سری نگر، جموں و کشمیر قانون ساز اسمبلی کا سات روزہ خزاں اجلاس پیر کو شروع ہونے کے ساتھ ہی اپنی پارٹی نے سری نگر میں جموں و کشمیر اسمبلی کے باہر احتجاج کیا اور ریزرویشن پالیسی میں شفافیت اور اس پر فوری کارروائی کا مطالبہ کیا۔

اپنی پارٹی کے رہنما اشرف میر کی قیادت میں مظاہرین نے حکومت پر الزام عائد کیا کہ وہ ریزرویشن کے نظام کا جائزہ لینے کے لیے تشکیل دی گئی کابینہ کی ذیلی کمیٹی کی رپورٹ کو عوام کے سامنے لانے میں ناکام رہی ہے۔ میر نے مطالبہ کیا کہ حکومت رپورٹ کو منظر عام پر لائے اور اسمبلی اور عوام کے سامنے پالیسی کی موجودہ صورت حال واضح کرے۔

میر نے احتجاج کے دوران کہاکہ ’’نوجوانوں کے ساتھ انصاف کیا جائے۔‘‘ انہوں نے ریزرویشن کے معاملے پر حکومت کی جانب سے بار بار دی جانے والی یقین دہانیوں پر سوال اٹھاتے ہوئے کہا کہ حکومت نے پہلے یقین دلایا تھا کہ چھ ماہ کے اندر ریزرویشن پالیسی کو عوام کے سامنے پیش کیا جائے گا۔

میر نے ریزرویشن کے مسئلے کو تعلیم یافتہ نوجوانوں میں بڑھتی ہوئی بے روزگاری کی تشویش سے جوڑا، خاص طور پر سری نگر میں۔ انہوں نے الزام لگایا کہ ڈگریاں رکھنے والے نوجوان روزگار کے محدود مواقع کا سامنا کر رہے ہیں، جبکہ منشیات کے استعمال اور روزگار کے مواقع کی کمی جیسے مسائل عوامی بے چینی میں اضافہ کر رہے ہیں۔

اپنی پارٹی کے رہنما نے اسمبلی کی کارکردگی پر بھی تنقید کرتے ہوئے کہا کہ گزشتہ پانچ اجلاس عوام کو درپیش مسائل پر مؤثر کارروائی کرنے میں ناکام رہے ہیں۔ انہوں نے الزام لگایا کہ ارکان اسمبلی نے عوام کے اہم مسائل حل کرنے کے بجائے سیاسی محاذ آرائی میں کافی وقت صرف کیا۔

میر نے کہاکہ ’’لوگوں کو اسمبلی سے امیدیں وابستہ تھیں، لیکن کچھ بھی نہیں ہوا۔‘‘ انہوں نے کہا کہ ایوان کو عوامی شکایات کے ازالے کے لیے ایک مؤثر پلیٹ فارم کے طور پر کام کرنا چاہیے۔

یہ احتجاج خزاں اجلاس سے پہلے اور اس کے دوران ریزرویشن کے نظام پر بڑھتی ہوئی سیاسی توجہ کے درمیان ہوا ہے۔ پی ڈی پی کے رہنما وحید پارہ نے بھی موجودہ ریزرویشن نظام پر فوری بحث کا مطالبہ کرتے ہوئے التوا کی تحریک پیش کی ہے۔ وحیدہ پارہ نے ریزرویشن پالیسی کو ناانصافی پر مبنی قرار دیتے ہوئے الزام لگایا کہ جان بوجھ کر تاخیر کی حکمت عملی اختیار کی جا رہی ہے، جس نے جموں و کشمیر کے نوجوانوں کو مشکل صورت حال سے دوچار کردیا ہے۔ انہوں نے کہا کہ اوپن میرٹ کے طلبہ کے مستقبل کو مزید قربان نہیں کیا جاسکتا۔

جموں و کشمیر اسمبلی کا خزاں اجلاس پیر کو شروع ہوا اور 21 سے 30 ستمبر کے درمیان اس کے سات اجلاس ہوں گے۔

یواین آئی۔ ظ ا۔

سری نگر، جموں و کشمیر نیشنل کانفرنس (این سی) نے اتوار کے روز اپنے ارکان اسمبلی اور حکومت کی حمایت کرنے والے آزاد ارکان کا اجلاس طلب کیا ہے۔ یہ اجلاس جموں و کشمیر قانون ساز اسمبلی کے خزاں اجلاس کے آغاز سے ایک روز قبل ہوگا۔

این سی کے چیف وہپ مبارک گل کی جانب سے ہفتے کے روز جاری ایک سرکاری خط کے مطابق، اجلاس پارٹی صدر فاروق عبداللہ کی صدارت میں وزیر اعلیٰ اور این سی قانون ساز پارٹی کے رہنما عمر عبداللہ کی موجودگی میں ہوگا۔

