واشنگٹن، امریکی صدر ڈونالڈ ٹرمپ نے کہا ہے کہ امریکہ نے ڈنمارک اور گرین لینڈ کے ساتھ ایک معاہدہ کیا ہے، جس کے تحت حکمت عملی کے لحاظ سے اہم آرکٹک خطے میں امریکہ کو ’’مستقل سکیورٹی کنٹرول‘‘ حاصل ہوگا، وہاں اس کی فوجی موجودگی میں اضافہ کیا جائے گا اور غیر نیٹو ممالک کو گرین لینڈ میں فوجی اڈہ قائم کرنے یا فوجی تعینات کرنے سے روکا جائے گا۔

مسٹر ٹرمپ نے جمعہ کو معاہدے کا اعلان کرتے ہوئے اسے ’’انفینٹ لائف‘‘ انتظام قرار دیا اور کہا کہ اس سے گرین لینڈ کے حوالے سے امریکہ کے دیرینہ قومی سلامتی کے خدشات دور ہوں گے۔

مسٹر ٹرمپ نے اپنے سوشل میڈیا پلیٹ فارم ٹروتھ سوشل پر لکھا، ’’امریکہ نے ڈنمارک اور گرین لینڈ کے ساتھ ایک معاہدہ کیا ہے، جو گرین لینڈ میں سکیورٹی اور دیگر تمام ضروریات کے حوالے سے امریکہ کو مستقل کنٹرول دیتا ہے اور ہماری تمام اہم امریکی تشویشوں کا مکمل حل کرتا ہے۔ اس پر امریکہ کو کوئی خرچ نہیں آئے گا۔‘‘

انہوں نے کہا کہ معاہدے کے تحت امریکہ کے حریف ممالک کو بھی واشنگٹن کی منظوری کے بغیر گرین لینڈ میں فوجی اڈہ قائم کرنے، فوجی موجودگی برقرار رکھنے یا حساس سرمایہ کاری کرنے سے روکا جائے گا۔
مسٹر ٹرمپ نے کہا، ’’اب سے کوئی بھی امریکی حریف گرین لینڈ میں کبھی اڈہ قائم نہیں کر سکتا، فوجی موجودگی نہیں رکھ سکتا یا ہماری واضح تحریری منظوری کے بغیر حساس سرمایہ کاری نہیں کر سکتا۔‘‘

انہوں نے کہا کہ امریکہ ’’فوری طور پر‘‘ گرین لینڈ میں اپنی فوجی موجودگی بڑھانے کی سمت میں کام شروع کرے گا اور نیم خودمختار ڈنمارک کے علاقے کے عوام کے ساتھ مل کر وہاں ترقیاتی اور تعمیراتی کام کرے گا۔

مسٹر ٹرمپ نے کہا، ’’ہم ڈنمارک اور گرین لینڈ کے شاندار عوام کے ساتھ اس بڑے اور انتہائی تزویراتی خطے کے حوالے سے شاندار مستقبل کی جانب کام کرنے کے منتظر ہیں۔‘‘ انہوں نے کہا، ’’ہم اس کی مکمل حفاظت کریں گے۔‘‘

ڈنمارک کے وزیر اعظم کے دفتر کے مطابق امریکہ، ڈنمارک اور گرین لینڈ کی حکومتیں آئندہ ہفتے نیویارک میں اقوام متحدہ کی جنرل اسمبلی کے اجلاس کے دوران آرکٹک اور شمالی بحر اوقیانوس میں سکیورٹی مضبوط کرنے سے متعلق معاہدے پر باضابطہ طور پر دستخط کر سکتی ہیں۔

معاہدے کے نافذ ہونے سے قبل متعلقہ پارلیمانی کارروائیاں مکمل کرنا ہوں گی۔ معاہدے کا مکمل متن ابھی جاری نہیں کیا گیا ہے۔ ڈنمارک کی وزیر اعظم میٹے فریڈرکسن نے معاہدے کا خیرمقدم کرتے ہوئے کہا کہ اس سے آرکٹک اور شمالی بحر اوقیانوس میں سکیورٹی مضبوط ہوگی، جبکہ ڈنمارک کی خودمختاری اور گرین لینڈ کے حق خود ارادیت کو برقرار رکھا جائے گا۔

محترمہ فریڈرکسن نے کہا، ’’مجھے خوشی ہے کہ ہم گرین لینڈ، مملکت ڈنمارک اور امریکہ کے لیے ایک اہم معاہدہ کرنے جا رہے ہیں۔‘‘

انہوں نے کہا کہ معاہدے سے خطے میں مشترکہ سکیورٹی مضبوط ہوگی اور یہ ’’نیٹو اور یورپ کے لیے بھی اچھا‘‘ ہوگا۔

انہوں نے خاص طور پر کہا کہ معاہدہ ’’مملکت ڈنمارک کی خودمختاری اور علاقائی سالمیت اور گرین لینڈ کے عوام کی حق خود ارادیت کو تسلیم کرتا ہے۔‘‘

