یہ تحقیق، ڈیزائن، ٹیسٹنگ، سرٹیفکیشن اور مینوفیکچرنگ تک پورے عمل میں ہونا چاہیے۔ انہوں نے کہا کہ ڈی آر ڈی او کے پاس علم اور ٹیکنالوجی، صنعت کے پاس پیداواری صلاحیت، اسٹارٹ اپس کے پاس جدت اور نوجوانوں کے پاس نئے ہندوستان کا خواب ہے۔ ان چاروں کی متحدہ طاقت سے کوئی بھی ہدف ناممکن نہیں ہے۔

انہوں نے کہا کہ 2047ء تک اہم ٹیکنالوجیز میں خودکفالت، ملک میں تیار کردہ سامان کے شیئر میں بڑا اضافہ، دفاعی برآمدات میں ملٹی فولڈ اضافہ اور عالمی سپلائی چین میں ہندوستان کی مضبوط موجودگی حاصل کرنی ہوگی۔

وزیردفاع نے کہا کہ گزشتہ چند سال میں دفاعی شعبے میں متعدد بڑے اصلاحاتی اقدامات کیے گئے ہیں۔ ان میں مثبت مقامی سطح پر تیاری کرنے کی فہرست، میک ان انڈیا، آئی ڈی ای ایکس اور ادتی جیسی پہل قدمیاں شامل ہیں۔ دفاعی تحقیق و ترقیاتی بجٹ کا 25 فیصد نجی شعبے کے لیے رکھنے کا فیصلہ بھی درآمدات پر انحصار گھٹانے اور خودکفالت بڑھانے کے لیے کیا گیا ہے۔

انہوں نے کہا کہ اسٹارٹ اپس اور ایم ایس ایم ای ہندوستان میں جدت کے نئے حاملین ہیں۔ انہیں بڑی کمپنیوں کے ساتھ دفاعی سپلائی چین کا لازمی حصہ بنانا ضروری ہے۔ نئی پہل قدمیوں میں صنعت پر مبنی تحقیق و ترقی، اسٹارٹ اپس اور ایم ایس ایم ای کو مالی امداد اور رہنمائی، تعلیمی اداروں اور صنعت کے درمیان تعاون نیز مصنوعی ذہانت، کوانٹم کمپیوٹنگ، ہائپر سونکس اور ڈائریکٹڈ انرجی جیسی مستقبل کی ٹیکنالوجیز میں سرمایہ کاری پر زور دیا گیا ہے۔

راج ناتھ سنگھ نے کہا کہ ڈرون ٹیکنالوجی، مصنوعی ذہانت اور سائبر سکیورٹی جیسے شعبوں میں ایم ایس ایم ای اور اسٹارٹ اپس جدت کو تیز کر سکتے ہیں اور ہندوستان کی تکنیکی و حکمتِ عملی کی صلاحیت کو نئی بلندیوں پر لے جا سکتے ہیں۔ انہوں نے ایم ایس ایم ای سے معیار، بروقت فراہمی، جدت اور عالمی معیاروں پر مسلسل توجہ دینے کو کہا۔

دفاعی سکریٹری راجیش کمار سنگھ نے کہا کہ ‘وارتا سے وکاس ‘ کے موضوع پر مبنی وِمرش-2026 کا مقصد نجی شعبے کی صلاحیتوں کو دفاعی نظام کے مرکز میں لانا ہے۔ اس کا ہدف خریدار- فروخت کنندگان کے تعلقات سے آگے بڑھ کر تعاون اور مشترکہ ترقی پر مبنی تکنیکی نظام تیار کرنا ہے۔

انہوں نے کہا کہ اب تک 1,100 سے زائد صنعتوں کو 2,300 سے زیادہ ٹیکنالوجی ٹرانسفر کی جا چکی ہیں۔ ڈی آر ڈی او کی جانب سے تیار کردہ تقریباً 50 میزائلوں سے جڑی ٹیکنالوجی بھی صنعتوں کے لیے دستیاب کرائی گئی ہے۔

