نئی دہلی، وزیرِ خارجہ ایس جے شنکر نے کہا ہے کہ بڑھتے ہوئے مقابلے، جیو پولیٹیکل کشیدگی اور تنازعات کے درمیان عالمی نظام دباؤ میں ہے اور ایسے میں بین الاقوامی تعاون کے جذبے کو مضبوط کرنا ضروری ہے۔

مسٹر جے شنکر نے پیر کی رات نیویارک میں اقوامِ متحدہ کی جنرل اسمبلی کے ‘ہائی لیول ویک’ اجلاس کے موقع پر ‘پارٹنرز فار ملٹی لیٹرلزم، انٹرنیشنل لاء، پیس اینڈ پراسپرٹی’ سربراہ اجلاس میں کہا کہ امن و بین الاقوامی سلامتی، ماحولیاتی اقدامات، ابھرتی ہوئی ٹیکنالوجی، ترقیاتی مالیات، دہشت گردی کا مقابلہ، سپلائی چین، آفات سے نمٹنے اور وبائی امراض کی تیاری جیسے مسائل کا حل اجتماعی کوششوں سے ہی ممکن ہے۔ انہوں نے ایندھن، خوراک، کھاد اور مالیات سے جڑے بحرانوں پر بھی توجہ دینے کی ضرورت بتائی اور کہا کہ موجودہ صورتحال میں ان بحرانوں کا حل انتہائی ضروری ہے۔

وزیرِ خارجہ نے کہا کہ نئی ٹیکنالوجیز اور صلاحیتوں کے لیے مناسب قوانین اور سکیورٹی کے انتظامات ضروری ہیں۔ سپلائی میں رکاوٹ اور کسی ایک جگہ پر حد سے زیادہ انحصار کے خطرے سے نمٹنے کے لیے خطرات کو کم کرنے اور ذرائع میں تنوع لانے کو فروغ دیا جانا چاہیے۔ انہوں نے کہا کہ کثیر الجہتی کو آگے بڑھانے کے لیے اس میں اصلاحات ضروری ہیں، جس میں زیادہ سے زیادہ شمولیت اور شفاف فیصلہ سازی کا عمل شامل ہو۔

یواین آئی۔الف الف

نئی دہلی، کانگریس نے شری رام مندر میں چڑھاوا چوری کے معاملے میں تین ماہ بعد بھی چارج شیٹ داخل نہ ہونے کو سرغناؤں کو بچانے کی کوشش قرار دیتے ہوئے الزام لگایا ہے کہ بی جے پی کی ڈبل انجن حکومتیں ایس آئی ٹی کے نام پر بڑے چوروں کو بچانے کی کارروائی کر رہی ہیں۔

کانگریس کے کمیونیکیشن ڈپارٹمنٹ کے انچارج جے رام رمیش نے منگل کو سوشل میڈیا ’ایکس‘ پر کہا کہ چڑھاوا چوری کے معاملے میں تحقیقات شروع ہوئے تین ماہ پورے ہونے میں صرف تین دن باقی ہیں لیکن ابھی تک ملزمان کے خلاف چارج شیٹ داخل نہیں کی گئی ہے۔ اگر 25 ستمبر تک چارج شیٹ داخل نہ ہوئی تو چڑھاوا چوری کے معاملے کے چھوٹے کرداروں کی ضمانت کا راستہ صاف ہو جائے گا۔

مسٹر رمیش نے کہا کہ ملک کے عوام کو ایسی ایس آئی ٹی اور ایسی کسی سرکاری چارج شیٹ پر بھروسہ نہیں ہے جس میں بڑی مچھلیوں کو بچانے کے خدشات برقرار ہیں۔ انہوں نے کہا کہ جو لوگ کہتے تھے کہ کچھ بھی رپورٹ کرنے کے قابل نہیں ہے، ان کی اپنی تحقیقات اب تسلیم کر رہی ہے کہ چڑھاوا چوری 70 نہیں بلکہ سی سی ٹی وی میں 105 بار سامنے آ چکی ہے جسے وہ چاہ کر بھی مسترد نہیں کر پا رہے ہیں۔

انہوں نے کہا کہ چارج شیٹ داخل کرنے میں تاخیر کیوں ہو رہی ہے، یہ سمجھنا مشکل نہیں ہے اور معاملہ بڑے چوروں اور ان کے سرپرستوں سے توجہ ہٹانے کا ہے۔ انہوں نے سوال کیا کہ ایودھیا کے بھگوان شری رام مندر میں منظم طریقے سے کی گئی چڑھاوا چوری کے سرغناؤں کو کون اور کیوں بچا رہا ہے؟ اس سنگین معاملے میں وزیر اعظم نریندر مودی کی خاموشی اور چڑھاوا چوری کے ملزمان کی مدد پر بھی مسلسل سوالات اٹھ رہے ہیں۔

