واشنگٹن، امریکی صدر ڈونالڈ ٹرمپ کی انتظامیہ نے مشرق وسطیٰ کے ان ممالک میں جنگ کے دوران تباہ ہونے والے توانائی کے بنیادی ڈھانچے کی تعمیر نو میں مدد کے لیے ایک نئے فنڈ میں 5 ارب ڈالر کی سرمایہ کاری کی تجویز پیش کی ہے۔ ’دی وال اسٹریٹ جرنل‘ (ڈبلیو ایس جے) نے ذرائع کے حوالے سے یہ اطلاع دی ہے۔

ڈبلیو ایس جے کے مطابق، امریکہ سعودی عرب، متحدہ عرب امارات، قطر، بحرین، کویت، عمان، عراق اور اردن سے بھی اس فنڈ میں سرمایہ کاری حاصل کرنے کی کوشش کرے گا۔ توقع ہے کہ یہ فنڈ مجموعی طور پر 10 ارب ڈالر کی سرمایہ کاری حاصل کرے گا۔

اخبار نے مزید بتایا کہ فنڈ کے حوالے سے بات چیت جاری ہے اور اس کی شرائط میں تبدیلی ممکن ہے۔

28 فروری کو امریکہ اور اسرائیل نے ایران میں مختلف اہداف پر حملے شروع کیے تھے، جس کے جواب میں ایران نے بھی جوابی حملے کیے۔ جون کے وسط میں تہران اور واشنگٹن نے جنگ بندی سے متعلق ایک مفاہمتی یادداشت پر دستخط کیے تھے، تاہم اس کے کچھ ہی عرصے بعد دوبارہ لڑائی شروع ہو گئی۔

تنازع اب بھی حل طلب ہے اور وقفے وقفے سے دوبارہ جھڑپیں جاری ہیں۔ تاہم واشنگٹن نے اسلامی جمہوریہ ایران پر اقتصادی دباؤ بڑھانے کا راستہ اختیار کیا ہے اور تہران پر اضافی مالی مشکلات عائد کرکے تنازع ختم کرنے کی کوشش کی جا رہی ہے۔

یو این آئی۔ ع ا۔

واشنگٹن، وائٹ ہاؤس نے ’ٹرمپ ٹی وی‘ شروع کرنے کا اعلان کیا ہے۔ یہ اعلان ایسے وقت میں سامنے آیا ہے جب امریکہ کے کئی بڑے میڈیا اداروں نے امریکی صدر ڈونالڈ ٹرمپ کی سرگرمیوں کی کوریج کے بائیکاٹ کا اعلان کیا ہے۔

وائٹ ہاؤس کے سرکاری یوٹیوب چینل پر ’’ٹرمپ ٹی وی: دی ایسینشلز اسٹیشن‘‘ کے نام سے ایک لائیو اسٹریم کا اعلان کیا گیا، جو 23:00 جی ایم ٹی پر شروع ہوا۔

ویڈیو کی تفصیل میں کہا گیا ہے، ’’ٹرمپ انتظامیہ کے اہم ترین لمحات سب ایک ہی جگہ دیکھیں۔ اہم ویڈیوز، بڑی تقریریں اور قابلِ ذکر جھلکیاں 24 گھنٹے، ہفتے کے ساتوں دن نشر کی جائیں گی اور انہیں حقیقی وقت میں اپ ڈیٹ کیا جائے گا۔ باخبر رہیں اور تازہ ترین معلومات سے آگاہ رہیں۔‘‘

گزشتہ ہفتے ٹرمپ نے کہا تھا کہ وہ ’سی این این‘، ’ایم ایس ناؤ‘ اور ’پولیٹیکو‘ کے رپورٹرز کو وائٹ ہاؤس سے پابندی عائد کر رہے ہیں اور ان تینوں اداروں کو ’’جعلی‘‘ قرار دیا تھا۔ ان تینوں میڈیا اداروں نے پیر کو کہا کہ وہ وائٹ ہاؤس کی کوریج کے لیے صحافیوں کی منظوری ختم کرنے کے اقدام پر امریکی انتظامیہ کے خلاف مقدمہ دائر کر رہے ہیں۔