اجلاس 20 ستمبر کو شام 4:30 بجے سری نگر کے بینکوئٹ ہال میں منعقد ہوگا۔

خط میں کہا گیا ہے کہ اجلاس میں ’’جموں و کشمیر قانون ساز اسمبلی کے نیشنل کانفرنس سے تعلق رکھنے والے معزز ارکان اور حکومت کی حمایت کرنے والے آزاد ارکان‘‘ شرکت کریں گے۔

خط میں تمام معزز ارکان سے مقررہ تاریخ، وقت اور مقام پر اجلاس میں شرکت کو یقینی بنانے کی درخواست کی گئی ہے۔

یہ اجلاس جموں و کشمیر اسمبلی کے خزاں اجلاس سے قبل طلب کیا گیا ہے، جو 21 سے 30 ستمبر تک سری نگر میں منعقد ہوگا۔ اجلاس کے کیلنڈر کے مطابق سات دن اسمبلی کی کارروائی ہوگی۔

توقع ہے کہ اس اجلاس میں حکمران نیشنل کانفرنس کے ارکان اسمبلی اور حکومت کی حمایت کرنے والے آزاد ارکان شرکت کریں گے۔ اسمبلی کے خزاں اجلاس کے دوران قانون سازی اور حکومت سے متعلق دیگر امور پر کارروائی کی جائے گی۔

بی جے پی نے بھی آئندہ خزاں اجلاس کے لیے حکمت عملی تیار کرنے کے مقصد سے اتوار کو قانون ساز پارٹی کا اجلاس طلب کیا ہے۔

یواین آئی۔ ظ ا

جموں، جموں و کشمیر کے لیفٹیننٹ گورنر منوج سنہا نے ہفتہ کو کہا کہ ماتا لَلّیشوری کی تعلیمات سماجی تفریق سے بالاتر تھیں اور رواداری، مساوات اور باطنی تبدیلی کے نظریات کی عکاسی کرتی تھیں۔

انہوں نے کہا کہ ان کے اشعار، جو اپنشدوں کی اعلیٰ ترین تعلیمات سے ہم آہنگ ہیں، نسل در نسل لوگوں کو متاثر کرتے رہے ہیں۔ لیفٹیننٹ گورنر نے تھلوال میں ماتا بھدرکالی استھاپن کے مقام پر ماتا لَلّیشوری ثقافتی و ورثہ مرکز کی سنگ بنیاد رکھنے کے بعد خطاب کرتے ہوئے کہا کہ کیپیکس بجٹ کے تحت منظور کیا گیا یہ منصوبہ 4.5 کروڑ روپے کی لاگت سے یوگنی لَلّیشوری کی لازوال وراثت کے تحفظ اور فروغ کے لیے ایک اہم اقدام کے طور پر تصور کیا گیا ہے۔

اس موقع پر خطاب کرتے ہوئے لیفٹیننٹ گورنر نے کہا کہ جموں و کشمیر قدیم زمانے سے ہی رشیوں، سنتوں اور سچائی کے متلاشیوں کی سرزمین رہا ہے۔

ماتا لَلّیشوری کے نام سے منسوب یہ مرکز ہندوستان کے تہذیبی شعور کی عکاسی کرے گا اور ثقافتی ہم آہنگی، روحانی سیاحت اور علمی تحقیق کے لیے ایک رہنما مرکز کے طور پر کام کرے گا۔

انہوں نے کہاکہ ’’یہ منصوبہ ہمیں اپنے لازوال تہذیبی شعور کی یاد دلاتا ہے۔ آج ہم اپنی تاریخ کے ایک اہم موڑ پر کھڑے ہیں، جہاں ہمارے آباؤ اجداد کی دعائیں اور ان کی لازوال دانش ایک پراعتماد، ترقی یافتہ اور خود کفیل جموں و کشمیر کی خواہشات سے ہم آہنگ ہو رہی ہیں۔‘‘

لیفٹیننٹ گورنر نے کہاکہ ’’یہ مرکز ان کے فلسفے کے ایک زندہ ذخیرے کے طور پر کام کرے گا، جس سے اسکالرز، فن کاروں اور سچائی کے متلاشیوں کو ان کی دانش سے استفادہ کرنے اور جدید ذرائع کے ذریعے اسے عالمی سطح پر عام کرنے کا موقع ملے گا۔‘‘

انہوں نے مزید کہا کہ یہ مرکز محض ایک عمارت نہیں ہوگا بلکہ ثقافتی ورثے کے تحفظ کے لیے ایک ادارہ جاتی بنیاد فراہم کرے گا۔ یہاں نمائشوں، ترجمے کے منصوبوں اور محفوظ دستاویزات کے مراکز کے علاوہ کشمیری شیو ازم میں فیلوشپ کو بھی فروغ دیا جائے گا۔

یواین آئی۔ ظ ا