نئی دہلی، کانگریس کے سابق صدر اور لوک سبھا میں اپوزیشن لیڈر راہل گاندھی نے بہار کے جموئی میں دسویں کلاس کی طالبہ کے ساتھ ہوئی بدسلوکی کے واقعے پر بہار حکومت سے لڑکیوں کے تحفظ پر جواب مانگا ہے۔

مسٹر گاندھی نے پیر کو سوشل میڈیا ایکس پر لکھا کہ جموئی میں اس لڑکی کے ساتھ ہوئی بدسلوکی کی ویڈیو انتہائی تکلیف دہ ہے، جس میں دسویں کلاس کے طالب علم اور طالبہ کو سڑک پر روک کر ہراساں اور ذلیل کیا گیا نیز طالبہ کے ساتھ بدتمیزی کی گئی۔ انہوں نے کہا کہ طالبہ ہاتھ جوڑ کر چھوڑنے کی التجا کرتی رہی لیکن اس کے ساتھ غلط سلوک کرتے ہوئے اسے گھسیٹ کر لے جانے کی کوشش کی گئی۔

انہوں نے کہا کہ ویڈیو میں نظر آنے والے ہر شخص کی شناخت کر کے پاکسو کے تحت کارروائی کی جانی چاہیے اور جلد انصاف ملنا چاہیے۔ مسٹر گاندھی نے سوال کیا کہ اگر واقعہ 19 ستمبر کا ہے تو ملزمان اب تک گرفتار کیوں نہیں کیے گئے اور بہار میں شام کے وقت بھی لڑکیاں محفوظ کیوں نہیں ہیں؟

یواین آئی ایف اے

نئی دہلی، کانگریس صدر ملکارجن کھرگے نے ووٹر لسٹ کی خصوصی تفصیلی نظرثانی (ایس آئی آر) کے تعلق سے حکومت اور انتخابی کمیشن سے پوچھا ہے کہ ووٹرز کو فہرست سے باہر کرنے کے بعد اب ’خصوصی‘ اور عام ووٹرز کو الگ الگ زمروں میں کیوں بانٹا جا رہا ہے۔

مسٹر کھرگے نے پیر کو سوشل میڈیا ایکس پر کہا کہ بہار سے شروع ہوا ایس آئی آر اب دہلی پہنچ چکا ہے اور کانگریس اسے پہلے دن سے ہی خامیوں سے بھرپور عمل بتا رہی تھی۔ انہوں نے کہا کہ بی جے پی کے سینئر رہنما لال کرشن اڈوانی، وزیر خارجہ، دہلی کے لیفٹیننٹ گورنر، راجیہ سبھا ایم پی، سابق مرکزی وزیر اور سابق وزیراعلیٰ سمیت کئی لوگوں کو نوٹس دیے گئے ہیں۔ انہوں نے کہا کہ کانگریس شروع سے ہی اسے خامیوں سے بھرپور نظام بتا رہی ہے اور اب اس کی خرابیاں کھل کر سامنے آ گئی ہیں۔

مسٹر کھرگے نے کہا کہ مغربی بنگال میں ایس آئی آر کے دوران جن لوگوں کے نام ووٹر لسٹ سے ہٹائے گئے، اب تک جن معاملات میں فیصلہ ہوا ہے ان میں 93 فیصد لوگوں نے اپیل میں کامیابی حاصل کی ہے اور 1,13,943 لوگوں کو پھر سے ووٹر لسٹ میں شامل کیا جائے گا۔ انہوں نے سوال کیا کہ آخر کس بنیاد پر ان لوگوں کا حقِ رائے دہی چھینا گیا۔

کانگریس صدر نے الیکشن کمیشن کی جانب سے ’وی آئی پی نشان زد ووٹرز‘ کے تعلق سے کہا کہ کیا ملک میں ہمہ گیر بالغ حقِ رائے دہی میں اب خصوصی اور عام ووٹرز کا الگ الگ زمرہ ہے؟ انہوں نے یہ بھی پوچھا کہ کیا یہ آئین کے ’ایک شخص، ایک ووٹ، ایک قدر‘ کے اصول کی خلاف ورزی نہیں ہے اور کیا وی آئی پی کا ووٹ اب زیادہ قیمتی ہو گیا ہے؟

مسٹر کھرگے نے کہا کہ ایس آئی آر کے پہلے تین مرحلوں میں 31 ریاستوں اور مرکز کے زیرِ انتظام علاقوں میں 13.8 کروڑ ووٹرز فہرست سے باہر ہوئے، جو 94.78 کروڑ ووٹرز کا تقریباً 14.61 فیصد ہے۔ ان کروڑوں عام ووٹرز کے معاملے میں کون اور کس کے اشارے پر ہاتھ پر ہاتھ دھرے بیٹھا ہے؟

انہوں نے کہا کہ الیکشن کمیشن اب وی آئی پی کے لیے پریس ریلیز اور کروڑوں عام ووٹرز کے معاملے میں خاموش ہے۔

یواین آئی ایف اے

نئی دہلی، مرکز نے ڈیجیٹل کمیونیکیشنز کمیشن (ڈی سی سی) کو تحلیل کر دیا ہے، جو ہندوستان کے ٹیلی کمیونیکیشن سیکٹر کے مختلف پہلوؤں سے نمٹنے کے لیے تین دہائی سے بھی پہلے قائم کیے گئے ٹیلی کام کمیشن سے ترقی پا کر اعلیٰ ترین ادارہ بنا تھا۔

وزارتِ مواصلات کے محکمہ ٹیلی کمیونیکیشن نے 19 ستمبر 2026 کے ایک قرار داد کے ذریعے اس فیصلے کی اطلاع دی، جو آج گزٹ آف انڈیا، ایکسٹرا آرڈنری میں شائع ہوئی۔ قرار داد میں کہا گیا کہ ڈی سی سی اپنی اشاعت کی تاریخ سے تحلیل شدہ سمجھا جائے گا۔

یہ ادارہ اصل میں 11 اپریل 1989 کو ایک سرکاری قرار داد کے ذریعے ٹیلی کمیونیکیشن کے شعبے کے مختلف پہلوؤں کو حل کرنے کے لیے ٹیلی کام کمیشن کے طور پر قائم کیا گیا تھا۔

تقریباً تین دہائیوں بعد، نوٹیفکیشن کے مطابق، 22 اکتوبر 2018 کو ٹیلی کام کمیشن کو ڈیجیٹل کمیونیکیشنز کمیشن کا نیا نام دیا گیا تھا۔

اس میں کہا گیا ہے، ”حکومتِ ہند نے فیصلہ کیا ہے کہ ڈیجیٹل کمیونیکیشنز کمیشن کو تحلیل کر دیا جائے۔“
یہ نوٹیفکیشن محکمہ ٹیلی کمیونیکیشن کے جوائنٹ سکریٹری دیویندر کمار رائے نے جاری کیا ہے۔

یواین آئی ایف اے