گرین لینڈ کے وزیر اعظم جینس فریڈرک نیلسن نے بھی مجوزہ معاہدے کا خیرمقدم کیا۔ انہوں نے کہا، ’’یہ حوصلہ افزا ہے کہ ہم ایسا معاہدہ کرنے جا رہے ہیں، جو گرین لینڈ، مملکت ڈنمارک، امریکہ اور مغربی اتحاد کی سکیورٹی کو یقینی اور مضبوط کرے گا۔‘‘

انہوں نے کہا کہ معاہدہ ’’گرین لینڈ کے مفادات اور بین الاقوامی تعاون میں ہماری جگہ‘‘ کو تسلیم کرتا ہے اور ’’ہم سب کے مفاد میں‘‘ ہے۔ معاہدے کے تحت امریکہ کو گرین لینڈ میں مستقل رسائی، فوجی اڈے قائم کرنے اور فضائی حدود کے استعمال کے حقوق حاصل ہوں گے، جبکہ غیر نیٹو ممالک کو جزیرے پر فوجی موجودگی قائم کرنے سے روکا جائے گا۔

معاہدے کے تحت کوئی بھی غیر نیٹو ملک گرین لینڈ میں فوجی اڈہ قائم نہیں کر سکے گا اور نہ ہی وہاں فوجی موجودگی رکھ سکے گا۔ امریکی حکام کے مطابق معاہدہ اس بات کو بھی یقینی بنائے گا کہ گرین لینڈ شمالی امریکہ کے تزویراتی دفاعی خطے کا حصہ بنا رہے۔

مسٹر ٹرمپ نے معاہدے کو گرین لینڈ کی سکیورٹی پر امریکہ کو ’’مستقل کنٹرول‘‘ دینے والا قرار دیا ہے، تاہم مجوزہ معاہدے کے تحت خطے کی خودمختاری امریکہ کو منتقل نہیں ہوگی۔ ڈنمارک اور گرین لینڈ نے واضح کیا ہے کہ معاہدہ مملکت ڈنمارک کی خودمختاری اور علاقائی سالمیت اور گرین لینڈ کے عوام کے حق خود ارادیت کو تسلیم کرتا ہے۔

یو این آئی۔ ع ا۔

واشنگٹن، امریکی صدر ڈونلڈ ٹرمپ نے یوکرین میں جاری جنگ کے سلسلے میں روس کو ہدف بنانے والے وسیع پابندیوں کے پیکیج پر دستخط کرکے اسے قانون کی شکل دے دی ہے۔ کانگریس کی جانب سے نادر دو طرفہ حمایت کے ساتھ بل وائٹ ہاؤس بھیجے جانے کے چند روز بعد جمعہ کو صدر نے اس پر دستخط کیے۔

یہ قانون، جسے لنڈسی او گراہم سینکشننگ رشیا اینڈ ایران ایکٹ 2026 کا نام دیا گیا ہے، آنجہانی ریپبلکن سینیٹر لنڈسی گراہم کے نام سے منسوب ہے، جنہوں نے جولائی میں اچانک انتقال سے قبل ایک سال سے زیادہ عرصے تک اس قانون پر مذاکرات کیے تھے۔ اس قانون کو ڈیموکریٹک سینیٹر رچرڈ بلومینتھل نے بھی مشترکہ طور پر تیار کیا تھا۔

قانون کے تحت روسی صدر ولادیمیر پوتن، اعلیٰ حکام اور ارب پتی کاروباری شخصیات کے علاوہ روسی بینکوں اور مالیاتی اداروں پر پابندیاں عائد کی گئی ہیں۔ اس میں روس کے توانائی اور دفاعی شعبوں کے ساتھ ساتھ نام نہاد ’شیڈو فلیٹ‘ میں شامل ان ٹینکروں کو بھی ہدف بنایا گیا ہے جو مغربی پابندیوں سے بچتے ہوئے روسی تیل کی نقل و حمل کے لیے استعمال ہوتے ہیں۔

قانون کی ایک اہم شق کے تحت ٹرمپ کو روسی تیل اور گیس کے پانچ بڑے خریدار ممالک کی درآمدات پر 100 فیصد تک محصولات عائد کرنے کا اختیار دیا گیا ہے۔ توقع ہے کہ اس اقدام کا سب سے زیادہ اثر روسی خام تیل کے دو بڑے درآمد کنندگان چین اور بھارت پر پڑ سکتا ہے۔

قانون میں ایران کے توانائی اور ہتھیاروں کے شعبوں پر عائد پابندیوں میں بھی توسیع کی گئی ہے۔

یہ بل گزشتہ ماہ سینیٹ اور بدھ کو ایوان نمائندگان سے منظور ہوا تھا، جہاں 58 ڈیموکریٹک ارکان نے پارٹی پالیسی سے ہٹ کر اس کے حق میں ووٹ دیا۔

یہ دو سال سے زائد عرصے میں یوکرین سے متعلق کانگریس سے منظور ہونے والا پہلا بڑا قانون ہے۔