ٹرمپ کے اعلان کے جواب میں کئی نشریاتی اداروں نے انتظامیہ پر امریکی آئین کی پہلی ترمیم کی خلاف ورزی کا الزام عائد کیا، جو آزادی اظہار اور آزادی صحافت کی ضمانت دیتی ہے، اور ٹرمپ کی سرگرمیوں کی کوریج کے بائیکاٹ کا اعلان کیا۔

’فاکس نیوز‘، ’اے بی سی‘، ’سی بی ایس‘، ’این بی سی‘، ’دی نیویارک ٹائمز‘ اور ’دی واشنگٹن پوسٹ‘ بائیکاٹ میں شامل ہو گئے ہیں۔

یو این آئی۔ ع ا۔

صنعاء، سعودی عرب کی رائل سعودی ایئر فورس نے یمن کے بحیرہ احمر پر واقع بندرگاہی شہر موخا میں ملٹری آپریشن کیا، جس میں چھ افراد ہلاک اور آٹھ دیگر زخمی ہو گئے۔

یمن کی صبا نیوز ایجنسی کی منگل کو شائع ہونے والی ایک رپورٹ کے مطابق، سعودی جنگی طیاروں نے پیر کی دیر رات موخا پر بمباری کی۔ ہلاک اور زخمی ہونے والوں میں تمام عام شہری بتائے جا رہے ہیں۔ زخمیوں میں دو بچے اور ایک خاتون بھی شامل ہیں۔ سعودی عرب نے 8 ستمبر کو یمن میں اپنی فضائی مہم کا آغاز کیا تھا۔

ایران کی حمایت یافتہ حوثی مسلح تنظیم کے رہنماؤں کا کہنا ہے کہ سعودی ایئر فورس نے حال ہی میں فضائی حملوں میں نمایاں اضافہ کیا ہے، جن میں حوثیوں کے زیر کنٹرول علاقوں کے ساتھ ساتھ مختلف فوجی اور لاجسٹک ٹھکانوں کو نشانہ بنایا گیا ہے۔

حوثی ہائی کمان کے حکام نے بتایا کہ 11 ستمبر سے 18 ستمبر کے درمیان سات دنوں میں سعودی ایئر فورس نے تقریباً 300 آپریشنز کیے۔ گزشتہ 16 ستمبر کو حوثی افواج نے سعودی عرب کے ایک ایف-15 جنگی طیارے کو مار گرایا اور بعد میں سوشل میڈیا پر اس کے ملبے کی ویڈیو پوسٹ کی۔ اس کے علاوہ، حوثی افواج نے حال ہی میں سعودی توانائی کے بنیادی ڈھانچے پر کئی حملے کیے ہیں، جس سے ریاض کو شدید نقصان پہنچا ہے۔ اگست کے آخری ہفتے میں سعودی عرب اور حوثی گروپ کے درمیان کشیدگی میں کافی اضافہ ہو گیا تھا۔

سعودی توانائی کے اثاثوں کو بھاری نقصان پہنچانے والے متعدد میزائل حملوں کے بعد، حوثی جنگجوؤں نے 11 ستمبر کی رات باب المندب آبنائے (اسٹریٹ) پر قبضہ کر لیا— جو بحیرہ احمر کو خلیج عدن سے جوڑتی ہے۔

یہ پیش رفت سعودی عرب کے لیے ایک بڑی شکست ہے، خاص طور پر اس لیے کہ امریکہ-ایران کشیدگی کے باعث آبنائے ہرمز کی بندش کی وجہ سے ریاض کو اپنی زیادہ تر پیٹرولیم کی برآمدات کے لیے باب المندب آبنائے پر انحصار کرنا پڑا ہے۔

یواین آئی۔الف الف