پروگرام میں ‘ڈیفنس سسٹمز فار ریزیلیئنٹ بھارت-ایڈوانسنگ آتم نربھرتا ان ڈیفنس’ کتاب کا اجراء کیا گیا۔ اس میں 2014ء سے 2026ء کے درمیان ڈی آر ڈی او کے تکنیکی گروپس کے ذریعہ تیار کردہ اہم دفاعی نظاموں کا مجموعہ ہے۔ ڈی آر ڈی او میں انسانی وسائل کی بیرونی خدمات کے لیے معاہداتی رہنمائی کے خطوط بھی جاری کیے گئے۔

پروگرام میں ڈی آر ڈی او کے تکنیکی گروپس نے ایروناٹیکل سسٹمز، میزائلوں، اسلحہ، مائیکرو الیکٹرانکس اور نیول سسٹمز سے جڑے تکنیکی روڈ میپ پیش کیے۔ ڈی آر ڈی او ہیڈکوارٹر نے طریقہ کار کو آسان بنانے، سہولیات تک تیز تر رسائی اور لائسنسنگ کے عمل کے وقت کو کم کرنے سے متعلق پہل قدمیاں بھی پیش کیں۔

پروگرام میں دفاعی صنعت کے 250 سے زائد اہم نمائندوں، صنعتی تنظیموں کے نمائندوں، سینئر سویلین و ملٹری افسران اور ڈی آر ڈی او کے سینئر سائنسدانوں نے شرکت کی۔ شعبہ برائے فروغِ صنعت و اندرونی تجارت کے سکریٹری نے بھی میٹنگ میں حصہ لیا۔

یواین آئی ایف اے

نئی دہلی،کانگریس کے جنرل سکریٹری انچارج مواصلات جے رام رمیش نے منگل کے روز نریندر مودی حکومت پر یونیفائیڈ پیمنٹس انٹرفیس (یوپی آئی) کے لین دین پر چارجز عائد کرنے کا راستہ کھولنے کا الزام لگاتے ہوئے دعویٰ کیا کہ ترمیم شدہ پیمنٹ اینڈ سیٹلمنٹ سسٹمز ایکٹ 2007ء کے تحت ایک حالیہ نوٹیفکیشن کے ذریعے 2,000 روپے سے زائد کی منتقلی پر فیس کے خلاف واضح قانونی تحفظ کو ختم کر دیا گیا ہے۔

جے رام رمیش نے کہا کہ اس صورتحال نے ان کی 6 اگست 2026ء کی اس تحریری انتباہ کو درست ثابت کر دیا ہے جس میں انہوں نے یوپی آئی لین دین پر فیس کا نظام لاگو کیے جانے کے امکان پر تشویش ظاہر کی تھی۔ انہوں نے یاد دہانی کرائی کہ اس وقت اس معاملے پر مرکزی وزیرِ خزانہ نِرملا سیتارمن نے بھی اپنا ردِعمل دیا تھا۔

جے رام رمیش نے ایک بیان میں کہا، “جیسا کہ ہم نے 6 اگست 2026ء کو خبردار کیا تھا، جس پر خود وزیرِ خزانہ نے جواب دیا تھا، مودی حکومت اب پارلیمنٹ سے زبردستی منظور کرائے گئے نئے قوانین کا استعمال کرتے ہوئے یوپی آئی پر چارجز لینے کا عمل شروع کر رہی ہے۔”

کانگریس لیڈر نے کہا کہ نوٹیفکیشن میں بینکوں اور ادائیگی کی سہولت فراہم کرنے والے اداروں کو صرف 2,000 روپے سے کم کی یوپی آئی منتقلی پر چارجز وصول کرنے سے روکا گیا ہے، لیکن اس حد سے زیادہ کے لین دین پر فیس نہ لگانے کی کوئی واضح قانونی پابندی فراہم نہیں کی گئی ہے۔