حمایت کرنے والوں کا کہنا ہے کہ اس کا مقصد روسی حکومت کو جنگی اخراجات پورے کرنے کے لیے درکار مالی وسائل سے محروم کرنا اور صدر ولادیمیر پوتن کو مذاکرات کی طرف لانا ہے۔ یوکرین کے صدر ولادیمیر زیلنسکی، جنہوں نے ووٹنگ سے قبل ارکانِ کانگریس سے قانون کی حمایت کے لیے رابطہ کیا تھا، نے اسے ’’انتہائی طاقتور ہتھیار‘‘ قرار دیا۔

ایوان نمائندگان کے اسپیکر مائیک جانسن نے کہا کہ اس قانون کے ذریعے ان کے بقول ’’روسی جنگی مشین‘‘ پر ’’زیادہ سے زیادہ دباؤ‘‘ ڈالا گیا ہے، جبکہ سینیٹر رچرڈ بلومینتھل نے امید ظاہر کی کہ اس سے ماسکو کو مذاکرات کی میز پر لانے میں مدد ملے گی۔ انہوں نے پوتن سے مخاطب ہوکر کہا، ’’ہم آپ کو جانتے ہیں۔‘‘

تاہم تمام ڈیموکریٹس نے قانون کی حمایت نہیں کی۔ ایوان نمائندگان میں ڈیموکریٹک اقلیتی رہنما حکیم جیفریز نے اس کی مخالفت کرتے ہوئے خبردار کیا کہ محصولات عائد کرنے کے اختیارات سے امریکی خاندانوں کے اخراجات بڑھ سکتے ہیں۔ انہوں نے پابندیوں کی شقوں میں ’’بہت سے رخنے‘‘ ہونے کا بھی دعویٰ کیا۔

روس کے ’شیڈو فلیٹ‘ میں شامل ایک تیل بردار جہاز کو 15 جون 2026 کو انگلش چینل میں برطانوی فورسز کی جانب سے روکے جانے کی تصویر بھی جاری کی گئی ہے۔

نئی محصولات کی دھمکی سے سب سے زیادہ متاثر ہونے والے ممالک میں شامل ہندوستان نے اس ہفتے کہا کہ وہ اپنے 1.4 ارب عوام کی توانائی سلامتی یقینی بنانے کے لیے پُرعزم ہے۔

ٹرمپ کا یہ فیصلہ ایسے وقت میں سامنے آیا ہے جب تقریباً ایک ہفتے بعد وہ چینی صدر شی جن پنگ کی وائٹ ہاؤس میں میزبانی کرنے والے ہیں۔

یو این آئی۔ ع ا۔

ماسکو، روسی وزارت خارجہ نے کہا کہ اس نے ماسکو میں برطانیہ کی قائم مقام سفیر ڈینی ڈھولکیا کو طلب کیا۔

وزارت نے ایک بیان میں کہاکہ “18 ستمبر کو روس میں ماسکو میں برطانیہ کی قائم مقام سفیر ڈینی ڈھولکیا کو روسی وزارت خارجہ میں طلب کیا گیا۔”

وزارت نے کہا کہ اس نے لندن کی جانب سے کیف کو بلا پائلٹ فضائی طیاروں اور دیگر ہتھیاروں کی سپلائی بڑھانے کے معاملے میں وہاں کے سفارتی نمائندے کے سامنے احتجاج درج کرایا ہے۔ وزارت نے یہ بھی کہا کہ کیف کو طویل فاصلے تک مار کرنے والے ہتھیاروں کی سپلائی کرکے لندن خود کو کیف کے مظالم میں شریک بنا رہا ہے۔

بیان میں کہا گیا کہ “برطانیہ کو ان بین الاقوامی ذمہ داریوں کی فہرست سونپی گئی ہے جن کی وہ کیف کی حمایت کرکے خلاف ورزی کر رہا ہے۔”

وزارت نے کہا کہ لندن کی پالیسی کو دیکھتے ہوئے ماسکو اپنے دفاع کے حق کے تحت جوابی کارروائی کرنے کا حق محفوظ رکھتا ہے۔ ساتھ ہی وزارت نے یہ بھی کہا کہ حالات بگڑنے پر اس کی پوری ذمہ داری لندن کی ہوگی۔

بیان میں کہا گیا کہ برطانیہ کو کشیدگی بڑھانے والے اپنے رویے کو ترک کرنا ہوگا اور اپنی سرگرمیوں کو متعلقہ بین الاقوامی ذمہ داریوں کے مطابق کرنا ہوگا۔

وزارت نے یہ بھی تصدیق کی کہ یوکرین میں موجود برطانیہ کی جن فوجی تنصیبات کا استعمال روسی علاقے پر حملے کرنے کے لیے کیا جاتا ہے، وہ روسی مسلح افواج کے لیے جائز ہدف ہیں۔ وزارت نے کہا کہ یوکرین میں برطانیہ کی سرگرمیوں کا مقصد واضح طور پر مسلح تنازع کو طول دینا اور اسے بڑھانا ہے۔

یو این آئی۔ این یو۔