نئی دہلی، کانگریس کے صدر ملکارجن کھرگے نے کہا ہے کہ امریکہ کی ہندوستان پر 100 فیصد تک ٹیرف عائد کرنے کی دھمکی سے ہندوستانی برآمدات اور کسانوں کے مفادات متاثر ہوں گے، لہٰذا حکومت کو اس کے دباؤ کے آگے جھکنے کی بجائے قومی مفاد کو ترجیح دینی چاہیے۔

ملکارجن کھرگے نے بدھ کے روز سوشل میڈیا ایکس پر کہا کہ امریکہ کی ہندوستانی اشیاء پر 100 فیصد تک ٹیرف بڑھانے کی دھمکی سے مودی حکومت کی خارجہ اور تجارتی پالیسی کی ناکامی سامنے آتی ہے۔ ان کا کہنا تھا کہ ادویات، کپڑا، انجینئرنگ کا سامان، کیمیائی مادے، گاڑیوں کے پرزے، جواہرات و زیورات نیز الیکٹرانکس اور ٹیکنالوجی کا شعبہ ٹیرف میں بھاری اضافے کا سامنا کر سکتا ہے۔

انہوں نے کہا کہ پہلے 25 فیصد اور پھر 50 فیصد ٹیرف لگایا گیا اور اب 100 فیصد ٹیرف کی دھمکی دی جا رہی ہے۔ انہوں نے کہا کہ مودی حکومت نے ایسے تجارتی فریم ورک پر رضامندی ظاہر کی ہے، جس سے امریکی زرعی مصنوعات کے لیے ہندوستان میں مارکیٹ بڑھے گی اور کسانوں کے مفادات متاثر ہوں گے۔ ان کے مطابق اس فریم ورک کے تحت اگلے پانچ سال میں تقریباً 500 ارب ڈالر کے امریکی سامان خریدنے کے لیے ہندوستان پر دباؤ ہوگا۔

کانگریس صدر نے یو پی آئی پر زیرو ایم ڈی آر کا نظام ختم کرنے کے حکومت کے فیصلے کو امریکی دباؤ سے جوڑتے ہوئے کہا کہ ٹیرف، تجارت، ایچ-1 بی ویزا، ویزا نظام اور ڈیجیٹل ادائیگی سمیت مختلف شعبوں میں امریکہ کا دباؤ بڑھ رہا ہے۔

اس سے قبل کانگریس کے کمیونکیشن شعبے کے انچارج جے رام رمیش نے آج لکھا کہ امریکی ایوانِ نمائندگان میں ہندوستان پر 100 فیصد ٹیرف عائد کرنے والے بل پر بدھ کے روز ووٹنگ ہونی ہے، جبکہ امریکی سینیٹ اسے پہلے ہی منظوری دے چکی ہے۔ ٹرمپ انتظامیہ ہندوستانی تارکینِ وطن کے خلاف سختی کرتے ہوئے ایچ-1 بی ویزا کی لاگت بڑھا چکی ہے۔ تبدیل شدہ نظام کے تحت ویزا ہولڈرز کے بے روزگار ہونے پر انہیں فوری طور پر ملک سے باہر کیا جا سکتا ہے۔

جے رام رمیش نے کہا کہ مودی حکومت نے امریکہ کے مطالبات کے آگے جھکتے ہوئے یو پی آئی پر زیرو ایم ڈی آر کا نظام ختم کر کے چارجز عائد کرنے کا راستہ کھول دیا ہے۔ انہوں نے سوال کیا کہ 0.4 فیصد ایم ڈی آر کیوں ہے اور کیا یہ اس لیے ہے کیونکہ ڈیبٹ کارڈ پر بھی ایم ڈی آر 0.4 فیصد ہے؟ انہوں نے پوچھا کہ کیا یہ امریکی کارڈ کمپنیوں کو یو پی آئی کے ساتھ مقابلہ کرنے کے قابل بنانے کے لیے کیا جا رہا ہے؟