انہوں نے دعویٰ کیا، “اس حد سے اوپر کی کسی بھی رقم کی منتقلی کے لیے کوئی واضح قانونی تحفظ موجود نہیں ہے،” جس کے باعث زیادہ رقم کے یوپی آئی لین دین پر فیس عائد کرنے کا قانونی راستہ ہموار ہو سکتا ہے۔

انہوں نے مزید خبردار کیا کہ 2,000 روپے کی اس حد کو بھی مستقبل میں کسی دوسرے نوٹیفکیشن کے ذریعے تبدیل کیا جا سکتا ہے، جس سے صارفین کو یہ مستقل قانونی ضمانت حاصل نہیں رہے گی کہ یوپی آئی ادائیگی ہمیشہ مفت رہے گی۔

انہوں نے کہا، “ہر کسی کے لیے یوپی آئی لین دین پر فیس ادا کرنے کی راہ ہموار کی جا رہی ہے۔ کل کو ایک اور نوٹیفکیشن کے ذریعے اس حد کو بھی بدلا جا سکتا ہے – اب قانون میں کوئی ضمانت باقی نہیں رہی۔”

جے رام رمیش نے یہ خدشہ بھی ظاہر کیا کہ مستقبل کے چارجز کا دائرہ روزمرہ کے ایک شخص سے دوسرے شخص (پرسن ٹو پرسن) کی رقم کی منتقلی تک پھیلایا جا سکتا ہے۔ انہوں نے کہا، “جہاں تک ہم جانتے ہیں، حکومت روزمرہ کی آپسی منتقلی پر بھی چارج عائد کر سکتی ہے۔”

یوپی آئی ہندوستان کے ڈیجیٹل ادائیگیوں کے نظام کی ریڑھ کی ہڈی بن کر ابھرا ہے، جو موبائل ایپلی کیشنز اور دیگر ڈیجیٹل پلیٹ فارمز کے ذریعے فوری بینک ٹو بینک لین دین کو آسان بناتا ہے۔ اس نظام کی تیز رفتار توسیع کا بڑا سبب بلا معاوضہ ڈیجیٹل ادائیگیوں کی دستیابی رہی ہے، اور عام صارفین سے براہِ راست کوئی چارج نہیں لیا جاتا۔

اس تناظر میں جے رام رمیش نے حکومت پر ترمیم شدہ قانون کے اثرات پر شفافیت برتنے میں ناکام رہنے کا الزام لگایا اور کہا کہ اس قدم سے ملک کے ڈیجیٹل ادائیگیوں کے نظام پر عوام کے اعتماد کو ٹھیس پہنچ سکتی ہے۔

انہوں نے کہا، “مودی حکومت نے ایک بار پھر ایمانداری اور شفافیت کے مکمل فقدان کا مظاہرہ کرتے ہوئے صارفین کا اعتماد توڑا ہے۔”

جے رام رمیش نے اس مسئلے کو وسیع جیو پولیٹیکل اور معاشی زاویہ دیتے ہوئے سوال اٹھایا کہ کیا حکومت کا یہ رویہ امریکی صدر ڈونالڈ ٹرمپ کو خوش کرنے کے لیے ہندوستانی ڈیجیٹل ادائیگی کے نظام کو امریکی کمپنیوں کے لیے کھولنے سے جڑا ہوا ہے؟

حکومت مسلسل یوپی آئی کو ہندوستان کے ڈیجیٹل پبلک انفراسٹرکچر کے ایک اہم ستون کے طور پر پیش کرتی رہی ہے اور ملک کے اندر اور بیرونِ ملک اس کی توسیع کی حوصلہ افزائی کرتی رہی ہے۔

تاہم جے رام رمیش کے اس حالیہ حملے نے یوپی آئی چارجز کو کنٹرول کرنے والے قانونی تحفظات پر روشنی ڈالی ہے اور اس سے ڈیجیٹل ادائیگیوں کی مستقبل کی لاگت، صارف کے تحفظ اور ہندوستانی ادائیگیوں کے نظام میں غیر ملکی شمولیت پر ایک وسیع سیاسی بحث چھڑنے کا امکان ہے۔

یواین آئی ایف اے