مسٹر رمیش نے کہا کہ عوام کے سیدھے سوالات ہیں کہ بڑی بڑی مچھلیوں پر اب تک کارروائی کیوں نہیں ہوئی اور ان سے سخت پوچھ گچھ کب ہوگی؟ اصل گنہگاروں کو بچانے کے لیے سپریم کورٹ کی نگرانی میں تحقیقات سے کون اور کیوں بچنا چاہتا ہے اور ٹرسٹ کو اب تک تحلیل کیوں نہیں کیا گیا؟ انہوں نے کہا کہ ایس آئی ٹی کے نام پر بی جے پی کی ڈبل انجن حکومتیں بی جے پی اور آر ایس ایس سے وابستہ چڑھاوا چوری کے ملزمان کو بچانے کی کارروائی کر رہی ہیں۔

انہوں نے کہا کہ سوال اب صرف ملزمان کا نہیں بلکہ ان لوگوں کی جوابدہی کا بھی ہے جن کی نگرانی میں یہ سب کچھ ہوا۔ وزیر اعظم کو عقیدت سے جڑے اس سنگین معاملے پر خاموشی کے لئے جواب دینا ہوگا۔

کانگریس نے مطالبہ کیا ہے کہ پورے نظام کا فارنسک آڈٹ کرایا جائے، ذمہ دار لوگوں کے خلاف سخت کارروائی کی جائے اور تحقیقات مکمل شفافیت کے ساتھ کی جائیں۔ مسٹر رمیش نے کہا کہ چڑھاوا بھگوان شری رام کے نام پر آیا تھا اور جو لوگ اس کے انتظام و انصرام اور منتظمین کے انتخاب کا کریڈٹ لیتے رہے ہیں، انہیں چڑھاوا چوری کی ذمہ داری بھی لینی ہوگی۔

یواین آئی۔الف الف

نئی دہلی، سینئر ایڈوکیٹ کپل سبل نے پیر کو سپریم کورٹ سے آل انڈیا ترنمول کانگریس (اے آئی ٹی ایم سی) کے نام اور اس کے مخصوص ‘پھول اور گھاس’ کے نشان کو منجمد کرنے کے الیکشن کمیشن آف انڈیا (ای سی آئی) کے فیصلے کو چیلنج کرنے والی ممتا بنرجی کی عرضی پر فوری سماعت کی اپیل کی۔ سبل نے انتخابی نوٹیفکیشن کے درمیان پارٹی کے نام اور نشان کو منجمد کرنے کے الیکشن کمیشن کے فیصلے پر سوال اٹھاتے ہوئے اس معاملے کو جلد فہرست بند کرنے کی مانگ کی۔

چیف جسٹس سوریہ کانت نے کہا کہ دونوں فریقوں کے پاس اپنے دلائل ہوں گے اور یقین دہانی کرائی کہ اس معاملے کو اسی ہفتے سماعت کے لیے فہرست بند کرنے کی کوشش کی جائے گی۔ محترمہ ممتا بنرجی کی عرضی میں الیکشن کمیشن کے 18 ستمبر (17 ستمبر کو جاری کردہ عبوری حکم) کے اس فیصلے کو چیلنج کیا گیا ہے جس کے تحت الیکشن سمبلز آرڈر، 1968 کے تحت حتمی فیصلہ آنے تک دونوں دھڑوں کے ‘آل انڈیا ترنمول کانگریس’ کے نام اور ‘پھول اور گھاس’ کا نشان استعمال کرنے پر روک لگا دی گئی ہے۔ الیکشن کمیشن نے آنے والے 6 اکتوبر کے اسمبلی ضمنی انتخابات کے لیے دونوں دھڑوں کو متبادل نام اور نشان الاٹ کیے ہیں۔ محترمہ ممتا بنرجی کی قیادت والے دھڑے کو ‘ممتا آل انڈیا ترنمول کانگریس’ نام اور ‘فٹ بال کھلاڑی’ کا نشان الاٹ کیا گیا ہے، جبکہ رتبرت بنرجی کی قیادت والے حریف دھڑے کو ‘ڈیموکریٹک ترنمول کانگریس’ اور ‘لفافہ’ کا نشان ملا ہے۔

یواین آئی ایف اے