انہوں نے کہا کہ کیا اس سے یو پی آئی ‘پائیدار’ بنے گا، جیسا کہ حکومت کا دعویٰ ہے؟ انہوں نے یہ بھی کہا کہ پورے یو پی آئی ایکو سسٹم کو چلانے کی تخمینہ لاگت تقریباً 20,000 کروڑ روپے سالانہ ہے اور یہ رقم گزشتہ چند سالوں میں ریزرو بینک آف انڈیا کے ذریعہ مرکزی حکومت کو منتقل کی گئی رقم کے 10 فیصد سے بھی کم ہے۔

یواین آئی ایف اے

نئی دہلی، وزیر خارجہ ڈاکٹر ایس. جے شنکر بدھ سے بھوٹان کے 2 روزہ سرکاری دورے پر رہیں گے۔

وزارت خارجہ نے بتایا کہ یہ دورہ بھوٹان کے وزیر خارجہ لیونپو ڈی. این. ڈھونگیال کی دعوت پر ہو رہا ہے۔

دورے کے دوران مسٹر جے شنکر بھوٹان کے وزیر خارجہ کے ساتھ دو طرفہ بات چیت کریں گے۔ انہیں بھوٹان کے بادشاہ سے شاہی ملاقات کا موقع بھی ملے گا۔ اس کے علاوہ وہ بھوٹان کے وزیر اعظم سے بھی ملاقات کریں گے۔

وزارت کے مطابق یہ دورہ ہندوستان اور بھوٹان کے درمیان باقاعدہ اعلیٰ سطحی ملاقاتوں کی روایت کے تحت ہو رہا ہے۔ اس کا مقصد دونوں ممالک کے درمیان دوستی اور تعاون کے موجودہ قریبی تعلقات کو مزید مضبوط کرنا ہے۔

یو این آئی۔ ایم جے

نئی دہلی، پاکستان کی دہشت گرد تنظیم جیشِ محمد کے سرغنہ مسعود اظہر پر 70 لاکھ پاکستانی روپے کے انعام کے اعلان کو دکھاوٹی قرار دیتے ہوئے ہندوستان نے کہا ہے کہ صرف انعام کا اعلان نہیں بلکہ حکومتِ پاکستان کو ٹھوس کارروائی کرتے ہوئے مسعود اظہر کو گرفتار کرنا چاہیے۔

وزارتِ خارجہ کے ترجمان رندھیر جیسوال نے منگل کے روز یہاں ہفتہ وار میڈیا بریفنگ کے دوران اس سلسلے میں پوچھے گئے سوال کے جواب میں کہا کہ صرف انعام کے اعلان کا کوئی مطلب نہیں ہے، پاکستان کو ٹھوس کارروائی کرنی چاہیے۔

انہوں نے کہا کہ پاکستان کی اس طرح کی دکھاوٹی حرکتیں آنکھوں میں دھول جھونکنے کی کوشش ہیں۔ یہ کوئی نئی بات نہیں ہے۔ پاکستان اس طرح کی حرکتیں پہلے بھی کرتا رہا ہے۔ ان کھوکھلے اعلانات کا کوئی مطلب نہیں ہے اور پاکستان کو ٹھوس کارروائی کرتے ہوئے مسعود اظہر کو گرفتار کرنا چاہیے۔

قابلِ ذکر ہے کہ پاکستان کی جانب سے یہ دکھاوٹی کارروائی اکتوبر میں ہونے والے فائنینشل ایکشن ٹاسک فورس (ایف اے ٹی ایف) کے مکمل اجلاس سے قبل کی گئی ہے۔ پاکستان کی کوشش ہے کہ ایسا کرنے سے وہ دوبارہ گرے لسٹ میں جانے سے بچ سکتا ہے۔ کارروائی سے بچنے اور بین الاقوامی برادری کو گمراہ کرنے کے لیے پاکستان نے 2021ء میں دعویٰ کرنا شروع کیا تھا کہ مسعود اظہر اب اس کے ملک میں نہیں ہے اور افغانستان بھاگ گیا ہے۔ اسی سال پاکستان کی وفاقی تحقیقاتی ایجنسی نے اس پر 50 لاکھ پاکستانی روپے کا انعام مقرر کیا تھا؛ پانچ سال بعد اب یہ انعام بڑھا کر 70 لاکھ پاکستانی روپے کر دیا گیا ہے۔

یواین آئی ایف اے