سری نگر، جموں و کشمیر کی وزیر تعلیم اسکول سکینہ ایتو نے منگل کو جموں و کشمیر قانون ساز اسمبلی میں ایک قرارداد پیش کی، جس میں تعلیم کا حق (آر ٹی ای) ایکٹ میں ترمیم کرکے 31 اکتوبر 2019 سے قبل مقرر کیے گئے اساتذہ کو ٹیچر اہلیتی ٹیسٹ (ٹی ای ٹی) میں شرکت سے مستثنیٰ قرار دینے کا مطالبہ کیا گیا ہے۔

ایوان میں پیش کی گئی قرارداد میں کہا گیا ہے کہ ’’یہ ایوان متفقہ طور پر مرکزی حکومت سے اپیل کرتا ہے کہ وہ بچوں کو مفت اور لازمی تعلیم کے حق (آر ٹی ای) ایکٹ 2009 کی دفعہ 23 میں ضروری قانونی ترمیم کرے، تاکہ 31 اکتوبر 2019 سے قبل مقرر کیے گئے تمام اساتذہ کو ٹیچر اہلیتی ٹیسٹ (ٹی ای ٹی) میں شرکت سے مستثنیٰ قرار دیا جاسکے۔‘‘

قرارداد میں مزید کہا گیا ہے کہ ’’یہ ایوان مرکزی حکومت سے یہ بھی اپیل کرتا ہے کہ وہ ٹیچر اہلیتی ٹیسٹ (ٹی ای ٹی) سے استثنیٰ کے لیے تمام ضروری قانونی اقدامات کرے اور نیشنل کونسل فار ٹیچر ایجوکیشن (این سی ٹی ای) کے ذریعے مطلوبہ نوٹیفکیشن جاری کرے۔‘‘

ارکان اسمبلی بلونت سنگھ منکوٹیا، رنبیر سنگھ پٹھانیا، وحید پرہ اور خورشید احمد شیخ نے بحث میں حصہ لیا اور قرارداد کے مختلف پہلوؤں پر اظہار خیال کیا۔

قرارداد پر بحث اسمبلی کے اگلے کام کے دن بھی جاری رہے گی۔

یواین آئی۔ط ا

سری نگر، سینئر جوڈیشل افسر یش پال برنی نے منگل کو جموں و کشمیر و لداخ ہائی کورٹ کے جج کی حیثیت سے حلف اٹھایا۔ حلف برداری کی پُروقار تقریب ہائی کورٹ کے سری نگر ونگ میں چیف جسٹس کی عدالت میں منعقد ہوئی۔

حکام کے مطابق جموں و کشمیر و لداخ ہائی کورٹ کے چیف جسٹس ڈاکٹر جسٹس پشپیندر سنگھ بھاٹی نے جسٹس یش پال برنی کو عہدے کا حلف دلایا۔

جموں و کشمیر و لداخ ہائی کورٹ کے رجسٹرار جنرل ایم کے شرما نے تقرری کا وارنٹ پڑھ کر سنایا اور تقریب کی کارروائی بھی انجام دی۔

تقریب میں جسٹس راج نیش اوسوال، جسٹس محمد اکرم چودھری، جسٹس وسیم صادق نرگل، جسٹس راجیش سیخری، جسٹس محمد یوسف وانی اور جسٹس سنجے پریہار موجود تھے۔ جسٹس سنجیو کمار، جسٹس سندھو شرما، جسٹس سنجے دھر، جسٹس راہل بھارتی، جسٹس موکشا کھجوریہ کاظمی اور جسٹس شہزاد عظیم نے ہائی کورٹ کے جموں ونگ سے آن لائن شرکت کی۔

جسٹس یش پال برنی کے اہل خانہ، قریبی رشتہ دار اور دوست بھی اس موقع پر موجود تھے، جس سے تقریب کی اہمیت مزید بڑھ گئی۔

حکومت ہند کی وزارت قانون و انصاف نے 19 ستمبر 2026 کو جسٹس یش پال برنی کو جموں و کشمیر و لداخ ہائی کورٹ کا جج مقرر کرنے کا نوٹیفکیشن جاری کیا تھا۔

جسٹس یش پال برنی 25 اگست 1967 کو پیدا ہوئے اور ان کا تعلق ضلع کٹھوعہ کے بلاور علاقے کے گاؤں ددوارہ سے ہے۔

اپنے ممتاز عدالتی کیریئر کے دوران انہوں نے کئی اہم عدالتی اور انتظامی عہدوں پر خدمات انجام دیں۔ وہ لیہ، بارہمولہ، ادھم پور اور جموں میں پرنسپل ڈسٹرکٹ اینڈ سیشنز جج کے عہدے پر فائز رہے۔ اس کے علاوہ انہوں نے سری نگر اور جموں میں انسداد بدعنوانی کے خصوصی جج کی حیثیت سے بھی خدمات انجام دیں۔

جسٹس برنی نے اہم ادارہ جاتی عہدوں پر بھی ذمہ داریاں نبھائیں، جن میں جموں و کشمیر لیگل سروسز اتھارٹی کے ممبر سکریٹری، جموں و کشمیر و لداخ ہائی کورٹ کے رجسٹرار ویجیلنس اور جموں و کشمیر جوڈیشل اکیڈمی کے ڈائریکٹر کے عہدے شامل ہیں۔

جموں میں پرنسپل ڈسٹرکٹ اینڈ سیشنز جج کی حیثیت سے خدمات انجام دینے کے بعد جسٹس برنی کو ڈیپوٹیشن پر جموں و کشمیر اسپیشل ٹریبونل، جموں کا رکن مقرر کیا گیا تھا۔ جموں و کشمیر و لداخ ہائی کورٹ کے جج کی حیثیت سے ترقی سے قبل وہ اسی عہدے پر خدمات انجام دے رہے تھے۔

یواین آئی۔ط ا

جموں، جموں و کشمیر انسداد بدعنوانی بیورو (اے سی بی) کے اہلکاروں نے منگل کو مولانا آزاد اسٹیڈیم میں واقع جموں و کشمیر اسپورٹس کونسل (جے کے ایس سی) کے دفتر کا اچانک دورہ کیا اور وہاں موجود ریکارڈ کی جانچ کی۔

ذرائع نے بتایا کہ اے سی بی کی ایک ٹیم منگل کی صبح جے کے ایس سی کے دفتر پہنچی۔ ذرائع کے مطابق، ’’یہ دورہ بعض شکایات اور الزامات سے متعلق تھا، جن کی تحقیقات جاری ہیں۔‘‘

انہوں نے بتایا کہ انتظامی ریکارڈ، ٹینڈر سے متعلق دستاویزات اور دیگر احکامات جانچ کے لیے حاصل کیے گئے ہیں۔ ذرائع نے کہا کہ ’’کونسل سے متعلق بعض معاملات میں کارروائی کے تحت یہ معائنہ کیا گیا ہے۔‘‘

ذرائع کے مطابق سری نگر کے دفتر میں بھی اسی طرح کے معائنے کیے جانے کی اطلاع ہے۔

ذرائع نے بتایا کہ ’’تحقیقات کے دائرہ کار یا کسی مخصوص نتیجے کی تفصیلات کا انتظار ہے۔‘‘ انہوں نے مزید کہا کہ اے سی بی نے ابھی تک اس سلسلے میں کوئی باضابطہ بیان جاری نہیں کیا ہے۔

یواین آئی۔ ظ ا